Read bassa MATIU 21 Bible Online

MATIU 21 - bassa bible

MATIU 21

¹Aka na to o gwumwonu nu Jɛrusalɛm, ee ci Bɛtifagi, na namɛ ni Ishɛmɛ Buta, ge Jisus tumwanɛ eseshi-iyi ubwa eyebi utumwa,

²bɛɛ hiɛŋ aŋ, Zhaga ma nụ ụshɛpwụ ga namɛ geri-be-eshe hiŋ, gunu ata hi zhɛ hia kwụba izhinyɛci nɛ ee umpi, to biywoywo bu bwa namba nu bwa. Tufwurinje aŋ ma, hi suje aŋ pi mi.

³Yaa shɛ kaa bụtụ be elele ihi heŋteni iwɛ ye elele, hiɛn bụ ma, Agwangwama[45] ubwa 'yajɛ uhwugwa na aba. Nazhɛ ɛɛ zhɛ ma hi ganganɛ aŋ gunu ata.

⁴Inɛ gɛ teni iwɛ maa iwɛ nɛ bigesere dumwa la sɛ, inɛ hiɛŋ,

⁵Mbiso ma atwa Jɛrusalɛm, maa, Hioko ma, agwuma hiŋ ta e ci pi hiŋ, bu meme-zucinje, baa patanɛ izhinyɛci, keeni biywoywo bi izhinyɛci.

⁶Eseshi-iyi ubwa zhe, aa njɛ ga gana ata ti ge Jisus ge peni aŋ unu.

⁷Aa shapɛ izhinyɛci ɛtɛ keeni biywoywo bu bwa, ee petengeni tugwuno ta aba na aba aba, nazhɛ ge Jisus munji baa jɛjɛ.

⁸Atwa ofwugwo ụ'wụtụ 'wụtụ beri otogwo aba nu uhwaŋna, atwa oko jwɛ abaga ishiwɛ, ee beri aŋ nu uhwaŋna.[46]

⁹Nazhɛ atwa na hwuri umbe, ta atwa na lɛ ekwunyi, a ugaga, ɛɛ hiɛŋ, Shɛtana ma Yɛu Devid! Zhemonjino ma bụtụ ata be ci ni izeci ya Agwangwama. Shɛtana ma azuba a'wụtụ a'wụtụ!

¹⁰Aka na ti ge Jisus teni Jɛrusalɛm, yaa dama atwa ụshɛpwụ ata ụ'wụtụ hwɛɛ, ɛɛ hiɛŋ, Gaaba na yaa?

¹¹Atwa ata ofwugwo hiɛŋ, Ge Jisus ganana, ubwa shɛ bigesere ata banɛ nu Nazarɛt na namɛ nu Galili.

¹²Aka na ti ge Jisus teni nu umwono wa Agwatana,[47] bee unzhi atwa elele na a sanga iyi keeni atwa elele na a sa iyi nu umwono ata wa Agwatana. Baa 'waŋtatanjɛ eteburu atwa na a nda usheyinji ukwuribi, keeni iyi ya ajɛjɛ ya atwa na a sanga nkwucimo.

¹³Bɛɛ hiɛŋ aŋ, E 'nyeci maa, ɛ zhɛ ɛ hiɛŋ, Umwono mu maa umwono wa adua. Ubwa tuba ahiɛ njɛ ụpangwụ wa ashɛrɛ.

¹⁴Nazhɛ sholubo, ta atwa na ivwunɛ ya aba 'wegeni zhajɛ pi Jisus nu Umwono wa Agwatana, baa nɛnjɛ aŋ.

¹⁵Aka na te ehiu onongbo keeni embisegeni Undwa kwụbɛ iyi ụrụhwajɛ nɛ baa njɛ, ta miaụŋ mu na ma ugaga nu Umwono wa Agwatana, ɛɛ hiɛŋ, Shɛtana ma Yɛu Devid, ibɛ po ehiu ata njɛ isɛbwɛ.

¹⁶Ɛɛ hiɛŋ Jisus, Bụ hwụjɛ shɛ maa iwɛ gɛ miaụŋ mu ga ma duma? Ge Jisus hiɛŋ aŋ, Iiŋ, hi ta rɛcɛ shɛ suu iwɛ ibɛ kwukwuŋ, iwɛ nɛ Utakada Iwɛ ya Agwatana dumwa la, nɛ imɛ iwɛ gɛ? I dumwa la, yɛɛ hiɛŋ, Nu unu Miaụŋ mi tidice dice, keeni miaụŋ mu na mu to subo, ashɛtwa na ulwa zhɛ a banɛ?

¹⁷Nazhɛ ge Jisus genji aŋ, bee beni nu ụshɛpwụ ata, bee hwuri ni Bɛtan, baa jɛjɛ apata.

¹⁸Aka na ti iyi heri, ti ge Jisus be teeneni ugwulwo nụ ụshɛpwụ ata nu uvwungwa dididi, imunɛ kaa gwụmɛ bụ.

