Read bassa ZƐFANIA 2 Bible Online

ZƐFANIA 2 - bassa bible

ZƐFANIA 2

¹Oo ahiɛba udenji ga mepi shi ezuye, momo sotulonu ma urubwo uko,

²tobwolo ụjita ata ee jwe te ci shi o, tobwolo ụjita ata ɛɛ zhɛ mo hi unzo gana afụrɛkɛcɛ te ci shi o, tobwolo isɛbwɛ ya AGWANGWAMA nɛ vwengenji te hi ubi shi o, tobwolo ụjita ata Agwangwama zhɛ a nda isɛbwɛ ibwɛ u te hi zhegeni shi o.

³Ahiɛba atwa elele na shɛ atwa cɛnjɛ tu ga, a na meme zucinje, a na kaa a hwuga-unu na AGWANGWAMA a pana, zhajɛ ma no ofwo AGWANGWAMA maa hi untangana tiririri. Untangana ma timeme zucinje, nekeshi hia banangana hwuŋ nụ ụjita ata AGWANGWAMA zhɛ a nda isɛbwɛ ibwɛ.

⁴I zasa bụtụ be elele zhɛ ba vwa nu Gaza o. Ashkɛlon kaa zhɛ a sha osombo. Ɛ zhɛ o unzo atwa na ga jɛjɛ na Ashdod nu uwaŋna tishikoko, ɛ zhɛ du o unzo atwa na ga jɛjɛ ne Ekron nụ ụshɛpwụ wa aba hwɛ hwɛɛ.

⁵Ahiɛba atwa cɛnjɛ ti Keret na hiɛ jɛjɛ nụ ụpalanụ itekwu, hi zhɛ hia nda hwuŋ adangboo! Ahiɛba atwa Kenan a na hi namɛ na cɛnjɛ ta Afilistia, n-ndumwa ma AGWANGWAMA mɛ hiɛ sukakanɛ. N zhɛ me hi iricingo hwɛɛ, i zasa bụtụ na zhɛ ba vwa ya o.

⁶Cɛnjɛ ta ata ti hiŋ tụ ụpalanụ Urefu ti zhɛ ta sha cɛnjɛ ta tiyaga, apata a'iywa-agwụdụ zhɛ a ta idile ya aba, nazhɛ a ma nsumo ma agwụdụ aba du na tuba.

⁷Atwa ihwɛ Juda a na vwanganɛ, ɛ zhɛ a lashagaga cɛnjɛ tụ bụ. Ɛ zhɛ na yaga ni iyimabiga ya aba na tuba, o no woto no shimwono sha ata shɛ namɛ na Ashkɛlon. AGWANGWAMA na shɛ Agwatana aba zhɛ ba ima aŋ u'ala, bɛɛ zhɛ be gwuricingeni aŋ tɛzhɛmana ta aba sasana.[3]

⁸AGWANGWAMA na Hwuri Kpaaŋ hiɛŋ, N hwụjɛ ta atwa Moab keeni atwa Amon a twagaga atwa mi, aa nda aŋ asada, aa busa[4] maa ɛ zhɛ a lashɛga cɛnjɛ ta aba.

⁹Gana na tu Ngaa shɛ Agwatana Isrɛl na ba hwungwa gom, N zhɛ ma nda Moab ufwu gana Sụdụm tilɛɛ, Ngɛɛ zhɛ ma nda A'amon ufwu gana Gụmụra. Ɛ zhɛ a sha ugodo manɛ keeni ofwo na hwuŋzwotongwu unyizo-nom, tu'untwo ti zhɛ ta lashagaga uŋ. Atwa mi na vwanganɛ aba zhɛ o sugo i'wɛŋnɛ ya aba, ta cɛnjɛ ta aba a 'yaga.

¹⁰Gana ɛɛ zhɛ a pana atwa ga Moab na atwa Amon ulwapɛ ta, iwɛ tubusa keeni tumama sata ta aba, ti iwɛ tutwa ta ata aa twagajɛ atwa AGWANGWAMA na Hwuri Kpaaŋ.

¹¹AGWANGWAMA zhɛ o holono aŋ. Bɛɛ zhɛ bo zwono tuwa ta cɛnjɛ tu unyizo inyɛsɛ maa tɛ shɛ iyi tɛgadaga, nazhɛ udenji we elele zhɛ na zhɛba bụ na cɛnjɛ ta aba.

¹²Ahiɛba atwa Itiopia, utokwobi wa AGWANGWAMA zhɛ du ma hiɛ kwụna.

¹³Bi zhɛ ba zhajɛ maa sukakana atwa tuzuba, bɛɛ zhɛ ba nda atwa Asiria ufwu. Bi zhɛ ba nda ụshɛpwụ Ninivɛ osombo na ee jineci, u zhɛ wa sha gana ụshɛka na zasa meni.

¹⁴U zhɛ wa sha ofwo na iyimabiga, ni inɛ, ni isundɛ ehilo iyiri swoswoswo[5] zhɛ no woto. Ozhukwukwu[6] zhɛ a nama no osombo ata a na ugagaga na agbahwụ ubwa. Shanụnụ iyiri swoswoswo shi zhɛ shɛ na patangana ni idwɛtwɛ yo odubo, shɛ na ugagaga. Ɛ zhɛ a bwaga i'wɛ'wɛ ɛtɛ yo osobu oo to la shimwono sha ata ukogo.

¹⁵Ụshɛpwụ wa ala mama 'yajɛ, na namɛ la suu, na wa shana wɛ hiɛŋ, Gamba na, i zasa binya bụtụ ta namba n hwuri o. Hioko, gana na tu waa shɛ ya osombo, waa shɛ ya ofwo na isundɛ ehilo yo woto! Bụtụ be elele na ba kashɛka ụŋ, bu na ta uŋ ashɛshɛrụwụŋ! Bu na sakakana uŋ u'ala.