Read bassa MATIU 26 Bible Online

MATIU 26 - bassa bible

MATIU 26

¹Aka na ti ge Jisus hwuwi iwɛ gɛ tụdụma hwɛɛ, bɛɛ hiɛŋ eseshi-iyi ubwa,

²Hi mepi du maa Isene Tɛkashɛka zhɛ ya nama waŋnabeyiko, ibɛ ɛɛ zhɛ a shapa Yɛu bụtụ a pana atwa maa e tegeni bu nrɛ nụ ụ'wụ'wụ-ubatanɛ.

³Na aka ata, ibɛ ehiu onongbo keeni n-nyarɛ ma atwamwa ụlwatagwụ nu umwamwa uhiu wo onongbo, na ɛɛ hiɛŋ izeci ibwɛ ga Kayafas.

⁴Nazhɛ aa twatwagwụ, maa a 'imɛ Jisus ni i'inswɛ, maa a kwụnɛ bụ.

⁵Ama ɛ hiɛŋ, Kede i shɛ na aka iyimɛyɛ Isene tiya o, iwɛ maa kede atwamwa njɛ ti'nyama o.

⁶Aka na ti ge Jisus namɛ ni Bɛtani nu umwono Saimon bụtụ-bụ-ụngwụ-uwaŋna,

⁷Nazhɛ biyikwo bu ko zhajɛ pu bwa, bee zweni manɛbɛ mu ko mu na mi 'yajɛ uhiụŋ ubiye ni iyi uhwugwa nɛ ɛɛ hiɛŋ alabasta, mu zhanjɛ kaa tebiye, bee dudugeni Jisus nu uhiuhiu, na aka na tu boo to ugbokwunu to dongonu uteburu.

⁸Ama aka na te eseshi-iyi ubwa kwụbɛ iŋ, yaa gwumanɛ aŋ, ɛɛ hiɛŋ, Iwɛmbe kwuŋ po aa njɛ mu ufwu gadagaa?

⁹E ge eri a sanga manɛbɛ mu ga mụ ụhiụ ubiye nu ukwuribi ụ'wụtụ, maa e peni okofwo.

¹⁰Aka na ti ge Jisus mepi iŋ, bɛɛ hiɛŋ aŋ, Iwɛmbe po ahia dumangana biyikwo ga n-ndumwa mụ wɛɛ? Bu n ndwanua ugondu ubiye.

¹¹Okofwo zhɛ a nama ne hiŋ aka elele, ama N zha shɛ tuba ma nama ne hiŋ aka elele o.

¹²Bu dudugeni tu'waba ti mi manɛbɛ mu ga mụ ụhiụŋ ubiye, maa imanga tụ, iwɛ ụjita tuno ti mi.

¹³Iwɛ-tɛkana Omo hi mbiso maa, ofwo elele na aa ananga hwuŋ Anabarɛ ga Ebiye nu unyizo ga, ɛ zhɛ a dumanana iwɛ iyi nɛ biyikwo ga njɛ, iwɛ maa o no toyingo bu.

¹⁴Nazhɛ bụtụ bu ko na ashashɛ eseshi-iyi umpwa-na-ba-eyebi, na ɛɛ hiɛŋ izeci ibwɛ go Judas Iskariot, zhe pe ehiu onongbo,

¹⁵bɛɛ hiɛŋ aŋ, Imbe ɛhi zhɛ hi ma m pana ti yaa shɛ Ngee hi peni Jisus ataa? Ibɛ po aa cɛpɛ bụ azụrụfa talacɛ.

¹⁶Te kwuni ya na aka ata, go Judas ba jalakaka ohwolu na maa shapa Jisus maa pana aŋ.

