Read bassa ZƐKARIA 8 Bible Online

ZƐKARIA 8 - bassa bible

ZƐKARIA 8

¹Nazhɛ AGWANGWAMA na Hwuri Kpaaŋ dumananɛ n-ndumwa ne mi, bɛɛ hiɛŋ.

²Gana Gamba AGWANGWAMA na Hwuri Kpaaŋ jɛmɛ na, N hiɛŋ, Mo tono uwuru iwɛ Zayon, isɛbwɛ kaa yo hwoŋno na amɛ mi tebiye iwɛ ubwa.

³Gana Gamba AGWANGWAMA na Hwuri Kpaaŋ jɛmɛ na, N hiɛŋ, N zhɛ me gwure nu Zayon, maa Ma nama na ashashɛ Jɛrusalɛm, nazhɛ ɛɛ zhɛ ɛ hiɛŋ Jɛrusalɛm ụ shɛ ụshɛpwụ tɛcara, ɛɛ zhɛ ɛ hiɛŋ, Ishɛmɛ ya AGWANGWAMA na Hwuri Kpaaŋ i shɛ ishɛmɛ tijilo.

⁴Gamba AGWANGWAMA na Hwuri Kpaaŋ, N hiɛŋ, N-nyarɛ nu n-ndaụŋ mi zhɛ ma 'waŋna shekwute, mɛɛ zhɛ mu na gɛga sasana ni ihwɛŋnɛ ya amɛ ụshɛpwụ Jɛrusalɛm, iwɛnɛ ta a inganjɛ tebiye.

⁵Miaụŋ-me-eyi na mu na mo o du kaa mi zhɛ mo shino ni ihwɛŋnɛ ya amɛ ụshɛpwụ ga, ɛɛ zhɛ na nanga tụlagwụ ni bɛ.

⁶Gana Gamba AGWANGWAMA na Hwuri Kpaaŋ, hiɛŋ na, Yaa shɛ yaa shanɛ tumwata ta atwa ga vwɛ iyi tudama na aka ata, i zhɛ suu ma n shana du iyi tudama, Gamba AGWANGWAMA na Hwuri Kpaaŋ?

⁷Gamba AGWANGWAMA na Hwuri Kpaaŋ, N hiɛŋ, Hioko, N zhɛ mo bicingo atwa mi ni i'ɛlɛ ya atwa cɛnjɛ tu uwaŋna-banụ keeni uwaŋna-twonuo.

⁸Ngɛɛ zhɛ me gwuricinje aŋ maa a nama na ashashɛ Jɛrusalɛm, nazhɛ ɛɛ zhɛ a sha atwa mi, Ngɛɛ zhɛ du ma sha Agwatana aba, na tɛcara keeni ne tiririri.

⁹Gana Gamba AGWANGWAMA na Hwuri Kpaaŋ jɛmɛ na, N hiɛŋ, Meme shi ma, 'yaga ma ikɛnyi ahiɛba na hiɛ hwụjɛ la n-ndumwa ma ata nu unu we egesere, te kwuni nụ ụjita ata ee shiri ukoshilo umwono wa AGWANGWAMA, iwɛ maa hi to tuhwulo tu umwono ata wa AGWANGWAMA tuma.

¹⁰I zasa la bụtụ be elele na eri bo gwushigo iyi nɛ waŋnɛ maa pana bụtụ kwo kaa usunda ehilo ụgwụ, nazhɛ aka ata ci o, i zasa kaa du bụtụ be elele na beni kwo kaa teni na eri ba banangana o, iwɛnɛ tu Ngaa njɛ maa bụtụ bụtụ ga sukakana uyebi ubwa.

¹¹Ama Gamba AGWANGWAMA na Hwuri Kpaaŋ, N hiɛŋ, N zha shɛ ma nda tumwata ta atwa ga, gana ata Ngaa njɛ la atwa ata o.

