Read bassa MATIU 4 Bible Online

MATIU 4 - bassa bible

MATIU 4

¹Nazhɛ Mpiala mi zeriji Jisus, ee teni nụ ụshɛka iwɛ maa Ibiri menji bu.

²Na aba na ti ge Jisus njɛ ezumi[8] iwɛŋnɛ buhanda ni ijitɛ buhanda, imunɛ kaa gwụmɛ bụ ya.

³Nazhɛ bimenji ata zhajɛ pi Jisus, bɛɛ hiɛŋ bụ, Yaa shɛ abɛ shɛ Yɛu ya Agwatana gom, asha hiɛŋ atayɛ ga tileni epe maa a jɛshɛrɛjɛ ibrɛd.

⁴Ge Jisus jishijɛ bụ, bɛɛ hiɛŋ, I 'nyeci, yɛɛ hiɛŋ, Shɛ ni ibrɛd kiri butugwumwa ba ya uraiŋ o, semi nu n-ndumwa me elele mu na mu banɛ nu unu wa Agwatana.

⁵Nazhɛ Ibiri shepi Jisus nu u'una ata tijilo, bee shikicinji bu taa ni ikerikeje umwono wa Agwatana,

⁶Bɛɛ hiɛŋ bụ, Yaa shɛ abɛ shɛ Yɛu ya Agwatana gom, asha meme gengenji maa ngbi, iwɛnɛ te e 'nyeci, ɛɛ hiɛŋ, Ubwa zhɛ ba pana atumwa ubwa azuba unu iwɛ bụ, iwɛ maa o bu so ni i'ɛlɛ ya aba, iwɛ maa kede po uvwɛvwɛjɛ bụ nu utayɛ o.

⁷Ge Jisus hiɛŋ bụ, E 'nyeci du kaa, ɛɛ hiɛŋ, Bɛ shɛ shɛ ba manga Agwangwama na shɛ Agwatana bu o.

⁸Nazhɛ Ibiri shepeneni Jisus ni ishɛmɛ ike tilegbe legbe, bee mbiseni bu cɛnjɛ-ta-tugwama tu unyizo ga kpaaŋ, tu ụjɛrụma u tuba,

⁹bɛɛ hiɛŋ bụ, Yaa shɛ ebi ge me kwuzeni, abu n zhɛbɛ, N ngɛ zhɛ ma bụ pana ijɛ kpaaŋ.

¹⁰Ge Jisus hiɛŋ bụ, E-Setan, hwulo beye! E 'nyeci, ɛɛ hiɛŋ, Gabụ bɛ shɛ ba zhɛba Agwangwama na shɛ Agwatana bụ, ubwa kiri abɛ shɛ ba ndana iyi.

¹¹Aka na ti Ibiri genji Jisus, nazhɛ atumwa Agwatana azuba zhajɛ aa ndanɛ bụ iyi.

¹²Aka na ge Jisus hwụjɛ maa e kepi Jon nu umwono-tishi, bɛɛ ishijɛ, bee gwuri nu Galili.

¹³Ti ge Jisus genji Nazarɛt, bee zhe baa jɛjɛ nu Kapanaum ata namɛ nu ụpalanụ itekwu ɛtɛ namɛ na cɛnjɛ tu Zɛbulon keeni Naftali.

¹⁴Inɛ gɛ teni iwɛ maa gɛ iwɛ ɛtɛ ga Ayizaya bigesere ata dumwa la sɛ, inɛ hiɛŋ.

¹⁵Cɛnjɛ tu Zɛbulon na cɛnjɛ tu Naftali, tu na tu namɛ geri bi itekwu, hileniye Urefu Jodan. Nu Galili ata shɛ cɛnjɛ ta atwa na shɛ shɛ Eju.

¹⁶Atwa na jɛjɛ la ne tishi, a kwụbwa uhioko-uhwaŋna ụ'wụtụ, uhioko-uhwaŋna kaa bonono atwa na jɛjɛ la na cɛnjɛ to tu'wo.

¹⁷Te kwuni na aka ata, ge Jisus kwuni i'enenji, bɛɛ hiɛŋ, Jɛshɛrɛga ma shihaŋsa, Cɛnjɛ-ta-tugwama ta azuba tu gwumwonu.

¹⁸Ti ge Jisus ba zha tahaŋnụ nụ ụpalanụ Itekwu ɛtɛ Galili, baa kwụbɛ miaụŋ-mo-bino mu ko mi yebi. Aba shɛ ga Saimon na du ɛɛ hiɛŋ ga Pita, na Andru yɛu-bino bwa, ta a 'waŋ igwune ya aba ni itekwu ɛtɛ, iwɛnɛ ta a shɛ ekwuzhi

¹⁹Ge Jisus hiɛŋ aŋ, Hwure ma hi n 'wa, N zhɛ ma hi nda ekwuzhi atwa ti'ima.

²⁰Ee genji ga n-ngwuno ma aba gunu ata aa 'wa bụ.

²¹Aka na ti ge Jisus beni apata, baa kwụbananɛ miaụŋ-me-eyi ma binya bụtụ bu ko mi yebi, ge Jemis ni yɛu-bino bwa ga Jon, a na shɛ miaụŋ mi Zɛbɛdi. A namɛ nụ ụhaŋtụ, ne bishi ba aba, aa nangangana n-ngwuno ma aba. Ge Jisus suyanɛ aŋ.

²²Nazhɛ ee genji ụhaŋtụ, te bishi ba aba, aa 'wa bụ.

²³Ti ge Jisus bo rungo ofwo elele na cɛnjɛ tu Galili. Boo mbisogono atwa iyi no shimwono shɛ tụ'ulwatagwụ sha aba, baa ananga du kaa Anabarɛ Ebiye Cɛnjɛ-ta-tugwama, baa nɛnga du atwa elele, ni igwumɛgwumɛ ya aba.

²⁴Ibɛ po urishi ubwa mburusonu, wee zhe tutu cɛnjɛ ti Siria kpaaŋ, iwɛbɛ po ee sugeni bu atwa na ụngwụ gɛnɛgɛnɛ wa pana ụbaụta, ta atwa na a laya tigbici, ta atwa na a sụma-ụmpɛ, ta atwa na tu'waba ta aba tu 'wegeni, baa nɛnjɛ aŋ hwɛɛ aba.

²⁵Atwa ofwugwo ụ'wụtụ bananjɛ nu Galili, ti Dikapolis,[9] tu Jɛrusalɛm, tu Judia keeni hileniye Urefu Jodan, aa 'wa bụ.