Read bassa MAK 1 Bible Online

MAK 1 - bassa bible

MAK 1

¹Umozhigo wa Anabarɛ Ebiye iwɛ Jisus Krast Yɛu ya Agwatana[1]

²U namɛ gana na ta Agwatana jɛmɛ nu utakada bigesere ga Ayizaya,[2] bɛɛ hiɛŋ, N zhɛ ma tumwana butumwa mi nu umbe bu, na zhɛ ma bu hangana uhwaŋna.

³Rụhwụŋ ra bụtụ bu ko ra ugaga nụ ụshɛka, rɛɛ hiɛŋ, Hanga ma uhwaŋna wa Agwangwama, nda ma uhwaŋna ata kpororo.

⁴Ga Jon Bɛnjɛ-bu-baptizim namɛ nụ ụshɛka baa ananga iwɛ ahaŋsa-tɛjɛshɛrɛga iwɛ maa e gengeni aŋ iwɛwɛ ya aba maa a njɛ aŋ ubaptizim.

⁵Atwa cɛnjɛ tu Judia, na atwa Jɛrusalɛm bananjɛ kpaaŋ aba ɛɛ zhɛ pu bwa, ee leni-unu iwɛwɛ ya aba, baa njɛ aŋ ubaptizim nu Urefu Jodan.

⁶Ga Jon bo urugono tugwuno tu na aa njɛ ne tihiŋzhe ti irihende, boo umpo embi ubwa nu umazhɛya na aa njɛ nu u'waba, baa ya ovworo keeni meni mi iswɛ.

⁷Ga Jon enenji, bɛɛ hiɛŋ, Bụtụ bu ko be ci ba ne ekwunyi mi, bu n hwuri ikɛnyi, N teni shi cɛŋ maa mo tufwurungo okwo ihwehwe ya abida ubwa o.

⁸Ma hi nda ubaptizim ne meni, ama bụtụ ata ubwa zhɛ ma hi nda ubaptizim na Mpiala mi Tijilo.

⁹Na aka ata ibɛ ge Jisus banɛ nu Nazarɛt na namɛ na cɛnjɛ tu Galili, ga Jon njɛ bu ubaptizim nu Urefu Jodan.

¹⁰Gunu ata ti ge Jisus be ci ụbanụ ne meni, baa kwụbɛ ta azuba bagwụ, Mpiala mi tijilo mu zwe nu uhiuhiu ubwa gana ikwucime.

¹¹Nazhɛ rụhwụŋ ru ko ru banɛ na azuba, rɛɛ hiɛŋ, Gabụ bɛ shɛ Yɛu mi nɛ Omo lubo duwa, amɛ mi kaa lemi na bu tebiye.

¹²Gunu ata ibɛ Mpiala ma Agwatana mu unzhi Jisus maa zha nụ ụshɛka.

¹³Ge Jisus namɛ nụ ụshɛka ata jitɛ buhanda, abana ni isundɛ-ehilo, ge Setan menji bu. Nazhɛ atumwa azuba zhajɛ aa ndanɛ bụ iyi.

¹⁴Na aba na ta a 'imɛ Jon ee kepi bu nu umwono-tishi, ge Jisus zhajɛ nu Galili, bee enenji Anabarɛ Ebiye Agwatana, bɛɛ hiɛŋ,

¹⁵Cɛnjɛ-ta-tugwama ta Agwatana tu gwumwonu, aka ci ya maa hiɛ jɛshɛrɛjɛ-shihaŋsa shi hiŋ maa hiɛ tɛtana Anabarɛ Ebiye rishe.

¹⁶Ti ge Jisus ba zha tahaŋnụ nu ụpalanụ Itekwu Galili, baa kwụbɛ Saimon, ni yɛu-bino bwa ga Andru, ta a 'waŋ igwune ya aba ni itekwu ɛtɛ, iwɛnɛ ta a shɛ ekwuzhi.

¹⁷Ge Jisus hiɛŋ aŋ, N 'wa ma, N zhɛ ma hi nda ekwuzhi na a ima atwa.

¹⁸Ee genji n-ngwuno ma aba gunu ata aa 'wa Jisus.

¹⁹Ti ge Jisus to tuhwulo geri-be-eshe fwalaa, baa kwụbɛ Jemis yɛu Zɛbɛdi, ni yɛu-bino bwa ga Jon, ta a jɛjɛ nụ ụhaŋtụ aa nangana n-ngwuno ma aba.

²⁰Ge Jisus suyanɛ aŋ, gunu ata ee genji bishi aba gɛ Zɛbɛdi nụ ụhaŋtụ, ta miaụŋ-mu-ugondu mu na ma lashɛga alubashɛ, aa 'wa Jisus.

²¹Ti ge Jisus ne eseshi-iyi ubwa zhajɛ nu Kapanaum, ge Jisus teni nu umwono Tụ'ụlwatagwụ nụ Ụjita-ụhinjanụ, bee mbisegeni atwamwa iyi.

²²Iyi nɛ ge Jisus mbisegeni aŋ dama aŋ, iwɛnɛ ti bee mbisegeni aŋ iyi nu ụhwada, shɛ gana na te embisegeni Undwa o mbisogono aŋ o.

