Read bassa MATIU 25 Bible Online

MATIU 25 - bassa bible

MATIU 25

¹Cɛnjɛ-ta-tugwama ta Azuba ti zhɛ ta sha hwuŋ na aka ata, gana showo umpwa shɛ na shi ta shɛ asapa, shɛ na shi suji asụtụla aba, ee beni maa e teji bwolo-be-eyikwo uhwaŋna.

²Showo sha ata shɛ ta, na amɛ aba, shɛ lagwụmɛ, shɛ ta shɛ incɛ.

³Ma shɛ ta shɛ lagwụmɛ, shi suji asụtụla aba, a 'waŋnɛ shɛ manɛbɛ ma asụtụla o.

⁴Ama ma shɛ ta shɛ incɛ, shɛ 'waŋnɛ manɛbɛ ma asụtụla ne ebene aba.

⁵Ama gana na to bwolo-be-eyikwo njɛ ti'insu na tizhajɛ tu bwa, aa ta ya ozhilwo kpaaŋ aba, ee leyi du malabụ.

⁶Tụ ụjita dwonu, n'ungwa mɛ shɛnjɛ ya, ɛɛ hiɛŋ, Bwolo-be-eyikwo ye be ci ma o, zhaga taga bụ ma uhwaŋna.

⁷Nazhɛ showo sha ata shɛ ishajɛ kpaaŋ aba, shaa nanganganɛ asụtụla aba.

⁸Shɛlagwụ shi hiɛŋ a na ata incɛ, Iti piɛ ma kaa manɛbɛ mi hiŋ cwɛŋ, iwɛnɛ ta asụtụla tu a jala tu'wogo.

⁹Ama showo sha ata shɛ incɛ, shi jishijɛ aŋ, shɛɛ hiɛŋ, Nekeshi mi zha shɛ ma tu twa hwayɛ atuba na te hiŋ o. Asha zhaga ma no ofwo atwa na a sanga, maa hi sɛ mi nee hiŋ.

¹⁰Aka na te e zhe maa ɛ sɛ, bwolo-be-eyikwo pushe, ibɛ po atwa na ga mama imwangwa zhagajɛ nu bwa, ee teni no ofwo towo, ee kepi odubo.

¹¹Na aba ibɛ, nazhɛ showo sha ata shɛlagwụmɛ shɛ zhajɛ ya du, shɛɛ hiɛŋ, Iyɛri! Iyɛri! Iti kepishingeni odubo!

¹²Ama bi jishijɛ aŋ, bɛɛ hiɛŋ, Iwɛ-tɛkana Omo hi mbiso, N te hi mepi shi o.

¹³Iwɛ ecilo ata, no shiyono ma ya eshe, iwɛnɛ te ehi mepi shi ụjita ata, kwo kaa auwa ata.

¹⁴Cɛnjɛ-ta-tugwama ta Azuba ti zhɛ ta sha hwuŋ sasana gana bụtụ bu ko na zhɛ ụ'ishɛgwa, maa ganga ihwɛ ibwɛ, baa suyanɛ miaụŋ mu bwa mu ugondu, bee peni aŋ i'wɛŋnɛ ihwɛ ibwɛ igbɛtɛtɛ.

¹⁵Bee peni bụtụ bu ko ukwuribi azhɛka a ta, bee peni binya bụtụ azhɛka eyebi, bee peni binya bụtụ sasana uzhɛka uko. Bi peni bụtụ bụtụ nu gana na ta bụtụ ata eri ba nda iyi nu bwa, nazhɛ bee hwuri tahaŋnụ tu bwa.

¹⁶Bụtụ na ge leshiji azhɛka a ta, hwuri tihinya tu bwa tɛnda, bee teni azhɛka a ta.

¹⁷Gobwonu du bụtụ na ge leshiji azhɛka eyebi, teni du azhɛka eyebi sasana.

¹⁸Ama bụtụ na ge leshiji uzhɛka uko, zhe bee hini u'ibwa na cɛnjɛ, bee sweci ukwuribi wa agwuma-ihwɛ ibwɛ.

¹⁹Na aba na ti yee ilegeji, nazhɛ agwuma-ihwɛ miaụŋ ma ata mu ugondu jiye, maa imanga ya ukwuribi ata na aba.

