Read bassa TƐRƐCƐ 32 Bible Online

TƐRƐCƐ 32 - bassa bible

TƐRƐCƐ 32

¹Ụlamụ Rubɛn nụ ụlamụ Gad, a 'yajɛ iyimabiga tebiye, ibɛ po aa kwụbɛ maa cɛnjɛ tu Jazɛ keeni cɛnjɛ ti Giliad tɛ zhɛmanɛ aŋ tunama ni iyimabiga ya aba.

²Ibɛ po ee zhe no ofwo Moses keeni Ɛleaza Bunongbo keeni ehwurembe tu'ulwatagwụ ta ata hwɛɛ, ɛɛ hiɛŋ aŋ,

³Ashɛpwụ na ɛɛ hiɛŋ, Atarot, ni Dibon, nu Jazɛ, ni Nimira, ni Hɛshibon, ni Ɛlɛale, ni Sɛbam, ni Nɛbo keeni Bɛon.

⁴Ibɛ shɛ cɛnjɛ ti geri na AGWANGWAMA mbiyeni atwa Isrɛl maa e leshiji maa a 'yaga, tɛ shɛ cɛnjɛ tu na ti zhɛmanɛ iyimabiga. Atuba miaụŋ mu ga mụ bụ mu ugondu, ti 'yajɛ kaa iyimabiga duwa.

⁵Ɛɛ hiɛŋ, Hioko kaa inyɛmɛnyɛmɛ miaụŋ mu ga bụ mu ugondu, maa iti peni cɛnjɛ ta ata maa ta gɛga na tuba, maa kede iti keshicinji Urefu ga Jodan maa ta gɛga apata o.

⁶Ama go Moses jishijɛ aŋ, bɛɛ hiɛŋ, Hia jala ree maa hi gɛga epe maa miaụŋ-mo-bino hiŋ tuba mi zhe ujasa?

⁷Iwembe po ahia jala maa hiɛ kwụshɛ atwa vwɛ hiŋ Isrɛl u'waba maa kede e keshi e zhe na cɛnjɛ ta ata AGWANGWAMA peni aaŋ?

⁸Gana ga la eshi hiŋ njɛ aka na tu Ngaa tumwanɛ aŋ te e beni nu Kadɛsh-bania maa a yalajɛ cɛnjɛ ta ata.

⁹Aka na te e ci ulomu Ɛshkol, aa kwụbɛ cɛnjɛ ta ata, aa kwụshɛ ya atwa Isrɛl avwɛ u'waba maa kede e teni cɛnjɛ ta ata AGWANGWAMA ge peni aŋ o.

¹⁰Ibɛ po AGWANGWAMA njɛ isɛbwɛ jita ata, bee keri-unu, bɛɛ hiɛŋ,

¹¹Iwɛ-tɛkana, i zasa bụtụ okwo bu ko na ashashɛ etwenyi na banɛ ni Ijipti, a na shiywa sha aba shi tuwo woshi kwo kaa uhwuri te e meci aŋ, zhɛ o tono cɛnjɛ ta ata Ngee shiri-unu maa N zhɛ ma pana Abraham, na Azik keeni Jekob o, iwɛnɛ ta a n 'wa sụ na amɛ aba oko hwɛɛ.

¹²I zasa bụtụ okwo bu ko, semi ga Kalɛb yɛu Jifune bụtụ bu Kɛnɛz keeni Joshua yɛu Nụn, iwɛnɛ ta n 'wa na amɛ aba oko hwɛɛ.

¹³Ibɛ po AGWANGWAMA njɛ isɛbwɛ na atwa Isrɛl, baa njɛ aŋ maa go no rungo gbom nụ ụshɛka tutu shiywa buhanda, uuwa i ci aka na uwaŋnɛ ata na heshigeni la AGWANGWAMA amɛ ileni hwɛɛ.

¹⁴Hioko ma, hi ishijɛ tụlụkpashɛ te eshi hiŋ, ahiɛba ụlamụ wa atwa ci'nyɛ, maa hi keeni isɛbwɛ ya AGWANGWAMA ti'ishicinjɛ no ofwo atwa Isrɛl sasana!

¹⁵Yaa shɛ ehi genji AGWANGWAMA tu'wa, bi zhɛ du bo jinoko atwa ga hwɛɛ nụ ụshɛka ga, asha ahiɛba kaa hi po ɛɛ zhɛ o ilono hwɛɛ.

¹⁶Nazhɛ ee kezhingeni pu Moses, ɛɛ hiɛŋ bụ, Ti zhɛ ta ma nsumo epe iwɛ iyimabiga tu, ti zhɛ du ta ma ashɛpwụ a'wụtụ iwɛ atwa na ta gwụmwatangwụ ati 'yajɛ.

¹⁷Ama ti zhɛ tu mama ima iwɛ maa ta zha ujasa na atwa vwɛ tu Isrɛl, uuwa i ci aka na atɛ gɛgɛcɛnjɛ aŋ na cɛnjɛ ta ata ɛɛ zhɛ a nama. Atwa na ati 'yajɛ tuba zhɛ o zwono na ashɛpwụ a'wụtụ a'wụtụ a na 'yajɛ uba, iwɛ maa kede atwa na jɛjɛ na cɛnjɛ tu ga timengeni aŋ o.

¹⁸Ti zha shɛ te gwure nu nhwaŋ mu tu o, semi aka na ta atwa vwɛ tu Isrɛl leshiji cɛnjɛ tu na ee peni aŋ.

¹⁹Ti zha shɛ ta lashɛga ya cɛnjɛ na aba hileniye ata Jodan o; iwɛnɛ ta ati 'yagawa cɛnjɛ tu tu hileni ga geri bu uwaŋna-banụ bu Jodan.