¹²Iwɛnɛ po ɛ zhɛ a bila tibila ta aba na amɛ-olom, afwafwa aba zhɛ a 'wala, cɛnjɛ ta aba ti zhɛ ta kaana iyi tu'wala, Ngɛɛ zhɛ ma pana aŋ eshilo, nazhɛ ma nda maa tumwata ta atwa ga ti leshiji ewebiye ga kpaaŋ.

¹³Oo ahiɛba atwa Juda keeni atwa Isrɛl, hiɛ shɛ la iyi tutwa no ofwo edenji, ama N zhɛ mo hi bicingo maa ma hiɛ pana uwebiye. Ta nda ma inyɛsɛ o, ama shikono ma dimi.

¹⁴Gamba AGWANGWAMA na Hwuri Kpaaŋ, N hiɛŋ, Gana na ti Ngee heŋshi la maa ma hiɛ pana ulwapɛ, na aka na te eshi hiŋ ishicinjɛ la isɛbwɛ mi, Ngee sheyinji shi la kaa ahaŋsa mi.

¹⁵Gobwonu du Ngee heŋshi maa ma ndana atwa Jɛrusalɛm keeni atwa Juda iyi ibiye, ta nda ma inyɛsɛ o.

¹⁶Iyi nɛ ahiɛ shɛ hi na nda na, na duma ma iwɛ-tɛkana na anya hiŋ, na duma ma ụshɛrɛya u tishiriri nu umwono-ụshɛrɛya hiŋ, na nda ma iyi nɛ zhɛ ya karɛ amɛ-olom.

¹⁷Ta haŋsa ma maa hi na mama ndanụ iyi iwɛ o, to lubo ma tuwa tu tukata tuta o. Gamba AGWANGWAMA, N hiɛŋ, Mo imo ijɛ ɛtɛ kpaaŋ.

¹⁸AGWANGWAMA na Hwuri Kpaaŋ, jɛmɛ n-ndumwa ne mi sasana, bɛɛ hiɛŋ,

¹⁹Ezumi tɛnda nu upiana bineshi, tu upiana butana, tu upiana bicenje keeni upiana bu'umpwa, zhɛ ya shana atwa ihwɛ Juda aka bu unyasa keeni amɛ-olom. Nsono mi hiŋ du mi zhɛ ma sha nsono mu unyasa, iwɛbɛ po lubo ma iwɛ-tɛkana keeni amɛ-olom.

²⁰Gana Gamba AGWANGWAMA na Hwuri Kpaaŋ, hiɛŋ na, N hiɛŋ, Aka zhɛ o to ta atwa na namɛ na ashɛpwụ a'wụtụ a'wụtụ anya zhɛ a zhagajɛ nu Jɛrusalɛm.

²¹Atwa na namɛ nụ ụshɛpwụ uko, zhɛ a zhagana anya, ɛ hiɛŋ aŋ, Mizha ti zhe ma maa tụ lụpɛ ma tulubo-ti-biye ta AGWANGWAMA maa tɛ zhɛbɛ ma AGWANGWAMA na Hwuri Kpaaŋ. N zhɛ du ma zha ni ikɛnyi mi.

²²Atwa ofwugwo keeni edenji a na 'yajɛ ikɛnyi, zhɛ a zhajɛ Jɛrusalɛm maa a lụpɛ tulubo-ti-biye no olugwo AGWANGWAMA na Hwuri Kpaaŋ.

²³Gana Gamba AGWANGWAMA na Hwuri Kpaaŋ, jɛmɛ na, N hiɛŋ, Aka ata ci hwuŋ, etwenyi umpwa zhɛ a banɛ na ashashɛ edenji keeni rɛjɛmɛ re elele, ɛɛ zhɛ o gbodongonu Biju bu ko gba, ɛ hiɛŋ bụ, Lono maa ta nama na bụ, iwɛnɛ ta tụ hwụjɛ maa Agwatana namɛ ne hiŋ.