Read bassa UNDWA TUKWABILANA 15 Bible Online

UNDWA TUKWABILANA 15 - bassa bible

UNDWA TUKWABILANA 15

¹Bɛ shɛ bu na gangana atwa iyi nu ukwunanga shiywa shi cenje she elele.

²Gana tugangana ta ata ti zhɛ ta sha na: bụtụ be elele na aa yɛ utashɛ, bɛ shɛ ba ganga iyi nɛ ba ga unanjɛ uyebi ubwa; kede hoŋtono ya uyebi ubwa kwo kaa yɛu-bino bwa utashɛ ata o, iwɛnɛ to o onongwo tuganga ta ata ta AGWANGWAMA.

³Bi eri bo hoŋtono bugaiŋ utashɛ na baa bu 'yajɛ maa leshiji; ama iyi elele nɛ i shɛ inɛɛ bu nɛ namɛ no ofwo yɛu-bino bu, bɛ shɛ ba vwata ya i'ɛlɛ bu ni ibɛ.

⁴Ama bukofwo zha shɛ ba nama na ashashɛ hiŋ o, (iwɛnɛ ta AGWANGWAMA zhɛ ma bụ pana-uwebiye na cɛnjɛ ta ata bee bi peni maa tɛ shɛ ogwu bu),

⁵ti yaa shɛ ɛbi zhɛ ba hwuga-unu na AGWANGWAMA na shɛ Agwatana bụ ibi peni hwayɛ ga, maa shiyeni uŋ eshe maa njɛ ụŋ kpaaŋ.

⁶AGWANGWAMA na shɛ Agwatana bụ zhɛ ma bụ pana-uwebiye, nu gana na ti bee bi shileni la unu, gabụ bi zhɛ ba unanga edenji ofwugwo iyi, ama tuba bi zha shɛ ba una o. Gabụ kaa bi zhɛ ba untangana edenji ofwugwo, ama a zha shɛ tuba ma bụ untangana o.

⁷Yaa shɛ bukofwo namɛ na ashashɛ hiŋ, na shɛ bụtụ bu ko na miaụŋ-mo-bino bu, na namɛ na ashɛpwụ hiŋ elele, na cɛnjɛ ta ata AGWANGWAMA na shɛ Agwatana bụ ibi peni, ta ta amɛ bụ tɛshɛshɛpana o, ta nda kaa tuwumanga no ofwo yɛu-bino ata bụ na shɛ bukofwo.

⁸Ama bɛ shɛ ba nda kakayɛ maa unanjɛ bụ iyi elele nɛ waŋnɛ ukekeshi na to bu.

⁹Ta laka maa unanjɛ yɛu-bino bu iyi o, iwɛ aka na ahaŋsa tusashɛ tuhaŋsa zhɛ e teni na amɛ bụ, ɛbi zhɛ bɛ hiɛŋ, Uywa ucenje na shɛ uywa u tuganga u gwumwonu, ɛbi zhɛ ba hanɛcɛngana yɛu-bino bu nɛ shɛ bukofwo rishe, abụ zha shɛ ba pana bụ iyi elele, bɛɛ zhɛ kaa ba uganana AGWANGWAMA nu uhiuhiu bu, yɛɛ zhɛ kaa ma bụ shana iwɛwɛ.

¹⁰Bɛ shɛ ba pana bụ kwakwa. Kede amɛ bụ hashɛganụ na aka na te ebi peni bu o. Iwɛnɛ po iwɛ inɛ gɛ ibɛ AGWANGWAMA bụ zhɛ ma bụ pana-uwebiye nu ugondu bu we elele keeni iyi elele nɛ abu 'yajɛ.

¹¹Iwɛnɛ po bukofwo zha shɛ ba vwunga tunama na cɛnjɛ ta ata o; iwɛbɛ po Ngee hi peni-unu Ngɛɛ hiɛŋ, Na pana ma yɛu-bino hiŋ keeni bụtụ na ukekeshi to, keeni bukofwo iyi duwa duwa.

