Read bassa MATIU 5 Bible Online

MATIU 5 - bassa bible

MATIU 5

¹Ti ge Jisus kwụbɛ unyama wa atwa, bee munji ni ishɛmɛ ike baa jɛjɛ, ibɛ eseshi-iyi ubwa zhajɛ pu bwa.

²Bee kepishinji unu ubwa, bee mbisegeni aŋ iyi, bɛɛ hiɛŋ.

³Atwa na mepi maa a shɛ okofwo ni iyi mpiala gwoje, iwɛnɛ ta Cɛnjɛ-ta-tugwama ta azuba ti zhɛ ta sha ma ta aba.[10]

⁴Atwa na a ta-ụkwụla gwoje, iwɛnɛ ta Agwatana zhɛ a ingatanga aŋ.

⁵Atwa na meme-zucinje gwoje, iwɛnɛ tɛ ɛ zhɛ a ya-ogwu iyi nɛ Agwatana shileni aŋ unu ibɛ nu unyizo.

⁶Atwa na imunɛ keeni i'uyɛ ya kwụna, iwɛ tiririri gwoje, iwɛnɛ tɛ ɛ zhɛ o shigogo.

⁷Atwa na o hioko inyɛmɛnyɛmɛ ya atwa vwɛ aba gwoje, iwɛnɛ tɛ ɛ zhɛ a ya du ule inyɛmɛnyɛmɛ tihioko.

⁸Atwa na shɛmɛ sha aba shɛ namɛ rụmbɛɛ gwoje, iwɛnɛ tɛ ɛ zhɛ a kwụba hwuŋ Agwatana.

⁹Atwa na a karɛ amɛ-olom gwoje, iwɛnɛ tɛ ɛ zhɛ ɛ hiɛŋ aŋ miaụŋ ma Agwatana.

¹⁰Atwa na anya aba a shɛka iwɛ tiririri gwoje, iwɛnɛ ta Cɛnjɛ-ta-tugwama ta azuba tɛ shɛ ma ta aba.

¹¹Hi gwoje iwɛnɛ ta atwa zhɛ ma hi twagaga, ɛɛ zhɛ ma hiɛ shɛka du, ɛɛ zhɛ kaa mo hi mbisogo n-ndumwa mụ wɛ me elele keeni ụzagwụ iwɛ mi.

¹²Ga shɛmɛ shi hiŋ shi lemi, maa hi bweji unyasa, iwɛnɛ te titeni ti hiŋ ti zhɛ to gombo hwuŋ na azuba. Gobwonu du aa shɛkwa la egesere na hwulwo umbe ne hiŋ.

¹³Ahiɛba hiɛ shɛ manɛ mu unyizo ga. Yaa shɛ manɛ mu lacɛmɛ shɛ, imbe ɛɛ zhɛ a nda mụ maa mụ lacɛmɛɛ? Te kwuni na aka ata mɛ zhɛshɛ ya maa a njɛ uhwara we elele na muba o, semi tu'waŋ ɛɛ zhɛ a 'waŋ mụ maa atwa rikeci mu.

¹⁴Ahiɛba hiɛ shɛ uhioko-uhwaŋna unyizo ga. Ụshɛpwụ na patanɛ ni ishɛmɛ eri shi wa swaka o.

¹⁵I za bụtụ na zhɛ bo shiyono ụsụtụla ulwa maa urugono uŋ okolo, semi bi zhɛ ba patana ụŋ nu uteburu-ụsụtụla, nazhɛ wɛɛ zhɛ wo hiokono atwa elele na zweni nu umwono ata uhwaŋna.

¹⁶Lono ma maa uhioko-uhwaŋna hiŋ na ta du na ashashɛ atwa gana ata, iwɛ maa a na kwụba ugondu hiŋ ubiye, maa a na pana Bishi hiŋ na namɛ na azuba ụjɛrụma.

¹⁷Ta haŋsa ma maa N zhajɛ maa Mo 'woricingo iyi nɛ 'nywotwo nu Undwa keeni iyi nɛ egesere 'nywotwo la o.[11] N zhe shi maa Mo 'woricingo iŋ o, ama iwɛ maa Ma ụrɛcɛnga iŋ.

¹⁸Iwɛ-tɛkana Omo hi mbiso, okwo azuba, tu unyizo keshici hwɛɛ, ama bi'nyata bu undwa bi ticwɛŋ kwo kaa ukangasụ ubwa okwo bu ko zha shɛ ba kashɛka uuwa i ci aka na aa ụrɛcɛnjɛ iyi elele kpaaŋ o.

