Read bassa LUK 14 Bible Online

LUK 14 - bassa bible

LUK 14

¹Tu Ụjita-ụhinjanụ uko ci, ge Jisus zhe maa ya iyimɛyɛ nu umwono uhiu wa Afarisi uko, ee zweni bu igbɛtɛtɛ.

²Bụtụ bu ko namba apata ba gwuma ụngwụ tishanjɛ.

³Ge Jisus heŋteni embisegeni Undwa, bɛɛ hiɛŋ, Undwa leni suu maa a nɛnjɛ bụtụ nu Ụjita-ụhinjanụ okwo u leni shi?

⁴Ama e sumenji bu. Bee shepi bụtụ ata baa nɛnjɛ bụ, bɛɛ hiɛŋ bụ, Zhaga jiyo ni ihwɛ bu.

⁵Bee heŋteni aŋ, bɛɛ hiɛŋ, Gaaba na ashashɛ hiŋ i shɛ maa yɛu ibwɛ ye eyi[44] okwo buna bu bwa leyi nu u'ibwa meni, i shɛ bi zha shɛ bɛ vwɛ bu nụ Ụjita-ụhinjanụụ?

⁶Ama ikɛnyi ya aba ci shi maa ɛ jishijɛ bu iwɛ ɛtɛ.

⁷Ge Jisus ngbaracɛ ta atwa na aa suyanɛ no ofwo iyimɛyɛ a tala ajɛjɛ ụjɛrụma, baa manganganɛ aŋ n-ndumwa, bɛɛ hiɛŋ,

⁸Yaa shɛ bụtụ be elele ubu suyanɛ no ofwo iyimɛyɛ towo, ta gɛga na ajɛjɛ ụjɛrụma o. Nekeshi bu ga suywanua fweye bụtụ bu ko na ubu hwuri nu ụjɛrụma.

⁹Nazhɛ bụtụ ebe ga hi suyanɛ pushe hwayɛ, ta bụtụ ebe baa ga suyanɛ. Bi zhɛ mɛ bi hiɛŋ, Ishijɛ peni bụtụ ga ohwolu. Nazhɛ bo kwuno ya ti'ishijɛ ne ezuye maa gɛga na ajɛjɛ ɛmɛwɛɛ.

¹⁰Ama aka na aa bu suyanɛ, gɛga na ajɛjɛ ɛmɛwɛɛ, iwɛ maa aka na bụtụ na ga bu suyanɛ zhajɛ hwayɛ, maa mɛ bi hiɛŋ, E-biyejilo mi, kaanɛ mungeni. Nazhɛ ɛbi zhɛ ba 'yaga ụjɛrụma ne eshe atwa elele na gɛgajɛ apata na bụ.

¹¹Bụtụ be elele na meme mungicinji, ɛ zhɛ e zucinje bu, ama bụtụ be elele na meme zucinje, ɛ zhɛ o mungicingo bu.

¹²Nazhɛ ge Jisus hiɛŋ bụtụ ata ga suyanɛ bụ, Aka na aba jala maa peni atwa iyimɛyɛ uwaŋna kwo kaa iyimɛyɛ ụrụmɛ, ta suyana eyejilo bu, kwo kaa miaụŋ-mo-bino bu, kwo kaa atwa na abu 'yajɛ ụmatụ na aba o, kwo kaa eyebi bu a na shɛ azhɛgba o; iwɛ aka na ɛɛ zhɛ ma bu suyana hwuŋ du gana ata maa a bu tụpanɛ.

¹³Ama aka na ɛbi zhɛ ba ima atwa ugaiŋ, ga shɛ okofwo, no okwuturu, na atwa na o shikoto keeni sholubo abu suyanɛ.

¹⁴Iwɛnɛ te e eri shi ma bu tụpana, ama Agwatana ubwa zhɛ ma bu tụpana hwuŋ nụ ụjita tihiɛ ta atwa tiririri, nazhɛ ɛbi zhɛ be gwoje.

¹⁵Aka na bụtụ bu ko na ashashɛ atwa na jɛjɛ nu bwa hwụjɛ iwɛ ɛtɛ, bɛɛ hiɛŋ bụ, Atwa na zhɛ a ya hwuŋ iyimɛyɛ na Cɛnjɛ-ta-tugwama ta Agwatana gwoje.

¹⁶Ama ge Jisus hiɛŋ bụ, Bụtụ bu ko njɛ iyimɛyɛ ụrụmɛ i'wɛtwɛ, baa suyanɛ atwa ofwugwo.

¹⁷Aka na ta aka iyimɛyɛ ɛtɛ ụrụmɛ ci ya, baa tumwanɛ yɛu-ugondu ubwa maa suyanɛ atwa na boo go mbiswogwo, maa hiɛŋ aŋ, Zhajɛ ma ya, iwɛnɛ to o hwuwo iyi elele ti'imanga hwɛɛ. Ama kpaaŋ aba kwuni udwonu tụdụmanga.

