Read bassa LUK 23 Bible Online

LUK 23 - bassa bible

LUK 23

¹Nazhɛ ɛɛ ishijɛ kpaaŋ aba, ee zeriji Jisus pu Pɛilat.

²Ee kwuni bu ụshɛrɛya tupatangana, ɛɛ hiɛŋ, Tu to bụtụ ga ugbe tu baa inzhanga udenji tu, baa lakana aŋ maa a cɛpɛ Sisa ukwuribi ụdalụ. Bɛɛ hiɛŋ maa ubwa ni ikɛnyi ibwɛ i shɛ ga Krast agwuma!

³Ga Pɛilat heŋteni Jisus, bɛɛ hiɛŋ, Gabụ suu bɛ shɛ Agwuma Eju? Ge Jisus jishijɛ bụ, bɛɛ hiɛŋ, Gabụ du bu dumwa ya.

⁴Ga Pɛilat hiɛŋ ehiu onongbo keeni atwa ata ofwugwo, N kwụbɛtanɛ shɛ bụtụ ga tụwụma o.

⁵Ama a uganɛ ɛɛ hiɛŋ, Bo vwundotongo atwa ni imbisegeni ibwɛ no ofwo elele nu Judia,[64] bee kwune iŋ na cɛnjɛ tu Galili uuwa i ci epe.

⁶Aka na ti ga Pɛilat hwụjɛ iwɛ gɛ, bee heŋteni aŋ, bɛɛ hiɛŋ, Bugalili suu bụtụ ga shɛ?

⁷Aka na ti ga Pɛilat mepi maa ge Jisus banɛ na cɛnjɛ tu na gɛ Hɛrod 'yajɛ ụhwada tuba, baa tumwanɛ bụ pi Hɛrod na namɛ du nu Jɛrusalɛm na aka ata.

⁸Aka na ti gɛ Hɛrod kwụbɛ Jisus, baa njɛ unyasa duwa, iwɛnɛ tu baa ga na hwuga unabarɛ ubwa cala, baa ga jala kaa du maa kwụba bụ, baa ngbaracɛ uhwaŋna maa du kwụba ụrụhwajɛ uko na ge Jisus zhɛ ba nda.

⁹Ga Pɛilat heŋtengeni Jisus iheŋtene ifwugwo. Ama ge Jisus jishijɛ shɛ bu o.

¹⁰Ehiu onongbo ne embisegeni Undwa shikekeni apata, aa patangana Jisus ụshɛrɛya ikɛnyi ikɛnyi.

¹¹Nazhɛ gɛ Hɛrod na asaza ubwa ngbaracɛ du Jisus cwɛŋ, aa nda bụ asada; ee urigeni bu utogwo uko na pilanụ tebiye, nazhɛ bee gwuricinji bu pu Pɛilat.

¹²Ibɛ po ata Hɛrod na Pɛilat a shɛ ya tiyejilo jita ata, shibwonu a ga lacɛmɛ shɛ la na binya o.

¹³Ga Pɛilat suyanɛ ehiu onongbo, ne ehwurembe keeni atwamwa.

¹⁴Bɛɛ hiɛŋ aŋ, Hi zɛrijɛ bụtụ ga pi mi, ɛhi hiɛŋ maa ba inzhanga atwa. Kwụba ma gana na tu Ngaa jɛmɛ ụshɛrɛya ubwa ne eshe hiŋ, N kwụbɛtanɛ shɛ bụ tụwụma ti iyi nɛ ehi peteni bu ụshɛrɛya ibɛ o.

¹⁵Okwo gɛ Hɛrod, bụ kwụbɛ shɛ du o, ibɛ po bee gwuricinje bu pu tu. Kwụba ma, bɛ njɛ shɛ iyi nɛ lanɛ tu'wo.

¹⁶Ama N zhɛ mo dubo bu, maa Ma ganga bụ.

¹⁷[I shɛ kaa tilɛɛ maa ga Pɛilat bacɛnganɛ aŋ bụtụ bu ko bu umwono-tishi na aka Isene Tɛkashɛka.][65]

¹⁸Ama a uganɛ hwɛɛ aba, ɛɛ hiɛŋ, Kwụna bụtụ ga. Ama itɛ bacɛnganɛ Barabas.

¹⁹E shiyeni kaa Barabas ata nu umwono-tishi iwɛnɛ tu baa bɛrɛ ujasa na kwụnɛ atwa nu ụshɛpwụ ata.