¹⁹Ibɛ po bụtụ be elele na bweji unu-tupana okwo uko, na gwụmwatangwụ, na kaa bo mbisogono du atwa maa ga a na nda gana ata, ɛ zhɛ ɛ hiɛŋ bụ bụtụ na 'nyanɛ na Cɛnjɛ-ta-tugwama ta azuba. Ama bụtụ be elele na ba nda uŋ, boo mbisogono kaa du anya atwa maa ga a na nda gana ata, ubwa zhɛ ba sha bụtụ bụ 'wụtụ na Cɛnjɛ-ta-tugwama ta azuba.

²⁰Mo hi mbiso maa, yaa shɛ tiririri ti hiŋ tu hwuri shi ma tụ tụ embisegeni Undwa keeni ma tụ tụ Afarisi duwa duwa, asha hi zha shɛ hio tono Cɛnjɛ-ta-tugwama ta azuba kwukwuŋ.

²¹Hi hwugwa ta a jɛmɛ cala cala, ɛɛ hiɛŋ, Ta kwụna ma bụtụ o, bụtụ be elele na kwụnɛ bụtụ, ɛ zhɛ a suyana bụ ụshɛrɛya.

²²Ama Mo hi mbiso inee mi, maa bụtụ be elele na ba nda isɛbwɛ ni yɛu-bino bwa, ɛ zhɛ a suyana bụ ụshɛrɛya. Bụtụ be elele na kaa bɛ hiɛŋ yɛu-bino bwa, Gabụ bụtụ bu tusashɛ, ɛ zhɛ a suyana bụ ụshɛrɛya na agba Ajɛmɛ-ụshɛrɛya. Bụtụ be elele na kaa hiɛŋ yɛu-bino bwa, Gabụ alagwụ, asha bu namɛ na tijama tu ukwokwo ulwa.

²³Ibɛ po yaa shɛ abu 'waŋnɛ upwaŋ bụ maa peteni nu utukwu-ụrụpɛ, ebi teyinje ya apata maa yɛu-bino bu 'yajɛ umukwu na bu,

²⁴asha ganga tugwo upwaŋ ata bụ nu umbe utukwu ata, maa zhe maa hi kwunanjɛ iwɛ ɛtɛ ni yɛu-bino bu tugwo hiiŋ nazhɛ gwure maa shɛkanɛ upwaŋ ata bụ.

²⁵Nda kakayɛ maa kwunanjɛ uwuru na ubu namanɛ na binya bụ tɛ ɛhi tɛ zhɛ nu uhwaŋna, iwɛ maa kede ma bụ shapa no ofwo Bɛjɛmɛ-bụ-ụshɛrɛya, maa Bɛjɛmɛ-bụ-ụshɛrɛya ibi shepi no ofwo iyɛri umwono-tishi o, nazhɛ iyɛri ɛtɛ umwono-tishi zhɛ ma bụ kala nu umwono ubwa tishi.

²⁶Iwɛ-tɛkana Omo hi mbiso maa, bu zha shɛ ba banɛ apata kwukwuŋ, semi aka na abɛ njɛ tijama tu na aa bụ mụnɛ hwɛɛ.

²⁷Hi hwugwa tɛ ɛ hiɛŋ, Ta nda ma tuwɛle o.

²⁸Ama Gamba mo hi mbiso inee mi maa, bụtụ be elele na ba ngbaraka biyikwo, baa nda ukwedeyi ubwa, asha bu nduwa tuwɛle nu bwa na amɛ ubwa cebe.

²⁹Yaa shɛ rishe rụ bụ rụ u'ala ubiye ra bụ ana iwɛwɛ tɛnda, asha bwa rụ kala. Inɛ ɛtɛ zhɛ ma bụ zhɛmana maa vwụnjɛ ụpadụ tu'waba tụ bụ uko uhwuri maa e keri tukwugwu tụ bụ kpaaŋ kpaaŋ nu ukwokwo ulwa.

³⁰Yaa shɛ kaa u'ala bụ ubiye ma bụ ana iwɛwɛ tɛnda, asha jaja uŋ kala. Inɛ ɛtɛ zhɛ ma bụ zhɛmana maa vwụnjɛ ụpadụ tu'waba tụ bụ uko uhwuri maa e keri tukwugwu tụ bụ kpaaŋ kpaaŋ nu ukwokwo ulwa.