¹⁷Tụ ụjita uhiiŋ na aa ya Iyimɛyɛ Isene, nɛ Zasa Ifucingɛ u ci, eseshi-iyi Jisus zhajɛ pu bwa, ee heŋteni bu, ɛɛ hiɛŋ, Ce ubu kwụlanɛ maa ta bụ imangana iyimɛyɛ Tɛkashɛka nɛ ɛbi zhɛ ba yaa?

¹⁸Ge Jisus jishijɛ aŋ, bɛɛ hiɛŋ, Zhaga ma no ofwo bụtụ bu ko na namba nụ ụshɛpwụ ga, hiɛŋ bụ ma, Bimbisegeni hiɛŋ, Aka mi gwumwonu, ti Ngɛɛ zhɛ ma ya iyimɛyɛ Isene Tɛkashɛka ni ihwɛ bụ, ne eseshi-iyi mi.

¹⁹Eseshi-iyi njɛ ga gana na ti ge Jisus ge peni aŋ unu, aa imanganjɛ ga iyimɛyɛ ɛtɛ Isene Tɛkashɛka.

²⁰Aka na tụ ụrụmɛ shɛ, ge Jisus jɛjɛ ne eseshi-iyi ubwa umpwa-na-ba-eyebi,[55] maa ya iyimɛyɛ ɛtɛ.

²¹Aka na ta a ya iyimɛyɛ ɛtɛ, ge Jisus hiɛŋ, Iwɛ-tɛkana Omo hi mbiso maa, bụtụ bu ko na ashashɛ hiŋ zhɛ ma n sangana atwa ne tidere.

²²Shɛmɛ sha aba shɛ hashaganụ duwa, bụtụ bụtụ bɛ hiɛŋ bụ, Agwangwama, Gamba suu?

²³Ge Jisus jishijɛ aŋ, bɛɛ hiɛŋ, Bụtụ na ba kalanga u'ala ni ikwede ne mi, ubwa zhɛ ma n sanga ne tidere.

²⁴Yɛu Bụtụ zhɛ ya zhaga, gana na to o 'nyotwo la iwɛ ubwa, ama bụtụ ata zhɛ ba sanga Yɛu Bụtụ ne tidere, zhɛ ba nda hwuŋ, Adangboo! I gɛ zhɛ ya zhɛmana bụtụ ata ti yaa shɛ atwa ubwa ge meci shi bu.

²⁵Ga Judas na senji bu ne tidere, heŋteni bu du, bɛɛ hiɛŋ, E-Bimbisegeni, shɛ Gamba suu gom? Ge Jisus jishijɛ bụ, bɛɛ hiɛŋ, Gabụ du bu dumwa ya.

²⁶Aka na ta a ya iyi, ge Jisus shepi ibrɛd ɛtɛ, bee peni iŋ uwebiye, nazhɛ boo dwonu iŋ, bee peni eseshi-iyi ubwa, bɛɛ hiɛŋ aŋ, Sugo iŋ ya ma, tu'waba ti mi tu ta.

²⁷Bee shepi ukwopi, baa njɛ ugwoje na Agwatana, bee peni aŋ, bɛɛ hiɛŋ, Swa uŋ ma kpaaŋ hiŋ.

²⁸Mehieŋ mi mi mu Unu-tutwa[56] ta, mu na mu 'waŋ iwɛ iwɛwɛ ya atwa ofwugwo tugangana.

²⁹Ama Mo hi mbiso, te kwuni hwuwayɛ go, N zha shɛ ma swa ya meni mu ga mu tụ'walụ ta afwafwa, uuwa i ci aka na Ngɛɛ zhɛ ma swa mu na mu ufwo ne hiŋ na Cɛnjɛ-ta-tugwama te Bishi mi o.

³⁰Aka na ta a zụnjɛ azunga, ee beni, ee zhe ni Ishɛmɛ Buta.

