Read bassa MATIU 27 Bible Online

MATIU 27 - bassa bible

MATIU 27

¹Aka na ti iyi heri nu uvwungwa dididi, ehiu onongbo kpaaŋ, tu n-nyarɛ ma atwamwa, njɛ ushaura iwɛ Jisus maa a kwụnɛ bụ.

²Aka na te e umpi bu, ee zeriji bu pu Pɛilat na shɛ ugwomina.

³Aka na tu go Judas na senji Jisus ne tidere, kwụbɛ maa e peni Jisus n-ndumwa-tụwụma, baa jɛshɛrɛjɛ-ahaŋsa, bee peni ehiu onongbo keeni n-nyarɛ ma ata azụrụfa ebe talacɛ.

⁴Bɛɛ hiɛŋ, N njɛ iwɛwɛ, iwɛnɛ ti Ngee senji bụtụ na zasa n-ndumwa-tụwụma me elele. Ama ɛ hiɛŋ bụ, Imbe ta shɛ inee tuu? Yalaga iŋ ni ikɛnyi bụ.

⁵Nazhɛ go Judas 'wɛŋ azụrụfa ata nu Umwono wa Agwatana, bee beni bee hwuri bee meme sweci.

⁶Nazhɛ ehiu onongbo suji azụrụfa ata, ɛɛ hiɛŋ, Undwa leni shi ya maa e zweni uŋ nu umwono-ukwuribi na namɛ nu Umwono wa Agwatana o, iwɛnɛ tu waa shɛ ulumo mehieŋ

⁷Ibɛ po aa njɛ ushaura abaaba, ee suji uŋ oo so cɛnjɛ to bumo-bu-nkwasha, iwɛ maa o no no agaiŋ apata.

⁸Ibɛ po oo po cɛnjɛ ta ata izeci, ɛɛ hiɛŋ, Cɛnjɛ te Mehieŋ tutu ta hwayɛ.

⁹Nazhɛ iwɛ nɛ gɛ Jɛrɛmia bigesere dumwa la sɛ, inɛ bɛɛ hiɛŋ, E suji azụrụfa ata talacɛ anaa na shɛ ulumo bụtụ ata ee lumeni atwa, ubwa shɛ bụtụ ata umeseyi uko miaụŋ mi Isrɛl mi lumeni atwa.

¹⁰Ee suji uŋ, oo so cɛnjɛ to bumo-bu-nkwasha, gana na ta Agwangwama m peni-unu.

¹¹Ge Jisus shikeni ya na agba ugwomina, ugwomina unseni bu, bɛɛ hiɛŋ, Gabụ suu bɛ shɛ Agwuma Eju? Ge Jisus jishijɛ bụ, bɛɛ hiɛŋ, Gabụ du bɛ jɛmɛ iŋ ya.

¹²Aka na te ehiu onongbo keeni n-nyarɛ ma patangana bụ ụshɛrɛya, bɛ jɛshɛjɛ shɛ aŋ iwɛ ye elele o.

¹³Ibɛ po ga Pɛilat hiɛŋ bụ, Bu hwụjɛ shɛ suu tiseyida tu ga ee sweji kpaaŋ iwɛ bụ?

¹⁴Ama ge Jisus jɛshɛjɛ shɛ bụ n-ndumwa okwo mu ko gba o. Ibɛ po yaa dama ugwomina tebiye.

¹⁵Ugwomina wa shana waa bacɛngana ufwugwo wa atwa ata bujama bu umwono-tishi, bu naa na aa jala, na aka Isene Tɛkashɛka.

¹⁶Bụtụ bu ko namba la na ashashɛ ajama, na ee kepi nu umwono-tishi na aka ata, na ɛɛ hiɛŋ, ge [Jisus] Barabas.[58]

¹⁷Aka na ta a ụlwatagwụ, ga Pɛilat heŋteni aŋ, bɛɛ hiɛŋ, Gaaba ahia jala maa ma hiɛ bacɛnganɛɛ? Ge [Jisus] Barabas suu, okwo ge Jisus ata ɛɛ hiɛŋ Krast?

¹⁸Iwɛnɛ ti bee mepi du maa ni isɛbwɛngwɛ, aa shapɛ Jisus ee peni bu.

