Read bassa LUK 15 Bible Online

LUK 15 - bassa bible

LUK 15

¹Ele-ụdalụ kpaaŋ na atwa-iwɛwɛ a kaanganɛ izhɛ oo gwumwonu ne Jisus maa a hwụjɛ iwɛ ubwa.

²Afarisi ne embisegeni Undwa o ngwulongongo, ɛɛ hiɛŋ, Bụtụ ga cimi atwa-iwɛwɛ, baa ya du iyimɛyɛ na aba.

³Ge Jisus manganganɛ aŋ n-ndumwa mu ko, bɛɛ hiɛŋ,

⁴Gaaba 'yajɛ agwụdụ dipi-yebi na ashashɛ hiŋ, yaa shɛ bu ko inanjɛ bụ, i shɛ bi zha shɛ ba ganga a na ata vwɛ dupu-na-buhanda-na-ba-e-cinjishi (99) nu ụshɛka maa jalakaka bu na ata inanjɛ bụ uuwa i ci aka na boo to bu ugbee?

⁵Aka na boo to bu ugbe, ba patana bu no otutu ubwa, bu na nda unyasa.

⁶Aka na bee ci ihwɛ, baa suyanɛ eyejilo ubwa keeni anya ubwa, bɛɛ hiɛŋ aŋ, M mbiyeni ma unyasa tɛnda, iwɛnɛ tu Ngoo to ụgwụdụ mu na ga ma inanjɛ ugbe.

⁷Mo hi mbiso maa, gabata du unyasa tɛnda zhɛ wa nama hwuŋ na azuba iwɛ bụtụ-bi-iwɛwɛ bu ko na jɛshɛrɛjɛ-ahaŋsa, uhwuri atwa tiririri dupu-na-buhanda-na-ba-e-cinjishi a na jɛshɛrɛjɛ shɛ shihaŋsa.

⁸Okwo biyikwo naa 'yajɛ azụrụfa arinya umpwa, yaa shɛ uko inanjɛ bụ, i shɛ bi zha shɛ bo shiyono ụsụtụla ubwa ulwa, maa sugo umwono ubwa maa jalakaka uŋ tebiye uuwa i ci aka na boo to uŋ ugbee?

⁹Aka na boo to uŋ ugbe, ba suyanɛ eyejilo ubwa keeni anya ubwa, bɛ hiɛŋ aŋ, M mbiyeni ma unyasa tɛnda, iwɛnɛ tu Ngoo to azụrụfa mi na ga ma inanjɛ ugbe.

¹⁰Mo hi mbiso maa, gabata du unyasa tɛnda namɛ na ashashɛ atumwa Agwatana a na namɛ na azuba iwɛ bụtụ-bi-iwɛwɛ bu ko na jɛshɛrɛjɛ-ahaŋsa.

¹¹Ge Jisus to tuhwulo bɛɛ hiɛŋ, Bụtụ bu ko 'yajɛ miaụŋ-me-eyi mi yebi.

¹²Inɛ imɛwɛɛ hiɛŋ bishi ba aba, Ada, M panɛ i'wɛŋnɛ nɛ i shɛ inee mi. Nazhɛ bishi ba aba dwotwogonu aŋ i'wɛŋnɛ ibwɛ.

¹³Ti yaa namɛ maa ijitɛ imbɛnɛ, yɛu ɛtɛ imɛwɛɛ imanjɛ i'wɛŋnɛ ibwɛ kpaaŋ, bee hwuri na cɛnjɛ tu na tụ dụlumɛ. Apata baa 'waŋtanjɛ i'wɛŋnɛ ibwɛ nu uraiŋ shɛbara na baa ya.

¹⁴Aka na ti bee hwuwi i'wɛŋnɛ ibwɛ ufwu tɛnda hwɛɛ, imunɛ i'wɛtwɛ layɛ na cɛnjɛ ta ata, nazhɛ ukekeshi iyi elele kwuni bu tɛnda.

¹⁵Nazhɛ bee zhe boo momo togwu na bụtụ bu ko na shɛ yɛu-cɛnjɛ ta ata. Ibɛ bụtụ ata tumwanɛ bu ne ehilo ubwa maa bu na pana nkomu mu bwa iyimɛyɛ.

¹⁶Nazhɛ baa jala maa bu na ya yibwa okwo tindeshi ta ata nkomu ma ya maa shigo, ama i zasa kaa bụtụ peni bu iyi elele o.

