Read bassa MAK 12 Bible Online

MAK 12 - bassa bible

MAK 12

¹Ge Jisus kwuni aŋ iyi timbisogono nu n-ndumwa tumanganjɛ, bɛɛ hiɛŋ, Bụtụ bu ko jwe itimɛ ya afwafwa, bee kepi iŋ uuwa boo rungwutwonu, bee vwuji du u'ibwa maa o no pilo meni ma ata mu tụ'walụ ta afwafwa, baa njɛ ta ashɛkpa. Nazhɛ bee peni ahwɛŋ-itimɛ igbɛtɛtɛ, baa sanɛ ya na cɛnjɛ ti nya.

²Aka na ta aka tụ'walụ ci, baa tumwanɛ yɛu ibwɛ ugondu ike maa lɛshijɛ tụ'walụ ta afwafwa tu na tɛ shɛ urobwo ubwa.

³Ibɛ ahwɛŋ-itimɛ ɛtɛ 'imɛ yɛu ɛtɛ ugondu, ee jibi bu, ee jicinji bu ni i'ɛlɛ yo ohondo.

⁴Baa tumwananɛ yɛu-ugondu inyɛ, aa gwụcanjɛ bu na ata nu uhiuhiu, ɛɛ njɛ bụ ụpụrụsa.

⁵Agwuma-itimɛ ɛtɛ tumwananɛ yɛu-ugondu inyɛ, bu na ata ubwa aa kwụnɛ, medenji miaụŋ-mu-ugondu mi nya mu ufwugwo. Ee jibi ono oko, aa kwụnɛ ono oko.

⁶Bụtụ bu ko na ta vwanɛ bu, ubwa shɛ yɛu ibwɛ nɛ boo lubo. Ubwa baa tumwanɛ no ofwo ahwɛŋ-itimɛ ɛtɛ umɛwɛɛ, bɛɛ hiɛŋ, Ɛ zhɛ a muna yɛu mi ụjɛrụma.

⁷Ama ahwɛŋ-itimɛ ɛtɛ mama hiaŋnụ, Bu na ga ubwa ree zhɛ ba ya hwuŋ ogwu ga. Hwure tụ kwụnɛ bụ ma, maa tu suji ma ogwu ga maa a shɛ onoo tu.

⁸Aa kwụnɛ yɛu ɛtɛ, ee keri bu ni ipɛlu itimɛ ɛtɛ ya afwafwa.

⁹Ge Jisus heŋteni aŋ, bɛɛ hiɛŋ, Imbe agwuma-itimɛ ɛtɛ zhɛ ba nda ahwɛŋ-itimɛ ɛtɛɛ? Bi zhɛ ba zha ba kwụna du ahwɛŋ-itimɛ ɛtɛ, ba lashɛga itimɛ ɛtɛ ya afwafwa, bo utogono anya atwa.

¹⁰Hi ta rɛcɛ shɛ suu Iwɛ ya Agwatana ata na oo 'nywotwo la, ɛɛ hiɛŋ, Utayɛ na Omo-tuma menji aa lacɛ gana uzhobu ubwa zhɛ wa sha utayɛ na ngezeni a na vwɛ hwɛɛ nụ ụzhɛ.

¹¹Taa ti yaa shɛ Agwangwama njɛ inɛ gɛ, iyi ụrụhwajɛ suu yaa shɛ ne eshe hiŋ?

¹²Ibɛ po ehwurembe Eju a jala maa a 'imɛ Jisus, ama a njɛ inyɛsɛ ya atwa na tileni apata. Iwɛnɛ te e mepi maa aba baa manganganɛ n-ndumwa ma ata. Ee genji Jisus aa sanɛ.

¹³Afarisi, na atwa Hɛrod tumwanɛ atwa oko pi Jisus, maa ɛ imɛ bu nu n-ndumwa mu na baa duma.

¹⁴Aka na te e ci Jisus, ɛɛ hiɛŋ bụ, E-Bimbisegeni, ti mepi maa bụtụ bu tɛkana abɛ shɛ, iyi bụtụ be elele ubu tatụlanụ sụ, bɛ shɛka sụ kaa bụtụ be elele o. Ama na tɛkana obo mbisogono atwa uhwaŋna wa Agwatana. Undwa leni suu maa bụtụ na tụpa Sisa ukwuribi ụdalụ, okwo u leni shi? I zhɛmɛ suu maa tu na tụpa okwo kede tu na tụpa o?

