Read bassa UNDWA TUKWABILANA 19 Bible Online

UNDWA TUKWABILANA 19 - bassa bible

UNDWA TUKWABILANA 19

¹Aka na ta AGWANGWAMA na shɛ Agwatana bụ njɛ edenji ata baa bụ pana cɛnjɛ ta aba ufwu kpaaŋ, abụ 'yajɛ aŋ, abɛ jɛjɛ kaa na amɛ ashɛpwụ aba keeni shimwono sha aba,

²bɛ shɛ bu momo tulonono ashɛpwụ a'wụtụ atatụ swooŋ, na cɛnjɛ ta ata AGWANGWAMA na shɛ Agwatana bụ zhɛ ma bụ pana maa 'yaga, to gwumwongonu.

³Bɛ shɛ ba kala ihwɛŋnɛ maa dwotwogonu cɛnjɛ ta ata AGWANGWAMA na shɛ Agwatana bụ zhɛ ma bụ pana maa 'yaga ekpeleshi atatụ, iwɛ maa bụtụ be elele na kwụnɛ bụtụ gezhiji maa zha apata.

⁴Inɛ gɛ i shɛ timbiyono ta bụtụ na kwụnɛ bụtụ, maa gozhigo apata maa uraiŋ ubwa bini. Yaa shɛ bụtụ be elele kwụnɛ uyebi ubwa nu u'ala-tuhwulo, tu baa ga zasa i'ime nu bwa cebe,

⁵Ibɛ shɛ gana na ta bụtụ zhe nu uwapa nu uyebi ubwa maa jaja ụ'wụ'wụ, bee heŋpi ogwubo maa jaja ụ'wụ'wụ ata, ibɛ ogwubo mushingwo nu utata, oo po uyebi ubwa, bee 'wi. Go gozhigo maa zha nụ ụshɛpwụ ata uko maa swaka maa bicingo uraiŋ ubwa;

⁶shibwonu bɛcɛpɛ-bi-itɛpwɛ bi mehieŋ bi isɛbwɛ zhɛ bo urugono bụkwụnɛ ata bụ bụtụ maa jitono bu, iwɛnɛ to ofwo dụlụmɛ, bi zhɛ ba gwụcɛnga bụ maa 'wo, okwo ta bụtụ ata ga lanɛ shɛ no tu'wo, iwɛnɛ ti bee ge te shi uyebi ata ubwa ni i'ime cebe.

⁷Iwɛbɛ po Ngee bi peni-unu, Ngɛɛ hiɛŋ, Bɛ shɛ bo tulono ashɛpwụ atatụ swooŋ.

⁸Yaa shɛ kaa AGWANGWAMA na shɛ Agwatana bụ a kaana tugwungwu tụ bụ ugombo, gana na bee shileni la eshi bu unu, bee bi peni kaa cɛnjɛ ta ata kpaaŋ, tu na bee shileni la eshi bu unu maa bi zhɛ ba pana aŋ,

⁹asha shiyono unu-tupana ata Ngee bi peni hwayɛ ga eshe maa untangana uŋ kpaaŋ, tedure no tulubo tu na obo lubo AGWANGWAMA na shɛ Agwatana bụ keeni tɛnda te teni cɛŋ gana na baa jala tutuu. Asha bɛ shɛ ba kaana ashɛpwụ atatụ na a na ga a tatụ,

¹⁰iwɛ maa kede a kwụnɛ bụtụ ata ga zasa n-ndumwa-tụwụma na cɛnjɛ ta ata AGWANGWAMA na shɛ Agwatana bụ zhɛ ma bụ pana maa 'yaga o, maa kede n-ndumwa-tụwụma ma atwa tụkwụna mụ bụ patana o.

¹¹Ama yaa shɛ bụtụ be elele po uyebi ubwa iyi, ti bee ge gwubeji bu, baa sukakanɛ bụ, baa gwụcɛnjɛ bụ ni iyi nɛ eri ya kwụna bụtụ, bee 'wi ga, okwo yaa shɛ bụkwụnɛ ata bụ bụtụ gezhiji maa swaka na amɛ ụshɛpwụ ga uko,

¹²asha ga n-nyarɛ mụ ụshɛpwụ ubwa mu tumwanɛ atwa maa ɛ bɛcinjɛ bụ apata, maa e peni bu bɛcɛpɛ ata bi itɛpwɛ be mehieŋ, iwɛ maa kwụna bụ.

¹³Ta nda uwanyi ubwa kwukwuŋ, iwɛ maa na bacɛnga n-ndumwa-tụwụma ma bụtụ tukwụna, na bụtụ na ga zasa n-ndumwa-tụwụma ni Isrɛl, iwɛ maa ibu zhɛmanɛ.

¹⁴To mushingo useyida tugwungwu tu uyebi bu unaa na atwa angwụshɛ shɛrɛ la na cɛnjɛ ta ata AGWANGWAMA na shɛ Agwatana bụ zhɛ ma bụ pana maa 'yaga o.

¹⁵Useyida mokondo waŋnɛ shɛ iwɛ tụwụma ta bụtụ be elele, kwo kaa iwɛ tu'wanga ta bụtụ be elele nɛ imɛ iyi iwɛ nɛ baa njɛ o; semi nu unu we eseyida eyebi, kwo kaa eseyida atatụ nazhɛ iwɛ ɛtɛ zhɛ ya sha iwɛ tukpororo.

¹⁶Yaa shɛ useyida uko tukata ishijɛ maa la bụtụ bu ko tiseyida iwɛ iyi nɛ teni shi cɛŋ,

¹⁷asha ga atwa ata ga mama 'yaganụ iwɛ, pushe na agba AGWANGWAMA, keeni agba onongbo keeni ajɛmɛ-ụshɛrɛya a na namba na aka ata.

¹⁸Ga ajɛmɛ-ụshɛrɛya hweyigeni iwɛ ɛtɛ tebiye. Yaa shɛ kaa useyida ata ụ shɛ useyida tukata, baa shananganɛ yɛu-bino bwa iwɛ na tukata,

¹⁹asha bɛ shɛ ba nda bụ du gana na bee ge heŋshi maa ga njɛ yɛu-bino ɛtɛ ubwa; iwɛ maa na bacɛnga iyi iwɛ na ashashɛ bụ.

²⁰Nazhɛ atwa vwɛ zhɛ a hwuga, ɛɛ zhɛ a nda inyɛsɛ, a zha shɛ a nda ya iyi gɛnɛ ɛtɛ kwukwuŋ na ashashɛ hiŋ.

²¹Ta nda kaa uwanyi ubwa kwukwuŋ; ga uraiŋ cɛpɛ uraiŋ, ge rishe rɛ cɛpɛ rishe, ge rine rɛ cɛpɛ rine, ga u'ala cɛpɛ u'ala, ga uvwɛvwɛjɛ cɛpɛ uvwɛvwɛjɛ.