¹⁹Baa kwụbɛ ụ'wụ'wụ uwowo uko tu wee shikeni nụ ụzalụ uhwaŋna, bee zhegeni uŋ, bụ kwụbɛtanɛ shɛ ụŋ tụ'walụ te elele o, semi ambɛ kiri. Bɛɛ hiɛŋ ụŋ, Te kwuni hwuwayɛ go, pushi geri-be-eshe, ta 'wala ya kwukwuŋ. Gunu ata uwowo ata hweteni.

²⁰Aka na te eseshi-iyi kwụbɛ iŋ, yaa dama aŋ, ɛɛ hiɛŋ, Gana na uwowo ga hwotwonuo hwuwayɛ go gana gaa?

²¹Ge Jisus jishijɛ aŋ, bɛɛ hiɛŋ, Iwɛ-tɛkana Omo hi mbiso, yaa shɛ ahiɛ 'yajɛ rishe-tɛtɛtana, ahiɛ njɛ shɛ oruwo, asha shɛ nu uwowo kiri ɛhi zhɛ hia nda iŋ o, ama okwo ishɛmɛ gɛ, ɛhi hiɛŋ iŋ, Mushingwo leyi ni itekwu, i zhɛ ya nda ga gana ata.

²²Iyi elele nɛ kaa ahia lụpa na adua ne rishe-tɛtɛtana, hi zhɛ hia lashɛga iŋ.

²³Aka na ti ge Jisus teni nu Umwono wa Agwatana, bee mbisegeni atwa iyi, nazhɛ ehiu onongbo, nu n-nyarɛ ma atwa ata zhajɛ pu bwa, ɛɛ hiɛŋ, nu ụhwada imbe kwuŋ aba ndangana ijɛ kpaaaŋ? Gaaba kwuŋ ubu peni ụhwada gaa?

²⁴Ge Jisus jishijɛ aŋ, bɛɛ hiɛŋ, N zhɛ mo hi hoŋtono du iheŋtene ike. Yaa shɛ ɛhi n tɛrɛ hwayɛ iheŋtene ɛtɛ, asha nazhɛ Ngɛɛ zhɛ mo hi mbiso ya ụhwada na Ama ndangana ijɛ kpaaŋ.

²⁵Ubaptizim ata ga Jon njɛ la atwa tubaa, na azuba suu waa banɛ okwo no olugwo atwa waa banɛ? Aa njɛ ushaura abaaba, ɛɛ hiɛŋ, Yaa shɛ ɛti hiɛŋ hwayɛ, Na azuba waa banɛ, bi zhɛ bɛ hiɛŋ, Asha iwɛmbe po tuba ahiɛ tɛtanɛ shɛ bụ la rishee?

²⁶Yaa shɛ kaa ɛti hiɛŋ hwayɛ, No olugwo atwa waa banɛ, inyɛsɛ ya atwa kaa itɛ shɛ. Iwɛnɛ ta atwa kpaaŋ rɛcɛ la Jon maa bigesere baa shɛ.

²⁷Ɛɛ jishijɛ bụ, ɛɛ hiɛŋ, Ti mepi shi ijiji o. Nazhɛ bɛɛ hiɛŋ aŋ, Asha N zha shɛ du mo hi mbiso ụhwada na Ama ndangana ijɛ kpaaŋ o.

²⁸Ge Jisus hiɛŋ, Imbe kwuŋ ehi heŋshii? Bụtụ bu ko namba 'yajɛ miaụŋ-me-eyi mi yebi. Bee zhe pi yɛu ihiiŋ, bɛɛ hiɛŋ iŋ, Ɛ-yɛu mi, Zhaga nda hwayɛ ga ugondu ni itimɛ ɛtɛ mi ya afwafwa.

²⁹Yɛu ɛtɛ jishijɛ bụ, yɛɛ hiɛŋ, N zha shɛ o. Ama ti yaa namɛ fwalaa, yɛu ɛtɛ gɛ hiɛŋ bi zha shɛ o, sheyinji ahaŋsa ibɛ, yee zhe ya.

³⁰Bee zhe pi yɛu iyebi, bɛɛ hɛiŋ iŋ du iwɛ ebe ike ike. Inɛ ɛtɛ jishijɛ, yɛɛ hiɛŋ, Ada, N zhɛ ma zha hwayɛ. Ama i zhe shi kaa o.

³¹Inɛ nɛ yɛu na ashashɛ miaụŋ mu ga mi yebi, i njɛ ukwulana bishi bi bɛɛ? Ɛɛ jishijɛ, ɛɛ hiɛŋ, Inɛ ihiiŋ. Nazhɛ ge Jisus hiɛŋ aŋ, Iwɛ-tɛkana Omo himbiso maa, ele-ụdalụ, na anjɛ-tuwɛle, ɛ zhɛ mo hi hwulono Cɛnjɛ-ta-tugwama ta Agwatana tutono.

