Read bassa MATIU 9 Bible Online

MATIU 9 - bassa bible

MATIU 9

¹Ti ge Jisus teni ụhaŋtụ, bee keshi itekwu ɛtɛ, bee zhe nụ ụshɛpwụ ubwa.[16]

²Aa shapɛrɛganɛ bụ bụtụ bu ko na tu'waba tu bwa tu 'wegeni, na kaa bo woto no ogodo. Aka na ti ge Jisus kwụbɛ rishe-tɛtɛtana ra atwa na 'waŋnɛ bụ, bɛɛ hiɛŋ bụtụ ata tu'waba tu bwa tu 'wegeni, Ɛ-yɛu mi, ta nda inyɛsɛ o! O bu gongwonuo iwɛwɛ bụ.

³Nazhɛ embisegeni Undwa oko mama hiaŋnụ, Bụtụ ga ba dumangana Agwatana n-ndumwa mụ wɛ!

⁴Ti ge Jisus mepi[17] iyi nɛ aa haŋsa na shɛmɛ sha aba, bɛɛ hiɛŋ aŋ, Iwɛmbe po ahia haŋsa shihaŋsa shụ wɛ na shɛmɛ shi hiiŋ?

⁵Inɛ nɛɛ zasa iwɛ maa Mɛ hiɛɛŋ? Maa Mɛ hiɛŋ bụ suu, E bi gengeni iwɛwɛ bụ, okwo maa Mɛ hiɛŋ bụ, Ishijɛ, zhe tahaŋnụ?

⁶Ama iwɛ maa hi mepi maa Yɛu Bụtụ 'yajɛ ụhwada nu unyizo ga, maa gangana bụtụ iwɛwɛ ibwɛ. Nazhɛ bɛɛ hiɛŋ ya bụtụ ata tu'waba tu bwa tu 'wegeni, Ishijɛ shepi ogodo bu, maa hwuri ujiyo ni ihwɛ bụ.

⁷Bụtụ ata ishijɛ ga, bee hwuri ujiyo ni ihwɛ ibwɛ.

⁸Aka na ta atwa ata kwụbɛ ijɛ, igɛhi[18] 'imɛ aŋ, aa shɛtanɛ Agwatana na peni atwa ga ụhwada gana ga.

⁹Ti ge Jisus beni apata, bɛɛ zhɛ tɛkashɛka, baa kwụbɛ bụtụ bu ko na ɛɛ hiɛŋ izeci ibwɛ ga Matiu, tu baa jɛjɛ nu umwono na aa la ụdalụ, bɛɛ hiɛŋ bụ, N 'wa. Ga Matiu ishijɛ ga, baa 'wa bụ.

¹⁰Aka na ti ge Jisus ba ya iyimɛyɛ nu umwono Matiu, ibɛ ele-ụdalụ ofwugwo, keeni atwa-iwɛwɛ zhajɛ, aa gɛgajɛ no ofwo ata ge Jisus ba ya iyimɛyɛ ne eseshi-iyi ubwa.

¹¹Aka na ta Afarisi oko kwụbɛ iŋ, ɛɛ hiɛŋ eseshi-iyi ubwa, Iwɛmbe po bimbisegeni hiŋ ba ya iyimɛyɛ ne ele-ụdalụ keeni atwa-iwɛwɛɛ?

¹²Aka na ti ge Jisus hwụjɛ iwɛ ɛtɛ, bɛɛ hiɛŋ aŋ, Ukekeshi buwa-bi-inibi te shi atwa na namɛ lapiya o, semi atwa na a gwumanga kiri.

¹³Zhaga soso ma ijɛ, inyɛmɛnyɛmɛ Ama jala, ama shɛ ụrụpɛ o. N zhe shi maa ma suyana atwa tiririri o, semi atwa-iwɛwɛ.

¹⁴Nazhɛ eseshi-iyi Jon zhajɛ pi Jisus, ee heŋteni bu, ɛɛ hiɛŋ, Iwɛmbe po ata nda ezumi ɛgbɛ ɛgbɛ[19] na Afarisi, eseshi-iyi bu tuba njɛ shɛɛ?

¹⁵Ge Jisus jishijɛ aŋ, bɛɛ hiɛŋ, Eyejilo bwolo-be-eyikwo a nda hwuŋ suu ezumi na aka na to bwolo-be-eyikwo ta namɛ na aba? Ama aka zhɛ o to, tɛ ɛ zhɛ a shapa bwolo-be-eyikwo no olugwo aba, aka ata nazhɛ ɛɛ zhɛ a nda ezumi.

¹⁶I zasa bụtụ zha jaja tugwuno tu ufwo maa swana utogwo ụngwụshɛ o, iwɛ aka na tugwuno ta ata ti zhɛ ta kaana utogwo ata ti'ingicinga.

¹⁷E zweni shi hwuŋ meni mụ tụ'walụ ta afwafwa mu ufwo no otutu angwụshɛ o, shibwonu otutu ata zhɛ o puswo, nazhɛ meni ma ata mụ tụ'walụ ta afwafwa mi zhɛ mo dudugwo; otutu ata kaa du zhɛ a nda ya ufwu. Ama o zwono hwuŋ meni mụ tụ'walụ ta afwafwa mu ufwo no otutu ofwo, nazhɛ mɛɛ zhɛ me ilogogo hwɛɛ to otutu ata.

