Read bassa LUK 17 Bible Online

LUK 17 - bassa bible

LUK 17

¹Ge Jisus hiɛŋ eseshi-iyi ubwa, Iyi ukwurishi[49] zha shɛ yo ngwulo tizhajɛ kwukwuŋ. Ama bụtụ na iyi ukwurishi dure no olugwo ubwa bi zhɛ ba nda hwuŋ adangboo!

²I debeji maa o to bu inɛnɛ ni i'ilu ibwɛ maa e shepi bu ee keri ni itekwu, uhwuri maa nda okwo yɛu ike ticwɛŋ ukwurishi maa laya.

³Na nda ma pece! Yaa shɛ yɛu-bino bu ɛbɛ njɛ iwɛwɛ, tazhɛgana bụ. Yaa shɛ baa jɛshɛrɛjɛ-ahaŋsa, gangana bụ.

⁴Yaa shɛ baa bɛ njɛ iwɛwɛ kpalụ cenje jitoo ko, nazhɛ bee gwure pụ bụ kpalụ cenje ata jita ata uko, bɛɛ hiɛŋ, N jɛshɛrɛjɛ-ahaŋsa, bɛ shɛ ba gangana bụ.

⁵Nazhɛ atumwa hiɛŋ Agwangwama, Kaana rishe ru tu tɛtɛtana ugombo.

⁶Agwangwama jishijɛ aŋ, bɛɛ hiɛŋ, Yaa shɛ ahiɛ 'yajɛ rishe-tɛtɛtana gana bụzagwụ bu mustad, hi ge eri hiɛ hiɛŋ udurumi ga, Mushingwo maa mama shɛrɛ ni itekwu, u gɛ zhɛ wa hwuga-unu hiŋ.

⁷Gaaba na ashashɛ hiŋ 'yajɛ yɛu nɛ ya hwanga bu itimɛ, kwo kaa nɛ ya ngbaraka agwụdụ ne ehilo. Aka na yɛu ɛtɛ jiye ehilo, bɛɛ zhɛ bɛ hiɛŋ bụ, Zhajɛ maa yɛ iyimɛyɛ gunu ataa?

⁸Awo, bi zhɛ bɛ hiɛŋ bụ, Urugono i'wɛŋnɛ bu hwungbɛ maa n ndanɛ tugwo iyimɛyɛ mi ụrụmɛ, maa aka na Ngaa yɛ hwayɛ inee mi hwɛɛ, nazhɛ ɛbi zhɛ ba ya inɛɛ bu.

⁹Bi zhɛ suu ba nda ugwoje yɛu-ugondu ɛtɛ iwɛnɛ tu baa njɛ iyi nɛ bee ge peni bu unu ibɛ? N heŋshi shi o.

¹⁰Gabata du yaa hi shanɛ, okwo ahi nduwa iyi elele nɛ ee hi eni, hiɛŋ ma, Tu ta shɛ waa miaụŋ-mu-ugondu mu na mi te shi eshe, iwɛnɛ ti yaa shɛ iyi nɛ ee ti eni kiri atɛ njɛ.

¹¹Ti ge Jisus to uhwaŋna tahaŋnụ tu bwa tu Jɛrusalɛm, bee keshici tugwungwu tu Samaria keeni Galili.

¹²Aka na ti bee teni ụshɛpwụ uko, ibɛ atwa ụngwụ-uwaŋna oko umpwa twa nu bwa. Ee shikeni taa dụlụ,

¹³ee shepi rụhwụŋ na azuba, ɛɛ hiɛŋ, Jisus, Agwuma-ihwɛ, kwụba inyɛmɛnyɛmɛ tu.

¹⁴Aka na ti ge Jisus kwụbɛ aŋ, bɛɛ hiɛŋ aŋ, Zhaga meme mbiseni ma onongbo. Aka na tɛ ɛ zhɛ, aa zhɛmananɛ aa namɛ shɛshɛshɛ.

¹⁵Aka na ta bụtụ bu ko na ashashɛ aba kwụbɛ maa bu zhɛmananɛ ụngwụ ubwa, bee gwure bee zhemonjino Agwatana na rụhwụŋ rụ 'wụtụ.

¹⁶Bee leyi ni ivwunɛ Jisus, baa njɛ ugwoje nu bwa. Bụtụ ata kaa shɛ Busamaria!

¹⁷Ge Jisus heŋteni iheŋtene, bɛɛ hiɛŋ, Shɛ atwa umpwa maa aa ga nɛnjɛ? Cee tuba atwa vwɛ ecinjishi namɛɛ?

