Read bassa NAHUM 3 Bible Online

NAHUM 3 - bassa bible

NAHUM 3

¹Ụshɛpwụ ata ụ'wụtụ wo dudwogo mehieŋ ma atwa, unaa na ụzagwụ we elele shini na amɛ ubwa, unaa na kaa wa lashaga i'wɛŋnɛ ya atwa aka elele, u zhɛ wa nda hwuŋ adangboo!

²Hwulaga ma rundu ra anaba, no rundu ra akwụka, ne e'inji idɛkwɛ, keeni rundu ri ihɛŋtu ujasa!

³Asụcɛ idɛkwɛ tɛ o gozhigo, otokwobi ta, nsanụ mu ta ma nda mbaraa mbaraa! N'wo ma atwa ta mu suteni gidigba, n'wo mu na mu zasa tɛrɛta, atwa du a twatwagwụ mụ!

⁴Ijɛ kpaaŋ i shɛ iwɛ ukwedeyi tuwɛle tu na Ninivɛ ya nda, tu na tu zasa tɛrɛta, wa insa atwa, nlayɛ mu na ma kwụna atwa kaa mi shini nu bwa. Wa ima edenji, waa nda aŋ ajama[5] tedure nɛ tuwɛle tu bwa.

⁵AGWANGWAMA na Hwuri Kpaaŋ hiɛŋ, Gamba ma bụ sukakana, N zhɛ mo sugo ipete bu na azuba mo bu ubo ne eshe! N zhɛ mo bu shilo mohondo maa edenji a bụ kwụbɛ, maa cɛnjɛ cɛnjɛ-ta-tugwama tụ kwụbɛ ezuye bu.

⁶N zhɛ ma sụkwụtwa Ninivɛ tiri tu na ta sha bụtụ inyɛsɛ, iwɛ bụ zha shɛ ya kwulana ya atwa ata ma bụ ngbaraka o, N zhɛ kaa ma bụ nda maa shɛ iyi igbɛtɛtɛ ne eshe atwa.

⁷Atwa elele na ụbụ kwụbɛ, ɛ zhɛ no bu gozhigono, ɛ zhɛ ɛ hiɛŋ, Ninivɛ hwuŋzwo! Gaaba zhɛ ba ta-ụkwụla iwɛ ubwaa? Gaaba kaa zhɛ ba ingatanga ụụŋ?

⁸Gabụ Ninivɛ, bɛ zhɛmɛ suu ebu hwuri Tɛbɛs,[6] na shɛ ụshɛpwụ ata namɛ to dongonu Urefu Nayɛl. Unaa na meni mu rungwutwonu gana uba? Itekwu ibɛ shɛ ijilɛni keeni uba ubwa.

⁹Itiopia keeni Ijipti aba shɛ la ukpahiŋ ubwa na zasa uce, atwa Put, na atwa Libia aba la o mbiyono bu[7]

¹⁰A 'imɛ waa kaa atwa Tɛbɛs, ee hwuri na cɛnjɛ ti nya. E jibi miaụŋ ma aba mi ticwɛŋ cwɛŋ uuwa aa kwụnɛ no ofwo eseshi ekpekiti elele na amɛ ụshɛpwụ ata hwɛɛ. A 'wɛŋ icɛcɛ iwɛ tudwotwogonu ta atwa ubwa ụjɛrụma, oo to ehwurembe aba ashɛnjɛ.

¹¹Gabụ Ninivɛ, bi zhɛ ba sha gana bụtụ na mayaga ma ngba du, ɛbi zhɛ kaa bu mama intana. Bi zhɛ du ba dwalakaka ofwo tuswaka maa benengeni atwa bụ i'ime.

¹²Ijilɛni bu hwɛɛ zhɛ ya sha gana uwowo na tụ'walụ tu bwa ti hiiŋ tɛ nɛ. Yaa shɛ ee zhingeci ya uwowo ata, tụ'walụ tu bwa ti zhɛ ta 'waŋ, maa ti teni nu unu bụtụ na ba ya tụ!

¹³Ejeshi bu hwɛɛ a shɛ gana eyikwo. Shidubo shi tutono na cɛnjɛ tụ bụ shɛ kapɛshɛngwanụ atwa i'ime bu kpotoo. Ulwa kaa hwoŋzhingwo imbele nɛ ahi ga kapanga shidubo sha ata hwɛɛ.

¹⁴Cɛgajɛ meni maa vwunji cɛnjɛ-ti-i'wɛŋnɛ maa njɛ etemberi, maa mo ijilɛni bụ. Bɛ shɛ bu mama imanganga iwɛ atwa ga ubu hweri ne tugwubi.

¹⁵Apata ulwa zhɛ mo bu songo, utokwobi kaa zhɛ ma bụ kakaba, u zhɛ ma bụ ya gana ovworo na a ya iyimɛyɛ. Hia wazhɛga gana ovworo, ahia wazhɛga gana a'nywa!

¹⁶Hi 'yajɛ ahinya na gembi ufwugwo uhwuri okwo mkpasu mu tụla! Ama hwuwayɛ go, a lụbɛnjɛ iyimɛyɛ cɛnjɛ ta ata gana ovworo, nazhɛ aa hiɛrɛ ee hwuri.

¹⁷Ehiu hiŋ a shɛ gana a'nywa, atwa hiŋ shihwolu a shɛ gana unyama wo ovworo na to ukoko nụ ụdatụ na mpiala na ma sha bụtụ namɛ. Ama aka na tu uwaŋna cɛ, a hiɛla, i zasa kaa bụtụ ba mapa geri na ee hwuri o!

¹⁸Oo gabụ agwuma Asiria, a'iywa bụ 'waŋ malabụ mo tu'wo, atwa bụ ụjɛrụma a ta ozhilwo! E gereteji atwa bụ nu nshama, a zasa kaa bụtụ maa jicinje aŋ ni ihwɛ o.

¹⁹Ụngwụ na ebi eri zasa bụkwụshɛ o, undala bụ kaa eri shi wo 'wo. Atwa elele na hwụjɛ unabarɛ bụ, o kwuno i'ɛlɛ tupuso, a na bwada unyasa. Gaaba hwụjɛ shɛ ụngwụ wa amiaụŋ na aba nda la atwa zasa ucee?