Read bassa TƐRƐCƐ 8 Bible Online

TƐRƐCƐ 8 - bassa bible

TƐRƐCƐ 8

¹Nazhɛ AGWANGWAMA hiɛŋ Moses,

²Mbiso Aron maa, Aka na bee shemeni asụtụla ata ecenje nu uteburu ata ụsụtụla, go zwono aŋ ulwa maa o no hioko uhwaŋna nu umbe uteburu ata ụsụtụla.

³Ga Aron hwụjɛ-unu, bee zweni asụtụla ata ulwa maa o no hioko uhwaŋna nu umbe uteburu ata ụsụtụla, gana na ta AGWANGWAMA peni Moses unu.

⁴A njɛ uteburu ata ụsụtụla na azhɛnarɛya na bee jibi, te kwuni nu uvwi ubwa tutu ihiŋhiŋ ubwa. A njɛ uŋ te teni cɛŋ ne bimenji ata AGWANGWAMA mbiseni Moses ni ishɛmɛ.

⁵Nazhɛ AGWANGWAMA hiɛŋ Moses,

⁶Bacɛnga Alivai na ashashɛ atwa Isrɛl, maa njɛ aŋ shɛshɛshɛ.

⁷Gana ɛbi zhɛ ba nda aŋ shɛshɛshɛ na: zhizhongo aŋ meni ma ata ma nda bụtụ shɛshɛshɛ na tu'waba ta aba, lonono aŋ maa a 'nyanjɛ tu'waba ta aba hwɛɛ, ga a nyashɛnjɛ du tugwuno ta aba. Nazhɛ asha a njɛ aŋ ya shɛshɛshɛ.

⁸Lonono aŋ maa ge shepi usemberi buna uko, nụ ụrụpɛ tuswa, ne mihiuŋ mi tilee lee mu na ee hiŋtetenji na manɛbɛ; shapa usemberi buna bi nya iwɛ ụrụpɛ iwɛwɛ.

⁹Sotulonu atwa Isrɛl hwɛ hwɛɛ, maa suje Alivai maa o shikono nu umbe udulo tu'ulwatagwụ.

¹⁰Aka na ebu suji Alivai nu umbe ata AGWANGWAMA, ga atwa Isrɛl petengeni aŋ i'ɛlɛ ya aba.

¹¹Ga ga Aron tileneni AGWANGWAMA Alivai maa a shɛ upwaŋ u tuvwurongo na banɛ no olugwo atwa Isrɛl, iwɛ maa a shɛ atwa na aa imanganjɛ maa a ndanɛ AGWANGWAMA ugondu.

¹²Ga Alivai petengeni i'ɛlɛ ya aba no ohiuhiu esemberi ata inɛ iyebi, go o to ụrụpɛ iwɛwɛ na buna ata bu ko, maa o to ụrụpɛ tuhwoŋzhingo na bu na bi yebi, iwɛ maa a njɛ Alivai shɛshɛshɛ.

¹³Shikicingo Alivai nu umbe Aron keeni umbe miaụŋ mu bwa me eyi, maa shɛkanɛ aŋ maa a shanɛ AGWANGWAMA upwaŋ u tuvwurongo.

¹⁴Gana ɛbi zhɛ bo bogwu Alivai na atwa Isrɛl, iwɛ maa tuba Alivai a shɛ e nee mi ta.

¹⁵Na aba na abɛ njɛ Alivai shɛshɛshɛ, abɛ shɛkanɛ aŋ maa a shɛ upwaŋ u tuvwurongo, nazhɛ ɛɛ zhɛ o tono cɛŋ maa a njɛ ugondu nu udulo tu'ulwatagwụ.

¹⁶N suji Alivai hwɛ hwɛɛ na ashashɛ atwa Isrɛl maa a shɛ e nee mi tụlụkpashɛ tu miaụŋ-me-eyi mu umbe ma atwa Isrɛl hwɛɛ.

¹⁷Nụ ụjita ata Ngaa kwụnɛ la miaụŋ-me-eyi mu umbe na cɛnjɛ ti Ijipti hwɛɛ, ibɛ du Ngee meme tileneni miaụŋ-me-eyi mu umbe ma atwa Isrɛl swooŋ keeni yɛu-ye-eyi umbe usunda we elele.

¹⁸N suji Alivai tụlụkpashɛ tu miaụŋ-me-eyi mu umbe ma atwa Isrɛl hwɛɛ.

¹⁹Ngɛɛ bɛcinjɛ Alivai na ashashɛ atwa Isrɛl, Ngee peni aŋ Aron na miaụŋ mu bwa upwaŋ maa a ndanɛ atwa Isrɛl ugondu nu udulo tu'ulwatagwụ, tụlụkpashɛ ta atwa Isrɛl, maa du a njɛ iyi iwɛwɛ tu'urugono iwɛ atwa Isrɛl, iwɛ maa kede tishikpe tɛ njɛ aŋ ufwu na aka na aa zhajɛ maa o gwumwongonu no ohwolu tijilo.

²⁰Gabata go Moses, na Aron keeni tu'ulwa ta atwa Isrɛl hwɛɛ tɛ njɛ Alivai nu gana na ta AGWANGWAMA peni Moses unu kpaaŋ.

²¹Nazhɛ Alivai mama njɛ shɛshɛshɛ, aa nyashɛnjɛ du tugwuno ta aba. Nazhɛ ga Aron shɛkanɛ aŋ AGWANGWAMA maa a shɛ upwaŋ u tuvwurongo, baa ndanɛ aŋ iyi iwɛwɛ tu'urugono maa a nama shɛshɛshɛ.

²²Atwa ata njɛ iyi elele nɛ AGWANGWAMA peni Moses unu iwɛ Alivai. Nazhɛ du Alivai teni nu udulo tu'ulwatagwụ maa a njɛ ugondu wa aba, ga Aron na miaụŋ mu bwa, aba a ngbaraka aŋ.

²³Nazhɛ AGWANGWAMA hiɛŋ Moses,

²⁴Inɛ gɛ ibɛ shɛ iwɛ Alivai, maa butubwenyi be elele na shiywa shɛ bwa shi ci woshi-na-shɛba-shɛ-ta te e meci bu, i zhɛ geri-be-eshe, bɛ shɛ bo tono nu udulo tu'ulwatagwụ maa nda ugondu,

²⁵ama bụtụ na shiywa shɛ bwa shi ci dupu te e meci bu, ga bana maa kede nda ya ugondu o.

²⁶Na aba ibɛ, bụtụ ata eri no mbiyono ya miaụŋ-mo-bino bwa iyi tɛnda na amɛ udulo tu'ulwatagwụ, ama bɛ shɛ shɛ ba nda ya tuba ugondu ni ikɛnyi ibwɛ o. Gana ɛbi zhɛ bo shilono Alivai gana na maa a na nda ugondu wa aba ta.