Read bassa UNDWA TUKWABILANA 20 Bible Online

UNDWA TUKWABILANA 20 - bassa bible

UNDWA TUKWABILANA 20

¹Aka na ebi zhe maa sukakanɛ atwa i'ime bu nu ujasa, okwo abụ kwụbɛ maa idɛkwɛ ya aba, ni ihɛŋtu ya aba ujasa keeni ejeshi aba gembi ufwugwo ee hwuri anaa bụ, ta nda inyɛsɛ ya aba o; iwɛnɛ ta AGWANGWAMA na shɛ Agwatana bụ na ubu bɛcinjɛ la na cɛnjɛ ti Ijipti namɛ na bụ.

²Aka na obo gwumwongonu no ofwo ujasa ata, go bunongbo kezhingeni maa duma iwɛ ne ejeshi ata bụ,

³maa hiɛŋ aŋ, Oo ahiɛba atwa Isrɛl, hwuga ma, Hio gwumwongonu hwayɛ ga maa hi sukakanɛ atwa i'ime hiŋ nu ujasa: kede shihwulu shi hi horukono; ta nda ma kaa du inyɛsɛ o, ta zhɛgɛda ma kaa du o, ta sụma aŋ ma kaa du inyɛsɛ o.

⁴Iwɛnɛ po AGWANGWAMA na shɛ Agwatana hiŋ, ubwa zhɛ ba zhagaga ne hiŋ maa ma hi twagwụ ifelu na atwa ata i'ime hiŋ, maa ma hi lasagwụ aŋ.

⁵Nazhɛ ga atwa shihwolu heŋteni atwa ata maa, Gaaba shɛ bụtụ na namba epe na mo umwono ufwo na te weci shi nu bwaa? Ga bụtụ ata gwuri nu umwono ata ubwa, iwɛ aka na bɛɛ zhɛ be 'we nu ujasa binya bụtụ zhɛ bo woto nu bwa.

⁶Gaaba namba epe na birɛ afwafwa ni itimɛ ibwɛ, na kaa ta yɛ shɛ tụ'walụ ta abaa? Ga bụtụ ata gwuri, iwɛ aka na bɛɛ zhɛ be 'we nu ujasa, binya bụtụ zhɛ ba ya tụ'walụ ta aba.

⁷Gaaba kaa shɛ bụtụ na namba epe na 'wa biyikwo, na kaa te zeni shi buu? Ga bụtụ ata gwuri ni ihwɛ ibwɛ, iwɛ aka na bɛɛ zhɛ be 'we nu ujasa, binya bụtụ zhɛ ba zana bụ.

⁸Ga atwa ata shihwolu na kaana atwa na ta vwɛ iwɛ tuhoŋtono, maa, Gaaba kaa shɛ bụtụ na namba epe, na ba nda inyɛsɛ, na kaa ohwulu o horokoo? Ga bụtụ ata gwuri ni ihwɛ ibwɛ, iwɛ aka na shihwulu shi zhɛ sha bwadụ atwa ubwa.

⁹Aka na ta atwa ata shihwolu hwuwi atwa ata iwɛ tuhoŋtono hwɛɛ, a shɛ a tala eberezhe, a na zhɛ a sha ehiu atwa ata.

¹⁰Aka na obo gwumwongonu nụ ụshɛpwụ maa sukakanɛ atwa ubwa, pana tugwo atwa ubwa amɛ-olom.

¹¹Yaa shɛ ɛɛ bi jishijɛ ajɛshɛgwa amɛ-olom, ee bi kepishingeni uŋ kaa, asha ga atwa elele na aa kwụbɛ apata a shɛ ajama bụ, ga a na bụ ndana ugondu ukɛnyi.

¹²Ama yaa shɛ aa bụ ndanɛ shɛ iyi ya amɛ-olom, aa bụ sukakanɛ kaa nu ujasa, asha hwala ụshɛpwụ ata.

¹³Aka na ta AGWANGWAMA na shɛ Agwatana bụ njɛ maa eri aŋ, asha kwụna etwenyi ubwa kpaaŋ nu utokwobi.

¹⁴Ama sugo eyikwo aba, ta miaụŋ ma aba, ti iyimabiga, keeni iyi inyɛ ye elele nɛ namɛ nụ ụshɛpwụ ata, nɛ ujasa yɛ, maa i shɛ ufwa bụ ikɛnyi bụ. Ya iyi ya atwa i'ime bu nɛ ujasa yɛ, inɛɛ nɛ AGWANGWAMA na shɛ Agwatana bụ ibi peni.

¹⁵Gabata abɛ shɛ ba nda ashɛpwụ a'wụtụ elele a na dụlụmɛ na bụ, anaa na shɛ shɛ ashɛpwụ anya edenji a na namɛ epe.

¹⁶Ama yaa shɛ ashɛpwụ atwa ga AGWANGWAMA na shɛ Agwatana bụ zhɛ ma bụ pana maa 'yaga, bɛ shɛ shɛ ba ganga iyi elele nɛ ya hwungwa maa i bini o.

¹⁷Ama iricingo iŋ kpaaŋ, aba shɛ Ɛhit, na A'amo, ne Ekenan, nɛ Ɛpɛrɛz, nɛ Ɛhiv, keeni Ɛjɛbus, nu gana na ta AGWANGWAMA na shɛ Agwatana bụ ibi peni-unu.

¹⁸Kwụna aŋ iwɛ maa kede e bi mbisegeni maa na nda iyi-tupwaŋ ya aba ye elele nɛ aa nda ta a zhɛba tuwa ta aba maa kede njɛ AGWANGWAMA na shɛ Agwatana bụ iwɛwɛ o.

¹⁹Aka na ehi hweri ụshɛpwụ te ilegeji, maa hiɛ sukakanɛ uŋ nu ujasa, maa hi leshiji uŋ, ta kakaba i'wɛ'wɛ ibwɛ no ogwubo maa njɛ iŋ ufwu o. Iwɛnɛ po ibɛ ɛbi zhɛ bu na ya hwuŋ, to logo iŋ du kaa o. I'wɛ'wɛ ye ehilo suu i shɛ atwa maa hweri iŋ?

²⁰Semi ga shɛ i'wɛ'wɛ nɛ ebi mepi maa i shɛ shɛ i'wɛ'wɛ tiya o, ga shɛ ibɛ kiri ebi leji maa suji iŋ i njɛ ijilɛni iwɛ ụshɛpwụ ata zhɛ ma bụ sukakana hwuŋ nu ujasa, uuwa i ci aka na ụshɛpwụ ata hwuŋzwo.