Read bassa MATIU 3 Bible Online

MATIU 3 - bassa bible

MATIU 3

¹Aka ata ibɛ ga Jon bɛnjɛ-bu-ubaptizim zhajɛ, baa nda i'enenji nụ ụshɛka Judia, bɛɛ hiɛŋ,

²Jɛshɛrɛga ma shihaŋsa maa hi genji iwɛwɛ hiŋ, iwɛnɛ ta Cɛnjɛ-ta-tugwama ta azuba tu gwumwonu.

³Ga Ayizaya bigesere dumwa la iwɛ Jon, bɛɛ hiɛŋ, Rụhwụŋ ra bụtụ bu ko ra kala n'ungwa nụ ụshɛka, rɛɛ hiɛŋ, Kalana ma Agwangwama uhwaŋna, Ndana bụ ma ihwɛŋnɛ i tukpororo.

⁴Ga Jon bo urugono tugwuno tu na aa nɛ ne tihiŋzhe ti irihende, boo umpo embi ubwa bu'waba. Iyimɛyɛ ibwɛ i shɛ ovworo ne meni mɛ iswɛ.

⁵Atwa beni nu Jɛrusalɛm, tu Judia kpaaŋ keeni cɛnjɛ tu na tu rungwutwonu Jodan hwɛɛ, ee zhe pu Jon.

⁶Baa njɛ aŋ ubaptizim nu Urefu ata Jodan, iwɛnɛ te e sweji-unu iwɛwɛ ya aba.

⁷Ama aka na tu baa kwụbɛ tu ufwugwo wa Afarisi keeni Asadusi we ci, iwɛ maa nda aŋ du ubaptizim, ga Jon hiɛŋ aŋ, Ahiɛba umata we egbezhi, gaaba ihi tɛtaganɛ-unu maa hi gezhigeni isɛbwɛ ya Agwatana nɛ ye cii?

⁸Ibɛ po na nda ma iyi nɛ teni cɛŋ na ahaŋsa-tɛjɛshɛrɛga.

⁹Ta haŋsa ma maa hi zhɛ hia banangana ulwapɛ iwɛnɛ ehi eri hi mama hiaŋnụ maa, Ga Abraham ubwa shɛ bishi tu o. Mo hi mbiso maa, Agwatana eri a bacɛnganɛ Abraham miaụŋ okwo na atayɛ ga.

¹⁰O kwutongwo ogwubo ne tini ti i'wɛ'wɛ cebe. ụ'wụ'wụ we elele na 'weri shi tụ'walụ ti biye, ɛ zhɛ o lo uŋ a kala uŋ nu ulwa.

¹¹Ma hi nda ubaptizim ne meni, iwɛnɛ ahiɛ jɛshɛrɛjɛ-shihaŋsa. Ama bụtụ na n hwuri ikɛnyi be ci ba ne ekwunyi mi. N teni shi cɛŋ maa ma 'waŋna okwo abida ubwa o. Ubwa zhɛ ma hi nda ubaptizim na Mpiala mi Tijilo keeni nu ulwa.

¹²Bu 'waŋnɛ ba abula ubwa, bɛɛ zhɛ bo sugo akpakpata ubwa shɛshɛshɛ, bɛɛ zhɛ bo zwono iyimɛyɛ ibwɛ nu urubwu ubwa, ama bi zhɛ bo hwoŋzhingo afụrɛkɛcɛ nu ulwa na 'weji shi.

¹³Nazhɛ ge Jisus banɛ nu ụshɛpwụ ata ɛɛ hiɛŋ, Galili, bee zhe nu ụpalanụ Urefu Jodan, iwɛ maa ga Jon njɛ bụ ubaptizim.

¹⁴Ama ga Jon mekeni maa lakana bụ tɛnda, bɛɛ hiɛŋ Jisus, Gamba yebe ukekeshi bu ma nda iwɛ maa n njɛ ubaptizim, gabụ suu bu zhajɛ ya pi mi?

¹⁵Ge Jisus jishijɛ bụ, bɛɛ hiɛŋ, N leneni hwuwayɛ go, iwɛnɛ po nu uhwaŋna ga yee ti teneni cɛŋ maa tụ ụrɛcɛnjɛ iyi nɛ teneni Agwatana cɛŋ kpaaŋ. Nazhɛ ga Jon leni.

¹⁶Tu ga Jon njɛ Jisus ubaptizim hwɛɛ, gunu ata tu baa banɛ ne meni, ee kepishingeni bu[7] azuba, baa kwụbɛ ta Mpiala ma Agwatana mu zwe gana ikwucime, maa patanɛ nu uhiuhiu ubwa.

¹⁷Nazhɛ rụhwụŋ ru banɛ na azuba, rɛɛ hiɛŋ, Yɛu mi nɛ Omo lubo duwa na, amɛ mi kaa lemi nu bwa tebiye.