Read bassa MATIU 12 Bible Online

MATIU 12 - bassa bible

MATIU 12

¹Na aka ata ge Jisus zhɛ tɛkashɛka ni itimɛ nɛ iyimɛyɛ te shikeni nụ Ụjita-ụhinjanụ we Eju. Imunɛ kaa gwụmɛ eseshi-iyi ubwa, ibɛ po aa cushanga ongbongbozu iyimɛyɛ ɛtɛ, aa shɛcɛma ni i'ɛlɛ, aa ya.

²Aka na ta Afarisi kwụbɛ aŋ, ɛɛ hiɛŋ Jisus, Hioko, te eseshi-iyi bu a nda iyi nɛ Undwa leni shi maa bụtụ njɛ nụ Ụjita-ụhinjanụ.

³Ama ge Jisus hiɛŋ aŋ, Hi ta rɛcɛ shɛ suu iyi nɛ ge Devid njɛ la, medenji atwa na namɛ nu bwa, ti imunɛ gwụmɛ aŋ?

⁴Gana na ti bee teni nu umwono wa Agwatana, baa yɛ ibrɛd tijilo nɛ undwa ge leni shi maa tu bwa, ta atwa na namɛ nu bwa a yɛ, semi onongbo kiri.

⁵Okwo hi ta rɛcɛ shɛ suu nu Undwa, maa onongbo na a nama nu Umwono wa Agwatana nụ Ụjita-ụhinjanụ we elele, a hashɛgana Ụjita-ụhinjanụ, ama e peni shi aŋ kaa n-ndumwa-tụwụma o.

⁶Ama Mo hi mbiso maa, iyi nɛ kaa uhwuri Umwono wa Agwatana namba epe.

⁷Yaa shɛ ehi ge mepi ecilo iwɛ ɛtɛ, nɛ hiɛŋ, Inyɛmɛnyɛmɛ Ama jala, shɛ ụrụpɛ o, hi ga zha shɛ hia pana atwa na njɛ shɛ iyi iwɛ n-ndumwa-tụwụma o.

⁸Iwɛnɛ po Yɛu bụtụ, ubwa shɛ Agwangwama Ụjita ata ụhinjanụ.

⁹Ti ge Jisus beni apata, bee teni nu umwono wa aba u tụ'ụlwatagwụ uko.

¹⁰Hioko, bụtụ bu ko namba apata na u'ala ubwa hwe. Ee unseni Jisus, ɛɛ hiɛŋ, Undwa leni suu maa a nɛnjɛ bụtụ nụ Ụjita-ụhinjanụ? Iwɛnɛ ta a jala iyi nɛ i shɛ maa a suyanɛ bụ ụshɛrɛya.

¹¹Ge Jisus jishijɛ aŋ, bɛ hiɛŋ, Gaaba namɛ na ashashɛ hiŋ, na 'yajɛ ụgwụdụ uko gba, na shɛ maa ụgwụdụ ata ubwa leyi nu u'ibwa, i shɛ bi zha shɛ bɛ vwɛ ụŋ okwo nụ Ụjita-ụhinjanụụ?

¹²Shɛ bụtụ suu uhwuri ụgwụdụ? Undwa leni kaa maa bụtụ na nda iyi ibiye nụ Ụjita-ụhinjanụ.

¹³Nazhɛ bɛɛ hiɛŋ bụtụ ata, Ndarɛshɛnga u'ala bụ. Bụtụ ata nderishinji ga u'ala ubwa, waa zhɛmananɛ, waa shaananɛ gana una uyebi.

¹⁴Ama Afarisi beni, aa njɛ ushaura iwɛ uhiuhiu Jisus, gana na i shɛ maa a kwụnɛ bụ.

¹⁵Ti ge Jisus mepi iwɛ ɛtɛ, bee beni apata. Atwa ofwugwo ụ'wụtụ kaa 'wa bụ, baa nɛnjɛ aŋ hwɛɛ.

¹⁶Baa tɛtaganɛ aŋ unu maa kede e mbishi atwa iwɛ ubwa o,

¹⁷iwɛ maa iwɛ nɛ ga Ayizaya bigesere ata dumwa la sɛ, aka na bɛɛ hiɛŋ,

¹⁸Hioko ma, Yɛu mi ugondu, nɛ Ngee teri, bụtụ mi na Omo lubo duwa, amɛ mi kaa lemi nu bwa tebiye. N zhɛ mo urugono bu Mpiala mi mi ubwa zhɛ ba shapɛrɛganɛ edenji ụshɛrɛya u tishiriri;

¹⁹bi zha shɛ ba nda ashamanjɛ o, bi zha shɛ kaa du ba ugana o; za bụtụ zhɛ ba hwuga rụhwụŋ ru bwa okwo ni ihwɛŋnɛ o.