²⁰Ibɛ bụtụ ata ge leshiji la azhɛka a ta zhajɛ, baa 'waŋnananɛ azhɛka anya a ta, bɛɛ hiɛŋ bụ, Iyɛri, azhɛka a ta, ebu m peni la. Kwụba, N teni azhɛka a ta sasana.

²¹Agwuma-ihwɛ ibwɛ hiɛŋ bụ, Okwu, yɛu-ugondu ibiye, bɛ shɛ bụtụ bɛ tɛcara! Gana na abɛ shɛ bụtụ bɛ tɛcara ni iyi ticwɛŋ, N zhɛ mo bu shikicingo maa shɛ uhiu iyi ifwugwo. Tono nu unyasa wa agwuma-ihwɛ bu.

²²Nazhɛ bụtụ na ge leshiji la azhɛka eyebi zhajɛ du, bɛɛ hiɛŋ bụ, Iyɛri, azhɛka eyebi, ebu m peni la. Kwụba, N teni du azhɛka eyebi sasana.

²³Agwuma-ihwɛ ibwɛ hiɛŋ bụ, Okwu, yɛu-ugondu ibiye, bɛ shɛ bụtụ bɛ tɛcara! Gana na abɛ shɛ bụtụ bɛ tɛcara ni iyi ticwɛŋ, N zhɛ mo bu shikicingo maa shɛ uhiu iyi ifwugwo. Tono nu unyasa wa agwuma-ihwɛ bu.

²⁴Ama bụtụ na ge leshiji la ụzhɛka uko zhajɛ du, bɛɛ hiɛŋ bụ, Iyɛri, M bi mepi maa bɛ shɛ bụtụ na hweteni, maa bo gwubo iyi no ofwo na abu ga bɛrɛ shɛ, obo sutongono iyi no ofwo na abu ga 'waŋtatanjɛ shɛ.

²⁵Ibɛ po inyɛsɛ bụ i n shɛ, Ngee sweci ụzhɛka ga bụ na cɛnjɛ. Kwụba, iyi bu nɛ.

²⁶Agwuma-ihwɛ ibwɛ jishijɛ bụ, bɛɛ hiɛŋ, Gabụ yɛu-ugondu iwɛ, gabụ bụrụna ga! Bi ge mepi maa Mo gwubo iyi no ofwo na Ngaa bɛrɛ shɛ, Omo sutongono iyi no ofwo na Ngaa nga 'waŋtatanjɛ shɛ.

²⁷Asha bu ga shɛ bo zwono ukwuribi mu nu umwono-ukwuribi. Aka na Ngaa nga zhajɛ N ngɛ zhɛ ma lashɛga ukwuribi mu medeni titeni tu bwa.

²⁸Lashɛga ma ụzhɛka ata ni i'ɛlɛ ibwɛ, maa hi peni bụtụ ata ga 'yajɛ azhɛka umpwa.

²⁹Bụtụ be elele na 'yajɛ iyi, ubwa ɛɛ zhɛ a pananana, nazhɛ bɛɛ zhɛ ba kaana ti'yaga. Ama bụtụ na zasa iyi, okwo inɛɛ nɛ baa ga 'yajɛ, ɛ zhɛ a lashɛga iŋ ni i'ɛlɛ ibwɛ.

³⁰Kala ma yɛu ɛtɛ ugondu i tisashɛ ne tishi to tupohondo, apata u'wo-tutwa keeni ene tiya zhɛ a nama.

³¹Aka na ti Yɛu Bụtụ ye ci hwuŋ, nụ ụjɛrụma ubwa, keeni atumwa ubwa azuba kpaaŋ, nazhɛ bɛɛ zhɛ ba gɛga ni idwɛtwɛ ụjɛrụma ubwa.

³²Bi zhɛ bo sotulonu edenji elele na agba ubwa, bɛɛ zhɛ bo bogotogwu aŋ gana na ta bi'iywa-ba-agwụdụ bo bogotogwu agwụdụ ni iyweywe.

³³Bi zhɛ bo tulono agwụdụ nu u'ala ubwa ubiye, bɛɛ zhɛ tuba bo tulono iyweywe nu u'ala ubwa ugwulwo.