³¹A dumwa la cala, ɛɛ hiɛŋ, Bụtụ be elele na keri biyikwo bwa, asha ga pana bụ utakada biyikwo tukala.

³²Ama Gamba mo hi mbiso inee mi maa, bụtụ be elele na keri biyikwo bwa ti yaa shɛ shɛ tuwɛle biyikwo ata ba nda, asha ubwa eni biyikwo ata tuwɛle tɛnda, ti yaa shɛ biyikwo ata tɛnananɛ. Bụtụ be elele na kaa du zeni biyikwo ata ee keri, asha bɛ njɛ du tuwɛle.

³³Hi hwugwa te e mbishi atwa angwụshɛ, ɛɛ hiɛŋ, Ta bwada ma unu na ehi shiri o, ama bɛ shɛ ba ndana Agwangwama iyi nɛ obu go shilwonuo bu unu ibɛ.

³⁴Ama Gamba mo hi mbiso inee mi maa, ta na ta ma iyi elele kwukwuŋ. Ta ta ma azuba o, iwɛnɛ ta a shɛ idwɛtwɛ ya Agwatana.

³⁵Ta na ta ma unyizo, iwɛnɛ tu waa shɛ ụdụsa na Agwatana a patangana ivwunɛ. Ta na ta ma Jɛrusalɛm, iwɛnɛ tu waa shɛ ụshɛpwụ wa Agwuma A'wụtụ.

³⁶Ta na ta ma uhiuhiu hiŋ o, iwɛnɛ te ehi eri shi hia nda maa bihiŋzhe hiŋ okwo bu ko bɛ shɛ bu na bɛ cɛnjɛ kwo kaa bu na bi shi.

³⁷Ama ga n-ndumwa mi hiŋ mu na sha, Iiŋ kwo kaa Awo. Iyi elele nɛ namɛ ya swooŋ ni inɛ ɛtɛ, asha i banɛ no olugwo bụtụ ata bụ wɛ.

³⁸Hi hwugwa tɛ ɛ hiɛŋ, Bụtụ ụbụ vwɛ rishe, vwa bu du rishe tụlụkpashɛ, bụtụ ubu mwi rine, mwo bu du rine tụlụkpashɛ.

³⁹Ama Gamba mo hi mbiso inee mi maa, ta tụpana ma iyi iwɛ nɛ bụtụ ihiɛ njɛ o. Ama yaa shɛ bụtụ ubu po uwaŋpɛ nu upada u'ala ubiye, jɛshɛrɛgana bụ upada u'ala ugwulwo.

⁴⁰Yaa shɛ kaa bụtụ be elele ba jala maa ma bụ suyana ụshɛrɛya, bee shepi idikɛ bụ, ta nyasa bu du utogwo bu tusugo.

⁴¹Yaa shɛ kaa bụtụ be elele ma bụ nda iji maa ma bụ shapa imɛle ike, asha 'wa bụ ya imɛle iyebi.

⁴²Na pana bụtụ na ma bụ lụpa iyi nɛ baa bụ lụpa. Bụtụ na kaa ba jala maa unanjɛ bụ iyi, ta nyasa bu o.

⁴³Hi hwugwa maa ɛ hiɛŋ, Lubo uyebi bu, ama imo bụtụ-bi-i'ime bu.

⁴⁴Ama Gamba mo hi mbiso inee mi maa, lubo ma atwa-i'ime hiŋ. Na ndana ma atwa na ma hiɛ shɛka adua,

⁴⁵iwɛ maa hiɛ shɛ miaụŋ me Bishi hiŋ na namɛ na azuba. Iwɛnɛ tu baa nda maa ga uwaŋna ubwa na tana atwa awɛ keeni atwa ebiye, baa nda kaa du maa ge eshilo no ngbono atwa tiririri keeni atwa na zasa ririri.

⁴⁶Yaa shɛ ohio lubo atwa na mo hi lubo kiri, asha ce ule na ɛhi zhɛ hia lashɛga hwuŋ namɛɛ? Okwo ele-ụdalụ du njɛ shɛ suu gana ata?

⁴⁷Yaa shɛ kaa miaụŋ-mo-bino hiŋ kiri ahia 'walụ, asha imbe ahiɛ njɛ uhwuri atwa vwɛɛ? Okwo atwa na tɛtanɛ shɛ rishe njɛ shɛ suu du gana ata?

⁴⁸Ibɛ po sha ma du atwa na ulwa gana na te Bishi hiŋ na namɛ na azuba ulwa.