Read bassa MAIKA 3 Bible Online

MAIKA 3 - bassa bible

MAIKA 3

¹N hiɛŋ hwulaga ma ahiɛba ehwurembe keeni ehiu ihwɛ Isrɛl! Shɛ ahiɛba suu hiɛ ga shɛ hia mapa ụshɛrɛya u tishiriri?

²Ahiɛba ya hio imo iyi ibiye tɛnda maa hi no lubo iyi iwɛ, ahiɛba hiɛ fwụcɛ tu'waba ta atwa mi buumwa buumwa, ehi usheji usunda wa aba no o'umpwo aba.

³Ahiɛba hiɛ yɛ usunda wa atwa mi, ehi usheji tu'waba ta aba, ehi bwereteji o'umpwo aba rukwu rukwu, nazhɛ ahiɛ yɛ atwa mi gana usunda na zweni ni ikwɛshɛ, kwo kaa gana usunda na zweni nụ ụpalụ.

⁴Iwɛbɛ po AGWANGWAMA zha shɛ mɛ hi jishijɛ ya na aka na ehi keri bu ụhiɛŋshɛ, ama bi zhɛ ma hi intanana ụpɛshɛka ubwa na aka ata, iwɛnɛ ta ahiɛ njɛ iyi iwɛ.

⁵Iyi nɛ AGWANGWAMA jɛmɛ iwɛ egesere ata inzhɛnjɛ atwa mi na, ta anaa na o shilono atwa na a pana aŋ iyimɛyɛ unu wa amɛ-olom, atwa na tuba peni shi aŋ iyimɛyɛ maa a yɛ, ɛ hiɛŋ aŋ, Ujasa ta we ci o.

⁶Iwɛbɛ po ụjita zhɛ mo hi shono zawa tumapa, tishi kaa ti zhɛ to hi ubo zawa ti'eshicigo. Uwaŋna zhɛ wo tonono egesere, ofwo zhɛ o 'wono aŋ tishi kpirimi na aka bu uwaŋna, a zha shɛ a kwụba iŋ no shizobu nazhɛ i ci o.

⁷Ụpụrụsa zhɛ wa sha egesere, ezuye zhɛ a sha ashɛjɛ, a zha shɛ a 'yaga ya iwɛ maa a jɛmɛ o, iwɛnɛ ta AGWANGWAMA peni shi aŋ ajɛshɛgwa.

⁸Ama yaa shɛ Gamba, AGWANGWAMA n shidingwo nu ukpahiŋ keeni Mpiala mu bwa, tụ ụshɛrɛya u tishiriri tụdụma keeni ikɛnyi, iwɛ maa mo mbiso atwa Jekob undwa wa aba tubwada, maa mo mbiso atwa Isrɛl iwɛwɛ ya aba.

⁹Shɛlaga ma, ahiɛba ehwurembe keeni ehiu ihwɛ Isrɛl, ahiɛba na hio imo ụshɛrɛya u tishiriri, ahiɛba na hio sheyingo iyi ibiye ye elele maa i shɛ iyi iwɛ.

¹⁰Ahiɛba na hia ma Zayon tedure ne mehieŋ ma atwa tududwogo, ahia ma Jɛrusalɛm tedure no tugworozwo tɛnda.

¹¹Ehiu ashɛpwụ a duma ụshɛrɛya nu ukwuribi ugworo tɛlashaga, ụgwụ atwa a nda onongbo nazhɛ oo mbisogono aŋ undwa. Egesere a duma tigesere tedure nu ukwuribi tɛlashaga atwa, ee te wetiteni waa AGWANGWAMA, ɛɛ hiɛŋ, AGWANGWAMA suu zasaba na ashashɛ tu? I zasa kaa iyi iwɛ ye elele zhɛ mo ti jitono.

¹²Iwɛ hiŋ po ɛɛ zhɛ a hwaŋ Zayon gana ehilo, Jɛrusalɛm tuba zhɛ wa sha ubizo, ibɛ po ishɛmɛ nɛ oo mo umwono wa AGWANGWAMA zhɛ ya sha uwapa.