Read bassa LUK 11 Bible Online

LUK 11 - bassa bible

LUK 11

¹Jitoo ko ti ge Jisus ba nda adua no ofwo oko. Aka na ti bee hwuwi, biseshi-bi-iyi bu bwa bu ko hiɛŋ bụ, Agwangwama, iti mbisegeni adua tɛnda gana na ga Jon mbisegeni du eseshi-iyi ubwa.

²Ge Jisus hiɛŋ aŋ, Aka na ahia nda adua, hiɛŋ ma: Bishi,[33] ge izeci bu jirimi, ga Cɛnjɛ-ta-tugwama tụ bụ ti zhɛ.

³Na tu pana iyimɛyɛ nɛ itu to ukekeshi iyi-heri.[34]

⁴Na tu gangana tu'wanganga tu tu, iwɛnɛ ata gangana du atwa elele na ma tu 'wangana.[35] To no tu tocingo na tumanga o.

⁵Nazhɛ ge Jisus hiɛŋ eseshi-iyi ubwa, Gaaba na ashashɛ hiŋ 'yajɛ biyejilo, na zhɛ ba zhagana biyejilo ata ubwa nụ ụjita tudwonu, na zhɛ hiɛŋ bụ, E-biyejilo mi, n unɛnjɛ kaa mbrad mụ tatụ.

⁶Iwɛnɛ te biyejilo mi bu ko na zhɛ tahaŋnụ zhajɛ pi mi, Gamba kaa N zasa iyimɛyɛ ye elele maa ma pana bu maa ya o.

⁷Nazhɛ biyejilo ata ubwa na namɛ na amɛ umwono zhɛ bɛ jishijɛ bụ, bɛɛ hiɛŋ, Ta ma zuga o! O kopwo odubo cebe, Ngoo wotowo na miaụŋ mi mi no ogodo. N eri shi mɛ ishijɛ ya maa ma bu pana iyi nɛ aba jala o.

⁸Mo hi mbiso maa okwo tu baa ga zha shɛ bɛ ishijɛ maa pana biyejilo ata ubwa iyi nɛ baa jala. Ama gana na te biyejilo ata ubwa uranjɛ bụ tụlụpa zawa ezuye,[36] bi zhɛ bɛ ishijɛ ya maa pana bụ iyi elele nɛ go to bu ukekeshi.

⁹Gabata du Omo hi mbiso maa, Na lụpa ma, ɛ zhɛ ma hi pana, na jalakaka ma, hi zhɛ hia ta ugbe, na pa ma ukpa iyi, ɛ zhɛ ma hiɛ kapɛshɛngana.

¹⁰Bụtụ be elele na ba lụpa, ɛ zhɛ a pana bụ, bụtụ be elele na kaa ba jalakaka, bi zhɛ ba ta ugbe, bụtụ na kaa ba pa ukpa iyi, ɛ zhɛ a kapɛshɛngana bụ.

¹¹Bishi aba na shashɛ hiŋ i shɛ maa yɛu ibwɛ lụpɛ bụ bijana, maa pana bụ uhwaa?

¹²Okwo yaa shɛ rɛnjɛ baa lụpɛ bụ, maa pana bụ anaa?

¹³Ahiɛba na hiɛ shɛ atwa awɛ, yaa shɛ ehi mepi gana na i shɛ maa hi na pana miaụŋ mi hiŋ iyi ibiye, asha Bishi hiŋ na namɛ na azuba, bi zha shɛ suu ba pana atwa na a lụpa bu Mpiala mi Tijilo?

¹⁴Aka na ti ge Jisus becinji butumwa-bi-ibiri na shɛ igwureni na amɛ bụtụ bu ko. Aka na ta butumwa ata bi ibiri beni, nazhɛ igwureni ɛtɛ dumanɛ iwɛ, yaa dama atwa ofwugwo ata.

¹⁵Ama atwa oko na ashashɛ aba hiɛŋ, Tedure nu ukpahiŋ uhiu-ibiri, ibɛ bụtụ ga ba bacɛnga butumwa-bi-ibiri.

