Read bassa HABAKUK 3 Bible Online

HABAKUK 3 - bassa bible

HABAKUK 3

¹Adua na bigesere ga, ga Habakuk njɛ na, bi hiɛŋ,

²Oo AGWANGWAMA, N hwugwa la urishi iyi nɛ abu ndanjɛ, ibɛ po Ngaa bụ sụmɛ inyɛsɛ tebiye. Ndaanana kaa ijɛ ɛtɛ i'wɛtwɛ 'wɛtwɛ na aka ga tu. Nda maa e mepi iŋ kaa na aka ga tu. Ne teyinje inyɛmɛnyɛmɛ tihioko okwo ta aba nda isɛbwɛ.

³Agwatana banɛ na cɛnjɛ ti Teman baa zhajɛ; bụtụ ata bi Tijilo banɛ nu Nshama mu Paran. Ụjɛrụma ubwa botogwu azuba. Atwa unyizo kpaaŋ tuba a shɛtangana bụ.

⁴Tuta tu na baa ta tɛ shɛ gana uhioko-uhwaŋna uwaŋna; bụratụ bu ulwa bo gorogo nu u'ala ubwa, apata kaa bee sweci ukpahiŋ ubwa.

⁵Ubwa ba tumwana igwumɛgwumɛ yoo hwulono bu umbe. Tishikpe tuba ta 'wa bụ ne ekwunyi.

⁶Aka na baa njɛ zhiiŋ, baa ngbaracɛ cɛnjɛ tu unyizo, ibɛ po cɛnjɛ tɛ njɛ bulama, edenji bwɛ na tɛzhɛgɛda. Nshama mu na mu namɛ la cala mu bwaratagwụ; ibɛ po tikpekwu tu unyizo-nom ti iri na amɛ cɛnjɛ, ihwɛŋnɛ ibwɛ namɛ unyizo-nom.

⁷N kwụbɛ maa ụlamụ na ɛɛ hiɛŋ, Kush wa nda inyɛsɛ, ibɛ po atwa cɛnjɛ ti Midian tuba a zhɛgɛda.

⁸AGWANGWAMA, ne erefu maa amɛ bụ hashɛganụ? Ne erefu suu isɛbwɛ bụ ishijɛ? Okwo ni itekwu suu aba nda isɛbwɛ na aka na aba suka idɛkwɛ bụ; keeni ihɛŋtu bu ujasa iwɛ tụlasụ ta atwa bụ?

⁹Gabụ bu tufwurinji uta bụ, wee shiri ya bohondo, ebi beteni a'inla na bu'waba bu uta bụ. Gabụ kaa bi beji cɛnjɛ tu unyizo nazhɛ erefu banɛ.

¹⁰Aka na tu nshama mụ bụ kwụbɛ, mɛɛ bwɛ na tɛzhɛgɛda; meni mu banɛ na tụla maa 'waŋ. Meni mu na mu namɛ na amɛ cɛnjɛ mo ngwulo. Ibɛ po adanga muba ishijɛ mungwu mungwu.

¹¹Uwaŋna, nu upiana shikeni urubwo uko zhirimi na tụla. Iwɛ tumbaraa mbaraa ta a'inla bụ a na o gozhigo tebiye, keeni iwɛ tuta te ezezeji isɛnu ɛtɛ bu nɛ ya nda mbaraa mbaraa,

¹²Gabụ kaa bi rikeci cɛnjɛ tu unyizo na amɛ-tụhaŋtụ bụ; abu fwundacɛ kaa edenji ni isɛbwɛ bụ.

¹³Gabụ kaa bi beni maa lesheji atwa bụ, maa bicinji bụtụ ata bụ ebu dudugeni manɛbɛ. Gabụ kaa bu bwereteji uhiu u tugworozwo,[6] ebi iricinji kaa atwa elele na ga 'wa bụ kpaaŋ.

¹⁴Ebi shepi isɛnu ibwɛ abɛ ibatajɛ ohiuhiu eberezhe ejeshi ubwa, aka na ta a zhajɛ gana ujipo maa e ti gereteji, aa bwada unyasa gana maa ɛ zhɛ a nda okofwo umungwuta swɛɛ swɛɛ.

¹⁵Gabụ kaa bu vwundeci Urefu ni idɛkwɛ bụ, ibɛ po meni ma ata mụ 'wụtụ mu bwɛ no tufwuno.

¹⁶N hwụjɛ ijɛ hwɛɛ, ibɛ po Ngɛɛ bwɛ na tɛzhɛgɛda; ti ihwumbwe mi du ya zhɛgɛda. Ibɛ po o'umpwo mi kwuni tulwogo, uvwuna mu uko wa twatwagwụ unya. N zhɛ ma gɛga saiiŋ ma 'yaka ụjita ata tiriri ti zhɛ to vwutono atwa na mɛ ti tɛfulɛjɛ.

¹⁷Okwo to owowo njɛ shɛ tusumbo, ta afwafwa kaa 'weri shi du, okwo ta buta 'weri shi tụ'walụ, ti iyimɛyɛ kaa meci shi ne ehilo, okwo ta agwụdụ zasaba ni isume ya aba, ti iyimabiga kaa tileni ya bohondo,

¹⁸Okwo ti yaa shɛ gana ata, N zhɛ kaa ma bwada waa unyasa na amɛ AGWANGWAMA, na shɛ Agwatana na mo m bicingo.

¹⁹AGWANGWAMA na shɛ Agwatana mi, ubwa shɛ ikɛnyi mi, Ubwa ba nda maa ɛvwɛvwɛjɛ mi a shɛ gana a na bụlụba, baa nda kaa maa mu no rungo ne tikpekwu ti mi lapiya.