Read bassa MAK 2 Bible Online

MAK 2 - bassa bible

MAK 2

¹Ti yaa namɛ gana ijitɛ imbɛnɛ, ge Jisus teneneni Kapanaum. Aka na ta atwa hwụjɛ maa bu namba ni ihwɛ.

²Ibɛ po atwa ofwugwo ụlwatagwụ pu bwa, okwo ohwolu zasaba no odubo. Ge Jisus mbishi aŋ n-ndumwa ma Agwatana.

³Ibɛ po atwa oko eneshi 'waŋnɛ bụtụ bu ko na tu'waba tu bwa tu 'wogeni aa zhajɛ pi Jisus.

⁴Gana na ta atwa ata eri shi o to pi Jisus iwɛ atwa ofwugwo na teleni apata, ibɛ po ee zhe aa 'yɛbɛ ukogo ata, ne eririri na ge Jisus namɛ. Aka na te e hwuwi tɛ'yɛba, ee zucinji akpa ata bụtụ ata tu'waba tu bwa tu 'wogeni weci.

⁵Aka na ti ge Jisus kwụbɛ rishe ra aba tɛtɛtana, bɛɛ hiɛŋ bụtụ ata tu'waba tu bwa tu 'wogeni, Ɛ-yɛu mi, e bi gengeni iwɛwɛ bu.

⁶Ama embisegeni Undwa oko a na gɛgajɛ apata, kwuni tuhaŋsa na shɛmɛ sha aba, ɛɛ hiɛŋ,

⁷Iwembe po bụtụ ga ba duma iwɛ gana ga, baa dumangana Agwatana n-ndumwa mụ wɛɛ? Gaaba eri ba gangana bụtụ iwɛwɛ ibwɛ ti yaa shɛ shɛ Agwatana kirii?

⁸Gunu ata ge Jisus mepi na ahaŋsa ubwa maa atwa ata a haŋsa ba iwɛ gɛnɛ ɛtɛ na shɛmɛ sha aba, bɛɛ hiɛŋ aŋ, Iwembe po ahia haŋsa iyi gɛnɛ gɛ na shɛmɛ shi hiiŋ?

⁹Inɛ nɛ i shɛ kakayɛ maa Mɛ hiɛŋ bụụ? Mɛ hiɛŋ bụ suu e bi gengeni iwɛwɛ bu, okwo maa Mɛ hiɛŋ bụ, Ishijɛ shepi akpa bụ maa hwuri ujiyo?

¹⁰Ama maa hi mepi maa Yɛu Bụtụ 'yajɛ ụhwada nu unyizo maa gangana bụtụ iwɛwɛ ibwɛ, bɛɛ hiɛŋ bụtụ ata tu'waba tu bwa tu 'wogeni,

¹¹Gamba m bi hiɛŋ, Ishijɛ shepi akpa bụ maa hwuri ujiyo ni ihwɛ bu.

¹²Bụtụ ata ishijɛ ga gunu ata, bee shepi akpa ubwa bee hwuri ujiyo ne eshe aba kpaaŋ. Ibɛ po yaa dama aŋ kpaaŋ aba, ee peni Agwatana ụjɛrụma, ɛɛ hiɛŋ, Tu ga ta kwụbɛ shɛ iyi gɛnɛ gɛ kwukwuŋ.

¹³Ti ge Jisus beneneni apata, bee hwuri nụ ụpalanụ itekwu, ibɛ atwa ata kpaaŋ zhe pu bwa, bee mbisegeni aŋ iyi.

¹⁴Aka na ti ge Jisus zhɛ tɛkashɛka, baa kwụbɛ Livai yɛu Alifios, tu baa jɛjɛ nu umwono na aa la ụdalụ, bɛɛ hiɛŋ bụ, N 'wa. Ge Livai ishijɛ ga baa 'wa bụ.

¹⁵Aka na ti ge Jisus jɛjɛ nu umwono Livai[7] baa ya iyimɛyɛ, ne ele-ụdalụ ofwugwo, na atwa-iwɛwɛ gɛgajɛ du nu bwa medenji eseshi-iyi Jisus, iwɛnɛ te e gembi ufwugwo ta a 'wa bụ.