¹⁸Ti ge Jisus mbishi aŋ inɛ ɛtɛ, nazhɛ uhiu uko zhajɛ eshigiri, wee kwuzeni bu, bɛɛ hiɛŋ bụ, Yɛu mi yo o 'wi ba hwuwayɛ hwuwayɛ go, zhajɛ kaa maa timengeni bu maa hiɛ.

¹⁹Ge Jisus ishijɛ ga, te eseshi-iyi ubwa hwɛɛ aa 'wa bụ.

²⁰Na aka ata, ibɛ biyikwo bu ko na ba bana mehieŋ shiywa umpwa-na-shɛba-shi-yebi, ringeni geri ba aba ubwa, bee timengeni izhɛmi utogwo ubwa swɛɛ.

²¹Iwɛnɛ po biyikwo ata mɛmɛ hiɛŋ, Okwo utogwo ubwa ubaba Ngee timengeni hwayɛ, N zhɛ ma zhɛmanana.

²²Ti ge Jisus jishirijɛ mabaaba, baa kwụbɛ biyikwo ata, bɛɛ hiɛŋ bụ, Ɛ-yɛu mi, ima-isɛbwɛ! Rishe rụ bụ tɛtɛtana rụ bụ nɛnjɛ. Ibɛ po biyikwo ata zhɛmananɛ te kwuni na aka ata.

²³Aka na ti ge Jisus teni ihwɛ uhiu we ebe, baa kwụbɛ atwa ofwugwo, ta atwa na o hwulo akpasana, ta atwa na a nda rundu,

²⁴bɛɛ hiɛŋ aŋ, Bana ma epe. Yɛu gɛ kaa 'wi shi, malabụ kwakwa yoo woto. Ama atwa ata hiɛnjɛ bụ ilɛtu ya asada.

²⁵Aka na ta atwa ata bananjɛ hwɛɛ, nazhɛ ge Jisus teni ya na amɛ umwono ata yɛu ɛtɛ weci, bɛɛ imɛ u'ala yɛu ɛtɛ, nazhɛ yɛu ɛtɛ ishijɛ.

²⁶Unabarɛ iwɛ ɛtɛ mburusonu na cɛnjɛ ta ata kpaaŋ.

²⁷Ti ge Jisus beni apata, ibɛ sholubo shi ko shi yebi shɛ 'wa bụ, shaa ugaga duwa, shɛɛ hiɛŋ, Gabụ Yɛu Devid, hioko inyɛmɛnyɛmɛ tu!

²⁸Aka na ti ge Jisus teni nu umwono, sholubo sha ata shɛ zhajɛ pu bwa. Ge Jisus heŋteni aŋ, bɛɛ hiɛŋ, Hiɛ tɛtanɛ suu rishe maa N eri ma nda ijɛ? Ɛɛ hiɛŋ bụ, Agwangwama, Iiŋ!

²⁹Nazhɛ ge Jisus timengeni shishe sha aba, bɛɛ hiɛŋ aŋ, Ga ihi shanɛ gana na ta ahiɛ tɛtanɛ-rishe.

³⁰Nazhɛ shishe sha aba shi ushogwu ga. Nazhɛ ge Jisus tɛtaganɛ aŋ unu duwa duwa, bɛɛ hiɛŋ aŋ, Kwụba ma, ta nda ma maa bụtụ be elele mepi iwɛ gɛ o.

³¹Ama te e beni apata, ee zhe oo mburusonu unabarɛ ubwa na cɛnjɛ ta ata kpaaŋ.

³²Ta a zha tahaŋnụ ta aba, ibɛ atwa oko shapɛrɛganɛ Jisus igwureni ike nɛ butumwa-bi-ibiri namɛ na amɛ ubwa.

³³Aka na ti ge Jisus becinji butumwa ata bi ibiri, nazhɛ igwureni ɛtɛ dumanɛ iwɛ. Yaa dama atwa elele na namba apata, ɛɛ hiɛŋ, Tu ta kwụbɛ shɛ la iyi gɛnɛ gɛ kwukwuŋ na cɛnjɛ ti Isrɛl.

³⁴Ama Afarisi hiɛŋ, Nu ukpahiŋ uhiu wa atumwa-ibiri ibɛ bụtụ ga ba bacɛnga atumwa-ibiri.

³⁵Ge Jisus rungwutwonu ashɛpwụ a'wụtụ a'wụtụ keeni ashɛpwụ na gwụmwatangwụ turungo, boo mbisogono atwa iyi no shimwono shɛ tụ'ulwatagwụ sha aba, baa ananga kaa Anabarɛ Ebiye Cɛnjɛ-ta-tugwama, baa nɛnga du kaa atwa ni igwumɛgwumɛ gɛnɛgɛnɛ keeni tulwogogo te elele.

³⁶Aka na tu baa kwụbɛ atwa ofwugwo, ibɛ po inyɛmɛnyɛmɛ ya aba shɛ bụ, iwɛnɛ ti iyi ya zuga aŋ na shɛmɛ sha aba, a zasa kaa bụtụ maa mbiyono aŋ o, a shɛ gana agwụdụ na zasa bi'iywa.

³⁷Nazhɛ ge Jisus hiɛŋ eseshi-iyi ubwa, Iyimɛyɛ nɛ i nɛ tugwubo gembi ne ehilo tebiye, ama anjɛ-ugondu twa sụ ufwugwo.

³⁸Iwɛ ecilo ata na tabwa ma Agwangwama iyi-tugwubo maa tumwanɛ anjɛ-ugondu ne ehilo iyi ibwɛ tugwubo.