Read bassa HABAKUK 2 Bible Online

HABAKUK 2 - bassa bible

HABAKUK 2

¹N zhɛ mo mungo ashɛkpa mi u'iywa, maa mo shikono ma shɛlana, maa ma kwụba iyi nɛ AGWANGWAMA zhɛ mo m mbiso, keeni iyi nɛ Ngɛɛ zhɛ mɛ jishijɛ bụ, iwɛ iyi nɛ Ngee swegeni bu.

²Iyi AGWANGWAMA n jishijɛ na, bi hiɛŋ, 'Nyata ijɛ Ngee bi kepishingeni na atayɛ tụpatakwụ patakwụ kpataa tebiye, iwɛ maa bụtụ be elele na ba rɛta iŋ eri iŋ tɛrɛta kakayɛ.

³Tɛkapɛshɛngana ta ata tɛ ta 'yacɛ aka tuba na ee jwe, aka ata a nda izɛlɛgwu, aa sala geri bu ukwunanga, aka ata kaa zha shɛ o kwu o. Okwo yaa shɛ maa e ilegeji, ama 'yaka aŋ, ijɛ kaa zhɛ ya nda gom, aka ata kaa zha shɛ ɛ njɛ ti'insu o.

⁴Hioko, bụtụ na mama sata[1][2] zhɛ ba ya uraiŋ tedure ne rishe ru bwa tɛtɛtana Agwatana.

⁵Shɛ inɛ ɛtɛ kiri o, uduciya wa halakaka bụtụ ata ba abwagara, ibɛ po baa zasa ụhinjanụ. Ba nda tudundo ti iyi gana u'uye, baa shɛ kaa gana tu'wo tu na tu lukwumi shi atwa tụkwụna. Iwɛbɛ po bee meme sugeni edenji, boo momo sutonono kaa du atwamwa kpaaŋ.

⁶Shɛ atwa na suu a twaga bụ ni ilɛtu tuhunga, keeni asada, zhɛ ɛ hiɛŋ bụ, Bi zhɛ kaa ba nda hwuŋ adangboo? Gana na to bo sutongono i'wɛŋnɛ nɛ i shɛ shɛ inɛɛ bụ, uuwa i ci ụkwụmbwụ naa ɛbi zhɛ ba ganga bɛzhɛgba tumama nda ni iyi ufwafwaa!

⁷Ayɛ atashɛ hiŋ zhɛ ɛ ishijɛ hwuŋ maa ahiɛ sukakanɛ geri-be-eshe. Atwa na mama 'imɛ aba zhɛ mo hi zwono hwuŋ inyɛsɛ. Nazhɛ ɛɛ zhɛ mo hi sugo gana atwa na ujasa yɛ.

⁸Hi suje i'wɛŋnɛ ye edenji ofwugwo, ama tuba atwa elele na ta vwanganɛ aba zhɛ o sugo ya i'wɛŋnɛ hiŋ hwuwayɛ go, iwɛnɛ ehi dudweji mehieŋ ma atwa na abwagara ata ahiɛ njɛ na cɛnjɛ tu unyizo, keeni mu na ma atwa ata jɛjɛ na ashɛpwụ a'wụtụ a'wụtụ.

⁹Bụtụ na be sugeni atwa ihwɛ ibwɛ titeni to orugwusu, na kaa peteni ihwɛ ibwɛ no ofwo na zeci, iwɛ maa kede abara-ne-ebe jiteni bu o, bi zhɛ ba nda hwuŋ adangboo!

¹⁰Ama hi sugeni nhwaŋ mi hiŋ ezuye; iwɛ edenji ga ofwugwo ahiɛ njɛ ufwu, hi mama njɛ iwɛwɛ ni ikɛnyi hiŋ.

¹¹Okwo atayɛ na oo mo uba zweni nu n'ungwa mu na mi zhɛ ma hi sukakana, ibɛ po i'wɛ'wɛ nɛ ee heji ukogo ya lashajɛ n'ungwa ma ata.

¹²Bụtụ na shiri ukoshilo ụshɛpwụ na abwagara, na kaa jwe ụshɛpwụ ne mehieŋ ma atwa tududwogo, bi zhɛ ba nda hwuŋ adangboo!

¹³Shɛ AGWANGWAMA na Hwuri Kpaaŋ suu njɛ maa atwamwa njɛ ugondu, maa ulwa hwoŋzhinji uŋ, maa edenji meme lukwucinji ni iwɛ tɛgadaga?

¹⁴Ụjɛrụma wa AGWANGWAMA tumapa zhɛ wo shino na cɛnjɛ tu unyizo, gana na te meni mo shino ni itekwu.

¹⁵Bụtụ na ba pana anya ubwa mayaga mi isɛbwɛ[3] ibwɛ, uuwa i ci aka na maa ngba aŋ, aa nda ya gologolo, bi zhɛ ba nda hwuŋ adangboo, iwɛnɛ tu baa ngbaracɛ mohondo ma aba!

¹⁶Ezuye du zhɛ ma hi sha tụlụkpashɛ tụ ụjɛrụma. Hi zhɛ du kaa hia swa mayaga maa hi na nda gologolo.[4] Ukwopi isɛbwɛ na namɛ nu u'ala ubiye wa AGWANGWAMA zhɛ du we ringeni wa zhajɛ pi hiŋ, nazhɛ ụjɛrụma hiŋ zhɛ wa jɛshɛrɛga wa sha ya ụpụrụsa.

¹⁷Ikebi nɛ ahiɛ njɛ uwapa Lebanon; ɛ zhɛ du ma hi kaba. Ụzagwụ isundɛ ehilo nɛ ehi iricinji zhɛ du ma hi ima.[5] Ijɛ zhɛ mo hi jitono iwɛ mehieŋ ma atwa na ehi dudweji, keeni iwɛ abwagara na ahiɛ njɛ cɛnjɛ tu unyizo, keeni atwa na jɛjɛ na ashɛpwụ a'wụtụ a'wụtụ.

¹⁸Imbe shɛ uhwara na tuwa tɛ 'yajɛɛ? Iyi nɛ bụtụ njɛ kwakwa taa shɛ, i zasa kaa iyi elele tee eri to mbiso bụtụ namɛ swooŋ nụ ụzagwụ o. Iyi ibiye imbe tɛɛ zhɛ ta ndana bụtụ na njɛ tụ tu baa patanɛ tụ rishee? Tuwa tu na ti eri shi ta dumana iwɛ taa shɛ!

¹⁹Bụtụ be elele na bɛ hiɛŋ iyi nɛ aa njɛ nụ ụ'wụ'wụ maa, Zhinjɛ! Na kaa bɛ hiɛŋ okwo utayɛ na hwụjɛ shɛ iwɛ maa, Ishijɛ shikono, bi zhɛ ba nda hwuŋ adangboo! Tuwa ti eri shi tu ma hiɛ kapɛshɛngana iyi elele o. Okwo tee sweni tu bata azụrụfa, na azhɛnarɛya, ama kaa tụ hwungwa sụ o.

²⁰AGWANGWAMA namɛ nu umwono ubwa tijilo; ga bụtụ be elele na namɛ nu unyizo 'imɛ ilɛmɛ na agba ubwa.