Read bassa MALAKAI 3 Bible Online

MALAKAI 3 - bassa bible

MALAKAI 3

¹Gamba AGWANGWAMA na Hwuri Kpaaŋ, N hiɛŋ, Hioko ma, N zhɛ ma tumwanɛ butumwa mi[10] maa bu na ma kalana uhwaŋna nu umbe mu. Nazhɛ AGWANGWAMA ata ahia jalakaka zhɛ e teni nu umwono ubwa eshigiri, nazhɛ butumwa ata bu unu-tutwa ahia nda ashɛlatụ ubwa zhɛ ba zhajɛ.

²Ama gaaba zhɛ ba la hwuŋ egiri nụ ụjita ata bɛɛ zhɛ ba zhajɛɛ? Gaaba zhɛ ba ala hwuŋ tishikono nụ ụjita ata bɛɛ zhɛ ba banɛ upejee? Iwɛnɛ po bi zhɛ ba sha gana ulwa na wa nyashɛnga ashɛmbɛrɛ keeni gana ukwo tugwuno tɛnyashɛnga.

³Bi zhɛ ba gɛga gana bụlụma na ba nyashɛnga azụrụfa maa nda aŋ rụmbɛɛ, bi zhɛ ba nda miaụŋ mi Livai[11] shɛshɛshɛ gana azụrụfa keeni azhɛnarɛya na aa nyashɛnjɛ maa e peni AGWANGWAMA ụrụpɛ na teni cɛŋ.

⁴Nazhɛ ụrụpɛ na atwa Juda keeni atwa Jɛrusalɛm zhɛ a ta, zhɛ wo lomicingo AGWANGWAMA amɛ, gana na woo lomicingwo bu la amɛ na shiywa shɛ na shi koshikwo cala.

⁵Gamba AGWANGWAMA na Hwuri Kpaaŋ, N hiɛŋ, N zhɛ ma zhajɛ maa mo hi dongonu iwɛ ụshɛrɛya, Ngɛɛ zhɛ ma sha useyida na zhɛ wa sukakana anjɛ-tishino, na anjɛ-tuwɛle, ne ejwe-ụzagwụ, na atwa na a ya buhwɛŋ bụ ụgwụ imwere ni itimɛ ya aba, ta atwa na a nda olulo na miaụŋ-me-e'weteji tuhwulo, na atwa na a nda alashɛ alaacɛ keeni atwa na n sụmɛ shɛ inyɛsɛ kakayɛ.

⁶Iwɛnɛ po Gamba n shɛ AGWANGWAMA, N sheyinji shi o, ahiɛba ajalalo Jekob, hi sheyinji shi du kaa o.

⁷Gamba AGWANGWAMA na Hwuri Kpaaŋ, N hiɛŋ, Hiɛ jɛshɛrɛjɛ ehi genji andwa mi, te kwune taa no ogwunukwoshi hiŋ, hi 'wa sụ aŋ o. Gwure ma pi mi, nazhɛ Ngɛɛ zhɛ me gwure pi hiŋ. Ama hi hiɛŋ Gana na ɛti zhɛ te gwure pụ bụụ?

⁸Bụtụ suu ba ya hwuŋ Agwatana imwere? Ama kaa hi ma n ya imwere. Ama hio unsono, ɛhi hiɛŋ, Ni imbe ata bụ ya imweree? Hi ma n ya imwere ni iyi-umpwa hiŋ keeni apwaŋ hiŋ.

⁹E keleni udenji hiŋ unu hwɛɛ, iwɛnɛ ahi ma n ya imwere.

¹⁰Gamba AGWANGWAMA na Hwuri Kpaaŋ, N hiɛŋ, Suje ma iyi-a'umpwa hiŋ hwɛ hwɛɛ nu urubwu mu, iwɛ maa iyimɛyɛ nama nu ubwa duwa, nazhɛ hi m menji okwo N zha shɛ ma hiɛ kapɛshɛngana tụla maa mɛ hi 'wɛnjɛ uwebiye nɛ ahiɛ zha shɛ hio gwushigo ohwolu na zhɛ a la iŋ.

¹¹Nazhɛ Ngaa zha shɛ mo lono ya maa iyɛɛyɛɛ timengeni iyimɛyɛ ne shihilo shi hiŋ kwukwuŋ, shifwafwa she shihilo shi hiŋ shi zha shɛ sho ngwulo tụ'walụ o.

¹²Gamba AGWANGWAMA na Hwuri Kpaaŋ, N dumwa, Ngɛɛ hiɛŋ, Nazhɛ edenji kpaaŋ zhɛ ma hi suyana maa atwa na gwoje; iwɛnɛ ta cɛnjɛ ti hiŋ ti zhɛ ta sha cɛnjɛ tu na tɛ zhɛmɛ tunama.

¹³Gamba AGWANGWAMA, N hiɛŋ, Hi mo n zwogono n-ndumwa mụ wɛ, ehi to unsono waa maa, n-ndumwa mụ wɛ mi imbe oto bu zwogonoo?

¹⁴Hia dumanga maa, Iyi tɛndana Agwatana zasa ule o; ɛhi hiɛŋ, Cee titeni tu na eti teni nu unu ubwa tụpana na atu untanganɛ tu namɛɛ? Imbe ɛti bwɛ ya nu ụkwụla na otu to nu umbe AGWANGWAMA na Hwuri Kpaaŋ, iwɛ iyi iwɛ nɛ atu ndanjɛɛ?

¹⁵Gana atụ kwụbɛ iŋ na, maa atwa tubusa aba shɛ atwa na gwoje. Atwa na kaa a nda iyi iwɛ, shɛ tɛzhɛmana kiri yaa zhɛmana aŋ o, ama okwo ee mbiseji Agwatana n-ndumwa mụ wɛ, aba kaa a banangana waa.

¹⁶Aka na atwa na a sụma Agwatana inyɛsɛ a njɛ n-ndumwa abaaba, ibɛ Agwatana shɛlaganɛ aŋ, baa hwụjɛ kaa. Iwɛbɛ po ee 'nyeci nzeci[12] ma atwa elele na a sụma Agwatana inyɛsɛ, a na kaa a muna bụ ụjɛrụma nu utakada u titeyinje na namba na agba ubwa.

¹⁷Nazhɛ Ngaa jɛmɛ, Gamba AGWANGWAMA na Hwuri Kpaaŋ, Ngɛɛ hiɛŋ, Aba zhɛ a sha hwuŋ atwa mi ticinji nụ ụjita na Ngɛɛ zhɛ ma nda iyi nɛ Ngɛɛ hiɛŋ N zhɛ ma nda. N zhɛ mo hioko inyɛmɛnyɛmɛ ya aba gana na bishi bo hioko inyɛmɛnyɛmɛ yɛu ibwɛ nɛ ya ndana bụ ugondu.

¹⁸Ụjita ata ci hwuŋ, nazhɛ ɛhi zhɛ hia kwụba tuswoswoswo ti iyi nɛ zhɛ yo jitono atwa tiririri no ogworozwo keeni atwa na ndanɛ la Agwatana ugondu, na atwa na lacɛ maa a ndanɛ bụ la ugondu.