¹⁸Bụtụ bi hiiŋ hiɛŋ, N so itimɛ, i shɛ tilɛɛ maa Ma zha mɛ kwụbɛ iŋ. Ma bu tabwa maa go lono udwonu mu.

¹⁹Bụtụ bi yebi hiɛŋ bụ, N so inɛ umpwa iwɛ ugondu, ibɛ po gɛ Ngɛɛ zhɛ maa ma manjɛ iŋ. Ma bu tabwa maa go lono udwonu mu.

²⁰Binya bụtụ hiɛŋ, N zeni biyikwo bu ufwo, iwɛbɛ po Ngee eri shi ma zhajɛ.

²¹Aka na ti yɛu-ugondu ɛtɛ gwure bee mbishi agwuma-ihwɛ ibwɛ iwɛ gɛ. Ibɛ po agwuma-ihwɛ ɛtɛ njɛ isɛbwɛ, bɛɛ hiɛŋ yɛu-ugondu ubwa, Zhaga ne ekpekiti keeni ihwɛŋnɛ timwee mwee nɛ namɛ nu ụshɛpwụ, suje okofwo, no okwuturu, no sholubo keeni atwa na o shikoto.

²²Yɛu-Ugondu ubwa hiɛŋ bụ, Iyɛri, N nduwa iyi nɛ ebi m peni-unu ibɛ, ama okwo ti yaa shɛ gana ata ohwolu ta vwɛ ba waa iwɛ anya atwa.

²³Nazhɛ agwuma-ihwɛ yɛu-ugondu ata hiɛŋ bụ, Zhaga ni ihwɛnnɛ, uranga atwa maa e teni maa ihwɛ mi shini pwomuu.

²⁴Mo hi mbiso maa, i zasa bụtụ be elele na ashashɛ atwa na Ngaa suyanɛ zhɛ ba hungana iyimɛyɛ mi o.

²⁵Ti ge Jisus kwụbɛ tu ufwugwo ụ'wụtụ zhagajɛ nu bwa, baa mbiyanɛ aŋ, bɛɛ hiɛŋ aŋ,

²⁶Yaa shɛ bụtụ be elele be ci pi mi, bee imi shi bishi bwa, to bino bwa, te biyikwo bwa, ta miaụŋ mu bwa, ta miaụŋ-mo-bino mu bwa, ta angwụfwụ ubwa, tu uraiŋ ubwa ukɛnyi ibwɛ du, asha bi eri shi ba sha biseshi-bi-iyi mi o.

²⁷Bụtụ be elele na 'waŋnɛ shɛ ụ'wụ'wụ-ubatanɛ ubwa maa ma n 'wa, asha bi eri shi ba sha biseshi-bi-iyi mi o.

²⁸Gaaba na ashashɛ hiŋ na ba jala maa ma tuma tụ 'wụtụ, na zha shɛ ba gɛga tugwo maa imanga ulumo tuba maa kwụba okwo iyi nɛ baa 'yajɛ zhɛ yo hwuwo tuma ta ataa?

²⁹Shibwonu boo shilwo hwuŋ ukoshilo, yaa shɛ ikɛnyi ibwɛ ci shi maa hwuwo uŋ tuma, atwa elele na kwụbɛ uŋ zhɛ na nda bu asada, ɛ hiɛŋ,

³⁰Bụtụ ga kwuni tuma, ama ikɛnyi ibwɛ ci shi maa hwuwo tu o.

³¹Okwo agwuma naa zhɛ a sukakana agwuma anya nu ujasa, tu baa 'yajɛ asaza igbɛɛ-itɛ (10,000), i shɛ bi zha shɛ ba gɛga tugwo maa haŋsa okwo bi zhɛ ba ala hwayɛ bụtụ na 'yajɛ asaza igbɛɛ-umpwaa (20,000)

³²Yaa shɛ bee mepi maa bi zha shɛ ba ala bu o, bi zhɛ ba tumwana eseci-i'ɛlɛ ta bụtụ bwa bi i'ime ta dụlụmɛ maa a lụpɛ gana na maa amɛ-olom nama.

³³Gobwonu du, yaa shɛ bụtụ be elele na ashashɛ hiŋ genji shi iyi elele nɛ baa 'yajɛ, bi eri shi ba sha biseshi-bi-iyi mi o.

³⁴Manɛ mɛ shɛ iyi biye, ama yaa shɛ manɛ mu lacɛmɛ shɛ, imbe ɛɛ tɛ zhɛ a nda mu maa mu lacɛmɛɛ?

³⁵Mu zasa ule na cɛnjɛ kwo kaa nu ubizo, semi tu'waŋ kiri ɛɛ zhɛ a 'waŋ mu no tupohondo. Bụtụ na 'yajɛ acɛbɛ, ga hwuga.