²⁰Ga Pɛilat dumananɛ iwɛ, iwɛnɛ ti yaa kwụlanɛ bụ maa ganga Jisus.

²¹Ama a uranjɛ n'ungwa, ɛɛ hiɛŋ, Tagana bụ nrɛ nụ ụ'wụ'wụ-ubatanɛ! Tagana bụ nrɛ nụ ụ'wụ'wụ-ubatanɛ!

²²Ga Pɛilat hiaŋnanɛ aŋ na aka tatụ, Iwembe poo, iyi iwɛ imbe kwuŋ baa njɛɛ? N kwụbɛ shɛ iyi nɛ baa njɛ waŋnɛ tu'wo. Ama N zhɛ mo dubo bu nazhɛ maa ganga bụ.

²³Ama ee keeni tụdụma na rụhwụŋ rụ 'wụtụ, maa ge tegeni bu nrɛ. Ibɛ po rụhwụŋ ra aba keeni ma rụ rụ ehiu onongbo rụ lasụ Pɛilat.

²⁴Nazhɛ ga Pɛilat leni maa nda gana na ɛɛ hiɛŋ bụ.

²⁵Bee becingeni aŋ bụtụ na aa lụpɛ bụ, ubwa shɛ bụtụ ebe ee ge shiyeni nu umwono-tishi iwɛnɛ tu baa bɛrɛ ujasa na kwụnɛ atwa. Ama bi shepi Jisus bee peni aŋ maa a njɛ bụ gana na kwụlanɛ aŋ.

²⁶Gana na te e zeriji Jisus, ɛɛ zhɛ nu uhwaŋna, aa 'imɛ Saimon bụtụ bu Saren, tu baa banɛ ne ehilo, ee peteni bu ubatanɛ ata maa 'waŋna uŋ u 'wa Jisus ne ekwunyi.

²⁷Atwa ofwugwo ụ'wụtụ te eyikwo ofwugwo a na 'wa Jisus, a pa shɛgba sha aba iyi, ee zweneni bu u'wo gboo!

²⁸Ti ge Jisus mbiyanɛ aŋ, bɛɛ hiɛŋ aŋ, A-miaụŋ-mo-o mu Jɛrusalɛm, ta ma twana ma u'wo, ama na mama twana ma u'wo keeni u'wo miaụŋ mi hiŋ.

²⁹Iwɛnɛ ta aka oko zhɛ o to hwuŋ, tɛ ɛ zhɛ ɛɛ hiɛŋ, O'ulo keeni eyikwo na 'waŋnɛ shɛ miaụŋ mu na mo subo kwukwuŋ gwoje.

³⁰Na aka ata ɛ zhɛ o kwuno nshama keeni tingbekwu tihiɛŋ, Utu layɛtanɛ maa hi tu urigeni.

³¹Yaa shɛ aa nda ijɛ nụ ụ'wụ'wụ ulom, asha imbe tuba zhɛ yo jitono ụ'wụ'wụ uhwoo?

³²Ee zeriji atwa awɛ eyebi maa a kwụnɛ aŋ ne Jisus.

³³Aka na te e ci ofwo ata ɛɛ hiɛŋ izeci aba, Ukokolo uhiuhiu, apata ee tegeni Jisus nrɛ nụ ụ'wụ'wụ-ubatanɛ, na atwa ata awɛ eyebi, bu ko namɛ nu u'ala ubiye ubwa, bu na bi yebi namɛ nu u'ala ugwulwo ubwa.

³⁴Ge Jisus hiɛŋ, Ada, gangana aŋ, iwɛnɛ te e mepi shi iyi nɛ aa nda.[66] Nazhɛ oo dwotwogonu i'wɛŋnɛ ibwɛ ni icɛcɛ tu'waŋ.

³⁵Atwamwa shikekeni apata aa ngbaracɛ bụ. Ehiu o sumono bu du, ɛɛ hiɛŋ, Bi bicinji anya atwa, asha go momo bicingo, ti yaa shɛ ubwa shɛ ga Krast ata na Agwatana teri.

³⁶Asaza a nda bu du asada, aa zhajɛ pu bwa, ee peni bu meni mụ tụ'walụ ta afwafwa mu na mi sembi, ɛɛ hiɛŋ,

³⁷Yaa shɛ gabụ bɛ shɛ Agwuma Eju, asha meme bicinji.

³⁸E 'nyeci ti'nyeci tu ko, ee peteni na azuba uhiuhiu ubwa, ɛɛ hiɛŋ,[67] BỤTỤ GA UBWA SH Ɛ AGWUMA EJU.

