Read bassa MAK 3 Bible Online

MAK 3 - bassa bible

MAK 3

¹Nazhɛ ge Jisus teneneni nu umwono Tụ'ụlwatagwụ nyajita; bụtụ bu ko namba nu umwono ata u'ala ubwa hweteni.

²Ee zweni Jisus igbɛtɛtɛ okwo bi zhɛ ba nɛnga bụ nụ Ụjita-ụhinjanụ, iwɛ maa a suyanɛ bụ ụshɛrɛya.

³Ge Jisus hiɛŋ bụtụ ata u'ala ubwa hweteni, Ishijɛ shikono na ashashɛ.

⁴Ge Jisus heŋteni atwa ata, bɛɛ hiɛŋ aŋ, Undwa leni suu maa bụtụ na nda iyi ibiye nụ Ụjita-ụhinjanụ okwo iyi iwɛ? Maa e bicinji suu bụtụ okwo maa a kwụnɛ? Ee sumengenji bu.

⁵Aka na ti ge Jisus mbiyanganɛ aŋ ni isɛbwɛ ta amɛ ubwa hashɛganụ, iwɛnɛ ta shɛmɛ sha aba shɛ shɛshɛpanɛ. Bɛɛ hiɛŋ bụtụ ata, Ndarɛshɛnga u'ala bụ. Bee nderishinji uŋ ga, waa zhɛmananɛ.

⁶Afarisi keeni atwa Hɛrod[10] beni gunu ata, aa njɛ ushaura iwɛ uhiuhiu Jisus gana na i shɛ maa a kwụnɛ bụ. (Mak 12:13.)

⁷Ge Jisus gwuleneni nụ ụpalanụ itekwu abana ne eseshi-iyi ubwa. Atwa ofwugwo ụ'wụtụ bananjɛ nu Galili, tu Judia, aa 'wa bụ.

⁸Atwamwa bananjɛ du nu Jɛrusalɛm, ti Idumia, ti hileniye Jodan, ta shɛnguwa shɛ na shu rungwutwonu Taya keeni Saidụn, ɛɛ zhɛ pi Jisus, iwɛnɛ ta a hwụjɛ iyi nɛ baa ndangana kpaaŋ.

⁹Nazhɛ ge Jisus mbishi eseshi-iyi ubwa maa ga a shapɛrɛganɛ bụ ụhaŋtụ uko ugwumwa, iwɛ maa kede atwa ofwugwo ata na hwungwulangana bu o.

¹⁰Atwa elele na igwumɛgwumɛ ya pana ụbaụta, a fwụrụganɛ bụ, iwɛ maa e timengeni bu, iwɛnɛ tu baa nungwa atwa ofwugwo.

¹¹Aka na ta bụtụ bu ko na mpiala mụ wɛ mu namɛ na amɛ ubwa kwụbɛ Jisus, bee leyi nɛ ɛvwɛvwɛjɛ ubwa, baa uganɛ, bɛɛ hiɛŋ, Gabụ bɛ shɛ Yɛu ya Agwatana.

¹²Ge Jisus tɛtaganɛ mpiala ma ata mụ wɛ unu maa kede mɛ njɛ iyi nɛ maa atwa mepi bu o.

¹³Ti Ge Jisus munji ni ishɛmɛ, baa mama suyananɛ atwa na baa jala nu uda ubwa, ɛɛ zhɛ pu bwa.

¹⁴Bee teri eseshi-iyi umpwa-na-ba-eyebi maa a nama nu bwa, [aba du boo po izeci maa atumwa],[11] iwɛ maa bu na tumwangana aŋ utumwa, maa a na ananga du iwɛ ya Agwatana.

¹⁵Bee peneneni aŋ du ụhwada maa a na bacɛnga atumwa-ibiri.