¹⁹Ti ga Pɛilat jɛjɛ ni idwɛtwɛ ụshɛrɛya, biyikwo bwa tumwanɛ butumwa pu bwa, bɛɛ hiɛŋ bụ, To tumongono bụtụ ata zasa n-ndumwa-tụwụma o. Iwɛnɛ tu Ngaa nduwa ụbaụta iwɛ ubwa duwa nụ ụwalabụ na Ngee wetegeni hwayɛ ga nụ ụjita.

²⁰Ama ehiu onongbo keeni n-nyarɛ ụranjɛ atwa ata maa ga shɛ ga Barabas ɛɛ bɛcinjɛ, maa tuba a kwụnɛ Jisus Krast.

²¹Ugwomina heŋteni aŋ sasana, bɛɛ hiɛŋ, Gaaba ahia jala maa ma hiɛ bacɛnganɛ na ashaashɛ atwa ga eyebii? Ɛɛ jishijɛ bụ, ɛɛ hiɛŋ, Ga Barabas.

²²Ga Pɛilat heŋteni aŋ, bɛɛ hiɛŋ, Imbe tuba ahia jala maa Ma nda Jisus ga ɛɛ hiɛŋ Krastii? Ɛɛ jishijɛ bụ kpaaŋ aba, ɛɛ hiɛŋ, Ge tegeni bu nrɛ nụ ụ'wụ'wụ-ubatanɛ!

²³Ama ugwomina heŋteni aŋ, bɛɛ hiɛŋ, Iwɛmbe poo? Imbe kwuŋ shɛ iyi iwɛ nɛ baa njɛɛ? Ama a ụranjɛ n'ungwa duwa, ɛɛ hiɛŋ, Ge tegeni bu nrɛ nụ ụ'wụ'wụ-ubatanɛ.

²⁴Aka na tu ga Pɛilat kwụbɛ maa iwɛ nɛ baa njɛ zana bu eshe o, ama ti'nyama kwakwa ta kaana ugombo, bee shepi meni, boo sukwutwo i'ɛlɛ ibwɛ, ne eshe atwa ata kpaaŋ, bɛɛ hiɛŋ, N zasa n-ndumwa-tụwụma ne mehieŋ ma bụtụ ga bi tiririri o, yalaga iŋ ma du ni ikɛnyi hiŋ.[59]

²⁵Atwa ata jishijɛ bụ, hwɛɛ aba, ɛɛ hiɛŋ, Ga tijama te mehieŋ mu bwa ti kezhe no ohiuhiu tu, ta miaụŋ mu tu hwɛɛ.

²⁶Ga Pɛilat bacɛnganɛ aŋ Barabas, bee lwepi tuba Jisus nu udugwu, nazhɛ bee shepi bu bee peni aŋ maa e tegeni bu nrɛ nụ ụ'wụ'wụ-ubatanɛ.

²⁷Nazhɛ asaza ugwomina shepi Jisus nu umwamwa ugwomina, aa suyaganɛ asaza elele kpaaŋ, aa ụlwatagwụ maa a sukakanɛ bụ.

²⁸Ee ushiji bu tugwuno tu bwa, nazhɛ ee urigeni bu utogwo uduhwa ushenje.

²⁹Ee pieci esepi adanya, aa njɛ ụdara, ee peteni bu nu uhiuhiu, ee hwuŋteni bu du bininjidegbe nu u'ala ubwa ubiye. Nazhɛ ee kwuzhi nɛ ɛvwɛvwɛjɛ ubwa, aa nda bụ asada, ɛɛ hiɛŋ, Zaacɛ Tumaka, Agwuma Eju!

³⁰Ee zwegeni bu mecemi, nazhɛ ee shepi bininjidegbe ebe, oo po bu nu uhiuhiu.

³¹Aka na te e hwuwi bu asada tɛnda hwɛɛ, ee hwucici bu utogwo ebe uduhwa ushenje, nazhɛ ee hwuŋteni bu una ubwa. Ee zeriji bu maa e tegeni bu ya nrɛ nụ ụ'wụ'wụ-ubatanɛ.

³²Aka na te e ci ụbanụ, aa kwụbɛ bụtụ bu ko bu Sareni, na ɛɛ hiɛŋ izeci ibwɛ, ga Saimon. Aa 'imɛ bụ, aa njɛ bụ ni iji maa ga 'waŋna ụ'wụ'wụ-ubatanɛ Jisus.