¹⁸I zasa suu bụtụ zhɛ be gwure maa pana Agwatana ụjɛrụma, semi bugaiŋ ga hŋ kiri?

¹⁹Bɛɛ hiɛŋ bụtụ ata, Ishijɛ hwuri, rishe rụ bụ tɛtɛtana rụ bụ nɛnjɛ.

²⁰Afarisi heŋteni Jisus, ɛɛ hiɛŋ, Aka na kwuŋ Cɛnjɛ-ta-tugwwama ta Agwatana ti zhɛ ta zhajɛɛ? Ge Jisus jishijɛ aŋ, bɛɛ hiɛŋ, Tizhajɛ ta Cɛnjɛ-ta-tugwama ta Agwatana tɛ shɛ shɛ iyi nɛ eshe atwa zhɛ a ngbaraka ti te e ci o.

²¹A zha shɛ ɛ hiɛŋ, Kwụba ma taa na tu namɛ epe! Kwo kaa, Tee ye tu namɛ peye o! Cɛnjɛ-ta-tugwama ta Agwatana tu namwawaŋ na ashashɛ hiŋ.

²²Bɛɛ hiɛŋ eseshi-iyi ubwa, Aka zhɛ o to tɛ hi zhɛ hi na jala maa hiɛ kwụbɛ ụjita uko ni ijitɛ Yɛu Bụtụ, ama hi zha shɛ kaa hia kwụba uŋ.

²³Atwa zhɛ mɛ hi hiɛŋ, Bweeye! Kwo kaa, Bwaana! Ta zhaga ma o, ta 'wa aŋ ma o.

²⁴Iwɛnɛ tu ụjita Yɛu Bụtụ zhɛ wa sha hwuŋ gana na tu ubɛrɛ wa ta te kwune nu uce tụla geri bu ko tutu uce tụla geri yebi.

²⁵Ama i shɛ tilɛɛ maa bi zhɛ bo hioko tugwo ụbaụta ofwugwo hiiŋ, atwa uwaŋnɛ ga zhɛ a manga bụ, ɛɛ zhɛ a laka bu gana uzhobu.

²⁶Gana na ti yaa namɛ la na aka Noa, gobwonu du yɛɛ zhɛ ya nama hwuŋ na aka Yɛu Bụtụ.

²⁷A ya la, aa swa, aa zana, aa pana tụmbụla, uuwa i ci ụjita na ga Noa teni nụ ụhaŋtụ ata, ibɛ meni ma ata mu zhagajɛ, mee suji aŋ kpaaŋ.

²⁸Gana ata du yaa namɛ la na aka Lụt, A ya la, aa swa, aa sa, aa sanga, aa bila, aa ma tuma.

²⁹Ama jita na ga Lụt beni nu Sụdụm, nazhɛ ulwa ne tuwiŋ-tuwaŋna banɛ na azuba wee ngbe, wee hwoŋzhinji aŋ kpaaŋ.

³⁰Gobwonu du yɛɛ zhɛ ya sha hwuŋ nụ ụjita na ɛɛ zhɛ a kapɛshɛnga Yɛu Bụtụ.

³¹Ụjita ata ci hwuŋ, kede bụtụ na patanɛ no osokwu, okwo i'wɛŋnɛ ibwɛ zweni nu umwono, kezhe maa sugo iŋ o. Kede kaa du bụtụ na namɛ ne ehilo gwure ya o.

³²Ne teyinje ma iwɛ biyikwo Lụt,

³³Bụtụ be elele na ba jala maa bicingo uraiŋ ubwa, asha nazhɛ baa inzhɛnga uŋ, ama bụtụ be elele na ba inzhɛnga uraiŋ ubwa, asha nazhɛ bɛɛ zhɛ bo bicingo uŋ maa nama.

³⁴Mo hi mbiso maa, ụjita ata ci hwuŋ atwa eyebi zhɛ o woto no ogodo oko, ɛ zhɛ a shapa bụtụ bu ko, a ganga bụtụ bi yebi.

³⁵Eyikwo eyebi zhɛ na naka inɛkɛ ni izhɛrɛ, ɛ zhɛ a shapa bu ko a ganga bu na bi yebi.

³⁶[Atwa eyebi zhɛ a nama ne ehilo, ɛ zhɛ a shapa bụtụ bu ko,[50] a ganga bụtụ bi yebi.]

³⁷Nazhɛ eseshi-iyi ubwa heŋteni bu, ɛɛ hiɛŋ, Agwangwama, Ce bwaa? Bɛɛ jishijɛ aŋ, bɛɛ hiɛŋ, Ofwo na ru'wo ri iyi ru namɛ, apata du ogwulu a ụlwatagwụ.