Read bassa UNDWA TUKWABILANA 22 Bible Online

UNDWA TUKWABILANA 22 - bassa bible

UNDWA TUKWABILANA 22

¹Ta ngbaraka buna kwo kaa ụgwụdụ yɛu-bino bu tu baa ina, maa genji bu timbiyono; gwuricingeni aŋ yɛu-bino ata bụ.

²Yaa shɛ kaa bo gwumwonu su na bụ, kwo kaa ebi mepi shi bu, asha shapɛ bụ ni ihwɛ bụ, ga nama ni ihwɛ bụ tutu i ci aka na agwuma ubwa banɛ urungo ubwa; nazhɛ gwuricingo bu no ofwo yɛu-bino ata bụ.

³Gabata du kaa abɛ shɛ ba nda ni izhinyɛci ibwɛ; tu utogwo ubwa; ti iyi elele nɛ inanjɛ yɛu-bino bu inɛɛ nɛ ebu gwushiji. Ta ganga bụ timbiyono.

⁴Ta ngbaraka izhinyɛci kwo kaa buna bi yɛu-bino bu ti bee leyi nu uhwaŋna, maa genji bu timbiyono; mbiyono aŋ maa ishicinjɛ aŋ sasana.

⁵Biyikwo shɛ shɛ bo urugono i'wɛŋnɛ butubwenyui o, kede kaa du butubwenyi urugono i'wɛŋnɛ biyikwo. Bụtụ be elele na ba nda ijɛ bɛ shanɛ AGWANGWAMA na shɛ Agwatana bụ iyi-tupwaŋ.

⁶Yaa shɛ ebu vwuteni tuhwurugwo tụ ụnụnụ nụ ụ'wụ'wụ we elele, kwo kaa na cɛnjɛ, taa 'yajɛ oywoywo kwo kaa anjɛ, bino bwa kaa ta hwakanɛ oywoywo ubwa, kwo kaa anjɛ ata. To sugo oywoywo ata to bino ba aba o.

⁷Bɛ shɛ ba ganga bino ba aba maa hwulo tugwo, nazhɛ suji oywoywo ubwa kiri maa 'yaga; iwɛ maa ibu zhɛmanɛ, maa yɛ du urugbo duwa.

⁸Aka na obu mo umwono ufwo, bɛ shɛ ba ndana ukogo[25] ata bụ ijilɛni, iwɛ maa kede n-ndumwa mụ bụ wụmɛ, okwo yaa shɛ bụtụ be elele bɛzhɛrungwa nu bwa baa layɛ o.

⁹Ta bila izɛgwu tuswoswoswo iyebi ni itimɛ ya afwafwa bụ o, iwɛ aka na izɛgwu ɛtɛ abu ga bɛrɛ kpaaŋ, ta afwafwa bụ zha shɛ ya mata tebiye.

¹⁰Bɛ shɛ shɛ ba ta buna ni izhinyɛci igewe maa a hwɛŋ itimɛ zhiaaŋ o.

¹¹Bɛ shɛ shɛ bo urugono kaa tugwuno tu na aa nɛ ee hiŋtetenji ne tihiŋzhe ta agwụdụ ni ihwehwe o.

¹²Bɛ shɛ ba nda ezeje maa to na akakalụ tugwuno tụ bụ tu tu'urugono hwɛɛ aba eneshi.

¹³Yaa shɛ bụtụ be elele zeni biyikwo, bee kwuni ya biyikwo ata ti'imo,

¹⁴bee peteni bu kaa izeci ye ezuye, bɛ hiɛŋ, N zeni biyikwo ga, aka na ti Ngee weci nu bwa, N kwụbɛtanɛ shɛ bụ masha mu usapa[26] o.

¹⁵Asha ge bishi keeni bino bi yɛu ɛtɛ towo shapɛ useyida na tu baa ta shɛ usapa maa a zhajɛ no ofwo n-nyarɛ mụ ụshɛpwụ ata no ofwo odubo uba.

¹⁶Ge bishi bi yɛu ɛtɛ towo hiɛŋ n-nyarɛ ma ata, M peni bụtụ ga yɛu mi yo o maa zana, boo to bu ya ni i'ime.

¹⁷Hioko ma, ti bee peteni bu ezuye, bɛɛ hiɛŋ, N kwụbɛtanɛ shɛ bụ useyida o. Ijɛ kaa ibɛ shɛ useyida yɛu mi yo o nɛ te mepi shi butubwenyi. Ge e berishiji tugwuno ta ata nu umbe n-nyarɛ mụ ụshɛpwụ ata.

