Read bassa MATIU 6 Bible Online

MATIU 6 - bassa bible

MATIU 6

¹Na nda ma pece maa kede hi na nda iyi hiŋ i tiririri ne eshe atwa maa a na hi kwụba o, shibwonu hi zha shɛ hia lashɛga hwuŋ ule hiŋ ne Bishi hiŋ na namɛ na azuba o.

²Aka na aba pana okofwo apwaŋ, ta na ananga, gana na atwa na a nda tɛnda-te-eshe a nda no shimwono shɛ Tụ'ụlwatagwụ sha aba keeni ni ihwɛŋnɛ, maa atwa na dumanga aŋ o. Iwɛ-tɛkana Omo hi mbiso maa, o loshigwo ule wa aba.

³Ama aka na aba pana okofwo apwaŋ, to lono maa u'ala bụ ugwulwo mepi iyi nɛ u'ala bụ ubiye wa nda o,

⁴iwɛ maa ga apwaŋ na aba pana okofwo a shɛ ne tusweci, iwɛ maa tuba Bishi bu na ba kwụba iyi ne tusweci ubu peni hwuŋ ule bu.

⁵Aka na ahia nda adua, ta na nda ma gana na atwa na a nda tɛnda-te-eshe a nda o. Iwɛnɛ to o lubo tishikono no shimwono shɛ tu'ulwa keeni shiseshi shi ihwɛŋnɛ, iwɛ maa atwa na kwụba aŋ. Iwɛ-tɛkana Omo hi mbiso maa, o loshigwo ule wa aba.

⁶Ama aka na ɛbi zhɛ ba nda adua, tono taa na amɛ umwono bu maa kepi odubo bu, maa njɛ adua bụ pe Bishi bu na namɛ ne tusweci, iwɛ maa Bishi bu na ba kwụba iyi ne tusweci ubu peni ule bu.

⁷Aka na aba nda adua, ta na dumanga n-ndumwa mu tusashɛ gana na atwa na tɛtanɛ shɛ rishe a nda o. Iwɛnɛ te e heŋshi maa iwɛ n-ndumwa mu ufwugwo mu na aa dumanga, ibɛ po ɛɛ zhɛ a hwuga iwɛ aba.

⁸Ta sha ma gana aba o, Bishi hiŋ mwopwo iyi nɛ ukekeshi ibɛ ma hi nda tobwolo hi ta lụpɛ shɛ bụ iŋ o.

⁹Ama gana i shɛ maa hi na nda adua na: Bishi tu na namɛ na azuba, Ge izeci bu jirimi,

¹⁰Ga Cɛnjɛ-ta-tugwama tụ bụ ti zhɛ, Ga a na nda ụkwụlana bụ, Nu unyizo, gana na aa nda ụŋ na azuba.

¹¹Iti peni iyimɛyɛ nɛ i tu to ukekeshi hwayɛ ga.

¹²Iti gengeni tu'wanganga tu tu, gana na otu gongwonuo atwa na utu 'wanganɛ.

¹³To tu tocingo na tumanga o, ama na tu lashɛga ni i'ɛlɛ bụtụ bụ wɛ.[12] [Iwɛnɛ po gabụ bɛ 'yajɛ Cɛnjɛ-ta-tugwama, nu ukpahiŋ, nụ ụjɛrụma unyizo-nom Ami].

¹⁴Yaa shɛ ahia gangana atwa tu'wanganga ta aba, nazhɛ Bishi hiŋ na namɛ na azuba zhɛ ma hi gangana du tu'wanganga ti hiŋ.

¹⁵Ama yaa shɛ ehi gengeni shi atwa tu'wanganga ta aba, asha Bishi hiŋ zha shɛ ma hi gangana du tu'wanganga ti hiŋ o.

¹⁶Aka na ahia nda ezumi, ta na ta ma usumbu gana atwa na a nda tɛnda-te-eshe o. Iwɛnɛ ta a hashagana shishe sha aba maa atwa na mapa maa a nda ba ezumi. Iwɛ-tɛkana Omo hi mbiso maa, o loshigwo ule wa aba.

¹⁷Ama aka na abu ta nda ezumi bu, na sụkwụtwa uhiuhiu bu manɛbɛ, na fwata du eshe bu,

¹⁸iwɛ ma kede atwa mepi maa ba nda ba ezumi o, semi ga shɛ Bishi bu na namɛ no ofwo tusweci, maa ma bụ pana ule bu.

¹⁹To no momo tulonono ma uduciya nu unyizo ga, no ofwo na a'nyasụ, keeni tukwocikwolwo ti zhɛ ta nda ụŋ ufwu o, kwo kaa ofwo na ozundo o bwugo, oo tono maa o no zundo uŋ o.