¹⁶Ama anya atwa na ashashɛ aba a manga Jisus, ɛɛ hiɛŋ a jalakaka useyida na banɛ na azuba no olugwo ubwa.

¹⁷Ama ti ge Jisus mepi shihaŋsa sha aba, bɛɛ hiɛŋ, Cɛnjɛ-ta-tugwama te elele tu momo bogotogwu maa tu na mama sukakanụ, ti zhɛ ta sha ụshɛka. Okwo atwa ihwɛ elele nɛ momo bogotogwu maa a na mama sukakanụ, ihwɛ ɛtɛ zhɛ yo hwuŋzwo.

¹⁸Yaa shɛ ge Setan momo bogotogwu maa mama sukakana, asha gana naa cɛnjɛ-ta-tugwama tu bwa ti zhɛ to shikonoo? Iwɛnɛ ɛhi hiɛŋ maa tedure nu ukpahiŋ uhiu-ibiri Ama bacɛnga atumwa-ibiri.

¹⁹Yaa shɛ tedure nu ukpahiŋ uhiu-ibiri Ama bacɛnga atumwa-ibiri, asha ni izeci aba tubaa miaụŋ mi hiŋ mi zhɛ ma bacɛnga mụụ? Iwɛbɛ po miaụŋ ma ata mi hiŋ mi zhɛ ma sha ajɛmɛ-ụshɛrɛya hiŋ.

²⁰Ama yaa shɛ Ama bacɛnga atumwa-ibiri na buvwa ba Agwatana, asha Cɛnjɛ-ta-tugwama ta Agwatana ti hi zhaganɛ ga gom.

²¹Aka na bụtụ na 'yajɛ ikɛnyi mama 'imɛ ni i'wɛŋnɛ ujasa, baa 'yaka ukpogwu ubwa, i'wɛŋnɛ ibwɛ zhɛ yo tulono lapiya.

²²Ama aka na ta bụtụ na hwuri bu ikɛnyi zhajɛ baa sukakanɛ bụ, baa lasụ bụ, nazhɛ bɛɛ zhɛ bo sugo i'wɛŋnɛ ibwɛ ujasa elele nɛ baa ga tɛtanɛ-rishe, nazhɛ bo dwotwogonu ya iyi nɛ bee suje na atwa ubwa.

²³Bụtụ be elele na zasa ne mi, asha bu ma n sukakana, bụtụ be elele na kaa m mbiyeni shi tusutono, asha ba garataga.

²⁴Aka na mpiala mụ wɛ mu banɛ na amɛ bụtụ, mee zhe no ofwo elele na zasa meni, maa jalakaka ofwo na maa mu to ụhinjanụ. Ama gana na tu maa kwụbɛ shɛ, nazhɛ mɛɛ hiɛŋ, N zhɛ ugwulwo ni ihwɛ mi nɛ Ngaa banɛ la.

²⁵Aka na ti mee gwure apata, maa kwụbɛ maa e suji iŋ shɛshɛshɛ, aa njɛ iŋ du tisemberi.

²⁶Nazhɛ mee zhe mee suje mpiala mụ wɛ minya mi cenje mu na mu wụmanjɛ mu hwuri mi ne ebe, mee zhe mee teni apata maa jɛjɛ. Nazhɛ bụtụ ata wụmanjɛ ya na aka umɛwɛɛ uhwuri aka ihiiŋ.

²⁷Ti ge Jisus jɛmɛ iwɛ ɛtɛ, nazhɛ biyikwo na namɛ na ashashɛ ofwugwo ata uganɛ, bɛɛ hiɛŋ, Biyikwo na ubu meci, na kaa ebu subi mosubo mu bwa gwoje!

²⁸Ge Jisus jishijɛ biyikwo ata, bɛɛ hiɛŋ, Atwa na a hwuga N-ndumwa ma Agwatana, a na kaa a nda gana na tu maa jɛmɛ, aba gwoje uhwuri atwa vwɛ hwɛɛ.