³³Aka na te e ci ofwo oko na ɛɛ hiɛŋ, Golgota, (ecilo Golgota ata shɛ Ofwo Ukokolo-uhiuhiu.)

³⁴Apata ee peni bu meni mụ tụ'walụ ta afwafwa, mu na mi hiŋci ni ingɛyi maa swa. Ama aka na tu baa hunganɛ mụ, baa lacɛ mụ tuswa.

³⁵Aka na ee tegeni Jisus nrɛ nụ ụ'wụ'wụ-ubatanɛ, nazhɛ aa 'wɛŋ ya icɛcɛ, maa o dwotwogonu tugwuno tu bwa abaaba.[60]

³⁶Aa jɛjɛ apata, aa ngbarakacɛ bụ.

³⁷Ee 'nyeci iyi nɛ ɛɛ hiɛŋ maa bɛ njɛ, ee peteni iŋ na azuba uhiuhiu ubwa nụ ụ'wụ'wụ ata ubatanɛ, ti'nyeci ta ata ti hiɛŋ, GE JISUS AGWUMA EJU NA.

³⁸E tegeni du ashɛrɛ eyebi nrɛ nụ ụ'wụ'wụ-ubatanɛ nu bwa, bu ko namɛ nu u'ala ubiye, bu ko namɛ nu u'ala ugwulwo ubwa.

³⁹Atwa na a kashaka apata, a dumangana bu du n-ndumwa mụ wɛ, oo zhingoto ohiuhiu aba,

⁴⁰ɛɛ hiɛŋ, Gabụ ga bo hwuŋzo Umwono wa Agwatana, maa meeneni uŋ na amɛ ijitɛ itɛtu! Yaa shɛ gabụ bɛ shɛ Yɛu ya Agwatana gom, asha meme bicinji, maa kezhe nụ ụ'wụ'wụ-ubatanɛ ga!

⁴¹Gobwonu du ehiu onongbo, ne embisegeni Undwa keeni n-nyarɛ njɛ bụ asada, ɛɛ hiɛŋ,

⁴²Bi bicinji anya atwa, bi eri shi kaa momo bicingo. Agwuma ga Isrɛl ta! Ge kezhe nụ ụ'wụ'wụ-ubatanɛ ga hwuwayɛ go, nazhɛ ɛti zhɛ ta tɛtana bụ rishe!

⁴³Baa tɛtanɛ Agwatana rishe gom, yaa shɛ amɛ Agwatana kaa du lemi nu bwa, asha go bicingo bu hwuwuyɛ go. Iwɛnɛ tu baa shana bɛɛ hiɛŋ, Gamba n shɛ Yɛu ya Agwatana.

⁴⁴Gobwonu du ashɛrɛ ata ee tegeni nrɛ nụ ụ'wụ'wụ-ubatanɛ nu bwa, twagajɛ bụ.

⁴⁵Te kwuni nu uwaŋna tishikoko, tishi tu layɛ nu unyizo kpaaŋ, uuwa i ci uwaŋna ụrụmɛ.

⁴⁶Aka na tu uwaŋna shɛ ụrụmɛ, ge Jisus uganɛ duuwa, bɛɛ hiɛŋ, Elɛi, Elɛi, lama sabakitani? (Ecilo ibɛ shɛ, Agwatana mi, Agwatana mi, iwembe po ebi n jinecii?)

⁴⁷Aka na atwa oko na ashashɛ atwa na shikekeeni apata hwụjɛ iwɛ ɛtɛ, ɛɛ hiɛŋ, Bwoonu ba suyana Elaija.

⁴⁸Gunu ata bụtụ bu ko na ashashɛ aba gezhiji, bee shepi ụhwụŋkwụ, bee shidinji uŋ ne meni mu tụ'walụ ta afwafwa mu na mi sembi, bee hwuŋteni uŋ ne bininjidegbe, bee peni Jisus maa swa.

⁴⁹Ama atwa vwɛ ubwa hiɛŋ bụ, Ganga bụ, ti zhɛ ta kwụba okwo ge Elaija ata zhɛ ba zhajɛ maa bicingo bu.