²⁰Ama no momo tulonono ma uduciya na azuba, no ofwo na a'nyasụ, keeni tukwocikwolo ti zha shɛ ta nda ụŋ ufwu keeni ofwo na ozundo kaa eri shi o bwugo maa e zunji o.

²¹Ofwo elele na uduciya bụ namɛ, apata du ahaŋsa bụ namɛ hwɛɛ.

²²Eshe, aba shɛ ụsụtụla tu'waba. Yaa shɛ eshe bu namɛ ndaụụ, asha tu'waba tụ bụ ti zhɛ ta sha uhioko-uhwaŋna hwɛ hwɛɛ.

²³Ama yaa shɛ eshe bu zasa ndaụụ, asha tu'waba tụ bụ ti zhɛ ta sha tishi hwɛ hwɛɛ. Ama kaa yaa shɛ uhioko-uhwaŋna na namɛ na amɛ bụ shɛ tishi, asha tishi ta ata tu hwuri ugombo.

²⁴I zasa bụtụ be elele na eri ba ndana shɛgwangwama shi yebi iyi o. Asha bi zhɛ bo imo bu ko bɛɛ zhɛ bo lubo bu na bi yebi, kwo kaa maa muna bu ko ụjɛrụma, maa ngbaraka bu na bi yebi cwɛŋ. Hi eri shi hi na ndana Agwatana iyi hi na ndana uduciya iyi o.

²⁵Iwɛbɛ po Omo hi mbiso maa, Kede iwɛ uraiŋ hiŋ ihi tɛtaga, iwɛ iyi nɛ ɛhi zhɛ hia ya keeni iyi nɛ ɛhi zhɛ hia swa, okwo iwɛ iyi nɛ ɛhi zhɛ hio urugono na tu'waba ti hiŋ o. Shɛ uraiŋ suu uhwuri iyimɛyɛ? Shɛ tu'waba suu tu hwuri tugwuno?

²⁶Hioko ma shanụnụ shɛ na sha hila, shɛ bɛrɛ shɛ iyimɛyɛ, shi gwubi shi, shi zweni shi iyimɛyɛ nu urubwu o, ama Bishi hiŋ na namɛ na azuba ubwa ba biga shụ. Shɛ ahiɛba suu hi 'yaganɛ bụ ule uhwuri shu duwa?

²⁷Gaaba namba na ashashɛ hiŋ eri ba kaana uraiŋ ubwa ụnjɛswa[13] iwɛnɛ yaa tɛtajɛ bụụ?

²⁸Iwembe po ya iwɛ tugwuno ma hiɛ tɛtagaa? Na haŋsa ma tebiye gana na modwodwo ma waŋna na ambɛ. Mɛ njɛ shɛ ụbaụta, mu mama nanɛ shɛ kaa tugwuno.

²⁹Ama Mo hi mbiso maa, Okwo go Sụlụmụn nu ụjɛrụma ubwa kpaaŋ, bu urigeni shi iyi elele nɛ pilanụ gana modwodwo mu ga okwo mu ko.

³⁰Yaa shɛ Agwatana eri a nda ambɛ ehilo a na namɛ hwayɛ ga, a na ɛɛ zhɛ o hwoŋzhingo beyi nu ulwa tisemberi, asha bi zha shɛ suu mo hi urugono tugwuno uhwuri mu, ahiɛba na hiɛ tɛtanɛ bụ rishe cwɛŋ?

³¹Iwɛ inɛ ɛtɛ, kede i na hi tɛtaga maa hi nɛ hiɛŋ, Imbe ɛti zhɛ ta yaa, imbe ɛti zhɛ ta swaa? Kwo kaa imbe ɛti zhɛ to urugonoo?

³²Ijɛ ibɛ atwa na tɛtanɛ shɛ rishe a jalakaka kpaaŋ. Bishi hiŋ na namɛ na azuba kaa mepi maa ukekeshi ijɛ kpaaŋ ma hi nda.

³³Ama na jalakaka ma cɛnjɛ-ta-tugwama tu bwa keeni tiririri tu bwa hiiŋ, nazhɛ bɛɛ zhɛ ma hi kaana ijɛ ɛtɛ kpaaŋ.

³⁴Iwɛ inɛ ɛtɛ kede iwɛ beyi ihi tɛtaga ya o, iwɛnɛ ti beyi zha 'yaga tɛtɛtaga ti ikɛnyi ibɛ. Ụjita we elele 'yagawa tɛtɛtaga tu na ti gembi uŋ.