Read bassa MATIU 18 Bible Online

MATIU 18 - bassa bible

MATIU 18

¹Na aka ata eseshi-iyi zhaganɛ Jisus, ee heŋteni bu, ɛɛ hiɛŋ, Gaaba kwuŋ hwuri atwa vwɛ na Cɛnjɛ-ta-tugwama ta azubaa?

²Ge Jisus suyanɛ yɛu ike ticwɛŋ, bee shikicinji iŋ na ashashɛ aba,

³bɛɛ hiɛŋ aŋ, Iwɛ-tɛkana Omo hi mbiso, yaa shɛ ahiɛ jɛshɛrɛjɛ shɛ, maa hiɛ shɛ gana miaụŋ mu ga mi tidice dice, hi zha shɛ hio tono Cɛnjɛ-ta-tugwama ta azuba kwukwuŋ.

⁴Ama bụtụ na meme zucinje gana yɛu gɛ ticwɛŋ, ubwa zhɛ bo hwulo hwuŋ atwa vwɛ na Cɛnjɛ-ta-tugwama ta azuba.

⁵Bụtụ be elele na kaa ba la yɛu gɛnɛ gɛ ticwɛŋ ike ni izeci mi, asha Gamba baa la.

⁶Ama bụtụ be elele na ba nda miaụŋ mu ga mi tidice dice mu n tɛtanɛ-rishe ukwurishi,[37] asha i debeji maa o to bu inɛnɛ ni i'ilu, maa e iricinji bu ni itekwu nɛ iri.

⁷Unyizo ga zhɛ wa nda hwuŋ adangboo iwɛ iyi ukwurishi. I tilɛɛ kaa yaa shɛ maa iyi ukwurishi zhɛ ya zhajɛ, ama bụtụ na iyi ukwurishi ɛtɛ dure no olugwo ubwa, bi zhɛ ba nda hwuŋ adangboo!

⁸Ama yaa shɛ u'ala bụ kwo kaa uvwuna bụ ma bụ nda ukwurishi, jaja uŋ kala, i zhɛ ma bụ zhɛmana maa teni nu uraiŋ no tukwuturu, kwo kaa no tu'wogono uhwuri maa 'yaga i'ɛlɛ iyebi kwo kaa ivwunɛ iyebi, maa e bi keri nu ukwokwo ulwa unyizo-nom.

⁹Yaa shɛ kaa rishe rụ bụ ru ma bụ nda ukwurishi, vwa rụ kala, i zhɛ ma bụ zhɛmana maa teni nu uraiŋ ne rishe ru ko, uhwuri maa 'yaga eshe eyebi, maa e bi keri nu ukwokwo ulwa.

¹⁰Na nda ma pece maa kede hi na ngbaraka okwo yɛu ike na ashashɛ miaụŋ mu ga mi tidice dice cwɛŋ kwukwuŋ. Mo hi mbiso maa, atumwa aba namba na azuba aa ngbaraka eshe Bishi mi na namɛ na azuba aka elele.

¹¹[Yɛu Bụtụ zhajɛ maa bicingo atwa na 'inɛ.][38]

¹²Imbe kwuŋ ehi heŋshii? Yaa shɛ bụtụ bu ko 'yajɛ agwụdụ dipi-yebi, nazhɛ bu ko 'inɛ na ashashɛ aba, bi zha shɛ suu ba ganga a na ta vwɛ dupu-na-buhanda-na-ba-ecinjishi nu nshama, maa jalakaka bu na ata 'inɛ?

¹³Iwɛ-tɛkana Omo hi mboso maa, yaa shɛ boo to bu ugbe, ba nda unyasa iwɛ ubwa uhwuri agwụdụ dupu-na-buhanda-na-ba-ecinjishi a na ga 'inɛ shɛ.

¹⁴Gabata du, i shɛ shɛ ukwulana Bishi hiŋ[39] na namɛ na azuba maa okwo yɛu ike na ashashɛ miaụŋ mu ga mi tidice dice mɛ njɛ ufwu o.

¹⁵Yaa shɛ yɛu-bino bu ubu njɛ iwɛwɛ, zhaga mbiso bu na ashashɛ hiŋ ehie yebi kiri. Yaa shɛ baa hwụjɛ iwɛ bụ, asha bɛ yɛ ule yɛu-bino ɛtɛ bụ.

¹⁶Ama yaa shɛ baa hwụjɛ shɛ iwɛ bụ, asha suyana bụtụ bu ko kwo kaa atwa eyebi maa e bi she, iwɛ maa n-ndumwa me elele mu na kwunanga tedure nu unu we eseyida eyebi kwo kaa atatụ.

¹⁷Ama yaa shɛ iwɛ ya aba tatụlanụ sụ bụ, asha zhaga mbiso tụ'ụlwa-tụ-ụhiɛŋshɛ-Agwangwama. Yaa shɛ kaa iwɛ tụ'ụlwa-tụ-ụhiɛŋshɛ-Agwangwama tatụlanụ sụ bụ sasana, asha ga ma bụ shana gana bụtụ na tɛtanɛ shɛ rishe keeni bile-bụ-ụdalụ.