³¹Nazhɛ ge Jisus hiɛŋ aŋ, Ɛ zhɛ ma hi nda ukwurishi iwɛ mi hwɛɛ hiŋ nụ ụjita go. Iwɛnɛ to o 'nyotwo la, ɛɛ hiɛŋ, N zhɛ ma pa bi'iywa ba agwụdụ iyi, nazhɛ unyama wa agwụdụ zhɛ wa garatagwụ.

³²Ama aka na ɛɛ n hicinjɛ, N zhɛ mo hi hwulono ma zha na cɛnjɛ tu Galili.

³³Ga Pita jishijɛ bụ, bɛɛ hiɛŋ, Okwo ɛɛ zhɛ a nda atwa vwɛ ukwurishi iwɛ bụ, a zha shɛ ma n nda ukwurishi iwɛ bụ kwukwuŋ.

³⁴Ge Jisus hiɛŋ Pita, Iwɛ-tɛkana Omo bu mbiso maa, bi zhɛ ba tala ashamanjɛ nụ ụjita go kpalụ tatụ maa bi m mepi shi, tobwolo alụma ta uganɛ shɛ o.

³⁵Ga Pita hiɛŋ bụ, Okwo yaa shɛ i tilɛɛ maa mo 'wo na bụ, N zha shɛ kwukwuŋ ma tala ashamanjɛ maa m bi mepi shi. Gabata du eseshi-iyi vwɛ dumanjɛ kpaaŋ aba.

³⁶Nazhɛ ge Jisus zhagajɛ na aba, ee zhe no ofwo oko na ɛɛ hiɛŋ izeci aba, Gɛsɛmani, bɛɛ hiɛŋ eseshi-iyi ubwa, Gɛga ma epe, N zhɛ tuba peye maa ma nda adua.

³⁷Bee zeriji Pita keeni miaụŋ mi Zɛbɛdi mi yebi, aa zhagajɛ nu bwa, amɛ ubwa hashɛganụ, ụbaụta sepi bu duwa.

³⁸Nazhɛ bɛɛ hiɛŋ aŋ, Amɛ mi hashɛganụ duwa okwo uuwa zhɛ o to tu'wo. Nama ma epe, hi na 'yaka ne mi.

³⁹Bee zhe geri-be-eshe, bee leyi, bee ubi eshe na cɛnje, baa njɛ adua, bɛɛ hiɛŋ, Ada, yaa shɛ yee ge deuri asha ga ukwopi ga n keshici. Ama tuba shɛ ukwulana mu Ama jala o, semi ukwulana bụ.

⁴⁰Bee gwure pe eseshi-iyi, bee jiteni aŋ to o woto malabụ, bɛɛ hiɛŋ Pita, Hi eri shi suu hia ganga malabụ tuwoto ne mi okwo auwa oko?

⁴¹Ganga ma malabụ, maa hi na nda adua, iwɛ maa kede hi teni na tumanga o. Mpiala mi leni gom, ama tu'waba tu lweji.

⁴²Bee gwuleneni na aka yebi, baa njɛ adua, bɛɛ hiɛŋ, Ada, yaa shɛ ukwopi ga eri shi ma n kashɛka, semi ga ma swa uŋ, asha ga ukwulana bụ njɛ.

⁴³Bee gwure sasana no ofwo eseshi-iyi ubwa, bee jiteni aŋ to o wotonono malabụ, iwɛnɛ te shishe sha aba shi zhinengeni na malabụ.

⁴⁴Bee genji aŋ, bee gwuleneni beye na aka tatụ, baa njɛ adua sasana, baa dumananɛ iwɛ ebe ike ike.

⁴⁵Nazhɛ bee gwure pe eseshi-iyi ubwa, bɛɛ hiɛŋ aŋ, Woto ma ya nazhɛ malabụ, ta ma ya ụhinjanụ. Hioko ma, auwa gwumwonu, tɛ ɛ zhɛ a shapa Yɛu Bụtụ a pana atwa iwɛwɛ.

⁴⁶Ishijɛ ma, tu hwuri ma. Hioko ma, bụtụ na ma n sanga ne tidere, bu gwumwonu ya.