¹⁷Aka na ta ahaŋsa ubwa kezhe, bɛɛ mɛmɛ hiɛŋ, Miaụŋ-mu-ugondu mu na bishi mi ba tụpa alubashɛ, a 'yajɛ iyimɛyɛ nɛ hwuleji aŋ tiya, Ngaa namɛ epe tuba imunɛ ma n kwụna.

¹⁸N zhɛ mɛ ishijɛ ma zha pe bishi mi; mɛ hiɛŋ bụ, Ada, N njɛ Agwatana iwɛwɛ, Ngaa bɛ njɛ du kaa iwɛwɛ.

¹⁹N lanɛ shɛ ya hwuwayɛ maa a na mɛ hiɛŋ yɛu bu o. Ama n njɛ ya okwo gana yɛu-ugondu bu ike nɛ aba tụpa alubashɛ.

²⁰Bɛɛ ishijɛ ga bee zhe pe bishi bwa. Aka na te bishi bwa kwụbɛ bụ taa dụlụ, inyɛmɛnyɛmɛ ibwɛ shɛ bụ. Bee gezhiji bee teji bu uhwaŋna, bee keri bu u'ala ni i'ilu, baa ruwanɛ bụ.

²¹Nazhɛ yɛu ɛtɛ hiɛŋ bụ, Ada, N njɛ Agwatana iwɛwɛ, Ngaa bɛ njɛ du kaa iwɛwɛ. N lanɛ shɛ ya hwuwayɛ maa a na mɛ hiɛŋ yɛu bu o.[45]

²²Ama bishi bwa hiɛŋ miaụŋ-mu-ugondu ubwa, Zhaga suje ma utogwo na ngezeni a na vwɛ nụ ụzhɛ kakayɛ maa hi urigeni bu, shana bu ma bukanɛ na buvwa bwa, hwuŋtono bu ma abida nɛ ɛvwɛvwɛjɛ ubwa. (Umoz 41:42; Zɛka 3:4.)

²³Shapɛ ma yɛu buna nɛ hwuri a na vwɛ unyomo hiɛ kwụnɛ, maa tɛ yɛ ma, maa tu nanjɛ ma tụlagwụ.

²⁴Iwɛnɛ ti yɛu gɛ mi ge 'wi, bɛɛ hiɛ, bu ga 'inɛ la, Ngoo to bu ugbe. Ee kwuni ga tụlagwụ tunanga.

²⁵Ama batagwụ bi yɛu ɛtɛ ge ipi, aka na ti bee ci ujiyo, boo gwumwonu ni ihwɛ, baa hwụjɛ azunga keeni tɛhiɛba.

²⁶Baa suyanɛ yɛu-ugondu ike, bee heŋteni bu iyi nɛ shɛ ecilo tụlagwụ tu na aa nda.

²⁷Yɛu-ugondu ɛtɛ jishijɛ bụ, bɛɛ hiɛŋ, Buhongwu bu ubwa jiye, ibɛ bishi bu kwụnanjɛ bụ yɛu buna nɛ hwuri a na vwɛ unyomo hwɛɛ, iwɛnɛ ti bee leshiji bu nu unyasa tebiye.

²⁸Ama batagwụ bi yɛu ɛtɛ ba nda isɛbwɛ, baa lacɛ maa tono ihwɛ ɛtɛ. Ibɛ po bishi bwa banɛ bee zhegeni bu, baa tabwa bụ maa teni ihwɛ.

²⁹Ama bi jishijɛ bishi bwa, bɛɛ hiɛŋ bụ, Hioko shiywa shu ofwugwo Ama bu ndana ugondu gana bujama, i ta zasa unu elele na e bu m peni Ngaa lakwa kwukwuŋ, ama bi te me peni shi kaa okwo yɛu biywoywo kwukwuŋ maa ma nda unyasa ne eyejilo mi.

³⁰Ama aka na ti yɛu gɛ bu nɛ 'waŋtanjɛ i'wɛŋnɛ bu hwɛɛ na awɛle jiye, abu kwụnanjɛ bu yɛu buna nɛ nyemi.

³¹Bishi bwa jishijɛ bụ, bɛɛ hiɛŋ, Ɛ-yɛu mi, bu namɛ kaa ne mi aka elele, iyi elele nɛ Ngaa 'yajɛ, inɛɛ bu kaa yaa shɛ.

³²Ama i teni cɛŋ maa njɛ du unyasa na tụlagwụ tu ga, iwɛnɛ to buhongwu ga bụ ge 'wi, bɛɛ hiɛ, bu ga 'inɛ, Ngoo to bu ugbe.