Read bassa UNDWA TUKWABILANA 25 Bible Online

UNDWA TUKWABILANA 25 - bassa bible

UNDWA TUKWABILANA 25

¹Yaa shɛ iwɛ pa atwa eyebi, aa zhajɛ na agba ụshɛrɛya, ga ajɛmɛ-ụshɛrɛya yeleji iyi nɛ namɛ na ashashɛ aba, maa e peni bụtụ na teni cɛŋ n-ndumwa-zhɛ, maa e peni bụtụ na ma wụmɛ n-ndumwa-tụwụma.

²Yaa shɛ yee teni cɛŋ maa e jibi bụtụ ata n-ndumwa-wụmɛ, asha ga ajɛmɛ-ụshɛrɛya eni bu tuwoto mo wubwo wubwo maa e jibi bu na tuswananga tu ufwugwo tu na ti teni cɛŋ ni iyi iwɛ ɛtɛ baa njɛ.

³Ge e swenenji bu iyi kpalụ buhanda, ama kede tu hwuri gana ata o; iwɛ aka na ɛɛ zhɛ a kaana bụ tudubo uhwuri gana ata, yɛu-bino bu zhɛ ya sha bụtụ tusashɛ ne eshe bu.

⁴To togono arɛta maa shiyeni unu buna aka na tu bo rukoto ohiu o.

⁵Yaa shɛ miaụŋ-mo-bino mu namɛ urubwo uko, bụtụ bu ko na amɛ aba 'wi, baa zasa kaa yɛu-ye-eyi, asha kede biyikwo bụtụ ata 'wi tuna bụtụ na shɛ bugaiŋ, no tupohondo tu umwamwa ata o; go ukwede ubwa zeni bu tɛzhaada.

⁶A shɛ a pa yɛu-ye-eyi ihiiŋ nɛ biyikwo ata zhɛ ba mata izeci yɛu-bino ɛtɛ 'wi, iwɛ maa kede izeci ibwɛ 'weji ni Isrɛl o.

⁷Yaa shɛ kaa yaa kwụlanɛ shɛ bụtụ ata maa zana biyikwo batagwụ bwa tɛzhaada, asha ge biyikwo ata munji maa zha no odubo uba no ofwo n-nyarɛ, maa duma maa, Buhongwu bwolo mi lacɛ maa ishicinjɛ izeci batagwụ bwa ni Isrɛl; bu lacɛ maa ma n zana tɛzhaada.

⁸Ga n-nyarɛ mụ ụshɛpwụ ubwa mu suyanɛ bụ, maa a jɛmɛ n-ndumwa nu bwa. Yaa shɛ kaa ba untanganɛ n-ndumwa mu bwa dimi maa, I n kwụlanɛ shɛ maa ma zana bu o,

⁹asha ge biyikwo ata batagwụ bwa zhe no ofwo ubwa ne eshe n-nyarɛ ma ata, maa hwuciko ubida uvwɛvwɛjɛ ubwa, maa zwogono bu mecemi nụ ụpɛshɛka. Ge biyikwo ata jɛmɛ maa, Gana aa nda hwuŋ bụtụ na lacɛ maa batagwụ bwa 'yaga atwa ne ekwunyi ta.

¹⁰Nazhɛ ɛɛ zhɛ a pa atwa ihwɛ ibwɛ izeci ni Isrɛl maa, Ihwɛ bụtụ na ee hwucici ubida ubwa.

¹¹Aka na te etwenyi a twa ifelu abaaba, yaa shɛ biyikwo bụtụ bu ko na amɛ aba kezhingeni maa lashaga bwolo bwa ni i'ɛlɛ bụtụ na bo dubo bu, bee keri u'ala baa 'imɛ bụ ofwo tusweci.

¹²Jaja u'ala biyikwo ata; ta nda uwanyi ubwa o.

¹³To zwono timenji ti yebi nu ulapa bụ o, ibɛ shɛ bu na bụ 'wụtụ na bu na bu gwumwa.

¹⁴Ta 'yaga kaa omudu eyebi nu umwono bu o, ibɛ shɛ una ụ'wụtụ nu una u gwumwa.

¹⁵Ga shɛ bimenji bu uzhinono bi iyi nɛ ulwa kiri aba 'yaga, ga shɛ umudu na ulwa kiri aba 'yaga; iwɛ maa yɛ urugbo na cɛnjɛ ta ata AGWANGWAMA na shɛ Agwatana bụ zhɛ ma bụ pana.

¹⁶Iwɛnɛ po atwa elele na a ndangana ijɛ kpaaŋ, na atwa elele na a nda orugwusu, a shanɛ AGWANGWAMA na shɛ Agwatana bụ iyi-tupwaŋ.

¹⁷Ne teyinje iyi nɛ ga Amalɛk ụbụ njɛ la nu uhwaŋna, ta abu banɛ ni Ijipti.

¹⁸Gana na tu baa bụ sukakanɛ la nu uhwaŋna, na aka na tu ugiriri ubi keri te ebu lukwumi, baa kwụnɛ atwa bụ elele na lɛ ekwunyi umɛwɛɛ, a na a nda ti'insu, iwɛnɛ tu baa njɛ shɛ inyɛsɛ ya Agwatana.

¹⁹Iwɛbɛ po aka na ta AGWANGWAMA na shɛ Agwatana bụ ibi peni hwuŋ ụhinjanụ iwɛ atwa i'ime bu a na ubu rungwutwonu, na cɛnjɛ ta ata AGWANGWAMA na shɛ Agwatana bụ zhɛ ma bụ pana maa tɛ shɛ iyi-yo-ogwu na ɛbi zhɛ ba 'yaga, kwụna atwa Amalɛk hwɛɛ nu unyizo ga, kede isɛbwɛ ibu 'wi o.