Read bassa MALAKAI 2 Bible Online

MALAKAI 2 - bassa bible

MALAKAI 2

¹Gamba AGWANGWAMA na Hwuri Kpaaŋ, ma hi pana-unu ga, ahiɛba onongbo.

²N hiɛŋ, Yaa shɛ ahiɛ shɛlajɛ shɛ, ehi shiyeni shi iŋ kaa na shɛmɛ shi hiŋ ma hi na maa muna ụjɛrụma, asha N zhɛ ma hi kalana-unu, Ngɛɛ zhɛ ma kalana du ewebiye hiŋ unu. Iwɛ-tɛkana, N kolonuo aŋ kaa unu cebe, iwɛnɛ ehi shiyeni shi iŋ na shɛmɛ shi hiŋ.

³N zhɛ ma tazhɛgana ajalalo hiŋ, nazhɛ Ngɛɛ zhɛ mo buso apɛshɛka hiŋ tuwiŋ ti iyimabiga ɛtɛ ahia ta arụpɛ, nazhɛ ma hiɛ bacɛnga no olugwo mi.

⁴Nazhɛ ɛhi zhɛ hia mapa maa Gamba n hi tumwananɛ la unu ata tụpana iwɛ maa go unu na Ngaa twa no onongbo a na shɛ ụlamụ Livai u to tuhwulo.

⁵Unu na Ngaa twa la na aba ụ shɛ unu-tutwa uraiŋ keeni una wa amɛ-olom, Gamba m peni aŋ la iwɛ maa a na nda inyɛsɛ, maa a na ma n sụma inyɛsɛ, iwɛ maa gɛ igɛhi izeci mi na ima aŋ.

⁶Aba mbisegeni[5] atwa iyi nɛ teni cɛŋ, iyi nɛ 'wanjɛ beni shi nu unu wa aba o. E zhe tahaŋnụ ne mi na amɛ-olom, aa njɛ iyi nɛ teni cɛŋ, aa njɛ du kaa maa atwa ofwugwo jɛshɛrɛjɛ maa e genji iyi iwɛ nɛ aa ga nda.

⁷I shɛ tijama to onongbo maa o no mbisogono atwa iyi-tumapa ya Agwatana, nu unu wa aba kaa du atwa shɛ o no soso iyi tusokokono, iwɛnɛ ta a shɛ atumwa AGWANGWAMA na Hwuri Kpaaŋ.

⁸Gamba AGWANGWAMA na Hwuri Kpaaŋ, N hiɛŋ onongbo, Hiɛ vwụrɛ ehi genji uhwaŋna na teni cɛŋ, imbisegeni hiŋ njɛ maa ga atwa ofwugwo twa udukwutwa. Hi tecinji unu na Ngaa twa la na Alivai ụdamụ.

⁹Iwɛbɛ po Ngaa njɛ maa ga atwa Isrɛl a hiɛ ngbaraka du cwɛŋ bana, maa kede a 'wa iwɛ hiŋ o, iwɛnɛ ta hiɛ 'wa sụ ukwulana mu, ahia zanga atwa ni imbisegeni hiŋ undwa nɛ ahia nda.

¹⁰Shɛ bishi bu ko maa atɛ shɛ? Shɛ Agwatana oko maa utu karɛ? Iwembe po tuba atɛ shɛ shɛ ya atwa tɛcara na anya tuu? Atu ma bwada unu na Agwatana twa la ne eshi tuu?

¹¹Ụlamụ Juda shɛ shɛ atwa tɛcara o, a njɛ tupwaŋ na cɛnjɛ ti Isrɛl, tu Jɛrusalɛm. Atwa tijilo Juda a na Agwatana o lubo meme heshigeni, aa zanɛ eyikwo cɛnjɛ ti nya a na a zhɛba tuwa.

¹²Ga AGWANGWAMA na Hwuri Kpaaŋ becinji bụtụ be elele na njɛ ijɛ na tu'ulwa ta atwa Isrɛl,[6] maa kede ba 'yaga ya okwo ụlamụ na tɛ zhɛ wa la tiseyida ta AGWANGWAMA o, maa kede du o to ya okwo ụrụpɛ pa AGWANGWAMA kwukwuŋ.

¹³Inyɛwɛŋ nɛ ahia nda na, hio lomicingo utukwu-ụrụpɛ wa AGWANGWAMA na malaba mu u'wo hiŋ shakpaa, ahia kala n'ungwa gboo, iwɛnɛ bee peni shi ya abashɛ, bee leshiji shi ya kaa iyi ya arụpɛ hiŋ.

¹⁴Hio unsono maa, Iwembe po bee leshiji shi aŋ yaa? Iwɛnɛ ta AGWANGWAMA kwụbɛ maa hi bweji unu na ahiɛ twa la ne eyikwo na ehi zeni la ne tisemberi ti hiŋ, okwo ta a shɛ eyikwo hiŋ a na ahi twa la unu na aba, hi shanɛ shɛ aŋ waa kaa atwa tɛcara o.

¹⁵Shɛ Agwatana suu njɛ maa hiɛ shɛ tu'waba tu ko[7] keeni ohwulu oko[8] ne biyikwo ata? Iwembe poo? Iwɛnɛ tu baa jala maa hi meci miaụŋ mu na mi zhɛ ma 'wa bụ no tugom. Iwɛ ecilo ata nda ma pece maa kede bụtụ be elele bweji unu na baa ga twa la ne biyikwo na bee zeni ne tisemberi tu bwa o.

¹⁶AGWANGWAMA na shɛ Agwatana Isrɛl, hiɛŋ, Mo imo[9] atwa na a 'waŋ eyikwo aba, keeni atwa na a nda eyikwo aba ogbo, iwɛ ecilo ata nda ma pece maa kede hi bweji tɛcara ti hiŋ ne eyikwo hiŋ keeni anya atwa o. AGWANGWAMA na Hwuri Kpaaŋ Ubwa jɛmɛ.

¹⁷Hi lukwucinji AGWANGWAMA nu n-ndumwa mi hiŋ, ama hi tɛ hiɛŋ waa maa, Ni imbe etu lukwucinji buu? Hi lukwucinji bu nu n-ndumwa ma ata ahia duma maa, Bụtụ be elele na ba nda iyi iwɛ asha ubwa shɛ ya bụtụ bi biye ne eshe AGWANGWAMA, aba du kaa baa ndana unyasa, keeni tu'unsono ta ata ohio unsono maa, Cee kwuŋ Agwatana ata a duma ụshɛrɛya u tishiriri namɛ yaa?