¹⁸Iwɛ-tɛkana Omo hi mbiso, Iyi elele nɛ ehi umpi nu unyizo ga, asha e umpi iŋ du na azuba, iyi elele nɛ kaa ehi tufwurinji nu unyizo ga, asha e tufwurinji iŋ du na azuba.

¹⁹Iwɛ-tɛkana Omo hi mbiso sasana, yaa shɛ unu wa atwa eyebi ụ shɛ uko ni iyi elele nɛ aa nda adua ibɛ nu unyizo ga, asha Bishi mi na namɛ na azuba zhɛ ma hi ndana iŋ.

²⁰Ofwo na atwa eyebi kwo kaa atwa atatụ ulwa ni izeci mi, N namba apata na ashashɛ aba.

²¹Nazhɛ ga Pita zhajɛ pi Jisus, bee heŋteni bu, bɛɛ hiɛŋ, Agwangwama, kpalụ mba kwuŋ yɛu-bino mi zhɛ ma n nda iwɛwɛ nazhɛ ma gangana bụụ? Uuwa i ci kpalụ cenje suu?

²²Ge Jisus hiɛŋ bụ, Shɛ kpalụ cenje Ngɛɛ bi hiɛŋ o, ama kpalụ dupu-nu-woshi karɛ cenje (490).[40]

²³Cɛnjɛ-ta-tugwama ta azuba tɛ shɛ gana agwuma oko na a jala maa kwunanga iyi ti'imanga na miaụŋ mu bwa mu ugondu.

²⁴Aka na bee kwuni iŋ ti'imanga, aa shapɛrɛganɛ bụ bụtụ bu ko na ga 'yajɛ bụ utashɛ azhɛka igbɛɛ-itɛ (1,000,000),[41]

²⁵Bụtụ ata kaa zasa iyi nɛ maa tụpa utashɛ ata o. Ibɛ po agwuma-ihwɛ ibwɛ peni atwa ubwa unu maa ge e senji bu, te biyikwo bwa, ta miaụŋ mu bwa keeni iyi elele nɛ baa 'yajɛ iwɛ maa tụpa utashɛ ata.

²⁶Ibɛ po yɛu ɛtɛ ugondu leyi na cɛnjɛ ni ivwunɛ ibwɛ, baa lụpɛ bụ, bɛɛ hiɛŋ, Ima kaa isɛbwɛ, N zhɛ ma bụ tụpa uŋ kpaaŋ.

²⁷Ibɛ po agwuma-ihwɛ yɛu ɛtɛ ugondu hieci inyɛmɛnyɛmɛ ibwɛ, bee gengeni bu utashɛ ata kpaaŋ maa hwulo.

²⁸Ama aka na ti yɛu ɛtɛ ugondu beni apata, baa kwụbɛ yɛu-ugondu inyɛ nɛ 'yajɛ bụ du utashɛ unaira uko[42] gba, baa zukpanɛ bụ, bee kwuni bu urworwo tufwaŋ. Bɛɛ hiɛŋ bụ, N cɛpɛ utashɛ mu.

²⁹Ama yɛu ɛtɛ ugondu leyi na cɛnjɛ ni ivwunɛ ibwɛ, baa lụpɛ bụ, bɛɛ hiɛŋ, Ima kaa isɛbwɛ, N zhɛ ma bụ tụpa uŋ kpaaŋ.

³⁰Ama bi leni shi o, bee shepi bu bee keri nu umwono-tishi, uuwa i ci aka na baa cɛpɛ bụ utashɛ ata ba ga yɛ bụ hwɛɛ.

³¹Aka na ta miaụŋ-mu-ugondu mụ vwɛ mụ kwụbɛ iyi nɛ baa njɛ, shɛmɛ sha aba shɛ hashaganụ duwa, ee zhe, ee mbishe agwuma-ihwɛ aba iyi nɛ baa njɛ kpaaŋ.

³²Aka na ta agwuma-ihwɛ ibwɛ suyanɛ bụ, baa zhajɛ, bɛɛ hiɛŋ bụ, Gabụ yɛu-ugondu iwɛ, utashɛ ata Ngee bi gengeni hwɛɛ, aka na abụ n lụpɛ,

³³i ga shɛ shɛ suu du tilɛɛ maa hieci inyɛmɛnyɛmɛ yɛu-ugondu inyɛ, gana na Ngee hieci la inɛɛ bụ?

³⁴Ibɛ po agwuma-ihwɛ ibwɛ njɛ isɛbwɛ nu bwa, bee peni bu atwa na zhɛ a pana bụ du ụbaụta, uuwa i ci aka na baa cɛpɛ utashɛ ata baa ga yɛ la hwɛɛ.

³⁵Gabata du Bishi mi na namɛ na azuba zhɛ ma hi nda, ti yaa shɛ bụtụ bụtụ na ashashɛ hiŋ gengeni shi binya bwa na amɛ ubwa kpaaŋ.