Read bassa UNDWA TUKWABILANA 17 Bible Online

UNDWA TUKWABILANA 17 - bassa bible

UNDWA TUKWABILANA 17

¹Ta taga AGWANGWAMA na shɛ Agwatana bụ ụrụpɛ na buna kwo kaa nụ ụgwụdụ na zasa ulapiya, kwo kaa ni iyi elele nɛ iyi iwɛ njɛ o. Iwɛnɛ po inɛ ɛtɛ shanɛ AGWANGWAMA na shɛ Agwatana bụ iyi-tupwaŋ.

²Yaa shɛ aa kwụbɛ butubwenyi okwo biyikwo be elele na amɛ ụshɛpwụ we elele na AGWANGWAMA na shɛ Agwatana bụ ibi peni, tu baa nda iyi iwɛ ne eshe AGWANGWAMA na shɛ Agwatana bụ, baa bwada unu ubwa tutwa,

³tedure na tuwa, okwo uwaŋna, okwo upiana, kwo kaa iyi elele na amɛ unyama iyi ya azuba tɛzhɛba, inɛɛ nɛ Ngaa lacɛ maa a njɛ,

⁴ee bi mbishi kaa unabarɛ iwɛ ibɛ, asha bɛ shɛ bo hwoyigono iwɛ ibɛ tebiye, yaa shɛ kaa iwɛ ɛtɛ shɛ ga iwɛ-tɛkana maa a njɛ ga iyi-tupwaŋ gɛnɛ ɛtɛ ni Isrɛl.

⁵Asha bɛcinjɛ butubwenyi kwo kaa biyikwo ata na njɛ tupwaŋ ta ata no ofwo odubo uba, maa hi tegeni butubwenyi kwo kaa biyikwo ata atayɛ maa 'wo.

⁶No timbisono te eseyida eyebi kwo kaa eseyida atatụ, ɛɛ zhɛ a kwụna bụtụ ata. A shɛ shɛ a kwụna bụtụ nu useyida uko gba o.

⁷U'ala useyida ata ubwa shɛ wa ta bụ utayɛ hiiŋ nazhɛ atwa vwɛ tegeni bu du atayɛ maa a kwụnɛ bụ. Gabata ɛbi zhɛ ba nda maa becinji iyi iwɛ na ashashɛ hiŋ.

⁸Yaa shɛ iwɛ ye elele teni, yee bu hwuleji tukwunanga na ashashɛ bụtụ bu ko na kwụnɛ binya bwa, okwo iwɛ undwa uko tutono cɛŋ nu unya, okwo iwɛ iyi iwɛ tumama ndanụ na binya, n-ndumwa me elele na mi teni na ashɛpwụ bụ, mu na mụ bụ 'yaganɛ ikɛnyi, asha bɛ shɛ ba zha no ofwo ata AGWANGWAMA na shɛ Agwatana bụ zhɛ a tala.

⁹Yaa shɛ ebi zhe kaa no ofwo Alivai a na shɛ onongbo, keeni ofwo bɛjɛmɛ-bụ-ụshɛrɛya na namba apata na aka ata, maa mbishi aŋ, aba zhɛ ma bụ kwunangana ụshɛrɛya ata.

¹⁰Asha bɛ shɛ ba nda gana na te e bi kepishingeni iŋ no ofwo ata AGWANGWAMA zhɛ a tala. Shiyono eshe maa njɛ gana na te e bi sekekeni iŋ kpaaŋ.

¹¹Lono maa njɛ gana na to tusokokono tu na ee bi peni tu namɛ. Ta ganga ecilo ụshɛrɛya ata ee bi mbishi okwo cwɛŋ o.

¹²Bụtụ be elele na hwụjɛ shɛ unu bunongbo na shikeni ba nda ugondu nu umbe AGWANGWAMA na shɛ Agwatana bụ, kwo kaa una bɛjɛmɛ-bụ-ụshɛrɛya ata, ga kwụnɛ bụtụ ata. Gana ɛbi zhɛ ba nda maa becinji iyi iwɛ ni Isrɛl ta.

¹³Nazhɛ atwa kpaaŋ zhɛ a hwuga, ɛɛ zhɛ a nda inyɛsɛ, maa kede a njɛ ya ụhwụjɛshɛ iwɛ gana ata sasana o.

¹⁴Aka na ebi ci hwuŋ cɛnjɛ ta ata AGWANGWAMA na shɛ Agwatana bụ zhɛ ma bụ pana, ebi leshiji tu, abɛ jɛjɛ na tuba. Ɛbi hiɛŋ, N zhɛ ma gɛgɛcɛnga agwuma na zhɛ ma n 'yaga, gana na edenji na n rungwutwonu kpaaŋ 'yajɛ.

¹⁵Asha ga sha bụtụ na AGWANGWAMA na shɛ Agwatana bụ teri gom, ubwa shɛ ba sha agwuma ata bụ. Ga shɛ kaa bụtụ bu ko na ashashɛ miaụŋ-mo-bino bu i shɛ agwuma ata bụ. Kede bugaiŋ na shɛ shɛ yɛu-bino bu shɛ agwuma bụ o.

¹⁶Kede agwuma ata na mama kaana idɛkwɛ ibwɛ ujasa ufwugwo, kede kaa nda atwa maa e gwuri ni Ijipti maa a kaanɛ idɛkwɛ ibwɛ ufwugwo, gana na ta AGWANGWAMA ubi mbiswo, bɛɛ hiɛŋ, To gwulo ya nu uhwaŋna ata kwukwuŋ o.

¹⁷Agwuma ata kaa shɛ shɛ bu na kaana eyikwo ofwugwo tuzana o, iwɛ aka na bɛɛ zhɛ ba jɛshɛrɛga ba ganga AGWANGWAMA, kede bu na kaana kaa azụrụfa keeni azhɛnarɛya ti'yaga duwa duwa maa sha bɛzhɛgba o.

¹⁸Aka na baa yɛ tugwama hwɛɛ, go zwogo undwa ata namɛ nu utakada wa Agwatana, bɛ shɛ ba 'nyata tuzwogo tu utakada ata onongbo na shɛ Alivai 'yajɛ.

¹⁹I shɛ kaa ya nama pu bwa, baa shɛ bu na rɛta uŋ tutu tu'wo tu bwa, maa soso AGWANGWAMA na shɛ Agwatana ubwa inyɛsɛ tụsụma, tedure na tu'untangana tu n-ndumwa mu undwa ata keeni shikpogo sha ata, maa bu na nda gana na yaa jɛmɛ.

²⁰Kede bu no momo mungicingo uhwuri miaụŋ-mo-bino mu bwa o, kede ganga kaa unu-tupana ga okwo cwɛŋ o; iwɛ maa bo ilogogo na tugwama tu bwa, keeni miaụŋ mu bwa na amɛ Isrɛl.