Read bassa MAIKA 7 Bible Online

MAIKA 7 - bassa bible

MAIKA 7

¹Adangboo! Iwɛnɛ Ngaa shɛ gana bụtụ na zhegeni tụ'walụ ta afwafwa tu na oo tuwo ta tumwata ta aba taa nu ubwaza, okoko aba elele zaba ya maa ma ya o, ta tụ'walụ to owowo ti hiiŋ tu na tɛ nɛ, gana na Ama jala o.

²Bụtụ bu gana na Agwatana a jala njɛ ufwu na cɛnjɛ ta ata, i zasa ya kaa bụtụ bi tiririri na ta namba na ashashɛ atwa ata o. Atwa cɛnjɛ ta ata a dwalakaka ohwolu maa a kwụnɛ atwa, bụtụ bụtụ ba shɛka yɛu-bino bwa ni igwune tutulonono bu.

³A shɛ egwoni ni iyi iwɛ tɛnda ni i'ɛlɛ ya aba, miaụŋ-ma-tugwama keeni ajɛmɛ-ashɛrɛya, a lụpa ukwuribi ugworo, atwa a'wụtụ aba bɛcinjɛ tukwulangana ti ci'nyɛ tu na tu namɛ na shihaŋsa sha aba, ibɛ po aa imanganga iŋ ya zhiaaŋ.

⁴Bụtụ na ɛɛ hiɛŋ ubwa ngezeni atwa vwɛ hwɛɛ, keeni bụtụ tɛcara na amɛ aba, bɛ shɛ gana tu'untwo tu na tu zasa uhwara, bụtụ bi tiririri na amɛ aba, bɛ shɛ gana esepi. Aka ci ya maa Agwatana peni angbaracɛ aba[21] ulwapɛ, hwuwayɛ go a namɛ ya no tusukwutogwu.

⁵Ta patana binya bụ rishe o, ta tɛtana du kaa eyejilo bu rishe o, no zwono unu bu meni nu n-ndumwa mu na obo mbiso okwo biyikwo bu na obo lubo.

⁶Na aka ata yɛu-ye-eyi zha shɛ ya muna bishi bi bɛ ụjɛrụma o, yɛu-yo-o kaa ya sukakana bino bi bɛ, utashɛ wa sukakana bino-bwolo, atwa i'ime bụtụ, aba shɛ ya atwa umwamwa ukanyi ubwa.

⁷Ama yaa shɛ Gamba, AGWANGWAMA Ngɛɛ zhɛ ma 'yaka, N zhɛ ma 'yaka Agwatana na shɛ bibicinji mi, Agwatana mi kaa zhɛ na hwuga ilupwɛ mi.

⁸Oo a-bụtụ bi i'ime mi, ta bwada unyasa, okwo ti Ngee leyi bana o, N tɛ zhɛ mɛ ishijɛ, okwo tu Ngaa jɛjɛ bana ne tishi, AGWANGWAMA ubwa zhɛ ba sha uhioko-uhwaŋna mu.

⁹Isɛbwɛ ya AGWANGWAMA zhɛ ya patana nu uhiuhiu mu, iwɛnɛ tu Ngaa njɛ bụ iwɛwɛ, uuwa i ci aka na bee teni orogwu iwe mi, baa kwunanjɛ kaa ụshɛrɛya mu. Bi zhɛ kaa mɛ m bɛcinjɛ maa ma nama nu uhioko-uhwaŋna, N zhɛ kaa ma kwụba tiririri tu bwa.

¹⁰Nazhɛ bụtụ bi i'ime mi zhɛ ba kwụba iŋ, ezuye kaa zhɛ a sha bụ, bu gata ma n nda asada ni i'unsene, bɛɛ hiɛŋ, Cee AGWANGWAMA ata shɛ Agwatana ata bụ namɛɛ? Eshe mi zhɛ a kwụba ulayɛ ubwa. Ɛ zhɛ o rukoto bu gana udwodwo ihwɛŋnɛ ya amɛ ụshɛpwụ.

¹¹Ụjita na maa meeneni uba ụshɛpwụ bụ we ci ba! Nụ ụjita ata nazhɛ ɛɛ zhɛ a kaana tugwungwu tụ bụ ugombo duwa.

¹²Aka ata ci hwuŋ atwa zhɛ a bananjɛ na Asiria na shɛ ashɛpwụ Ijipti e jiye pụ bụ, ɛ zhɛ a banɛ okwo ni Ijipti a zha nu Urefu Yufretis, ɛ zhɛ a banɛ nu ntokwu keeni nshama mu na mụ dụlụmanjɛ.

¹³Ama cɛnjɛ tu unyizo ti zhɛ ta sha osombo, iwɛ iyi nɛ atwa na jɛjɛ na tuba a ndangana.

¹⁴AGWANGWAMA, ga shɛ ne bidingbengbere bụ aba nda u'iywa unyama wa atwa bụ, anaa na mama namanjɛ nu uwapa, na cɛnjɛ tu na ti 'yajɛ ugwungwu, ge e zhe maa a na yaga nu Bashan keeni Giliad, gana na ta a nda la cala.

¹⁵N zhɛ ma ndana aŋ iyi ya arụhwajɛ[22] gana na ti yaa namɛ la nụ ụjita ata abu banɛ la na cɛnjɛ ti Ijipti.

¹⁶Okwo te edenji 'yajɛ ukpahiŋ wa aba, ezuye kaa zhɛ a sha aŋ, ɛ zhɛ o utogo onu aba ni i'ɛlɛ, shɛcɛbɛ sha aba kaa shi zhɛ sha kwụrụmanga.

¹⁷Ɛ zhɛ o songo upwupwutu gana uhwa keeni iyi nɛ yo hombilo na cɛnjɛ. Ɛ zhɛ a bananjɛ na apangwụ aba, na tɛzhɛgɛdaga, e gwure no ofwo AGWANGWAMA na shɛ Agwatana tu ni inyɛsɛ, inyɛsɛ bụ kaa zhɛ ya sha aŋ.

¹⁸Agwatana, gaaba ta shɛ gana bụ, na ba gangana atwa ubwa a na ta vwanganɛ, a na shɛ iyi-yo-ogwu bu iwɛwɛ ya aba keeni andwa aba tubwadaa? Bu untanganɛ shɛ isɛbwɛ bụ unyizo-nom o, ama ba nda unyasa ni inyɛmɛnyɛmɛ tihiokono atwa bụ.

¹⁹Gabụ kaa bi zhɛ ba nda uwanyi tu sasana, maa rikeci iwɛwɛ tu nɛ ɛvwɛvwɛjɛ bụ. Gabụ kaa bi zhɛ ba bacɛnga iŋ maa 'wɛŋ iŋ no me'ilwo mi itekwu.

²⁰Gabụ kaa bi zhɛ bo mbisono Jekob tɛcara tụ bụ, maa hieci kaa inyɛmɛnyɛmɛ Abraham, gana na ebi shileni la eshi tu unu cala.