¹⁸Nazhɛ ga n-nyarɛ mụ ụshɛpwụ ata mi shepi bụtụ ata maa e lwepi bu.

¹⁹Ge leshiji azụrụfa dipi-yebi no olugwo ubwa, maa e peni bishi bi yɛu ɛtɛ yo o, iwɛnɛ ti bee peteni yɛu-yo-o Isrɛl nɛ ta shɛ usapa izeci iwɛ. Bɛ shɛ kaa ba sha biyikwo bwa; bɛ shɛ shɛ ba kala bụ kwukwuŋ tutu tu'wo tu bwa o.

²⁰Ama yaa shɛ ijɛ ɛtɛ i shɛ iwɛ-tɛkana ga, maa a kwụbɛ shɛ useyida yɛu-yo-o nɛ te mepi shi butubwenyi no olugwo yɛu ɛtɛ yo o,

²¹asha ga a shapɛ yɛu ɛtɛ yo o no odubo ihwɛ bishi bwa, maa etwenyi ụshɛpwụ ata tegeni bu atayɛ maa 'wo, iwɛnɛ tu baa njɛ iwɛ tusashɛ ni Isrɛl, ibɛ shɛ tuwɛle tu na baa njɛ ni ihwɛ bishi bwa. Gana ɛbi zhɛ ba bacɛnga iyi iwɛ na ashashɛ hiŋ ta.

²²Yaa shɛ aa kwụbɛ ta bụtụ bu ko bo woto ne biyikwo binya bụtụ, ga a kwụnɛ aŋ hwɛɛ aba ebe yebi, te butubwenyi ata weci nu bwa; te biyikwo ata; iwɛ maa becinji iyi iwɛ ni Isrɛl.

²³Yaa shɛ bụtụ bu ko jiteni yɛu-yo-o nɛ ta shɛ usapa na amɛ ụshɛpwụ, nɛ kaa bụtụ bu ko go nyingono, bee weci ni ibɛ.

²⁴Asha ge suje aŋ hwɛɛ aba ebe yebi no odubo uba ụshɛpwụ ata, maa e tegeni aŋ atayɛ maa e 'wi. Inɛ yɛu ɛtɛ yo o i shɛ iwɛnɛ tu baa uganɛ shɛ maa e mbiyeni bu, ubwa kaa namɛ na amɛ ụshɛpwụ. Inɛ butubwenyi i shɛ iwɛnɛ ti bee heshigeni biyikwo bu uyebi ubwa. Gana ɛbi zhɛ ba nda maa na bacɛnga iyi iwɛ na ashashɛ hiŋ ta.

²⁵Ama yaa shɛ na ambɛ butubwenyi jiteni yɛu-yo-o nɛ kaa bụtụ bu ko go nyingono, baa njɛ bụ iji, bee weci nu bwa, asha butubwenyi ata na weci nu bwa kiri ɛɛ zhɛ a kwụna.

²⁶Ama ta nda ma yɛu ɛtɛ yo o iyi elele o; yɛu ɛtɛ yo o zasa ulwapɛ na waŋnɛ tu'wo, iwɛnɛ ti inɛ gɛ i shɛ gana bụtụ na sukakanɛ uyebi ubwa maa kwụna bụ.

²⁷Iwɛnɛ po na ambɛ bụtụ ga kwụbɛ bụ, okwo yɛu ɛtɛ yo o nɛ oo nyingono ga uganɛ, maa e mbiyeni bu, asha i zasa bụtụ namba maa lashaga bụ o.

²⁸Yaa shɛ butubwenyi jiteni yɛu-yo-o nɛ ta shɛ usapa, nɛ kaa o to nyingono so, baa 'imɛ bụ, bee weci nu bwa, aa 'imɛ aŋ.

²⁹Asha bụtụ ata weci nu bwa zhɛ ba tụpa bishi bi yɛu ɛtɛ yo o azụrụfa arinya dupu, bɛ shɛ kaa ba zana iŋ, iwɛnɛ tu ba nduwa iŋ ufwu. Bɛ shɛ shɛ kaa ba kala bụ ya kwukwuŋ tutu tu'wo tu bwa o.

³⁰Kede bụtụ zeni biyikwo bishi bwa o: maa kaa pana ogodo bishi bwa ụpụrụsa o.[27]