Read bassa UNDWA TUKWABILANA 12 Bible Online

UNDWA TUKWABILANA 12 - bassa bible

UNDWA TUKWABILANA 12

¹Andwa keeni shikpogo shɛ na ahiɛ shɛ hi no shiyono eshe tebiye maa hi na nda, na cɛnjɛ ta ata AGWANGWAMA na shɛ Agwatana eshi hiŋ ma hi pana maa hi 'yaga tutu ukwunanga uraiŋ hiŋ tunama na cɛnjɛ tu unyizo na.

²Hiɛ shɛ hia nda ofwo elele na edenji na ɛhi zhɛ hia lashɛga cɛnjɛ ta aba ga shana aa zhɛba tuwa ta aba ufwu kpaaŋ, te tilegbe, te tikpeku keeni ucilo ụ'wụ'wụ ulomu we elele.

³Hwuŋzotongo ma otukwu-ụrụpɛ aba, bwarataga ma ijɛ ɛtɛ ee shikecenji, hwoŋzhingo ma imbele ya Ashɛra[19] ya aba nu ulwa; logo ma ntatanuwaŋ ma tuwa ta aba, maa kede a na zhɛba tu ya apata kwukwuŋ.

⁴Hiɛ shɛ shɛ tuba hia nda AGWANGWAMA na shɛ Agwatana hiŋ gana ata aa nda tuwa ta aba o.

⁵Ama hiɛ shɛ hia dwalakaka ofwo oko gba a na AGWANGWAMA na shɛ Agwatana hiŋ zhɛ a tala maa alamụ hiŋ kpaaŋ na zhajɛ maa a na zhɛba bụ no ofwo elele na ɛhi zhɛ.

⁶Apata ɛhi zhɛ hie suje arụpɛ hiŋ tuhwoŋzhingo keeni arụpɛ hiŋ vwɛ. Ti iyi-a'umpwa[20] keeni apwaŋ hiŋ tɛshɛkana, ta apwaŋ hiŋ unu-tishilo, ta apwaŋ hiŋ tukwulangana, keeni miaụŋ mu umbe mi inɛ keeni agwụdụ hiŋ.

⁷Apata kaa ɛhi zhɛ hia ya iyi nu mbe AGWANGWAMA na shɛ Agwatana hiŋ, nu unyasa tubwada, ta ahiɛba, ta atwa nhwaŋ mi hiŋ, ni iyi elele nɛ ahi 'yagajɛ, inɛɛ nɛ AGWANGWAMA na shɛ Agwatana hiŋ ihi peni-uwebiye.

⁸Ta nda ma gana na ahi ga nda epe kpaaŋ na aka ga o. Iwɛnɛ po bụtụ bụtụ hiŋ ba shana baa zhɛba gana na teni cɛŋ ne eshe ubwa kwakwa.

⁹Iwɛnɛ po hi te ci shi cɛnjɛ ta ata AGWANGWAMA na shɛ Agwatana hiŋ ihi peni, maa hi to ụhinjanụ maa hiɛ yɛ ogwu tuba o.

¹⁰Ama aka na ehi keshi Urefu Jodan, ahiɛ jɛjɛ na cɛnjɛ ta ata AGWANGWAMA na shɛ Agwatana hiŋ ihi peni maa hi 'yaga, keeni aka na bee hi peni ụhinjanụ no olugwo atwa i'ime hiŋ a na ihi rungwutwonu kpaaŋ, iwɛ maa hi gɛga ya na amɛ-olom suu.

¹¹Nazhɛ AGWANGWAMA na shɛ Agwatana hiŋ zhɛ a tala ofwo oko gba maa a na zhɛba bụ. Apata du ɛhi zhɛ hie suje iyi elele nɛ Ngee hi peni-unu ibɛ: ibɛ shɛ arụpɛ tuhwoŋzhingo keeni arụpɛ hiŋ anya, ti iyi-a'umpwa hiŋ keeni apwaŋ hiŋ ticinji, ta apwaŋ hiŋ elele kpaaŋ, a na ehi shileni AGWANGWAMA unu.

¹²Hiɛ shɛ kaa hia bwada unyasa nu umbe AGWANGWAMA na shɛ Agwatana hiŋ, ta ahiɛba, ta miaụŋ mi hiŋ me eyi keeni miaụŋ mi hiŋ mo o, ta miaụŋ-mu-ugondu hiŋ me eyi keeni miaụŋ-mu-ugondu hiŋ mo o, ta Alivai na jɛjɛ na amɛ ashɛpwụ hiŋ, gana na te ehi mepi maa a zasa urubwo wa azajɛ keeni ogwu ne hiŋ o.

¹³Ta na ta ma arụpɛ hiŋ tuhwoŋzhingo no ofwo elele na ihiɛ kwụlanɛ kwakwa o.

¹⁴Ama ga shɛ no ofwo ata oko gba anaa na AGWANGWAMA zhɛ a tala na amɛ ụlamụ hiŋ uko, apata ɛhi zhɛ hi na ta arụpɛ hiŋ tuhwoŋzhingo, apata du ɛhi zhɛ hi na nda iyi elele nɛ Ngee hi peni-unu ibɛ.

¹⁵Okwo ti yaa shɛ gana ata, hi eri hia kwụna usunda maa hiɛ yɛ usunda ubwa na amɛ ashɛpwụ hiŋ gana elele na ahia jala, gana na tu uwebiye nɛ AGWANGWAMA na shɛ Agwatana bụ ibi peni namɛ. Ta bụtụ na hashɛganụ keeni bụtụ na hashɛganụ sụ, eri ba ya uŋ, gana na ta a ya udwamwa kwo kaa bụlụba.