¹²Yaa shɛ ee bi sengeni[22] yɛu-bino bu nɛ shɛ Bihibru be eyi, kwo kaa Bihibru bo o, ga ma bụ ndana ugondu shiywa shi cihiŋ, ama nu uywa ucenje ga bana ya no olugwo bu maa mama 'yaga.

¹³Aka na ɛbi zhɛ ba ganga bụ maa bana no olugwo bu maa mama 'yaga, bɛ shɛ shɛ ba ganga bụ maa hwulo ni i'ɛlɛ yo ohondo.

¹⁴Bɛ shɛ ba imangana bụ maa peni bu agwụdụ bụ, no ohiu, ne meni mu tụ'walụ ta afwafwa bụ kwakwa; nu gana na ta AGWANGWAMA na shɛ Agwatana bụ ibi peni-uwebiye, pana bu du gana ata.

¹⁵Bɛ shɛ be teyinje maa bɛ shɛwa la du bujama na cɛnjɛ ti Ijipti, nazhɛ AGWANGWAMA bụ ubu gwube. Iwɛbɛ po Ama bụ pana-unu ga hwayɛ ga.

¹⁶Ama yaa shɛ bɛɛ hiɛŋ, N zha shɛ ma bana no olugwo bu o, iwɛnɛ tu boo bu lubo, ta atwa ihwɛ bụ, iwɛnɛ ti yaa zhɛmanɛ bụ kaa no ofwo bu,

¹⁷asha bɛ shɛ ba shapa ụcɛpɛya maa tibi bu ụcɛbɛ nụ ụ'wụ'wụ wo odubo, nazhɛ bɛɛ zhɛ ba sha bujama bụ unyizo-nom. Gana ata kaa du abɛ shɛ ba nda bujama bụ bo o.

¹⁸Kede ibu gwumanɛ, na aka na tɛ bi zhɛ ba ganga bụ maa bana no olugwo bu maa mama 'yaga o. Iwɛnɛ po bu bu ndwanua ugondu na dwonu ashashɛ ulumo ata ɛbi gɛ zhɛ ba tụpa bụtụ bụ ụgwụ, bu bu ndwanua ugondu shiywa shi cihiŋ. Yaa shɛ abɛ njɛ gana ga, AGWANGWAMA na shɛ Agwatana bụ zhɛ ma bụ pana-uwebiye ni iyi elele nɛ aba nda.

¹⁹Bɛ shɛ bo tulonono AGWANGWAMA na shɛ Agwatana bụ miaụŋ-me-eyi mu na inɛ keeni agwụdụ bụ meci hiiŋ kpaaŋ. Bɛ shɛ shɛ ba nda ugondu na buna bụ be eyi bi hiiŋ o, ta hwaga kaa tihiŋzhe ti yɛu nɛ ụgwụdụ bụ meci hiiŋ o.

²⁰Bɛ shɛ ba ya bụ ta atwa ihwɛ bụ, nu umbe AGWANGWAMA na shɛ Agwatana bụ uywa uywa, no ofwo ata AGWANGWAMA zhɛ a tala.

²¹Ama yaa shɛ ya 'yajɛ unu-tusapa, yaa shɛ uvwuna ubwa dwonu kwo kaa yee lubeni, kwo kaa baa 'yajɛ tɛhashɛganụ tu na tu wumanjɛ duwa, asha ta shapa bụ maa to ụrụpɛ pa AGWANGWAMA na shɛ Agwatana bu o.

²²Bɛ shɛ ba ya bụ na amɛ ụshɛpwụ bụ; ta bụtụ na hashɛganụ, ta bụtụ na hashɛganụ sụ e eri a ya bụ, gana na ta a ya udwamwa keeni bụlụba.

²³Semi mehieŋ mu bwa kiri abɛ shɛ shɛ ba ya; bɛ shɛ ba 'waŋ mụ na cɛnjɛ gana meni.