¹⁵Ama gana na ti ge Jisus mepi tɛnda-te-eshe ta aba, bɛɛ hiɛŋ aŋ, Iwembe po ahi ma mangaa? M panɛ ma urinya uko ma kwụba.

¹⁶Aa panɛ bụ uŋ. Bee heŋteni aŋ, bɛɛ hiɛŋ, Gaaba ee sweni ụsụbwa ubwa nu urinya ga keeni ti'nyeci tu gaa? Ɛɛ jishijɛ bụ, ɛɛ hiɛŋ, Ge Sisa.

¹⁷Ge Jisus jishijɛ aŋ, bɛɛ hiɛŋ, Iyi elele nɛ shɛ inɛ Sisa, pana ma Sisa, iyi elele nɛ kaa i shɛ inɛ ya Agwatana, pana ma Agwatana. Nazhɛ n-ndumwa mu na ge Jisus jɛmɛ mu dama aŋ duwa.

¹⁸Asadusi zhajɛ pi Jisus, aba shɛ atwa na hiɛŋ maa tihiɛ ta atwa na 'wi tu zasaba o. Ee unseni bu, ɛɛ hiɛŋ,

¹⁹E-Bimbisegeni, go Moses iti 'nyeteni nu Undwa, bɛɛ hiɛŋ, Yaa shɛ yɛu-bino bụtụ 'wi, bee genji biyikwo bwa na ee ge te meci shi kaa yɛu nu bwa, asha gɛ yɛu-bino[47] bwa zeni biyikwo ata tizhaada maa matanga yɛu-bino ɛtɛ ibwɛ yɛu.

²⁰Miaụŋ mu bụtụ bu ko mu namba mi cenje. Bu na bi hiiŋ zeni biyikwo, bu meci shi yɛu nazhɛ bee 'wi.

²¹Bu na bi yebi zeni biyikwo ata tizhaada, bee 'weeneni, bu meci shi du yɛu o. Gobwonu du yaa shaananɛ na bụtụ bu tatụ.

²²Atwa ecenje zeni biyikwo ata hwɛɛ aba, i zasa kaa bụtụ be elele meci yɛu ne biyikwo ata o. Nu ukwunanga ibɛ, biyikwo ata du 'wi ya.

²³Biyikwo aba tuba bɛɛ zhɛ ba sha hwuŋ na aka tihiɛɛ?[48] Iwɛnɛ po hwɛɛ aba ebecenje kaa zwonuo bu.

²⁴Ge Jisus jishijɛ aŋ, bɛɛ hiɛŋ, Shɛ iwɛnɛ suu ehi mepi shi Utakada wa Agwatana kwo kaa ukpahiŋ ubwa, upo ahiɛ 'inɛ?

²⁵Na aka na atwa zhɛ ɛ hiɛ hwuŋ, i zasa bụtụ zhɛ ba zana biyikwo, i zasa kaa du bụtụ zhɛ ba pana yɛu ibwɛ tụmbụla o, ama ɛ zhɛ a sha gana atumwa Agwatana na namɛ na azuba.

²⁶Hi ta rɛcɛ shɛ suu nu utakada Undwa Moses iwɛ tihiɛ ta atwa na 'wi, no ofwo ukokoto ata, ta Agwatana hiɛŋ Moses, Gamba n shɛ Agwatana Abraham, na Agwatana Azik keeni Agwatana Jekob?

²⁷Bɛ shɛ shɛ Agwatana atwa na 'wi o, semi Agwatana atwa na shɛ buumwa.

²⁸Aka na ta bụtụ bu ko na ashashɛ embisegeni Undwa zhajɛ, baa hwụjɛ to o momo unsongonu i'unsene, aka na ti bee mepi maa ge Jisus peni aŋ ajɛshɛgwa na teni cɛŋ. Bee unseni Jisus, bɛɛ hiɛŋ, Unu-tupana naa kwuŋ uhwuri a na vwɛ kpaaaŋ?

²⁹Ge Jisus jishijɛ bụ, bɛɛ hiɛŋ, Unaa na hwuri a na vwɛ kpaaŋ na, ahiɛba atwa Isrɛl, shɛlaga ma, maa Agwangwama na shɛ Agwatana tu, ubwa shɛ Agwangwama mokondo,[49]

³⁰Bɛ shɛ bu no lubo Agwangwama na shɛ Agwatana bụ na amɛ bụ kpaaŋ, to ohwulu bu kpaaŋ, ta ahaŋsa bụ kpaaŋ, ti ikɛnyi bụ kpaaŋ.