²³Bụtụ bu ko namba nu umwono ata Tụ'ụlwatagwụ na mpiala mụ wɛ mu namɛ na amɛ ubwa.

²⁴Ibɛ bụtụ ata uganɛ, bɛɛ hiɛŋ, Imbe shɛ inee tu na bu gabụ ge Jisus bụtụ bu Nazarɛtii? Bu zhajɛ suu maa ɛtɛ njɛ ufwu? M mepi bụtụ na abɛ shɛ. Bụtụ bi Tijilo ba Agwatana abɛ shɛ.

²⁵Ge Jisus tezhigeni mu, bɛɛ hiɛŋ, Ima ilɛmɛ, banɛ na amɛ ubwa!

²⁶Nazhɛ mpiala ma ata mụ wɛ mi keri bụtụ ata tigbici, maa uganɛ duwa, nazhɛ maa banɛ na amɛ ubwa.

²⁷Ibɛ po igɛhi 'imɛ atwa ata kpaaŋ aba, oo momo hoŋtongonu, ɛɛ hiɛŋ, Imbe shaanaa? Timbisogono tu ufwo ti imbe nɛɛ? Iwɛnɛ ti bee peni mipiala mụ wɛ unu nu ụhwada, maa hwụjɛ-unu ubwa!

²⁸Gunu ata unabarɛ Jisus beni woo mburusonu no ofwo elele nu ukpeleshi cɛnjɛ tu Galili.

²⁹Ti ge Jisus,[3] ne Jemis keeni Jon beni nu umwono Tụ'ụlwatagwụ, ee zhe ni ihwɛ Saimon na Andru.

³⁰Te e'uji Saimon weci, mpiala mɛ shɛ bụ. Ee mbishi Jisus iwɛ ubwa.

³¹Ge Jisus zhe bɛɛ imɛ bu u'ala, bɛɛ ishicinjɛ bụ. Gunu ata mpiala ma ata mi genji bu, baa ndanɛ aŋ iyi.

³²Aka na tu uwaŋna teni ụrụmɛ shɛ, atwamwa suje atwa elele na a gwumanga keeni atwa na atumwa-ibiri namɛ na shɛmɛ sha aba aa zhajɛ no ofwo Jisus.

³³Ibɛ po atwa ụshɛpwụ ata kpaaŋ ụlwatagwụ no odubo.

³⁴Ge Jisus nɛnjɛ atwa ofwugwo a na ga 'yajɛ ụngwụ gɛnɛgɛnɛ, bee becinji du atumwa-ibiri ofwugwo na shɛmɛ sha atwa ata. Bi leneni shi atumwa-ibiri maa a dumanɛ iwɛ o, iwɛnɛ te e mepi bu.

³⁵Ge Jisus ishijɛ na aasavwungwa a'wụtụ, bee beni bee zhe no ofwo na bụtụ be elele zasaba, baa njɛ adua apata.

³⁶Ga Saimon na atwa vwɛ ubwa dwelekeci bu.

³⁷Aka na to o to bu ugbe, ɛɛ hiɛŋ bụ, Atwa kpaaŋ ma bu jalakaka.

³⁸Ge Jisus jishijɛ aŋ, bɛɛ hiɛŋ, Hwure ti zhe ma nyapadụ na ashɛpwụ na gwumwongonu, iwɛ maa Ma nda du apata i'enenji, ecilo no po Ngaa zhajɛ ta.

³⁹Ge Jisus tenenji shimwono shɛ Tụ'ụlwatagwụ shɛ na shɛ namanjɛ na cɛnjɛ tu Galili kpaaŋ, baa nda i'enenji, baa bacɛnga du atumwa-ibiri.

⁴⁰Bụtụ bu ko na 'yajɛ ụngwụ-uwaŋna[4] zhajɛ no ofwo Jisus, bee kwuzeni bu, baa tabwa bụ, bɛɛ hieŋ, Yaa shɛ yaa bu kwụlanɛ, bi eri bu ma nɛnga.

⁴¹Inyɛmɛnyɛmɛ ibwɛ shɛ Jisus, bee nderishinji u'ala ubwa, bee timengeni bụtụ ata, bɛɛ hiɛŋ bụ, I n kwụlanɛ, zhɛmanana ya.

⁴²Gunu ata ụngwụ-uwaŋna ata genji bụtụ ata baa zhɛmananɛ shɛ.

⁴³Ge Jisus becinji bụtụ ata, baa tɛtaganɛ bụ unu duwa duwa, bɛɛ hiɛŋ bụ,

⁴⁴To mbiso bụtụ be elele o. Ama zhaga meme mbiseni bunongbo, iwɛ tɛnɛnjɛ tu na aa bụ nɛnjɛ, pana bu du iyi nɛ go Moses ihi peni-unu ibɛ, iwɛ maa ibi le tiseyida no ofwo aba.[5]

⁴⁵Ama ta bụtụ ata beni apata, bee kwuni iwɛ ɛtɛ tu'ananga tutu boo mburusonu iŋ no ofwo elele, iwɛbɛ po ge Jisus eri shi[6] bo tono ya nụ ụshɛpwụ ụ'wụtụ we elele caakwụ, ama ba nama ya no tupohondo no ofwo na bụtụ zasaba, ama tuba atwamwa aa bananjɛ no olugwo elele aa zhaganɛ bụ.