Read bassa MAIKA 5 Bible Online

MAIKA 5 - bassa bible

MAIKA 5

¹Ahiɛba atwa Jɛrusalɛm, sotulonu ma ejeshi hiŋ, e hi rungwutwonuo nu uba, ee hi hwolwo oo rungwutwonu, aa pagana agwuma Isrɛl bukwuto na agawa.

²Ama gabụ Bɛtlɛhɛm Efrata, okwo ta abụ 'nyanɛ na ashashɛ edenji Juda, no olugwo bu kaa bụtụ na zhɛ ba sha uhiu wa atwa mi Isrɛl zhɛ ba banɛ. Ogwunukwoshi ubwa kaa banɛ cala, taa na aka atwa angwụshɛ.

³Ibɛ po AGWANGWAMA zhɛ o jinokono atwa ubwa Isrɛl atwa aba i'ime uuwa i ci aka na biyikwo na ụngwụ tumata to meci yɛu, nazhɛ miaụŋ-mo-bino mu bwa mi zhɛ me gwure no ofwo atwa vwɛ aba ni Isrɛl

⁴Ubwa kaa zhɛ bo shikono maa 'yagaga atwa ubwa nu ukpahiŋ na banɛ no olugwo AGWANGWAMA keeni igɛhi izeci ya AGWANGWAMA na shɛ Agwatana ubwa. Nazhɛ ɛɛ zhɛ a nama suu zawa mazhanga, iwɛnɛ tu ugombo ubwa zhɛ we ce ukwunanga cɛnjɛ tu unyizo.

⁵Ubwa kaa zhɛ ba 'waŋnanɛ aŋ amɛ-olom. Aka na atwa Asiria teni hwuŋ cɛnjɛ tu tu, ee hwuŋzetenji ijilɛni[14] tu, ti zhɛ ta tumwana ehwurembe tu ecenje kwo kaa ehwurembe tu ukpahiŋ atụndatụ maa a twa ifelu na aba.

⁶Ɛ zhɛ[15] a lasụ cɛnjɛ ta atwa Asiria nu utokwobi, ta cɛnjɛ ti Nimrod[16] nu ukpahiŋ i'wɛŋnɛ ujasa, aba zhɛ[17] ma tụ lashaga hwuŋ ni i'ɛlɛ ya atwa Asiria ti yaa shɛ aa kara maa e teni cɛnjɛ tu tu maa e rikeci amɛ tugwungwu tu tu.

⁷Ibɛ po tuvwa ta atwa Jekob ti zhɛ ta sha gana cime tu na AGWANGWAMA tumwanɛ na ashashɛ edenji ofwugwo, gana eshilo na o ngbo na ambɛ na ta waŋna, anaa na 'yacɛ shɛ bụtụ, a njɛ shɛ kaa ti'insu iwɛ miaụŋ ma atwa o.

⁸Tumwata ti Jekob ti zhɛ ta shana edenji na namɛ na ashashɛ atwa ofwugwo, gana bizeci na namɛ na ashashɛ isundɛ nɛ zweni nu uwapa. Ɛ zhɛ a sha gana usemberi bizeci na namɛ na ashashɛ unyama wa agwụdụ, na bo tonono aŋ, boo rukoto aŋ, baa dwatwaga aŋ wunzu wunzu, na zasa kaa bụtụ be elele na namba maa lashaga aŋ.

⁹Gabụ kaa bi zhɛ ba haŋpa u'ala bụ maa po atwa na ma bụ sukakana, gabụ kaa bi zhɛ ba nda atwa ata bụ i'ime ufwu kpaaŋ.

¹⁰AGWANGWAMA hiɛŋ, Aka ata ci hwuŋ, N zhɛ mo sugo idɛkwɛ hiŋ, ti ihɛŋtu hiŋ ujasa nɛ ahiɛ 'yajɛ ma nda iŋ ufwu hwɛɛ.

¹¹N zhɛ ma nda ashɛpwụ cɛnjɛ ti hiŋ ufwu, N zhɛ mo hwuŋzotongo du aba ashɛpwụ hiŋ hwɛɛ.

¹²N zhɛ mo iricingo ekwupenyi na cɛnjɛ ti hiŋ, Ngɛɛ zhɛ du ma bacɛnga ashɛjɛ na ashashɛ hiŋ.

¹³N zhɛ du kaa ma bwarataga ntatanuwaŋ mi hiŋ, ta azhɛba ata hiŋ atayɛ, hi zha shɛ hia zhɛba ya iyi nɛ ahiɛ njɛ ni i'ɛlɛ hiŋ kwukwuŋ.

¹⁴N zhɛ mo mushingo itɛtɛnuwɛŋ ɛtɛ yo o, ɛɛ hiɛŋ Ashɛra na ashashɛ hiŋ, N zhɛ du kaa mo iricingo ashɛpwụ hiŋ hwɛɛ.

¹⁵Ni isɛbwɛ tɛnda keeni isɛbwɛ ti'ishijɛ Ngɛɛ zhɛ ma nda itɛpwɛ nu uhiuhiu we edenji elele na lacɛ unu mu tuhwuga.