³¹Una uyebi ubwa na maa, Bɛ shɛ bu no lubo uyebi bu gana na obu momo lubo. Unu-tupana na te hwuri una ga zasaba ya o.

³²Nazhɛ Bimbisegeni ata bu Undwa jishijɛ Jisus, bɛɛ hiɛŋ, E-Bimbisegeni, iwɛ-tɛkana ta abɛ jɛmɛ maa, Bu ko baa shɛ, i zasa binya ta namba ya o.

³³Maa ga bụtụ no lubo Agwatana na amɛ ubwa kpaaŋ, to ohwulu ubwa kpaaŋ, ta ahaŋsa ubwa kpaaŋ, ti ikɛnyi ibwɛ kpaaŋ, maa go bu no lubo du uyebi ubwa gana na tu boo momo lubo, inɛ ɛtɛ hwuri arụpɛ tuhwoŋzhingo we elele keeni arụpɛ na vwɛ kpaaŋ.

³⁴Aka na ti ge Jisus kwụbɛ maa bụtụ ata peni bu ajɛshɛgwa ahaŋsa ebiye, bɛɛ hiɛŋ bụ, Bụ dụlụmɛ shɛ na Cɛnjɛ-ta-tugwama ta Agwatana o. Te kwuni na aka ata, i zasa bụtụ na ta 'yajɛ ya eshe-hwoo maa hoŋtono Jisus iheŋtene o.

³⁵Aka na ti ge Jisus bo mbisogono atwa iyi nu Umwono wa Agwatana, bee heŋteni aŋ, bɛɛ hiɛŋ, Iwembe po embisegeni Undwa hiɛŋ maa ga Krast shɛ yɛu Devidii?

³⁶Ge Devid kaa jɛmɛ na Mpiala mi Tijilo ni ikɛnyi ibwɛ, bɛɛ hiɛŋ, Agwangwama hiɛŋ Agwangwama mi, Gɛga nu u'ala ubiye mu, uuwa i ci aka na Ngaa njɛ atwa i'ime bu iyi yɛ ɛvwɛvwɛjɛ bu tupatangana.

³⁷Yaa shɛ ge Devid ni ikɛnyi ibwɛ hiɛŋ bụ, Agwangwama, asha gana naa ya ga Krast tɛ zhɛ ba sha yɛu ibwɛɛ? Atwa ofwugwo a na shɛlajɛ iwɛ ubwa, njɛ unyasa.

³⁸Aka na ti ge Jisus bo mbisogono aŋ iyi, bɛɛ hiɛŋ aŋ, Na nda ma pece iwɛ embisegeni Undwa anaa na a jala maa o no urugono otogwo tuwururu keeni a'walụ nu udukwo,

³⁹keeni ajɛjɛ ụjɛrụma no shimwono shɛ Tụ'ụlwatagwụ, keeni ofwo ebiye no ofwo iyimɛyɛ tiya.

⁴⁰Ibɛ po oo sugo i'wɛŋnɛ yo olulo aa ya, aa ndana aŋ adua ụnjɛswa tɛnda-te-eshe. Ɛ zhɛ a pana aŋ hwuŋ n-ndumwa-tụwụma uhwuri atwa vwɛ hwɛɛ.

⁴¹Ti ge Jisus jɛjɛ geri-be-eshe bu umwono ukwuribi na namɛ nu Umwono wa Agwatana, baa ngbaracɛ gana na ta atwa ofwugwo o zwono ukwuribi ni ikpɛtɛ ukwuribi. Azhɛgba ofwugwo zweni ukwuribi duwa.

⁴²Ama bululo bu ko na shɛ bukofwo zhajɛ du, bee zweni anɛnɛ eyebi.

⁴³Nazhɛ ge Jisus suyanɛ eseshi-iyi ubwa no ofwo ubwa, bɛɛ hiɛŋ aŋ, Iwɛ-tɛkana Omo hi mbiso maa, bululo ga i shɛ bukofwo, bu zweni ukwuribi ni ikpɛtɛ gɛ uhwuri atwa elele na zweni ukwuribi ni ibɛ.

⁴⁴Iwɛnɛ ta atwa kpaaŋ tarɛ iyi nɛ hwuleji aŋ nazhɛ ee zweni ni ikpɛtɛ gɛ, ama biyikwo ga suje iyi elele nɛ 'nyananɛ bu bee zweni na amɛ ibɛ.