²⁰Bi zha shɛ kaa ba hwaŋzhɛnga bininjidegbe na aa pɛpɛtanɛ o, bi zha shɛ kaa bo 'woricingo buzuzu bụ ụsụtụla na ta bana nshikwo, ama ubwa kaa zhɛ bɛ bɛcinjɛ ụshɛrɛya na zhɛ wa lasụ atwa.

²¹Izeci ibwɛ kaa edenji zhɛ a shɛlana.

²²Aa shapɛrɛganɛ Jisus bụtụ bu ko na butumwa-bi-ibiri namɛ na amɛ ubwa, na du lubeni, na kaa shaananɛ igwureni. Baa nɛnjɛ bụ, igwureni ɛtɛ dumanɛ iwɛ, baa kwụbɛ du uhwaŋna.

²³Ibɛ po iwɛ ubwa dama atwa ata kpaaŋ, ɛɛ hiɛŋ, Shɛ Yɛu Devid na maa?

²⁴Aka na ta Afarisi hwụjɛ iŋ, ɛɛ hiɛŋ, Shɛ bụtụ ga ba bacɛnga atumwa ga ibiri[24] o, semi tedure nu ukpahiŋ uhiu-ibiri, ibɛ baa nda iŋ.

²⁵Ti ge Jisus mepi shihaŋsa sha aba, bɛɛ hiɛŋ aŋ, Cɛnjɛ-ta-tugwama te elele tu mama sukakanụ kwo kaa tu momo bogotogwu, ti zhɛ ta sha gana ụshɛka. Kwo kaa ụshɛpwụ kwo kaa ihwɛ ye elele nɛ mama sukakanụ, yoo bogotogwu, ihwɛ ɛtɛ zha shɛ yo shikono.

²⁶Yaa shɛ ge Setan ba bacɛnga Setan, boo bogotogwu, iwɛ maa bu na mama sukakana; asha gana naa cɛnjɛ-ta-tugwama tu bwa ti zhɛ to shikonoo?

²⁷Yaa shɛ tedure nu ukpahiŋ uhiu-ibiri Ama bacɛnga atumwa-ibiri, asha tedure nu ukpahiŋ aba tuba miaụŋ mi hiŋ mi zhɛ ma bacɛnga aaŋ? Asha aba zhɛ a sha ya ajɛmɛ-ụshɛrɛya hiŋ.

²⁸Ama yaa shɛ Ama bacɛnga atumwa-ibiri nu ukpahiŋ Mpiala ma Agwatana, asha Cɛnjɛ-ta-tugwama ta Agwatana ti zhajɛ ga pi hiŋ gom.

²⁹Gana naa bụtụ be elele eri bo tono nu umwono bụtụ na 'yajɛ ikɛnyi, maa sugo i'wɛŋnɛ ibwɛ, ti yaa shɛ shɛ aka na bee umpi tugwo bụtụ ata bi ikɛnyii? Nazhɛ bee eri bo sugo ya i'wɛŋnɛ ibwɛ nɛ zweni nu umwono ubwa.

³⁰Bụtụ be elele na zasa ne mi, asha ubwa ma n sukakana, bụtụ be elele na kaa m mbiyeni shi tusutongono, asha ubwa ba garataga.

³¹Mo hi mbiso iwɛ-tɛkana, maa ɛ zhɛ a gangana atwa iwɛwɛ ye elele, keeni n-ndumwa mụ wɛ me elele, ama bụtụ na ba dumangana Mpiala mi Tijilo n-ndumwa mụ wɛ, a zha shɛ a gangana bụ kwukwuŋ.

³²Bụtụ be elele na ba dumangana Yɛu Bụtụ n-ndumwa mụ wɛ, ɛ zhɛ a gangana bụ, ama bụtụ be elele na ba dumangana Mpiala mi Tijilo n-ndumwa mụ wɛ, a zha shɛ a gangana bụ kwukwuŋ, okwo na aka ga, kwo kaa na aka ye te ci hwuŋ.

³³Yaa shɛ ụ'wụ'wụ zhɛmɛ, u zhɛ du wa 'wala tụ'walụ tu na tɛ zhɛmɛ, ama yaa shɛ ụ'wụ'wụ zhɛshɛ, u zhɛ du wa 'wala tụ'walụ tu na tɛ zhɛshɛ. A mapa kaa ụ'wụ'wụ we elele na tụ'walụ tu bwa.

³⁴Ahiɛba ụsụbwa miaụŋ me egbezhi, ahiɛba atwa awɛ, gana naa ehi eri hia duma iyi ibiyee? Iwɛnɛ tu unu bụtụ wa duma iyi nɛ ya gwuzhaga na amɛ ubwa.

³⁵Bụtụ bi biye bɛ bɛcinjɛ iyi ibiye, nɛ shini na amɛ ubwa ebiye, bụtụ bụ wɛ kaa du bɛ bɛcinjɛ iyi iwɛ, nɛ shini na amɛ ubwa awɛ.

