Read bassa ZƐKARIA 5 Bible Online

ZƐKARIA 5 - bassa bible

ZƐKARIA 5

¹Tu Ngaa mbiyanɛ sasana, Ngaa kwụbɛ utakada u tukwungwulo na wa hila na azuba!

²Ibɛ butumwa ata ba azuba n hiɛŋ, Imbe abụ kwụbɛɛ? Ngɛɛ jishijɛ bụ, Ngɛɛ hiɛŋ, N kwụbɛ utakada u tukwungwulo na wa hila na azuba. Ụnjɛswa ubwa ụ shɛ ivwunɛ talacɛ, uholo ubwa ụ shɛ ivwunɛ umpwa-ni-bɛ-tɛ.[8]

³Nazhɛ bɛɛ n hiɛŋ, Unu-tukalana na zhɛ wo botogwu hwuŋ cɛnjɛ tu ga hwɛ hwɛɛ na. E 'nyeci nu upada utakada ata uko, ɛɛ hiɛŋ, Bụtụ be elele na zunji izunde, ɛ zhɛ a bacɛnga bụ na cɛnjɛ tu ga, ee 'nyeci nu upada ubwa uyebi, ɛɛ hiɛŋ, Bụtụ be elele na jwe-ụzagwụ ɛ zhɛ du a bacɛnga bụ gana na te e 'nyeci nu bwa.

⁴AGWANGWAMA na Hwuri Kpaaŋ hiɛŋ, N zhɛ ma kalana aŋ unu ga, ibɛ wɛɛ zhɛ wo tono umwono buzundo be elele keeni bụtụ be elele na ba ta-tuwa tụ ụzagwụ. U zhɛ wa nama nu umwono ata, wɛɛ zhɛ kaa wo hwuŋzo uŋ, ti i'wɛ'wɛ ibwɛ, ta atayɛ ubwa.

⁵Nazhɛ butumwa ata ba azuba na ba njɛ n-ndumwa ne mi kaanɛ izhɛ, bɛɛ n hiɛŋ, Shapa eshe bu na azuba, mbiyana maa kwụbɛ iyi ye zhɛ ụbanụ.

⁶Ngee unseni bu, Ngɛɛ hiɛŋ, Imbe tɛɛ? Bɛɛ jishijɛ, bɛɛ hiɛŋ, Inɛ gɛ shɛ igwumi bimenji, nɛ shɛ tusakana ti iwɛwɛ ya atwa cɛnjɛ tu ga kpaaŋ.[9]

⁷Ngaa kwụbɛ maa igwumi ɛtɛ 'yajɛ bu'urigeni na aa njɛ na bundala, aka na ee ushiji iŋ, Ngaa kwụbɛ te biyikwo bu ko shiyeni ni igwumi ɛtɛ!

⁸Ibɛ bɛɛ hiɛŋ, Tugworozwo tu ta. Bee wecicinji bu ni igwumi ɛtɛ, bee urigeni iŋ sasana ne bu'urigeni ata bi bɛ.

⁹Ngee shepi eshe, Ngaa kwụbɛ eyikwo eyebi nu umbe mu, a na 'yajɛ apiambɛ gana a na ugbaanjɛ, uvwugo namɛ na apiambɛ ata aba, ee shepi igwumi ɛtɛ aa hiɛrɛ ni bɛ na ashashɛ cɛnjɛ na azuba.

¹⁰Ngee unseni butumwa ata ba azuba, Ngɛɛ hiɛŋ, Cee kwuŋ ɛɛ zhɛ ni igwumi ɛtɛɛ?

¹¹Bɛɛ jishijɛ, bɛɛ hiɛŋ, Ɛ zhɛ Babulon ni bɛ, apata ɛɛ zhɛ a mana iŋ umwono. Aka na ee meni iŋ umwono, ee hwuwi, ɛ zhɛ o sho igwumi ɛtɛ no ohwolu ibɛ.