Read bassa ZƐKARIA 4 Bible Online

ZƐKARIA 4 - bassa bible

ZƐKARIA 4

¹Nazhɛ butumwa-ba-azuba ata ga njɛ n-ndumwa ne mi zhagananɛ, bɛɛ n zhingicinjɛ gana maa N go woto malabụ.

²Bɛɛ n hiɛŋ, Imbe abụ kwụbɛɛ? Ngɛɛ hiɛŋ bụ, N kwụbɛ uteburu ụsụtụla na aa njɛ na azhɛnarɛya, asụtụla ecenje kaa patanganɛ nu ubwa, asụtụla ata ecenje, una una kaa 'yajɛ a'ibwa tuzuzu ti cenje tuhwuŋtongono.

³I'wɛ'wɛ buta iyebi shikekeni to dongonu asụtụla ata, uko shikeni nu u'ala ubiye, una uyebi shikeni nu u'ala ugwulwo.

⁴Ngee heŋteni butumwa ata ba azuba ba njɛ ne mi, Ngɛɛ hiɛŋ, Iyɛri mi, Imbe nɛ kwuuŋ?

⁵Nazhɛ butumwa ata n unseni, bɛɛ hiɛŋ, Bi mepi shi iŋ suu? Ngɛɛ jishijɛ bụ, Ngɛɛ hiɛŋ, Iyɛri, Awo.

⁶Bɛɛ n hiɛŋ, N-ndumwa mu na AGWANGWAMA 'yajɛ maa mbishi Zɛrubabɛl na, bi hiɛŋ, Shɛ ni ikɛnyi, shɛ nu ukpahiŋ du kaa o, ama semi na Mpiala mi mi.

⁷Oo ɛ-shɛmɛ gɛ i'wɛtwɛ, imbe abɛ shɛ[6] nu umbe Zɛrubabɛl gaa? Bi zhɛ ba sha cɛnjɛ tụ tụndalụụ nu umbe Zɛrubabɛl. Nazhɛ bɛɛ zhɛ ba shapɛ utayɛ uhiuhiu tuta, nazhɛ atwa zhɛ o zwono nu n'ungwa, ɛ hiɛŋ, U pilanụ tebiye! U pilanụ tebiye!

⁸Nazhɛ AGWANGWAMA m mbishi n-ndumwa mi nya, bɛɛ hiɛŋ.

⁹Hiɛŋ, Gɛ Zɛrubabɛl, ubwa shiri ukoshilo umwono ga wa Agwatana, ubwa du kaa zhɛ ba ta ụŋ uhiuhiu. Aka ata nazhɛ ɛhi zhɛ hia mapa maa AGWANGWAMA na Hwuri Kpaaŋ ubwa n tumwanɛ ga utumwa no ofwo hiŋ.

¹⁰Gaaba iwɛ aka na iyi ta namɛ cwɛŋ tatụlanụ sụụ? Ama shɛmɛ sha atwa ga ecenje shi zhɛ sho lomo hwuŋ, na aka na ta a kwụbɛ ti gɛ Zɛrubabɛl untanganɛ meni ma ata mo shikocongo tuma ni i'ɛlɛ ibwɛ. [Asụtụla ata ecenje aba shɛ eshe AGWANGWAMA ecenje a na a kwụba cɛnjɛ tu unyizo hwɛɛ].

¹¹Nazhɛ Ngee unseni bu, Ngɛɛ hiɛŋ, Imbe shɛ ecilo i'wɛ'wɛ gɛ buta i shikekeni nu u'ala ubiye keeni u'ala ugwulwo wa asụtụla gaa?

¹²Ngee unseni bu, na aka yebi, Ngɛɛ hiɛŋ, Imbe a'wa'walụ i'wɛ'wɛ gɛ iyebi nɛ namɛ nụ ụzalụ bo okwokworo ga aa njɛ na azhɛnarɛya, a ga namɛ no olugwo ata aa 'waŋ manɛbɛ ma buta[7] shɛɛ?

¹³Bee n unseni, bɛɛ hiɛŋ, Bi mepi shi suu iyi nɛ ijɛ shɛ? Ngɛɛ jishijɛ bụ, Ngɛɛ hiɛŋ, Iyɛri mi, Awo.

¹⁴Nazhɛ bɛɛ hiɛŋ, Ijɛ shikeni eshici atwa eyebi a na ee dudugeni manɛbɛ, maa a ndanɛ AGWANGWAMA cɛnjɛ tu unyizo hwɛɛ iyi.