³⁶Iwɛ-tɛkana Omo hi mbiso maa, ụjita ụshɛrɛya ci hwuŋ, atwa zhɛ e sweji sasana n-ndumwa mu tɛgadaga me elele mu na aa dumwangwa la.

³⁷Tedure nu n-ndumwa mu na aba duma, ɛɛ zhɛ ma bụ pana n-ndumwa-zhɛ, nu n-ndumwa mu na kaa aba duma, ɛɛ zhɛ du ma bụ pana n-ndumwa-tụwụma.

³⁸Nazhɛ umeseyi uko na ashashɛ embisegeni Undwa keeni Afarisi oko, hiɛŋ Jisus, E-bimbisegeni, ta jala maa utu ndanɛ useyida uko maa ta kwụba.

³⁹Ama ge Jisus jishijɛ aŋ, bɛɛ hiɛŋ, Uwaŋnɛ ga ụwɛ, keeni uwaŋnɛ ga wa nda tuwɛle, wa jala useyida, a zha shɛ kaa a ndana uŋ useyida we elele o, semi useyida iyi nɛ teneni la bigesere ata go Jona kiri.

⁴⁰Gana na tu go Jona namɛ la na amɛ bijana ata bụ 'wụtụ, iwɛŋnɛ itɛtu keeni ijitɛ itɛtu, gobwonu du Yɛu Bụtụ zhɛ ya nama na amɛ ohwulu cɛnjɛ tu unyizo ga, iwɛŋnɛ itɛtu keeni ijitɛ itɛtu.

⁴¹Atwa Ninivɛ zhɛ a sukakana hwuŋ atwa uwaŋnɛ ga nụ ụshɛrɛya, ɛɛ zhɛ a pana uŋ n-ndumwa-tụwụma nụ ụjita ụshɛrɛya. Iwɛnɛ po aka na ta atwa Ninivɛ hwụjɛ la i'enenji Jona, aa jɛshɛrɛjɛ-shihaŋsa sha aba. Hioko ma, iyi nɛ kaa uhwuri Jona na namɛ epe.

⁴²Agwuma-o-o na namɛ Tuta, zhɛ a sukakana hwuŋ atwa uwaŋnɛ ga nụ ụshɛrɛya, bɛɛ zha ba pana uŋ n-ndumwa-tụwụma nụ ụjita ụshɛrɛya. Iwɛnɛ tu baa banɛ taa dụlụ, baa zhajɛ maa hwuga iwɛ ti'inta ta agwuma Sụlụmụn. Hioko ma, iyi nɛ kaa uhwuri Sụlụmụn nɛ namɛ epe.

⁴³Aka na tu mpiala mụ wɛ mi beni na amɛ bụtụ, ma bana urungo no ofwo elele na zasa meni, maa mu to ụhinjanụ, ama aka na maa kwụbɛ shɛ.

⁴⁴Nazhɛ mɛ hiɛŋ, N zhɛ ugwulwo ni ihwɛ mi ingwụshɛ nɛ Ngaa banɛ la. Aka na tu mee gwure, maa kwụbɛ maa ihwɛ ɛtɛ ibwɛ ta namɛ bohondo, yee te suji kaa shɛshɛshɛ, aa ta njɛ iŋ kaa du tisemberi.

⁴⁵Nazhɛ mee zhe mee suje mpiala mụ wɛ mi nya mi cenje, mu na mu wumanjɛ mu hwuri mu, mee zhe mee teni apata maa jɛjɛ. Nazhɛ bụtụ ata wumanjɛ ya nu ukwunanga ubwa uhwuri umozhigo ubwa. Gabata du yɛɛ zhɛ ya shana hwuŋ atwa uwaŋnɛ ga ụwɛ.

⁴⁶Aka na ti ge Jisus ta njɛ n-ndumwa na atwa ata ofwugwo, ibɛ bino bwa, no ohongwu ubwa shikekeni no tupohondo, aa jalakaka maa a dumanjɛ n-ndumwa nu bwa.

⁴⁷Nazhɛ bụtụ bu ko na ashashɛ atwa ata hiɛŋ bụ, Hioko tu go nobu, no ohongwu bu[25] shikekeni no tupohondo, aa jalakaka ohwolu maa a dumanjɛ n-ndumwa na bụ.

⁴⁸Ge Jisus jishijɛ bụtụ ata mbishi bu iwɛ ɛtɛ, bɛɛ hiɛŋ bụ, Gaaba shɛ bino mi, no ohongwu mii?

⁴⁹Bee sekeni eseshi-iyi ubwa u'ala ubwa, bɛɛ hiɛŋ, Bino mi, no ohongwu mi na namɛ epe!

⁵⁰Bụtụ be elele na ba nda ụkwụlana Bishi mi na namɛ na azuba, asha ubwa shɛ buhongwu mi, na bụngwụfwụ mi keeni bino mi.