Read bassa ZƐKARIA 11 Bible Online

ZƐKARIA 11 - bassa bible

ZƐKARIA 11

¹Oo gabụ Lɛbanon, kapashanga shidubo shɛ bụ iwɛ maa ulwa tweni i'wɛ'wɛ bu yo osobu![18]

²Zwono ma nu u'wo gboo, hi no jirongono ahiɛba i'wɛ'wɛ yo orokwo, iwɛnɛ tụ ụ'wụ'wụ hiŋ usobu loyogwogwo, i'wɛ'wɛ ɛtɛ hiŋ ụjɛrụma kaa zasaba ya o. Twa ma u'wo ahiɛba i'wɛ'wɛ ye ekpekpeshi nɛ namɛ nu Bashan, iwɛnɛ to o dwowo uwapa hiŋ na inshi.

³Shɛlaga ma u'wo na a'iywa hiŋ a twa, shɛlaga ma tungwulo tu na esemberi izeci o ngwulo, iwɛnɛ ta a njɛ ụshɛka Jodan ufwu.

⁴AGWANGWAMA na shɛ Agwatana mi hiɛŋ, ga ma sha bi'iywa bu unyama wa agwụdụ na ɛɛ zhɛ a shɛla.

⁵Atwa na so aŋ shɛrɛ aŋ, ee hwuri uzawa ulwapɛ we elele, ee senji usunda wa aba, ɛɛ hiɛŋ, Shɛtana ma AGWANGWAMA, tɛ shɛ ya azhɛgba. Kwụba, okwo bi'iywa ba aba bi ikɛnyi aba kwụbɛ shɛ inyɛmɛnyɛmɛ ya aba o.

⁶Iwɛbɛ po AGWANGWAMA hiɛŋ, N zha shɛ ma kwụba ya inyɛmɛnyɛmɛ ya atwa na namɛ na cɛnjɛ tu ga o. Kwụba N zhɛ mo zwono atwa elele ni i'ɛlɛ ya a'yagajɛ keeni shɛgwuma sha aba, nazhɛ ɛɛ zhɛ a pana atwa ụbaụta. N zha shɛ kaa mo bicingo aŋ ni i'ɛlɛ ya aba o.

⁷Ibɛ po Ngaa shɛ ya bi'iywa-ba-agwụdụ ata ɛɛ zhɛ a shɛla, iwɛ atwa ata na a sa a sanganana. Ibɛ po Ngee suji shekwute shi yebi, Ngoo po bu ko izeci, tu go Tulubo, Ngoo po bu na bi yebi izeci, tu go Unu-tutwa. Ibɛ po Ngaa ngbaracɛ ya agwụdụ ata.

⁸Na amɛ upiana uko gba, Ngaa njɛ a'iywa ata atatụ ufwu. Ama N zasa isɛbwɛ-ti'ima na aba o, aba du kaa n to ni i'ime.

⁹Ibɛ po Ngɛɛ hiɛŋ unyama ata, N zha shɛ ma sha ya bi'iywa hiŋ o. A na elele na shɛ o 'wo, ge e 'wi, a na elele na kaa shɛ a nda ufwu, ga a njɛ ufwu, ama ga a na ata vwɛ, mama ndanụ ufwu.

¹⁰Ngee shepi bukwuto mi go Tulubo Ngoo dwonu, maa go unu na Ngaa twa la na atwa kpaaŋ bwaratagwwụ.

¹¹Ibɛ po unu ata tutwa bwaratagwwụ ga jita ata, gana na tu unyama wa agwụdụ ata, medenji atwa ata a pana aŋ ụbaụta, m ngbaracɛ, e mepi maa n-ndumwa ma ata mɛ shɛ mu na ma AGWANGWAMA.

¹²Ibɛ po Ngɛɛ hiɛŋ aŋ, Yaa shɛ yee hi teneni cɛŋ, asha n cɛpɛ ma utashɛ mu, ama yaa shɛ yee hi teneni shi kaa cɛŋ, asha untangana uŋ ma. Nazhɛ aa n cɛpɛ utashɛ mu, waa shɛ azụrụfa talacɛ.

¹³Nazhɛ AGWANGWAMA hiɛŋ, 'Wanga bumo-bu-nkwasha ukwuribi ata, utashɛ na teni cɛŋ maa a cɛpɛ iwe mi ta. Ngee suji ga azụrụfa ata talacɛ Ngaa 'wanjɛ bumo-bu-nkwasha.[19]

¹⁴Nazhɛ Ngaa kwụshɛ bukwuto mi bi yebi, bu na ata ɛɛ hiɛŋ, go Unu-tutwa, ibɛ po tutogwu ta atwa Isrɛl na atwa Juda tu bwadụ, a shɛ shɛ ya miaụŋ-mo-bino bu ko.

¹⁵Nazhɛ AGWANGWAMA n hiɛŋ, Shaanana bi'iywa-ba-agwụdụ a na teni shi ya cɛŋ na aka ga.

¹⁶Iwɛnɛ po N zhɛ mɛ ishicinjɛ bi'iywa-ba-agwụdụ bu ko, na iwɛ agwụdụ na a nda ufwu zha shɛ ya ta, na kaa zha shɛ ba dwalakaka anaa na 'inɛ,[20] na kaa zha shɛ ba nɛnga anaa na eri-ụngwụ, bi zha shɛ kaa du ba biga anaa na 'yajɛ ulapiya o, ama tiya kiri bɛɛ zhɛ na ya usunda wa aba, bɛɛ zhɛ kaa na dwatwaga to ogwogwozwo aba.

¹⁷Bi'iywa-ba-agwụdụ be elele na te shi eshe, na kaa genji unyama wa agwụdụ, bi zhɛ ba nda hwuŋ adangboo! Go utokwobi po bu nu ụragbamụ keeni rishe ru bwa ru u'ala ubiye! Ga ụragbamụ ubwa hweteni hwɛɛ, ge rishe ru bwa ru u'ala ubiye ri lubeni kpirimi!