⁵⁰Ge Jisus uganɛ sasana duuwa, nazhɛ baa dwa ihwungwɛ.

⁵¹Gunu ata ibɛgɛlɛ tugwuno nɛ ee kepi odubo Umwono wa Agwatana bagwụ, te kwune ni ihiŋhiŋ tutu uvwi, unyizo zhingotu, atayɛ a'wụtụ 'wụtụ bagatagwụ,

⁵²e'uye kapashangwụ, ibɛ atwa tijilo ofwugwo a na go loyo la malabụ hiɛ aa bananjɛ.

⁵³Aka na ta a bananjɛ, ne e'uye, na aba tihiɛ ti Jisus, ee teni nụ ụshɛpwụ ata tijilo, aa bananɛ atwa ofwugwo caakwụ.

⁵⁴Aka na tu uhiu wa asaza dipi-yebi keeni atwa na namba apata nu bwa, a na ngbaracɛ Jisus, kwụbɛ ta cɛnjɛ to zhingotu keeni iyi inyɛ nɛ tenenji hwɛɛ, ibɛ po inyɛsɛ shɛ aŋ duwa duwa. Ɛɛ hiɛŋ, Iwɛ-tɛkana, bụtụ ga shɛ ga Yɛu ya Agwatana.

⁵⁵Eyikwo ofwugwo a na banɛ nu Galili a na 'wa la Jisus a ndana bụ iyi, a namba du apata, ee shikekeni taa dụlụ, aa ngbaracɛ bụ.

⁵⁶Eyikwo na namba na ashashɛ aba shɛ, ge Meri biyikwo ata bu Magdala, ne Meri bino Jemis keeni Josɛf, no bino bu miaụŋ mu Zɛbɛdi.

⁵⁷Aka na tụ ụrụmɛ shɛ, bɛzhɛgba bu ko na banɛ Arimatia, na ɛɛ hiɛŋ izeci ibwɛ go Josɛf, zhajɛ, bɛ shɛ du biseshi-bi-iyi Jisus.

⁵⁸Bee zhe no ofwo Pɛilat, baa lụpɛ ru'wo ri Jisus. Nazhɛ ga Pɛilat peni atwa unu maa ge peni bu ru.

⁵⁹Aka na tu go Josɛf shepi ru, bee pipi ru no tugwuno tu ko ti ilinɛn ti tishɛshɛshɛ.

⁶⁰Bee shiri ru nu u'uye ubwa uko, na bee te hini tufwo tufwo nu utayɛ uko ụ'wụtụ. Bee jirinji utayɛ uko ụ'wụtụ, bee urigeni unu u'uye ata, nazhɛ bee hwuri.

⁶¹Ge Meri biyikwo ata bu Magdala, keeni Meri yebi, a namba apata, aa jɛjɛ geri-be-eshe bu u'uye ata.

⁶²Ti iyi heri, tɛ ɛ hiɛŋ Ụjita Tumama imanga wenebe, ibɛ po ehiu onongbo keeni Afarisi ụlwatagwụ no ofwo Pɛilat,

⁶³ɛɛ hiɛŋ bụ, Iyɛri, ti teyinje maa bihelekeci ga, ba shana baa duma tu baa ta hwungwa, bɛɛ hiɛŋ, N zhɛ mɛ hiɛ na aba ijitɛ itɛtu.

⁶⁴Iwɛ ecilo ata, pana atwa unu, maa a ngbaraka u'uye ata tebiye, uuwa i ci waŋnabeyiko, shibwonu eseshi-iyi ubwa zhɛ a zhajɛ o zundo bu, iwɛ maa o no mbiso atwamwa maa, Bi hiɛ. Nazhɛ tuhalakaka tu umɛwɛɛ ti zhɛ ta wụmangwụ to hwulo me ti ti hiiŋ.

⁶⁵Ga Pɛilat hiɛŋ aŋ, Hi 'yajɛ kaa angbaracɛ, zhaga ta uŋ ma ikɛnyi. Hi mepi[61] kaa gana na maa hiɛ njɛ.

⁶⁶Ee zhe ga, oo to u'uye ata ikɛnyi, ee sweni utayɛ ata mɛrɛɛ, nazhɛ ee shikicinji angbaracɛ.