²⁹Aka na ta atwa ofwugwo ụlwatagwụ, ge Jisus hiɛŋ, Atwa aka ga a shɛ atwa awɛ. A jala ụrụhwajɛ, a zha shɛ kaa a ndana aŋ ụrụhwajɛ we elele o, semi ụrụhwajɛ iyi nɛ jiteni la Jona.

³⁰Gana na tu go Jona shanɛ la atwa Ninivɛ iyi ụrụhwajɛ, gabata du Yɛu Bụtụ zhɛ ya shana atwa uwaŋnɛ ga iyi ụrụhwajɛ.

³¹Agwuma-o-o na namɛ tuta, zhɛ a sukakana hwuŋ atwa uwaŋnɛ ga nụ ụshɛrɛya, bɛɛ zhɛ ba pana aŋ n-ndumwa-tụwụma, iwɛnɛ tu baa banɛ la taa dụlụ, baa zhajɛ maa hwuga iwɛ ti'inta tu Sụlụmụn. Hioko ma, iyi nɛ uhwuri Sụlụmụn na kaa namɛ epe.

³²Atwa Ninivɛ zhɛ a sukakana hwuŋ atwa uwaŋnɛ ga nụ ụshɛrɛya, ɛɛ zhɛ a pana aŋ n-ndumwa-tụwụma. Iwɛnɛ tu go Jona enengeni aŋ la utumwa wa Agwatana, aa jɛshɛrɛjɛ-shihaŋsa sha aba. Hioko ma, iyi nɛ uhwuri Jona na kaa namɛ epe.

³³I zasa bụtụ zhɛ bo shiyono ụsụtụla ubwa ulwa, maa sho uŋ no ofwo tusweci o, kwo kaa maa urugonu uŋ umudu o. Ama bi zhɛ ba patana uŋ nu uteburu-ụsụtụla, iwɛ maa u no hiokono atwa elele na teni apata uhwaŋna.

³⁴Rishe rụ bụ rụba rɛ shɛ ụsụtụla u tu'waba tụ bụ. Aka na rishe rụ bụ rụ namɛ fwaaŋ, asha tu'waba tụ bụ ti zhɛ ta sha uhioko-uhwaŋna kpaaŋ. Ama aka na te rishe rụ bụ rɛ shɛ rishe rụ wɛ, asha tu'waba tụ bụ ti zhɛ ta sha tishi kpaaŋ.

³⁵Iwɛ ecilo ata na nda ma pece iwɛ maa kede uhioko-uhwaŋna na namɛ na amɛ hiŋ ụ shɛ tishi o.

³⁶Yaa shɛ uhioko-uhwaŋna shini na tu'waba tụ bụ kpaaŋ, taa zasa ofwo elele na shɛ tishi, asha uhioko-uhwaŋna ata gembi tebiye. I zhɛ ya sha gana ụsụtụla na wa ta na ma bu pana uhioko-uhwaŋna.

³⁷Aka na ti ge Jisus jɛmɛ iwɛ ɛtɛ, nazhɛ Bufarisi bu ko suyanɛ bụ maa ya iyimɛyɛ nu bwa. Ge Jisus teni ga baa jɛjɛ maa ya iyi.

³⁸Aka na ta Bufarisi ata kwụbɛ ti ge Jisus kwuni iyimɛyɛ tiya uzawa i'ɛlɛ tusukwutwo, yaa dama bụ.

³⁹Nazhɛ Agwangwama hiɛŋ Bufarisi ata, Ahiɛba Afarisi, hia nyashɛnga aba ukwopi keeni aba ikele shɛshɛshɛ, ama tuhwulo keeni iyi iwɛ kaa shini na shɛmɛ shi hiŋ.

⁴⁰Ahiɛba shɛlagwụ! Bụtụ ata njɛ aba, shɛ ubwa suu du njɛ amɛ?

⁴¹Ama na pana ma okofwo upwaŋ iyi nɛ namɛ na amɛ ugbamgbam,[37] nazhɛ iyi elele zhɛ ma hi namana du shɛshɛshɛ.