⁴⁷Ti ge Jisus ta duma iwɛ ɛtɛ, go Judas na shɛ bụtụ bu ko na ashashɛ eseshi-iyi umpwa-na-eyebi zhagajɛ na atwa ofwugwo, a na banɛ no olugwo ehiu onongbo keeni n-nyarɛ ma atwa, aa 'wananjɛ otokwobi ne shekwute.

⁴⁸Bụtụ ata na senji bu, go sokwokwonuo atwa ata, bɛɛ hiɛŋ aŋ, Bụtụ be elele Ngaa rụwanɛ hwayɛ, asha ubwa ata ta, ima bụ ma.

⁴⁹Gunu ata baa zhajɛ pi Jisus, bɛɛ hiɛŋ bụ, E-Bimbisegeni, okwu yoo! Baa rụwanɛ bụ.

⁵⁰Ge Jisus hiɛŋ bụ, E-biyejilo mi, imbe bwa abi zhajɛ iwɛ ibɛɛ?[57] Nazhɛ aa zhajɛ, oo gbodongonu Jisus, aa 'imɛ bụ.

⁵¹Nazhɛ bụtụ bu ko na namɛ ne Jisus, hwucice utokwobi ubwa, boo po yɛu-ugondu uhiu wo onongbo, bee vweri ụcɛbɛ ubwa.

⁵²Ge Jisus hiɛŋ bụ, Gwuricingo utokwobi bu nu ufwutwa ubwa, atwa elele na a kala utokwobi, tu'wo tu utokwobi du ɛɛ zhɛ o 'wo.

⁵³Bi heŋshi shi suu maa N nge eri ma tabwa Bishi mi, maa me sugeni atumwa ubwa azuba igbɛɛ gembi ufwugwo hwuwayɛ hwuwayɛ go maa e m mbiyeni?

⁵⁴Ama yaa shɛ Ngaa njɛ gana ata, asha gana na ya Iwɛ ya Agwatana zhɛ yɛ sɛɛ, inɛ hiɛŋ, I shɛ tilɛɛ maa i shɛ ya nda gana ataa?

⁵⁵Na aka ata ge Jisus hiɛŋ atwa ata, Hi 'wananjɛ suu otokwobi, ne shekwute maa hi n 'imɛ, gana maa bɛshɛrɛ ɛhi zhɛ hia ima? N namɛ la nu Umwono wa Agwatana Omo mbisogono atwa ofwugwo iyi, iyi-heri iyi-heri, hi n 'imɛ shɛ kaa o.

⁵⁶Ijɛ kpaaŋ teni, iwɛ maa iwɛ nɛ egesere 'nyotwo la sɛ. Nazhɛ eseshi-iyi ubwa genji bu, ee gezheji kpaaŋ aba.

⁵⁷A 'imɛ Jisus, ee zeriji bu pu Kayafas na shɛ uhiu wo onongbo, no ofwo na embisegeni Undwa, keeni n-nyarɛ ụlwatagwụ.

⁵⁸Ga Pita 'wa bụ ne ekwunyi, na ahanga na dụlụmɛ nu ubwa, tutu umwamwa uhiu wo onongbo. Aka na ti bee teni, baa jɛjɛ na angbaracɛ, iwɛ maa kwụba tukwunanga ti ibɛ.

⁵⁹Ibɛ ehiu onongbo, na n-nyarɛ keeni ajɛmɛ-ụshɛrɛya kpaaŋ, a jalakaka eseyida tukata iwɛ Jisus maa a kwụnɛ bụ.

⁶⁰Ama e gwushiji shi kaa iyi elele o, okwo te eseyida tukata ofwugwo kezhingeni. Ni imɛwɛɛ ibɛ ya, eseyida oko tukata eyebi kezhingeni,

⁶¹ɛɛ hiɛŋ, Bụtụ ga hiɛŋ, N eri mo hwuŋzo Umwono ga wa Agwatana, maa ma maanana ụŋ na amɛ ijitɛ itɛtu.

