Read bassa ZƐFANIA 1 Bible Online

ZƐFANIA 1 - bassa bible

ZƐFANIA 1

¹N-ndumwa mu na AGWANGWAMA mbishi Zɛfania na shɛ yɛu-ye-eyi Kushi, baa shɛ bijalụ Gɛdɛlia, baa shɛ bujalalo Amaria, baa shɛ binyabɛshɛ Hɛzɛkia na aka na tu go Josia yɛu Amon yɛ tugwama tu Juda.

²AGWANGWAMA hiɛŋ, N zhɛ mo sugo iyi elele nɛ namɛ na cɛnjɛ tu unyizo, gana na tu ujipo wo sugo iyi.

³AGWANGWAMA hiɛŋ, N zhɛ ma bacɛnga atwa, ti isundɛ ehilo, N zhɛ ma ishɛcɛnga shanụnụ shɛ na sha hila, ti ijɛnɛ nɛ zweni ni itekwu. N zhɛ ma 'waŋtatanga ogworozwo. N zhɛ ma nda butugwumwa ufwu na cɛnjɛ tu unyizo.

⁴N zhɛ ma zha ma sukakana atwa Juda, keeni atwa elele na jɛjɛ nu Jɛrusalɛm. N zhɛ mo 'woricingo tuwa ti Beal tu na tu ga ta vwɛ epe hwɛɛ, keeni nzeci mo onongbo ata ga nda tuwa ta ata,

⁵ta atwa na o mungo no osokwu maa o no kwuzono uwaŋna, nu upiana, nu mkpasu, ta atwa ata mo n kwuzono Gamba AGWANGWAMA, a na kaa a ta izeci mi, ama tuba a zha ya aa ta uzhɛba ata ɛɛ hiɛŋ, Milkom,[1]

⁶ta atwa ata gwuri ne ekwunyi a na n 'wa sụ ya Gamba AGWANGWAMA, a na kaa dwelekeci shi ya timbiyono no olugwo mi na shɛ AGWANGWAMA, kwo kaa a na n heŋteni shi ya iwɛ iyi elele.

⁷Ima ma ilɛmɛ nu umbe mu Gamba AGWANGWAMA Mokondo, iwɛnɛ po ụjita na AGWANGWAMA zhɛ a duma ụshɛrɛya gwumwongonu; AGWANGWAMA kaa imwangwa maa ta ụrụpɛ uko na atwa ubwa, baa nduwa kaa atwa i'ime a na baa suyanɛ maa e suji i'wɛŋnɛ ya atwa Juda tijilo.

⁸Nụ ụjita ata na shɛ ụjita ụrụpɛ wa AGWANGWAMA, ibɛ Ngɛɛ zhɛ ma pana ehiu ulwapɛ, ta miaụŋ-me-eyi ma agwuma, ta atwa elele na a 'watatagwụ masha ma atwa cɛnjɛ ti nya.[2]

⁹Nụ ụjita ata gbaa Ngɛɛ zhɛ ma pana atwa elele na a hiranga nu n-ndwụtwụ mo shidubo iwɛ izunde keeni atwa tụkwụna ulwapɛ, ta atwa na o shidongo shimwono shɛ shɛgwangwama sha aba ni iyi nɛ aa lashajɛ na abwagara keeni tuhalakaka.

¹⁰AGWANGWAMA hiɛŋ, Nụ ụjita ata, ibɛ ɛhi zhɛ hia hwuga n'ungwa no odubo ata ɛɛ hiɛŋ, Odubo Bijana nu Jɛrusalɛm. Hi zhɛ hia hwuga tu u'wo zweni gboo geri ata atwa ta jɛjɛ tu ufwo tu ufwo keeni tuhwuŋzwotongwu te tikpekwu.

¹¹Ahiɛba na hi namɛ geri ba cɛnjɛ tu udukwo, zwono ma kwakwa nu u'wo gboo, iwɛnɛ ta ahinya elele zha shɛ a nama ya, ta atwa elele na ga nda tihinya ta azụrụfa, ɛ zhɛ a nda ufwu kpaaŋ.

¹²Na aka ata Ngɛɛ zhɛ ma shapa ụsụtụla mo hikokono Jɛrusalɛm. Maa ma pana atwa na mama ngbaracɛ maa e meme eri ni iyi elele ulwapɛ, a gata mɛmɛ hiɛŋ, AGWANGWAMA njɛ shɛ iyi ibiye kwo kaa iyi iwɛ o.

¹³Ɛ zhɛ o sugo uduciya wa aba, ɛ zhɛ o hwuŋzotongo du shimwono sha aba. A zha shɛ o zwono no shimwono sha ata aa ma o, a zha shɛ du kaa a swa meni ma tụ'walụ ta afwafwa ata aa bilaga o.

¹⁴Ụjita ata ụ'wụtụ AGWANGWAMA zhɛ a duma ụshɛrɛya gwumwongonu ya ciiŋ ciiŋ, u gwumwongonu, we ci ba kakayɛ! U zhɛ kaa wa sha ụjita ụwɛ, okwo yaa shɛ ejeshi na ge eri a nda teleyi, ɛ zhɛ o zwono nu n'ungwa gboo!

¹⁵Ụjita ata zhɛ wa sha ụjita isɛbwɛ, nụ ụjita tiriri, nụ ụjita ụngwụ-tuhwuga, nụ ụjita u tuhwuŋzwotongwu keeni ụjita ufwu tɛnda, nụ ụjita tishi ti tikpirimi, nụ ụjita wo odomu keeni iyi turumono i tizhuuŋ,

¹⁶nụ ụjita rundu ra akakacɛ ujasa, keeni rundu ru ukwuruwa ujasa ru na ri zhɛ ra sukakana ashɛpwụ ata a'wụtụ a'wụtụ a na ga 'yagajɛ aba na zeteji, ta shɛshɛkpa shɛ na shi ge zeteji.

¹⁷AGWANGWAMA hiɛŋ, N zhɛ me sugeni atwa kpaaŋ tiriri tụ 'wụtụ gana ga, iwɛ maa ga bụtụ be elele na hamba ofwo gana olubo. A n njɛ iwɛwɛ Gamba AGWANGWAMA, iwɛbɛ po mehieŋ ma aba mi zhɛ ma fwunga gana meni, n'wo ma aba mi zhɛ mo tulogono na cɛnjɛ mu no fwoso gana ubizo.

¹⁸Azụrụfa keeni azhɛnarɛya aba zha shɛ a ala maa e bicinji aŋ nụ ụjita na isɛbwɛ ya AGWANGWAMA ishijɛ o, Tugorogo tu na isɛbwɛ ibwɛ yo gorogo na tugwumana, ti zhɛ ta nda cɛnjɛ tu unyizo ufwu hwɛɛ. Ubwa kaa zhɛ be sugeni atwa elele na namɛ na cɛnjɛ tu unyizo ti'ilono ta aba eshigiri.