²⁰Go Moses hiɛŋ aŋ, Yaa shɛ ɛhi zhɛ hi mama ima epe ne eshe AGWANGWAMA maa hi zhe ujasa,

²¹maa etwenyi hiŋ ujasa hwɛɛ zhɛ mama ima maa e zhe ujasa na AGWANGWAMA, uuwa i ci aka na bee unzhi atwa i'ime ibwɛ,

²²maa aka na AGWANGWAMA leshiji cɛnjɛ ta ata, nazhɛ ɛhi zhɛ hie gwure maa hi mama 'yaga epe maa kede hi 'yaga ya tijama ta AGWANGWAMA keeni atwa vwɛ hiŋ Isrɛl o, asha nazhɛ ɛhi zhɛ hia 'yaga cɛnjɛ tu ga ne eshe AGWANGWAMA.

²³Ama yaa shɛ ahiɛ njɛ shɛ gana ga ehi shiri-unu ga, asha hiɛ njɛ AGWANGWAMA iwɛwɛ, iwɛwɛ hiŋ kaa zhɛ ma hi 'waŋnanɛ ulwapɛ tilɛɛ.

²⁴Ma ma ashɛpwụ a'wụtụ a'wụtụ iwɛ atwa hiŋ na gwụmwatangwụ keeni nsumo iwɛ iyimabiga hiŋ, ama hiɛ shɛ tuba hia nda iyi nɛ ehi shiri-unu ibɛ.

²⁵Ibɛ po atwa Gad keeni atwa Rubɛn hiɛŋ bụ, Iyɛri, Ti zhɛ ta nda gana ga ebi ti peni-unu ga.

²⁶Ti zhɛ ta nama epe na ashɛpwụ ga Giliad, ta miaụŋ mu tu, te eyikwo tu, ti inɛ tu keeni agwụdụ tu hwɛɛ.

²⁷Ama miaụŋ mu ga mụ bụ mu ugondu a mama 'imɛ maa a ndanɛ AGWANGWAMA ujasa. Ti zhɛ ta kasha Jodan ga maa ta jasa ujasa nu gana na ebi ti peni-unu.

²⁸Ibɛ po go Moses peni Ɛleaza bunongbo, no Joshua keeni ehiu nhwaŋ ma alamụ atwa Isrɛl unu iwɛ aba, bɛɛ hiɛŋ,

²⁹Yaa shɛ atwa Gad na atwa Rubɛn mama 'imɛ maa e keshi Jodan maa e jeseni AGWANGWAMA ujasa ne hiŋ, yaa shɛ ee hi mbiyeni ahiɛ lasụ atwa cɛnjɛ ta ata, asha hiɛ shɛ hia pana aŋ cɛnjɛ ta ata ti Giliad maa a 'yaga tụ.

³⁰Ama yaa shɛ aa mama 'imɛ shɛ maa e keshi Jodan maa e zhe ujasa ne hiŋ, asha ni Kenan du ɛɛ zhɛ a 'yaga cɛnjɛ ta aba gana hiŋ.

³¹Nazhɛ atwa Gad na atwa Rubɛn jishijɛ bụ, ɛɛ hiɛŋ, Iyɛri, ti zhɛ ta nda gana na ta AGWANGWAMA peni miaụŋ-mu-ugondu ga bụ unu.

³²Tu mama 'imɛ maa ta kasha Jodan ga nu ukpahiŋ wa AGWANGWAMA maa ta nda ujasa na cɛnjɛ ti Kenan, ama cɛnjɛ tu tu ti zhɛ tuba ta nama hileni ga Jodan.

³³Go Moses peni ụlamụ Gad, nụ ụlamụ Rubɛn keeni ashashɛ ụlamụ Manasɛ, na shɛ yɛu Josɛf cɛnjɛ-ta-tugwama ti Sihon agwuma A'amo keeni cɛnjɛ-ta-tugwama tu Og agwuma Bashan medenji a'una na rungwutwonu aŋ hwɛɛ.

³⁴Nazhɛ ụlamụ Gad meeneni ashɛpwụ Dibon keeni Atarot keeni Aroe,

³⁵keeni Atarot una Shofan keeni Jazɛ keeni Jogbɛha,

³⁶keeni Bɛt-nimira keeni Bɛt-haran, na shɛ ashɛpwụ a'wụtụ a'wụtụ a na 'yagajɛ uba, oo mo du nsumo iwɛ agwụdụ aba.

³⁷Ụlamụ Rubɛn aba tuba meeneni ashɛpwụ Hɛshbon keeni Ɛlɛale keeni Kiriataim,

³⁸keeni Nɛbo keeni Beal-mion (ibɛ oo po ashɛpwụ ata nzeci mi nya), keeni Sibma, nazhɛ oo po ashɛpwụ a'wụtụ a'wụtụ a na ee meeneni nzeci mi nya.

³⁹Nazhɛ atwa umwamwa Maki na shɛ yɛu Manasɛ zhe Giliad, ee leshiji cɛnjɛ ta ata, ee unzhi A'amo a na ga jɛjɛ la apata maa kede a 'yaga tu ya o.

⁴⁰Iwɛbɛ po go Moses shepi Giliad bee peni uŋ atwa umwamwa Maki na shɛ yɛu Manasɛ, aa jɛjɛ ya na tuba.

⁴¹Ga Jai yɛu Manasɛ zhe baa sukakanɛ ashɛpwụ aba oko, bee leshiji aŋ, boo po aŋ izeci maa, Harot-jai.[23]

⁴²Go Noba zhe bee leshiji ụshɛpwụ ata ɛɛ hiɛŋ Kenat keeni ashɛpwụ na rungwutwonu uŋ, boo po uŋ izeci ibwɛ maa, Noba.