Read bassa TƐRƐCƐ 34 Bible Online

TƐRƐCƐ 34 - bassa bible

TƐRƐCƐ 34

¹Nazhɛ AGWANGWAMA mbishi Moses, bɛɛ hiɛŋ,

²Pana atwa Isrɛl unu maa, Aka na ehi teni hwuŋ cɛnjɛ ta ata ti Kenan Ngee hi peni maa hiɛ yɛ-ogwu tuba tutu uce wo ogwungwu tuba.

³Ogwungwu hiŋ ụzalụ tuta zhɛ e kwune nụ Ụshɛka Zin, ti zhɛ ta palangana tugwungwu ti Idụm. Ogwungwu hiŋ uwaŋna-banụ nu ụzalụ tuta zhɛ e kwune ni Itekwu Manɛ.

⁴Nazhɛ tɛ ɛ zhɛ te ringeni te kwune nụ ụzalụ tuta, to mungo akarabim, ta kashɛka to dulo Zin, tutu tuta ti Kadɛsh-bania. Nazhɛ tɛ ɛ zhɛ ta ta tuhwulo ta zha geri bu uwaŋna-twonuo bu Haza-ada, to hwulo to to Azmon;

⁵ti zhɛ te ringeni te kwune na Azmon, ta zha ni Isese Ijipti, nazhɛ te pushe ni Itekwu.

⁶Ogwungwu hiŋ ụzalụ bu uwaŋna-twonuo zhɛ a sha ni Itekwu ɛtɛ I'wɛtwɛ, ti zhɛ ta palangana ukwokwo ibɛ. Apata zhɛ a sha ogwungwu hiŋ ụzalụ bu uwaŋna-twonuo.

⁷Shilo ma ogwungwu hiŋ ụzalụ tuzuba te kwune ni Itekwu ɛtɛ I'wɛtwɛ tutu Ishɛmɛ Ho.

⁸Yaa shɛ te e beni ni Ishɛmɛ Ho, ti zhɛ ta zha tutu tutono tu Hamat. Ti zhɛ ta ta tuhwulo ta zha Zidad,

⁹ta zha Sifron, tɛ ɛ zhɛ ta kwunanga nu Haza-inan.

¹⁰Hi zhɛ hio shilo ogwungwu hiŋ ụzalụ bu uwaŋna-banụ te kwune nu Haza-inan i ci Shifam.

¹¹Ti zhɛ ta bana ni Shifam to zwo tuta ti Ribla na bụ'aŋbụ bu uwaŋna-banụ bu Ain, ti zhɛ to zwo tutu bụ'aŋbụ bu uwaŋna-twonuo bi Itekwu Kinɛrɛt.[25]

¹²Tugwungwu ta ata ti zhɛ to zwo ta palangana Urefu Jodan, ta kwunanga ni Itekwu Manɛ. Ofwo na shɛ tugwungwu ta cɛnjɛ ti hiŋ tu ta tutu rungwutwonu tu.

¹³Go Moses peni atwa Isrɛl unu, bɛɛ hiɛŋ, Cɛnjɛ tu ga ɛhi zhɛ hia lashɛga tedure ni icɛcɛ tu'waŋ na. AGWANGWAMA shilwo maa bi zhɛ ba pana tụ alamụ ecinjishi keeni ashashɛ ụlamụ.

¹⁴Ụlamụ Rubɛn, nụ ụlamụ Gad keeni ashashɛ ụlamụ Manasɛ, o loshigwo cɛnjɛ ta ba, oo dwotwogonu tu nu gana na tu nhwaŋ me eshi aba mu namɛ.

¹⁵Alamụ ata eyebi keeni ashashɛ ụlamụ uko loshigwo cɛnjɛ ta aba geri bu uwaŋna-banụ Jodan ne eririri Jɛriko.

¹⁶Nazhɛ AGWANGWAMA hiɛŋ Moses,

¹⁷Atwa na zhɛ mo hi dwotwogonu cɛnjɛ ta ata a shɛ gɛ Ɛleaza bunongbo keeni Joshua yɛu Nụn.

¹⁸Bɛ shɛ du bɛ vwɛ buhwuri-bu-umbe bu ko nụ ụlamụ we elele maa e mbiyeni aŋ cɛnjɛ ta ata tudwotwogonu.

¹⁹Nzeci ma atwa ata na; Ga Kalɛb yɛu Jifune banɛ nụ ụlamụ Juda.

²⁰Gɛ Shɛmuɛl yɛu Amihud banɛ nụ ụlamụ Simion.

²¹Gɛ Ɛlidad yɛu Kislon, banɛ nụ ụlamụ Bɛnjamin.

²²Go Buki yɛu Jogli, ubwa shɛ buhwuri-bu-umbe na banɛ nụ ụlamụ Dan.

²³Ga Haniɛl yɛu Ifod, ubwa shɛ buhwuri-bu-umbe na banɛ nụ ụlamụ Manasɛ na shɛ yɛu Josɛf.

²⁴Gɛ Kɛmuɛl yɛu Shiftan, ubwa shɛ buhwuri-bu-umbe na banɛ nụ ụlamụ Ifrem, na shɛ yɛu Josɛf.

²⁵Gɛ Ɛlizafan yɛu Panak, ubwa shɛ buhwuri-bu-umbe na banɛ nụ ụlamụ Zɛbulon.

²⁶Ga Paltiɛl yɛu Azan, ubwa shɛ buhwuri-bu-umbe na banɛ nụ ụlamụ Isaka.

²⁷Ga Ahihud yɛu Shɛlomi, ubwa shɛ buhwuri-bu-umbe na banɛ nụ ụlamụ Ashɛ.

²⁸Gɛ Pɛdahɛl yɛu Amihud, ubwa shɛ buhwuri-bu-umbe na banɛ nụ ụlamụ Naftali.

²⁹Atwa gana na AGWANGWAMA peni-unu maa ga shɛ aba dwotwogonu atwa Isrɛl cɛnjɛ ta ata ti Kenan.