Read bassa UNDWA TUKWABILANA 14 Bible Online

UNDWA TUKWABILANA 14 - bassa bible

UNDWA TUKWABILANA 14

¹Ahiɛba hiɛ shɛ atwa AGWANGWAMA na shɛ Agwatana hiŋ. Ta na la ma tuzuzu o, ta na 'nyang ma kaa du tukpala na aka na ahia ta-ụkwụla iwɛ bụtụ na 'wi o.

²Iwɛnɛ po gabụ bɛ shanɛ AGWANGWAMA na shɛ Agwatana bụ bụtụ bi tijilo, AGWANGWAMA kaa bi teri maa banɛ na ashashɛ atwa na ubeni na cɛnjɛ tu unyizo ga kpaaŋ, maa ma bụ 'yaga.

³Ta na ya ma iyi elele nɛ AGWANGWAMA ihi mbiswo maa i hashɛganụ o.

⁴Isundɛ nɛ lanɛ maa hi na ya na: buna, nụ ụgwụdụ, no biywoywo,

⁵nu ukarubana, na bụlụba, nu unabara, ni itune, ne binemi, keeni udwamwa.

⁶Usunda we elele na ogwogwozwo ubwa bagwụ eyebi, unaa na kaa wa ya usabwo,[21] hiɛ shɛ hia ya isundɛ gɛnɛ ɛtɛ.

⁷Isundɛ nɛ ahiɛ shɛ shɛ hi na ya na amɛ inɛɛ nɛ ogwogwozwo ibɛ bagwụ tebiye kwo kaa inɛɛ nɛ ya ya usabwo nɛ: irihende, na azwɛ keeni ugwumbɛ, iwɛnɛ ta a ya usabwo ama ogwogwozwo aba kaa bagwụ sụ o, a hashɛganụ.

⁸Ta na ya ma ikemi o, ogwogwozwo ubwa bagwụ yibwa, ama bɛ yɛ shɛ usabwo, bu hashɛganụ no ofwo hiŋ. Ta na ya ma usunda wa aba o, to tumongono ma okwo n'wo ma aba o.

⁹Iyi nɛ ahiɛ shɛ hi na ya na amɛ inɛɛ nɛ namɛ na amɛ meni kpaaŋ na: na ya ma iyi nɛ 'yajɛ agagayɛ-ataga, keeni ashasha.

¹⁰Hiɛ shɛ shɛ kaa hi na ya iyi elele nɛ zasa agagayɛ-ataga keeni ashasha o; inɛ ɛtɛ hashɛganụ no ofwo hiŋ.

¹¹Na ya ma shanụnụ she elele shɛ na shɛ hashɛganụ sụ.

¹²Ama ma shɛ na ahiɛ shɛ shɛ hi na ya na: ugbeji, nu ugwulu, nu uzogbogwu,

¹³nu ugwuruwa, nu ugwogwori, keeni udenji wa aba kpaaŋ,

¹⁴nu ugwaagwaa, keeni udenji wa aba kpaaŋ,

¹⁵nu ugbaanjɛ, nu usharwarwa, nu ukwuturu-uwapa, keeni udenji ucepi we elele,

¹⁶nu ugwogworugwoni, nu uzhikwukwu, na alụma-meni,

¹⁷na alụma-agwatana, nu ugwulu-itekwu, nụ ụvwụvwụ,

¹⁸ne sunyi-gwune, nụ ụ'nyɛ'nyɛrɛ keeni udenji wa aba kpaaŋ, nu ugbururu keeni ogwobo.

¹⁹Iyi elele nɛ 'yajɛ apiambɛ, yo hombilo kaa na cɛnjɛ, i hashɛganụ no ofwo hiŋ; hiɛ shɛ shɛ hi na ya iŋ o.

²⁰Na ya ma iyi elele nɛ 'yajɛ apiambɛ nɛ kaa hashɛganụ sụ.

²¹Ta na ya ma iyi elele nɛ meme 'weji o; pana iŋ bụlashɛ na namɛ nụ ụshɛpwụ bụ, maa ya iŋ, kwo kaa sangana bugaiŋ. Iwɛnɛ po gabụ bɛ shanɛ AGWANGWAMA na shɛ Agwatana bụ bụtụ bi tijilo. To no shitogo yɛu-ụgwụdụ kwo kaa biywoywo no mosubo mo bino bwa o.

²²Na pana iyi-umpwa izɛgwu bụ ye elele nɛ banɛ ne ehilo bu uywa uywa.

²³Na ya iyi-umpwa bụ yo ohiu, ni inɛ meni mụ tụ'walụ ta afwafwa, ni inɛ manɛbɛ, ni inɛ miaụŋ mu umbe mi inɛ keeni agwụdụ bụ, na agba AGWANGWAMA na shɛ Agwatana bụ no ofwo ata bee teri maa ga a na zhɛba bụ, iwɛ maa no soso AGWANGWAMA na shɛ Agwatana bụ inyɛsɛ tụsụma aka elele.

²⁴Yaa shɛ kaa ofwo ata AGWANGWAMA na shɛ Agwatana bụ teri maa ga a na zhɛba bụ ubu hwuleni ụdụlụ, ebi eri shi be suje iyi-umpwa bụ maa ci apata, na aka na ta AGWANGWAMA na shɛ Agwatana bụ ubu peni-uwebiye ni iyi nɛ abi 'yajɛ;

²⁵asha sanga iŋ maa fwuleji ukwuribi ibɛ maa 'waŋna uŋ maa zhe no ofwo ata AGWANGWAMA na shɛ Agwatana bụ teri maa ga a na zhɛba bụ,

²⁶maa so iyi elele nɛ ubu kwụlanɛ nu ukwuribi ata bụ, okwo buna, okwo ụgwụdụ, okwo meni mụ tụ'walụ ta afwafwa, kwo kaa mayaga, iyi elele nɛ ma bụ dwa eshe; bɛ shɛ ba ya iŋ na agba AGWANGWAMA na shɛ Agwatana bụ, maa njɛ unyasa apata, ta atwa ihwɛ bụ.

²⁷To no jinoko Alivai na namɛ na ashɛpwụ bụ o, iwɛnɛ ta a zasa urobwo cɛnjɛ ti ikɛnyi aba gana bụ.

²⁸Bɛ shɛ bi ne suje iyi-umpwa iyimɛyɛ bụ nu gana na ti iyi bu zhɛmanɛ nu ukwunanga shiywa shɛ tatụ she elele nu uywa ata gbaa, maa tileni iŋ na amɛ ashɛpwụ bụ.

²⁹Iwɛnɛ po Alivai zasa urobwo cɛnjɛ gana bụ o, ti iwɛ bugaiŋ, te bu'weteji, keeni bululo na namɛ na amɛ ashɛpwụ bụ, maa a zhajɛ a yɛ maa e shigeji; iwɛ maa AGWANGWAMA na shɛ Agwatana bụ ubu peni-uwebiye nu ugondu we elele na aba nda.