Read bassa MAK 13 Bible Online

MAK 13 - bassa bible

MAK 13

¹Ti ge Jisus beni nu Umwono wa Agwatana, nazhɛ bụtụ bu ko na ashashɛ eseshi-iyi ubwa hiɛŋ bụ, Hioko atayɛ ga a'wụtụ a'wụtụ keeni shimwono shɛ ga shi shikekeni epe!

²Ge Jisus jishijɛ bụ, bɛɛ hiɛŋ, Bụ kwụbɛ shɛ tuma tu ga tụ 'wụtụ 'wụtụ ti shikekeni epe hŋ? I zasa utayɛ na zhɛ wa patana hwuŋ ni ihiŋhiŋ unya epe na zha shɛ wo hwuŋzwo.

³Ti ge Jisus jɛjɛ ni Ishɛmɛ Buta nɛ dongonu Umwono wa Agwatana. Ga Pita, ne Jemis, na Jon, keeni Andru unseni bu swɛɛ, ɛɛ hiɛŋ,

⁴Iti mbishi de aka na ti ijɛ kpaaŋ zhɛ ya ndangana. Imbe kwuŋ zhɛ ya sha hwuŋ useyida na aka na ti ijɛ kpaaŋ gwumwonu tɛndaa?

⁵Ge Jisus jishijɛ aŋ, bee kwuni aŋ timbiso, bɛɛ hiɛŋ, No shiyono ma eshe maa kede bụtụ be elele ihi inzhɛnjɛ o.

⁶Atwa ofwugwo zhɛ a 'waŋnɛ hwuŋ izeci mi a zhajɛ, ɛ hiɛŋ, Gamba n shɛ [ga Krast ata], iwɛ maa a inzhɛnjɛ atwa ofwugwo.

⁷Kede shihwulu shi hi horukono na aka na ta ahia hwuga hwuŋ anabarɛ ajasa keeni erishi ajasa o. I shɛ tilɛɛ maa ijɛ ɛtɛ shɛ ya ndangana, ama shɛ ukwunanga ibɛ tɛ o.

⁸Iwɛnɛ tu udenji uko zhɛ wɛ hwɛyijɛ wa sukakana udenji unya, tugwama tu ko ti zhɛ tɛ hwɛyijɛ maa tu sukakanɛ tugwama ti nya, cɛnjɛ ti zhɛ to zhingotu no ofwo ofwo, atwa zhɛ a ya-imunɛ. Inɛ ɛtɛ kpaaŋ ta shɛ tukwuno tu ụbaụta.

⁹Ama no shiyono ma iwɛ ohiuhiu hiŋ eshe. Ɛ zhɛ mo hi sugo a pana ajɛmɛ-ụshɛrɛya, ɛ zhɛ mo hi dubogo no shimwono shɛ Tụ'ụlwatagwụ, hi zhɛ hio shikono na agba ehiu, ta agba shɛgwuma iwe mi, iwɛ maa hi n le tiseyida no ofwo aba.

¹⁰I shɛ tilɛɛ maa e enengeni edenji elele Anabarɛ Ebiye tugwo hiiŋ.

¹¹Aka na ɛɛ zhɛ mo hi sugo hwuŋ na agba ụshɛrɛya, kede ohwulu ihi herikeni iwɛ iyi nɛ ɛhi zhɛ hia duma o, ama iyi elele nɛ ee hi peni na aka ata, ibɛ du ɛhi zhɛ hia duma. Iwɛnɛ ti yaa shɛ shɛ ahiɛba hi zhɛ hia duma iwɛ ni ikɛnyi hiŋ, ama Mpiala mi Tijilo mi zhɛ ma duma.

¹²Yɛu-bino zhɛ ya shapa yɛu-bino bwa ba pana atwa maa a kwụnɛ bụ, bishi bi yɛu zhɛ ba nda du gana ata ni yɛu ibwɛ. Miaụŋ du mi zhɛ mɛ hwɛyijɛ ma sukakana atwa na meci aŋ maa a kwụnɛ aŋ.

¹³Atwa kpaaŋ zhɛ ma hi ta ni i'ime iwe mi. Ama bụtụ na 'imɛ-isɛbwɛ tutu uce, ubwa zhɛ bo bino.

¹⁴Ama aka na ahiɛ kwụbɛ ti iyi-tupwaŋ nɛ ya nda iyi ufwu zhɛ yo shikono no ofwo na yaa ga shɛ shɛ yo shikono,[50] (bụtụ be elele na ba rɛta, ga bu na mapa ecilo ibɛ), ga atwa Judia gezhiji maa e zhe nu nshama na aka ata.

¹⁵Kede bụtụ na patanɛ nu ukogo kezhe maa tono nu umwono maa sugo i'wɛŋnɛ ibwɛ o.