¹⁶Aka na te embisegeni Undwa keeni Afarisi kwụbɛ ti ge Jisus ba ya iyimɛyɛ na atwa ata iwɛwɛ keeni ele-ụdalụ, ee heŋteni eseshi-iyi Jisus, ɛɛ hiɛŋ, Iwembe po baa ya iyi, baa swa ne ele-ụdalụ keeni atwa-iwɛwɛɛ?

¹⁷Aka na ti ge Jisus hwụjɛ iwɛ ɛtɛ, bɛɛ hiɛŋ aŋ, Ukekeshi buwa-bi-nibi njɛ shɛ bụtụ na namɛ lapiya o, semi atwa na a gwumanga. N zhe shi maa ma suyana atwa tiririri o, semi atwa-iwɛwɛ.

¹⁸Nazhɛ atwa oko zhajɛ pi Jisus, ee heŋteni bu, ɛɛ hiɛŋ, Eseshi-iyi Jon keeni a na Afarisi a nda ezumi,[8] iwembe po eseshi-iyi bu njɛ shɛ ezumii?

¹⁹Ge Jisus jishijɛ aŋ ni iheŋtene, bɛɛ hiɛŋ, Eyejilo bwolo-be-eyikwo suu a nda hwuŋ ezumi na aka na to bwolo-be-eyikwo ta namɛ no ofwo aba? Awo, e eri shi a nda ezumi to bwolo-be-eyikwo ta namɛ no ofwo aba o.

²⁰Ama jita na ee shepi bwolo-be-eyikwo no olugwo aba, nazhɛ ɛɛ zhɛ a nda ezumi.

²¹Za bụtụ zhɛ ba ngasa tugwuno tu ufwo maa swana tụ nu utogwo ụngwụshɛ o, shibwonu tugwuno ta ata tu ufwo ti zhɛ ta ingɛcɛnga tugwuno ta ata tụ ngwụshɛ, nazhɛ tụdwatwagwụ tu utogwo ata ụngwụshɛ ti zhɛ ta wụmangwụ.

²²Za kaa bụtụ zhɛ bo zwono meni mụ tụ'walụ ta afwafwa mu ufwo nu ututu[9] ụngwụshɛ o, shibwonu meni ma ata mu ufwo mi zhɛ mo puso ututu ata, nazhɛ meni ma ata mi zhɛ ma nda ufwu tu ututu ata hwɛɛ. Ama o zwono meni mụ tụ'walụ ta afwafwa mu ufwo nu ututu ufwo.

²³Ti ge Jisus zhɛ tɛkashɛka ni itimɛ nɛ iyimɛyɛ te shikeni nụ Ụjita-ụhinjanu, nazhɛ eseshi-iyi ubwa kwuni ogbongbozu iyimɛyɛ ɛtɛ tucushanga.

²⁴(Aka na ta Afarisi kwụbɛ iŋ) ee heŋteni Jisus, ɛɛ hiɛŋ, Iwembe po eseshi-iyi bu a nda iyi nɛ Undwa leni shi tɛnda nụ Ụjita-ụhinjanụụ?

²⁵Ge Jisus jishijɛ aŋ, bɛɛ hiɛŋ, Hi ta rɛcɛ shɛ suu iyi nɛ ge Devid njɛ la na aka na ti imunɛ gwụmɛ bụ ne eyejilo ubwa ta a zasa iyimɛyɛ?

²⁶Bee teni nu Umwono wa Agwatana na aka na tu ga Abiata ta shɛ la uhiu wo onongbo, ge Devid shepi ibrɛd tijilo na undwa leni shi maa binya bụtụ be elele yɛ semi onongbo kiri, baa yɛ, bee peni du eyejilo ata ubwa.

²⁷Ge Jisus hiɛŋ aŋ, sasana, Bụtụ aa ndanɛ Ụjita-ụhinjanụ, shɛ Ụjita-ụhinjanụ aa ndanɛ bụtụ o.

²⁸Iwɛbɛ po Yɛu Bụtụ shɛ Agwangwama Ụjita-ụhinjanụ du.