Read bassa NAHUM 2 Bible Online

NAHUM 2 - bassa bible

NAHUM 2

¹Ahiɛba atwa Ninivɛ, bụtụ na zhɛ ma hiɛ sukakana tuwo! Ukpahiŋ ata na zhɛ mo hi hwuŋzotongo tuwo, shikocongo ma ijilɛni ya asaza hiŋ dimi! Ngbaraka ma uhwaŋna maa hi mama 'imɛ tebiye!

²AGWANGWAMA zhɛ e gwuricinje ụjɛrụma Jekob ata shɛ ge Isrɛl, gana ala waa namɛ la cala. Atwa na a nda iyi ufwu zhogwo aa nduwa aŋ ufwu, aa njɛ du a'wa'walụ afwafwa aba ufwu kpaaŋ.

³Ejeshi atwa ata 'wananjɛ shabula shɛ ujasa shi shenje, ee hwuŋtengeni du i'wɛŋnɛ uduhwa ushenje. A mama 'imɛ maa a hiɛ sukakanɛ! Ihɛŋtu ya aba ujasa ya ta gana bụratụ bu ulwa! Idɛkwɛ[2] ya aba ya sala ujasa.

⁴Ihɛŋtu ya aba ujasa yo ibotogo ihwɛŋnɛ ya amɛ ụshɛpwụ, yoo tonongo ashashɛ ụshɛpwụ, ti beye tu bana. Ya nda rowu rowu gana shɛmwa shɛ ulwa, yaa nda berere gana ɛbɛrɛ.

⁵A suyanɛ atwa na shɛ ehiu aba; a twa udukwutwa gana na to o to tuhwulo, ee suri ni izɛlɛgwu, ee zhe nu uba maa e shikecenji n-jilanɛ ma aba.

⁶Shidubo shɛ na shɛ namɛ geri bu Urefu shɛ kapɛshɛngwa; ibɛ po inyɛsɛ 'imɛ ihwɛ ya agwuma.

⁷E tuferenji biyikwo ata shɛ uhiu[3] tugwuno, ee shepi bu ee hwuri; ibɛ po ajama ubwa o o a twa-u'wo, aa ta-ụkwụla gana nkwucimo, aa pa shɛgba sha aba iyi na amɛ-tụhaŋtụ.

⁸Atwa Ninivɛ sukwurukwo aa bananjɛ gana ukwokwo na oo go to meni mu bwa, woo sukwurukwo. Ibɛ po n'ungwa mu mwe, mɛɛ hiɛŋ, Shikokono ma! Shikokono ma! Ama i zasa bụtụ be elele kaa mbiyanɛ ekwunyi o.

⁹Sugo ma ufwa wa azụrụfa! Sugo ma ufwa wa azhɛnarɛya! Uduciya ubwa kaa zasa uce o! Uduciya ubwa we elele kaa ụ shɛ iyi yo ogwumishi kpaaŋ.

¹⁰E suji i'wɛŋnɛ Ninivɛ, waa shɛ ya osombo, aa njɛ ụŋ ufwu! Shihwulu shɛ bwadụ aŋ; shilulo sha aba sha zhɛgɛdaga, ikɛnyi zasaba ya o; shishe sha aba shɛ hashɛganụ.

¹¹Cee kwuŋ ụpangwụ[4] izeci namɛɛ? Ofwo na aa biga la oywoywo izeci. Cee bizeci be eyi na bu na bo o zhee? Ofwo na iyi elele eri shi yo tumongono oywoywo aba.

¹²Bizeci kwụnɛ usunda na gembi, bee dwetweji bu iwɛ oywoywo ubwa, baa fwɛŋ usunda urworwo iwɛ eyikwo ubwa; bee shidinji u'ibwa ubwa ni iyi nɛ baa kwụnɛ, bee shidinji ụpangwụ ubwa nu usunda na bee ensetenji.

¹³AGWANGWAMA na Hwuri Kpaaŋ hiɛŋ, Gamba ma bụ sukakana. N zhɛ mo hwoŋzhingo ihɛŋtu bụ ujasa nu ulwa, ɛ zhɛ a kwụna asaza bụ nu ujasa, N zhɛ kaa mo sugo iyi elele nɛ ebi lesheji la atwamwa. A zha shɛ a hwụga ya rụhwụŋ ra atwa bụ kwukwuŋ nu unyizo.