⁴²Ahiɛba Afarisi, hi zhɛ hia nda hwuŋ adangboo! Iwɛnɛ ahia pana Agwatana iyi-u'umpwa i tugombwo, no ongwoyi, keeni abuba vwɛ kpaaŋ, ama hi 'wa sụ kaa iwɛ ụshɛrɛya u tishiriri keeni tulubo ta Agwatana o. Hi ga shɛ hi na nda inɛ gɛ umɛwɛɛ, hiɛ shɛ shɛ kaa du hia ganga iyi-u'umpwa ata tụpana o.

⁴³Ahiɛba Afarisi, hi zhɛ hia nda hwuŋ adangboo! Iwɛnɛ ohio lubo ajɛjɛ ụjɛrụma no shimwono shɛ Tụ'ụlwatagwụ, keeni a'walụ no ofwo udukwo.

⁴⁴Ahiɛba Afarisi, hi zhɛ hia nda hwuŋ adangboo! Iwɛnɛ ahiɛ shɛ gana e'uye na atwa o rungo na azuba aba, aa kwụbɛ shɛ amɛ aba maa e mepi iyi nɛ namba.

⁴⁵Ibɛ po bụtụ bu ko na ashashɛ embisegeni Undwa jishijɛ Jisus, bɛɛ hiɛŋ, Aka na aba duma iwɛ gɛnɛ gɛ, asha atuba aba twagaga.

⁴⁶Ge Jisus jishijɛ bụ, bɛɛ hiɛŋ, Ahiɛba embisegeni Undwa, hi zhɛ du hia nda hwuŋ adangboo! Iwɛnɛ ahia patangana atwa i'wɛŋnɛ nɛ zhineni, hi jeri shi kaa maa hi timengeni iŋ ni ikɛnyi hiŋ okwo na buvwa hiŋ bu ko.

⁴⁷Hi zhɛ hia nda hwuŋ adangboo! Iwɛnɛ ahia ma e'uye egesere na eshi hiŋ kwụnɛ la.

⁴⁸Asha hi le tiseyida, ehi leni du ugondu ata eshi hiŋ njɛ la na tukwụna tu na aa kwụnɛ la egesere ata, iwɛnɛ ahia ma e'uye aba.

⁴⁹Agwatana dumwa na ti'inta tu bwa, bɛɛ hiɛŋ, N zhɛ ma tumwananɛ aŋ egesere keeni atumwa, ama hi zhɛ hia kwụna atwa oko na ashashɛ aba, ɛhi zhɛ kaa hia shɛka anya atwa na ashashɛ aba.

⁵⁰Ɛ zhɛ kaa a tụpana atwa uwaŋnɛ ga tụlụkpashɛ te egesere ata aa kwụnɛ la taa nu umozhigo.

⁵¹Te kwuni ne Ebɛl na aa kwụnɛ la uuwa i ci Zɛkaria na aa kwụnɛ la na ashashɛ na namɛ nu utukwu-ụrụpɛ no ohwolu tijilo. Iwɛ-tɛkana Omo hi mbiso maa, atwa uwaŋnɛ ga aba ɛɛ zhɛ a tụpana tụlụkpashɛ ti ijɛ ɛtɛ kpaaŋ.

⁵²Ahiɛba embisegeni Undwa, hi zhɛ hia nda hwuŋ adangboo! Iwɛnɛ ehi shepi i'ilɛ-isɛbwɛ iyi-tumapa, ahiɛba kaa hi teni shi ni ikɛnyi hiŋ o, ahia nda kaa atwa na a jala maa e teni ukwurishi.

⁵³Aka na ti ge Jisus beni apata, ibɛ po embisegeni Undwa keeni Afarisi kwuni bu tụlụma, aa suraka bụ ni iheŋtene maa duma iyi ifwugwo.

⁵⁴Iwɛnɛ te e gwubeji bu maa a 'imɛ bụ hwayɛ ni iwɛ ye elele nɛ bɛɛ zhɛ ba duma.