⁶²Nazhɛ uhiu wo onongbo ishijɛ, bɛɛ hiɛŋ, Bɛ tɛ jishijɛ shɛ suu iwɛ ye elele? Asha bụ hwụjɛ shɛ suu tiseyida tu ga atwa ga a bu dumangana?

⁶³Ama ge Jisus sumenji bu. Nazhɛ uhiu wo onongbo hiɛŋ bụ, M bu teji Agwatana uumwa, yaa shɛ gabụ bɛ shɛ ga Krast Yɛu ya Agwatana, asha iti mbishi.

⁶⁴Ge Jisus hiɛŋ bụ, Gabụ kaa du bu dumwa ya. Ama Mo hi mbiso maa, te kwuni na aka ga, hi zhɛ hia kwụba ti Yɛu Bụtụ zhɛ ya gɛga nu u'ala ubiye ukpahiŋ, ti bee ci kaa no odomu azuba.

⁶⁵Nazhɛ uhiu wo onongbo dwetweji otogwo ubwa, bɛɛ hiɛŋ, Ukekeshi eseyida imbe to tu to yaa? Hi hwugwa du kaa tu baa mama nangwụcɛnjɛ na Agwatana.

⁶⁶Imbe ehi heŋshii? Ɛɛ jishijɛ, ɛɛ hiɛŋ, N-ndumwa-wụmɛ bụ, bu lanɛ no tu'wo.

⁶⁷Nazhɛ ee zwegeni bu mecemi nụ ụpɛshɛka, aa tagana bụ okwu, atwa oko a pagana bụ awaŋpɛ,

⁶⁸ɛɛ hiɛŋ, Gabụ, ga Krast, utu dumanganɛ tigesere, gaaba ubu po iyii?

⁶⁹Ga Pita ta kaa jɛjɛ no tupohondo nu umwamwa. Ibɛ yɛu towo ike na ashashɛ miaụŋ-mu-ugondu ata zhajɛ pi Pita, bɛɛ hiɛŋ bụ, Bu namɛ du ne Jisus bụtụ ga bu Galili.

⁷⁰Ama ga Pita teri ashamanjɛ ne eshe aba kpaaŋ, bɛɛ hiɛŋ, M mepi shi n-ndumwa mu go aba njɛ o.

⁷¹Ga Pita beni bee shikeni no odubo ata oo tono nu umwamwa, ibɛ yɛu towo inyɛ kwụbɛ bụ, yɛu ɛtɛ hiɛŋ atwa na shikekeni apata, Bụtụ ga namɛ du ne Jisus bụtụ ga bu Nazarɛt.

⁷²Ga Pita teri ashamanjɛ sasana, ta-tuwa-tuta, bɛɛ hiɛŋ, M mepi shi bụtụ ga o.

⁷³Ti yaa namɛ fwalaa, atwa na shikekeni apata zhajɛ, ɛɛ hiɛŋ Pita, Iwɛ-tɛkana, bu namɛ du na ashashɛ aba, iwɛnɛ tu n-ndumwa mụ bụ mụ bụ vwɛ uvwi caakwụ.

⁷⁴Nazhɛ ga Pita meme kwuni ya unu-tukalana, keeni tuwa-tuta, bɛɛ hiɛŋ, M mepi shi bụtụ ga o! Gunu ata alụma uganɛ.

⁷⁵Nazhɛ ga Pita teyinje ya n-ndumwa mi Jisus, aka na ti bɛɛ hiɛŋ bụ, Bi zhɛ ba tala ashamanjɛ kpalụ tatụ maa bu m mepi shi, tobwolo alụma ta uganɛ shɛ o. Ga Pita beni bee tileni nu u'wo gboo.