¹⁶Semi mehieŋ kiri ahiɛ shɛ shɛ hia ya kwukwuŋ. Hiɛ shɛ hia 'waŋ mụ na cɛnjɛ gana meni.

¹⁷Bɛ shɛ shɛ ba ya iyi-umpwa bụ yo ohiu okwo inɛ meni mu tụ'walụ ta afwafwa okwo inɛ manɛbɛ mụ bụ, kwo kaa inɛ miaụŋ mu umbe mi inɛ keeni agwụdụ bụ, okwo apwaŋ na ebi shileni AGWANGWAMA unu, kwo kaa apwaŋ bụ u tukwulana kwo kaa apwaŋ bụ ticinji na amɛ ashɛpwụ bụ o.

¹⁸Ama bɛ shɛ ba ya iŋ nu umbe AGWANGWAMA na shɛ Agwatana bụ, no ofwo oko gba na AGWANGWAMA na shɛ Agwatana bụ zhɛ a tala, tụ gabụ, ta miaụŋ mụ bụ me eyi, ta miaụŋ mụ bụ mo o, ta miaụŋ-mu-ugondu bu me eyi, ta miaụŋ-mu-ugondu bu mo o keeni Alivai na jɛjɛ na amɛ ashɛpwụ bụ. Bɛ shɛ kaa ba bwada unyasa nu umbe AGWANGWAMA na shɛ Agwatana bụ na amɛ iyi elele nɛ aba nda ni i'ɛlɛ bụ.

¹⁹Nda pece maa kede jineci Alivai na cɛnjɛ ta ata abu namɛ tutu tu'wo tụ bụ o.

²⁰Aka na ta AGWANGWAMA na shɛ Agwatana bụ keeni tugwungwu tụ bụ ugombo, nu gana na ti bee bi shileni-unu, ɛbi hiɛŋ, Ti zhɛ ta ya usunda, iwɛnɛ ti isunjɛ usunda ma bụ nda, ya uŋ gana elele na tu usunda ata ụbụ kwụlanɛ.

²¹Yaa shɛ ofwo ata AGWANGWAMA na shɛ Agwatana bụ teri e hwuri ụdụlụ na bụ, asha kwụna buna bụ kwo kaa agwụdụ bụ elele na AGWANGWAMA na shɛ Agwatana bụ ubu peni, nu gana na ti Ngee bi peni-unu; maa yɛ na amɛ ashɛpwụ bụ gana elele na ụbụ kwụlanɛ.

²²Ya uŋ kwakwa gana na ta a ya usunda udwamwa kwo kaa una bụlụba. Ta bụtụ na hashɛganụ, ta bụtụ na hashɛganụ sụ, eri ba ya uŋ.

²³Ama mapa gom maa bɛ shɛ shɛ ba ya mehieŋ o; iwɛnɛ te mehieŋ mɛ shɛ uraiŋ, bɛ shɛ shɛ kaa ba ya uraiŋ medenji usunda ata o.

²⁴Bɛ shɛ shɛ ba ya mụ o; 'waŋ mụ na cɛnjɛ gana meni.

²⁵Na hwuga-unu ga, iwɛ maa iyi elele ibɛ zhɛmanɛ, ta miaụŋ mụ bụ me ekwunyi, na aka na ta aba nda iyi nɛ teni cɛŋ ne eshe AGWANGWAMA.

²⁶Ama bɛ shɛ bo sugo iyi ya arụpɛ bụ tijilo, keeni apwaŋ na ebi shileni AGWANGWAMA maa zhe no ofwo ata oko AGWANGWAMA zhɛ a tala,

²⁷na ta arụpɛ bụ tuhwoŋzhingo, tu usunda ubwa keeni mehieŋ mu bwa nu utukwu-ụrụpɛ wa AGWANGWAMA na shɛ Agwatana bụ. 'Waŋ du mehieŋ mu usunda ata wa arụpɛ bụ na ɛbi zhɛ ba ya nu uhiuhiu utukwu-ụrụpɛ wa AGWANGWAMA na shɛ Agwatana bụ.

²⁸No shiyono eshe maa hwụjɛ-unu n-ndumwa me elele na Ngee bi peni-unu muba, iwɛ maa ibɛ zhɛmanɛ, ta miaụŋ mụ bụ me ekwunyi unyizo-nom, na aka na ta aba nda iyi nɛ zhɛmɛ keeni inɛɛ nɛ teni cɛŋ ne eshe AGWANGWAMA na shɛ Agwatana bụ.

²⁹Aka na ta AGWANGWAMA na shɛ Agwatana bụ ibi iricingeni edenji ata ɛbi zhɛ bo tonono, ebi leshiji kaa cɛnjɛ ta aba maa gɛga ya na tuba.

³⁰Mama 'imɛ maa kede 'wa gana na atwa ata a zhɛba la tuwa ta aba maa modugwulo ma aba mụ bụ 'imɛ o, tobwolo kaa AGWANGWAMA ubu ndwanua aŋ ufwu. To hoŋtono du gana na edenji ata a shana aa zhɛba la tuwa ta aba, iwɛ maa na nda du gana ata o.

³¹Ta zhɛba kaa AGWANGWAMA na shɛ Agwatana bụ gana na atwa ata a zhɛba tuwa ta aba o. Iwɛnɛ po a zhɛba tuwa ta aba ni iyi-tupwaŋ ye elele nɛ AGWANGWAMA na shɛ Agwatana bụ bo imo. Iwɛnɛ po o hwoŋzhingono tuwa ta aba okwo miaụŋ ma aba me eyi, ta mu na mo o no otukwu-ụrụpɛ tuwa ta aba.

³²No shiyono ma iyi elele nɛ Ngee hi peni-unu ibɛ eshe maa hi na nda; ta kaana iŋ ma o, ta munanana iŋ ma kaa o.