³²Iwɛnɛ tu ga Jon bɛnjɛ-bu-ubaptizim zhajɛ la pi hiŋ, nu uhwaŋna tiririri, hiɛ tɛtanɛ shɛ iwɛ ubwa rishe o, ama ele-ụdalụ keeni anjɛ-tuwɛle tɛtanɛ iwɛ ubwa rishe. Okwo ta hiɛ kwụbɛ ijɛ ɛtɛ, hiɛ jɛshɛrɛjɛ shɛ kaa shihaŋsa shi hiŋ waa, maa hiɛ tɛtana iwɛ ubwa rishe o.

³³Hwuga ma n-ndumwa mi nya tumanganjɛ sasana: Agwuma-ihwɛ oko jwe itimɛ ya afwafwa, bee kepi iŋ uuwa boo rungwutwonu, bee vwuji u'ibwa wo onunu ni bɛ, baa njɛ du ashɛkpa. Nazhɛ bee utegeni ahwɛŋ-itimɛ ɛtɛ igbɛtɛtɛ, nazhɛ baa sanɛ na cɛnjɛ ti nya.

³⁴Ama aka na ta aka tụ'walụ i ci, baa tumwanɛ miaụŋ-mu-ugondu ubwa pa ahwɛŋ-itimɛ ɛtɛ, maa ɛ lɛshijɛ tụ'walụ tu bwa.

³⁵Ama ahwɛŋ-itimɛ ɛtɛ 'imɛ miaụŋ mu bwa mu ugondu, ee jibi bu ko, aa kwụnɛ bu na bi yebi, ee tegeni bu na bu ko atayɛ.

³⁶Baa tumwanɛ sasana miaụŋ-mu-ugondu mi nya mu na mu hwuri mi ne ebe mi hiiŋ, ahwɛŋ-itimɛ ɛtɛ ndaananɛ aŋ gana ebe gbaa.

³⁷Nu umɛwɛɛ ibɛ, baa tumwanɛ ya yɛu ibwɛ ikɛnyi ibwɛ, bɛɛ hiɛŋ, Ɛ zhɛ a mụna hwayɛ yɛu mi ụjɛrụma.

³⁸Ama aka na ta ahwɛŋ-itimɛ ɛtɛ kwụbɛ yɛu ɛtɛ, aa mama hiaŋnụ, Bu na ga, ubwa zhɛ ba ya hwuŋ ogwu ga. Hwure tu kwụnɛ bụ ma, maa tu suji ma ogwu ata.

³⁹Ee shepi bu, ee keri no tupohondo ti ipɛlu itimɛ ɛtɛ ya afwafwa, aa kwụnɛ bụ.

⁴⁰Aka na agwuma-itimɛ ɛtɛ ya afwafwa zhajɛ, imbe bɛɛ zhɛ ba nda ahwɛŋ-itimɛ ɛtɛ ɛ?

⁴¹Ɛɛ jishijɛ bụ, ɛɛ hiɛŋ, Bi zhɛ ba kwụna du atwa ata awɛ, nazhɛ ba shapa itimɛ ɛtɛ ya afwafwa ba pana ahwɛŋ-itimɛ anya a na zhɛ na panɛ bụ tụ'walụ tu bwa na aka na ta afwafwa ata 'weri.

⁴²Ge Jisus hiɛŋ aŋ, Hi ta rɛcɛ shɛ suu iwɛ nɛ Utakada Iwɛ ya Agwatana jɛmɛ, yɛɛ hiɛŋ, Utayɛ na omo-tuma menji aa lacɛ gana uzhobu, ubwa tuba zhɛ wa sha utayɛ usugwulumi iwɛ umwono ata. Inɛ gɛ kaa banɛ no olugwo Agwangwama, iyi ụrụhwajɛ suu yaa shɛ ne eshe tu?

⁴³Ge Jisus hiɛŋ aŋ, Mo hi mbiso, gabata du ɛɛ zhɛ a lashɛga Cɛnjɛ-ta-tugwama ta Agwatana no olugwo hiŋ a pana atwa na zhɛ na nda iyi nɛ baa jala.

⁴⁴[Bụtụ be elele na leyiteni utayɛ ga, bi zhɛ ba bwaratagwụ rukwu rukwu,[48] ama yaa shɛ waa layɛtanɛ kaa bụtụ be elele, u zhɛ wa pɛpɛtana bụ.]

⁴⁵Aka na te ehiu onongbo keeni Afarisi hwụjɛ n-ndumwa ma ata ge Jisus manganjɛ, ee mepi maa aba baa manganganɛ mụ.

⁴⁶Ibɛ po aa jalakaka maa a 'imɛ bụ, ama inyɛsɛ ya atwa ofwugwo ata shɛ aŋ, iwɛnɛ ta atwa ata rɛcɛ bụ maa bigesere baa shɛ.