³⁴Nazhɛ Agwuma ata zhɛ hiɛŋ atwa na namɛ nu u'ala ubwa ubiye, Zhajɛ ma, ahiɛba na Bishi mi peni uwebiye, maa hiɛ yɛ ogwu cɛnjɛ-ta-tugwama tu na aa hi imwangwanua taa na aka na aa karɛ la unyizo.

³⁵Imunɛ i n gwụmɛ la, ehi m peni iyimɛyɛ, i'uyɛ i n iri la, ehi m peni meni Ngee swe, Ngaa shɛ la bugaiŋ, ehi tecinji nu nhwaŋ mi hiŋ;

³⁶Ngaa namɛ la mohondo, ehi n urigeni tugwuno, Ngaa gwụmɛ la, ehi me hikeni, Ngaa namɛ la nu umwono-tishi, ahia zhajɛ pi mi.

³⁷Nazhɛ atwa ata tiririri zhɛ o hoŋtono bu, ɛ hiɛŋ, Agwangwama, aka na kwuŋ atụ bụ kwụbɛ la ti imunɛ i bụ gwụmɛ eti bi peni iyimɛyɛɛ, kwo kaa ti i'uyɛ i bụ gwụmɛ la eti bi peni iyi-tiswaa?

³⁸Aka na kwuŋ atụ bụ kwụbɛ la ta abɛ shɛ bugaiŋ, eti bi leshiji nu nhwaŋ mu tuu, kwo kaa ta abụ namɛ la mohondo, eti bi peni tugwunoo?

³⁹Kwo kaa aka na atụ bụ kwụbɛ la ta aba gwuma, kwo kaa abụ namɛ nu umwono-tishi, eti bi hikenii?

⁴⁰Nazhɛ Agwuma ata zhɛ ɛ jishijɛ aŋ, bɛɛ hiɛŋ, Iwɛ-tɛkana Omo hi mbiso maa, taa ta ahi ndwanua la okwo bụtụ bu ko gba ijɛ ɛtɛ na ashashɛ atwa na 'nyanɛ, a na kaa shɛ miaụŋ-mo-bino mi, asha Gamba ahiɛ ndanɛ iŋ.

⁴¹Nazhɛ bɛɛ zhɛ bɛ hiɛŋ ya du atwa na namɛ nu u'ala ubwa ugwulwo, Ishɛga ma epe hi n genji, ahiɛba na ee keleni-unu. Zhaga tono ma nu ulwa ata unyizo-nom, aa imwangwa iwɛ Ibiri keeni atumwa ubwa!

⁴²Imunɛ i n gwụmɛ la, hi m peni shi iyimɛyɛ, i'uyɛ i n iri la, hi m peni shi iyi-tuswa;

⁴³Ngaa shɛ la bugaiŋ, hi n leshiji shi nu nhwaŋ mi hiŋ, Ngaa namɛ la mohondo, hi m peni shi tugwuno maa mo urugono, Ngaa gwụmɛ la, Ngaa namɛ nu umwono-tishi, hi n hikeni shi o.

⁴⁴Nazhɛ ɛ zhɛ o hoŋtono bu, ɛɛ hiɛŋ, Agwangwama, aka na kwuŋ atụ bụ kwụbɛ la ti imunɛ, ti i'uyɛ, ibu gwụmɛ, ta abɛ shɛ bugaiŋ, ta abụ namɛ mohondo, ta aba gwuma, ta abụ namɛ nu umwono-tishi, atụ bụ ndanɛ shɛ iyi elelee?

⁴⁵Nazhɛ bɛɛ zhɛ bɛ jishijɛ aŋ, bɛ hiɛŋ, Iwɛ-tɛkana Omo hi mbiso maa, taa ta ahiɛ ndanɛ shɛ la okwo bụtụ bu ko gba na ashashɛ atwa ga 'nyanɛ, asha hi n ndanɛ shɛ du o.

⁴⁶Nazhɛ atwa ata zhɛ o hwulo, o tono nụ ụbaụta ata, ɛɛ zhɛ a pana aŋ unyizo-nom, ama atwa tiririri tuba zhɛ o tono nu uraiŋ unyizo-nom.