¹⁶Nzeci me eseshi-iyi ata umpwa-na-ba-eyebi bee teri na: Ga Saimon (na bee keeni izeci ti ga Pita);

¹⁷ne Jemis yɛu Zɛbɛdi, ni yɛu-bino bwa ga Jon, (anaa na bee keeni izeci ta Bonejɛs, inɛɛ nɛ ecilo ibɛ shɛ Miaụŋ mu Uto,)

¹⁸na Andru, ne Filip, na Batolomu, na Matiu, no Tomas, ne Jemis yɛu Alifios, na Tadios, na Saimon bụtụ bi Kenan,

¹⁹keeni Judas Iskariot na senji bu ne tidere.

²⁰Ti ge Jisus teni ni ihwɛ, ofwugwo ụ'wụtụ ụlwananụ, ibɛ po ee eri shi a ya okwo iyimɛyɛ.

²¹Aka na ta atwa ubwa hwụjɛ, aa zhajɛ maa e shepi bu, iwɛnɛ ta atwamwa hiɛŋ maa ba sụma-ụmpɛ.

²²Aka na te embisegeni Undwa a na banɛ nu Jɛrusalɛm zhajɛ, ɛɛ hiɛŋ, Uhiu wa atumwa-ibiri namɛ na amɛ Jisus, asha tedure nu ukpahiŋ uhiu wa atumwa-ibiri baa bacɛnga atumwa-ibiri.

²³Ge Jisus suyanɛ aŋ, baa manganganɛ aŋ n-ndumwa, bɛɛ hiɛŋ, Gana naa ge Setan eri ba bacɛnga Setan?

²⁴Yaa shɛ cɛnjɛ-ta-tugwama tu ko tu mama sukakanụ, asha cɛnjɛ-ta-tugwa ta ata ti eri shi to shikono.

²⁵Yaa shɛ kaa ihwɛ ike mama sukakanụ, asha ihwɛ ɛtɛ du eri shi yo shikono.

²⁶Yaa shɛ ge Setan hwayɛgwa maa mama sukakana, boo momo bogwu, asha bi eri shi du bo shikono, asha ukwunanga ubwa ta ya.

²⁷I zasa bụtụ na eri bo tono nu umwono bụtụ na yajɛ ukpahiŋ maa sugo i'wɛŋnɛ ibwɛ o, ti yaa shɛ shɛ aka na bee umpi tugwo bụtụ ata bu ukpahiŋ, nazhɛ bɛɛ zhɛ ba ala maa sugo i'wɛŋnɛ ibwɛ.

²⁸Iwɛ-tɛkana Omo hi mbiso maa, ɛ zhɛ a gangana atwa iwɛwɛ ye elele nɛ aa nda keeni n-ndumwa mụ wɛ me elele mu na aa dumanga[12]

²⁹Ama bụtụ be elele na ba dumangana Mpiala mi Tijilo n-ndumwa mụ wɛ, a zha shɛ a gangana bu kwukwuŋ. Ama n-ndumwa mụ wụmɛ bụ iwɛ iwɛwɛ ibwɛ unyizo-nom.

³⁰Iwɛnɛ ta atwa oko hiɛŋ maa mpiala mụ wɛ mu namɛ na amɛ Jisus.

³¹Nazhɛ bino Jisus, na miaụŋ-mo-bino bwa zhajɛ ee shikekeni no tupohondo, aa tumwanɛ butumwa maa a suyanɛ Jisus.

³²Atwa ofwugwo ta kaa gɛgajɛ rungwutwonu Jisus, ee mbishi bu, ɛɛ hiɛŋ, Bino bu, na miaụŋ-mo-bino bu keeni angwụfwụ bụ[13] ye shikekeni no tupohondo a ma bu jalakaka.

³³Ge Jisus jishijɛ aŋ ni iheŋtene, bɛɛ hiɛŋ, Gaaba shɛ bino mi, na miaụŋ-mo-bino mi keeni angwụfwụ mii?

³⁴Ge Jisus mbiyanganɛ atwa ata gɛgajɛ u rungwutwonu bu, bɛɛ hiɛŋ, Bino mi, na miaụŋ-mo-bino mi keeni angwụfwụ mi na!

³⁵Bụtụ be elele na ba nda ukwulana wa Agwatana, ubwa shɛ yɛu-bino mi, na bụngwụfwụ mi keeni bino mi.