¹⁶Kede kaa du bụtụ na namɛ ne ehilo gwure ni ihwɛ maa sugo utogwo ubwa o.

¹⁷Eyikwo na 'yajɛ shifubo, na anaa na 'wananjɛ miaụŋ mu na mo subo zhɛ a nda hwuŋ adangboo na aka ata!

¹⁸Na nda ma adua maa kede i shɛ na aka bu ugbofworo ijɛ zhɛ ya nda hwuŋ o.

¹⁹Iwɛnɛ ta aka ata zhɛ a sha aka ụbaụta na usara ubwa ta zasaba la kwukwuŋ taa ta Agwatana karɛ unyizo uuwa i ci aka ata, anaa na kaa du usara ubwa zha shɛ wa nama ya kwukwuŋ.

²⁰Ama yaa shɛ Agwangwama munananɛ shɛ ụjita ata, asha i zasa bụtụ be elele na zhɛ bo bino, ama iwɛ atwa na bee teri ni ikɛnyi ibwɛ, ibɛ po baa munananɛ ụjita ata.

²¹Yaa shɛ bụtụ be elele ihi hiɛŋ na aka ata, Hioko ma ga Krast na namɛ epe! Kwo kaa bweeye namɛ peye! Ta tɛtana ma iwɛ ya aba rishe o.

²²Iwɛnɛ ta akrast tukata, te egesere tukata zhɛ a bala na aka ata, ɛ zhɛ na nda iyi tudama keeni arụhwajɛ, maa yaa shɛ yee timeni aŋ maa a inzhɛnjɛ okwo atwa na Agwatana go tolwo.

²³Ama no shiyono ma ya eshe, N hi mbiswo iyi elele nazhɛ yɛɛ zhɛ yo to.

²⁴Ama na aba na tụ ụbaụta ata kwunanjɛ jita ata, uwaŋna zhɛ wo 'wo tishi, upiana zha shɛ wa ta o,

²⁵mkpasụ mi zhɛ mu na waŋtatangwụ na cɛnjɛ, iwɛnɛ tu ukpahiŋ na namɛ na azuba wo zhingotu.

²⁶Aka ata ɛ zhɛ a kwụba Yɛu Bụtụ ti bee ci no odomu nu ukpahiŋ ụ'wụtụ keeni ụjɛrụma.

²⁷Aka ata nazhɛ bɛɛ zhɛ ba tumwanɛ atumwa ubwa azuba maa o sotulonu atwa elele na bee teri no ofwo elele na unyizo teje.

²⁸No soso ma tusakana ti ibɛ nụ ụ'wụ'wụ uwowo, aka na ahiɛ kwụbɛ ta shɛ'walụ shɛ bwa shi kwuni ambɛ ofwo tusabɛ, asha hi mepi maa ushwo gwumwonu.

²⁹Gabata du yɛɛ zhɛ ya sha hwuŋ, aka elele na ahiɛ kwụbɛ ti ijɛ kwuni tɛndangana, asha mapa ma maa bu gwumwonu tuto.[51]

³⁰Iwɛ-tɛkana Omo hi mbiso maa, atwa na namɛ nu unyizo zha shɛ o 'wo kwukwuŋ kpaaŋ nazhɛ ijɛ kpaaŋ ndanganɛ.

³¹Azuba tu unyizo zhɛ a kashɛka, ama n-ndumwa mi mi mi zha shɛ ma kashɛka kwukwuŋ.

³²Ama iwɛ ụjita ata, kwo kaa auwa ata, i zasa bụtụ be elele na mepi o, ta atumwa na namɛ na azuba, ti Yɛu ni ikɛnyi ibwɛ, semi Bishi kiri.

³³No shiyono ma eshe,[52] iwɛnɛ te ehi mepi shi aka na shɛ aka ibɛ.

³⁴I shɛ gana bụtụ bu ko na zhɛ tahaŋnụ maa ganga ihwɛ ibwɛ, bee peni miaụŋ-mu-ugondu ubwa ụhwada ihwɛ ɛtɛ, bee hweŋshi aŋ ugondu bụtụ bụtụ, baa tɛtaganɛ bi'iywa bo odubo unu maa ga bu na ngbaraka ofwo.

³⁵Iwɛ ecilo ata no shiyono ma eshe, iwɛnɛ te ehi mepi shi aka na ta agwuma-ihwɛ e ci ujiyo, okwo nụ ụrụmɛ, okwo nụ ụjita tudwonu, okwo na aka na shalụma sha ugaga, kwo kaa nu uvwungwa.

³⁶Iwɛ aka na bɛɛ zhɛ be gwure eshigiri, maa mo hi jitono to ohio woto malabụ.

³⁷Iwɛ gɛ Omo hi mbiso bana, gobwonu du Omo mbiso atwa kpaaŋ maa, No shiyono ma eshe!