Read bassa MALAKAI 1 Bible Online

MALAKAI 1 - bassa bible

MALAKAI 1

¹N-ndumwa mu na AGWANGWAMA mbishi Malakai[1] maa mbiso miaụŋ mi Isrɛl na.

²AGWANGWAMA mbishi atwa ubwa, bɛɛ hiɛŋ, N hi lubi. Ama hi n unseni, ɛhi hiɛŋ, Gana na ebu tu lubii? AGWANGWAMA jishijɛ aŋ, bɛɛ hiɛŋ, Shɛ ga Isụ suu i shɛ batagwụ Jekob? Ama ge Jekob kaa Ngee lubi, ta ajalalo ubwa.

³Ngoo to tuba Isụ ni i'ime, ta ajalalo ubwa, Ngaa njɛ cɛnjɛ tu bwa tu nshama maa tu 'wi, Ngee gengeni tu aka.[2]

⁴Yaa shɛ ajalalo Isụ, a na shɛ atwa Idụm, hiɛŋ, O hwuŋzwotongwo ashɛpwụ tu, ama ti zhɛ kaa ta maanana aŋ. AGWANGWAMA na Hwuri Kpaaŋ hiɛŋ, E eri a maanana aŋ, ama N zhɛ kaa mo hwuŋzotongo aŋ, nazhɛ atwa zhɛ ɛ hiɛŋ aŋ, U'una wo ogworozwo, a shɛ udenji na AGWANGWAMA 'yajɛ isɛbwɛ na aba unyizo-nom.

⁵Hi zhɛ hia kwụba iŋ ne eshe hiŋ, ɛhi zhɛ kaa hiɛ hiɛŋ, AGWANGWAMA gembi bee keshici tugwungwu ti Isrɛl.

⁶Gamba AGWANGWAMA na Hwuri Kpaaŋ, N hiɛŋ, Yɛu ya muna bishi bwa ụjɛrụma, yɛu-ugondu ya sụma agwuma-ihwɛ ibwɛ inyɛsɛ. Yaa shɛ Ngaa shɛ bishi hiŋ, asha cee ụjɛrụma na ahi m mụnɛ namɛɛ? Yaa shɛ Ngaa shɛ agwuma-ihwɛ hiŋ, asha cee tụsụma tu na ahiɛ n sụmɛ inyɛsɛ tu namɛɛ? Ahiɛba onongbo, hi m ngbaracɛ cwɛŋ, ɛhi tɛ hiɛŋ waa maa, Gana na atụ bụ ngbaracɛ cwɛɛŋ?

⁷Gana ahi m ngbaracɛ cwɛŋ na, ibɛ shɛ ni iyi ụrụpɛ nɛ teni-ụdamụ nɛ ahi ma n ta ụrụpɛ nu utukwu mu. Nazhɛ ehio hoŋtono, ɛhiɛ hiɛŋ, Gana na atụ bụ ngbaracɛ cwɛɛŋ? Gana ahi m ngbaracɛ cwɛŋ na, ibɛ shɛ na tungbaraka tu na ahiɛ ngbaracɛ utukwu-ụrụpɛ mu cwɛŋ.

⁸Gamba AGWANGWAMA na Hwuri Kpaaŋ, N hiɛŋ, Aka na ehi n to ụrụpɛ ni iyimabiga nɛ lubegeni keeni inɛɛ nɛ ya gwumanga keeni inɛɛ nɛ ye shikoto, hi heŋshi shi ree maa iyi nɛ teni shi cɛŋ yaa shɛ? Shapa ma dee iyimabiga nɛ shɛ gana ata hi peni ugwomina hiŋ, okwo bi zhɛ ba 'yaga amɛ-olom ne hiŋ, kwo kaa bi zhɛ ba lashɛga iŋ no olugwo hiŋ.

⁹Gamba AGWANGWAMA na shɛ Agwatana na Hwuri Kpaaŋ, N hiɛŋ, Ahiɛba onongbo, n lụpɛ ma dee maa ma hi mapana iwɛ. N zha shɛ ma hi mapana iwɛ kwukwuŋ iwɛ upwaŋ gana ga o.

¹⁰Gamba AGWANGWAMA na Hwuri Kpaaŋ, N hiɛŋ, Ga bụtụ bu ko na ashashɛ hiŋ kepenji shidubo shi umwono mu, iwɛ maa kede hi shanɛ ya ulwa nu utukwu mu gbi o. N zasa amɛ-olom ne hiŋ o, iwɛbɛ po Ngaa zha shɛ ma lashɛga apwaŋ hiŋ.

¹¹Atwa zhɛ ma n muna ụjɛrụma na ashashɛ edenji, te kwune nu uwaŋna-banụ tutu i ci uwaŋna-twonuo, ɛɛ zhɛ du kaa no mo hwoŋzhingono iturɛre keeni ụrụpɛ tụrụmbɛɛ no olugwo elele. Edenji zhɛ ma n muna ụjɛrụma na ashashɛ aba.

¹²Ama hi m ngbaracɛ cwɛŋ aka na ɛhi hiɛŋ maa utukwu-ụrụpɛ mu hashɛganụ, ụrụpɛ na kaa te shi eshe, ubwa ahia ta nu utukwu mu, ibɛ po aa ngbaracɛ ụŋ cwɛŋ.

¹³Gamba AGWANGWAMA na Hwuri Kpaaŋ, N hiɛŋ, Hi ma gagwụmana maa hi lukwumi hwɛɛ, ehi mo n sumono.[3] Ehi n sugeni du kaa sasana iyimabiga nɛ ahiɛ lashajɛ na abwagara,[4] ti inɛɛ nɛ ye shikoto, ti inɛɛ nɛ ya gwumanga maa hi to ụrụpɛ pi mi. Hi heŋshi ree maa N zhɛ ma lashɛga upwaŋ gana ata no olugwo hiŋ?

¹⁴Gamba AGWANGWAMA na Hwuri Kpaaŋ, N hiɛŋ, Go unu-tukalana 'imɛ bụtụ be elele na 'yajɛ iyimabiga ibiye, na du kaa n shileni-unu maa bi zhɛ ma m pana iŋ, nazhɛ bee m peni shi, bee tileni iŋ iwɛ ukanyi ubwa, nazhɛ baa ta ụrụpɛ pi mi ni inɛɛ nɛ ya gwuma keeni inɛɛ nɛ ɛɛ 'imɛ na abwagara. Iwɛnɛ po Gamba n shɛ Agwuma a'wụtụ 'wụtụ, edenji elele ma n sụma inyɛsɛ na ashashɛ aba.