³⁹Nazhɛ bụtụ bu ko na ashashɛ atwa ata awɛ a na swacɛ apata nu bwa dumanganɛ bu du n-ndumwa mụ wɛ, bɛɛ hiɛŋ bụ, Shɛ gabụ suu bɛ shɛ ga Krast ata, meme bicinji, maa iti bicinji du.

⁴⁰Ama uyebi ubwa jishijɛ bụ, bee tezhigeni bu, bɛɛ hiɛŋ, Bɛ njɛ shɛ suu inyɛsɛ ya Agwatana, gana na te e bi peni n-ndumwa-tụwụma mu ko mu ko nu bwa?

⁴¹Iyi nɛ teni cɛŋ ni iyi nɛ atɛ njɛ, ibɛ gɛnɛnɛ aa tu tụpana itɛpwɛ ibɛ, ama bụtụ ga njɛ shɛ iyi iwɛ kwukwuŋ o.

⁴²Bɛɛ hiɛŋ Jisus, N teyinje aka na ebi ci[68] Cɛnjɛ-ta-tugwama tụ bụ.

⁴³Ge Jisus jishijɛ bụ, bɛɛ hiɛŋ, Iwɛ-tɛkana Omo bu mbiso maa, te kwuni nu hwayɛ ga, bi zhɛ ba nama ne mi nu Paradais.

⁴⁴Ti yee ci gana uwaŋna tishikoko, nazhɛ tishi tu layɛ nu unyizo kpaaŋ, uuwa i ci aka na tu uwaŋna yinganɛ.

⁴⁵Uwaŋna te shi ya o, ibɛgɛlɛ tugwuno nɛ ee kepi odubo amɛ Umwono wa Agwatana bagwụ na ashashɛ.

⁴⁶Ge Jisus uganɛ duuwa, bɛɛ hiɛŋ, Ada, M bi peni ihwungwɛ mi. Aka na tu baa jɛmɛ iwɛ ɛtɛ, baa dwa ihwungwɛ.

⁴⁷Aka na tu uhiu wa asaza dipi-yebi kwụbɛ ijɛ kpaaŋ, baa shɛtanɛ Agwatana, bɛɛ hiɛŋ, Iwɛ-tɛkana, bụtụ ga ubwa ga shɛ bụtụ bi tiririri.

⁴⁸Aka na ta atwa elele na ụlwatagwụ no ofwo igbɛtɛtɛ ɛtɛ kwụbɛ iyi elele nɛ teni, ee gwuri nu nhwaŋ ma aba, aa pa shɛgba sha aba iyi.

⁴⁹Ama atwa elele na ge mepi bu, te eyikwo na banɛ nu Galili a na ga zhagaga nu bwa, shikekeni taa dụlụ, aa ngbarakacɛ ijɛ ɛtɛ kpaaŋ.

⁵⁰Bụtụ bu ko na ɛɛ hiɛŋ izeci ibwɛ go Josɛf na banɛ Arimatia, na shɛ ụshɛpwụ we Eju. Bu namɛ na ajɛmɛ-ushaura, bɛ shɛ bụtụ bi biye keeni bụtụ bi tiririri.

⁵¹Bi leni shi ni iyi nɛ ee heŋshi kwo kaa ni iyi nɛ aa njɛ o. Bɛ shɛ bụtụ na du ba nda ashɛlatụ Cɛnjɛ-ta-tugwama ta Agwatana.

⁵²Bee zhe pu Pɛilat, baa lụpɛ bụ ru'wo ri Jisus.

⁵³Bee kezhicinje ru, bee pipi ru no tugwuno ti ilinɛn, bee ni ru nu u'uye na ee ge te ni shi bụtụ kwukwuŋ, unaa na bee ge hini nu utayɛ uko ụ'wụtụ.

⁵⁴Jita ata shɛ ụjita tumama imanga tu Ụjita-ụhinjanụ na vwɛ beyi.

⁵⁵Eyikwo na banɛ la nu bwa nu Galili a na 'wa bụ, kwụbɛ u'uye ata gana na ee ni ru'wo ru bwa.

⁵⁶Nazhɛ ee gwure, aa imanjɛ iyi nɛ 'yajɛ ụhiụŋ ubiye keeni umuru. Oo to ụhinjanụ nụ Ụjita-ụhinjanụ gana na tu unu-tupana ibɛ namɛ.