Read bassa UNDWA TUKWABILANA 26 Bible Online

UNDWA TUKWABILANA 26 - bassa bible

UNDWA TUKWABILANA 26

¹Aka na ebi teni hwuŋ cɛnjɛ ta ata AGWANGWAMA na shɛ Agwatana bụ zhɛ ma bụ pana maa tɛ shɛ iyi-yo-ogwu bu, ebi leshiji tu, abɛ jɛjɛ na tuba,

²no sugo tụ'walụ ti hiiŋ ta cɛnjɛ ta ata kpaaŋ, maa zweni tu ni igwumi, maa zhe no ofwo ata AGWANGWAMA na shɛ Agwatana bụ teri maa ga na zhɛba bụ.

³Bɛ shɛ kaa ba zha no ofwo bunongbo na ba nda ugondu na aka ata, maa hiɛŋ bụ, Mo mbiso AGWANGWAMA na shɛ Agwatana bụ hwayɛ ga maa, N zhajɛ ya na cɛnjɛ ta ata bee shileni la eshi tu unu maa bi zhɛ ma tu pana.

⁴Nazhɛ bunongbo ata zhɛ ba lashɛga igwumi ɛtɛ ni i'ɛlɛ bụ, maa sho iŋ nu umbe utukwu-ụrụpɛ wa AGWANGWAMA na shɛ Agwatana bụ.

⁵Gabụ kaa bɛ shɛ ba duma iwɛ na agba AGWANGWAMA na shɛ Agwatana bụ, bɛ hiɛŋ, Bishi mi shɛ Bisiria, na gɛ zhɛ la ti'ina; bee zwi ni Ijipti, baa shɛ bulashɛ apata, a twa sụ la kaa ufwugwo; aa shɛ ya udenji ụ'wụtụ na 'yajɛ ikɛnyi, na kaa gembi ufwugwo apata.

⁶Ibɛ po atwa Ijipti ɛtɛ njɛ tawɛ tawɛ, ee ti peni ụbaụta, ee ti peteni ugondu tijama unaa na gwụmɛ tebiye.

⁷Nazhɛ atu ugananɛ AGWANGWAMA na shɛ Agwatana eshi tu, nazhɛ baa hwụjɛ rụhwụŋ ru tu, baa kwụbɛ kaa ụbaụta keeni tiriri tu tu, keeni umungwuta na aa tɛ nda

⁸Ibɛ po AGWANGWAMA iti bɛcinjɛ ni Ijipti tedure nu ukpahiŋ ụ'wụtụ keeni igɛhi i'wɛtwɛ, ne eseyida keeni arụhwajɛ.

⁹Bee tu suje no ofwo ga, bee ti peni kaa cɛnjɛ tu ga, cɛnjɛ tu na ti 'yajɛ ugwungwu tu na tuwebiye kaa tu barɛ.

¹⁰Oo AGWANGWAMA hioko, hwuwayɛ go N suje tụ'walụ ti hiiŋ ta cɛnjɛ tu na ebu m peni. Bɛ shɛ bo sho tu nu umbe AGWANGWAMA na shɛ Agwatana bụ maa zhɛbɛ bụ apata.

¹¹Bɛ shɛ kaa ba bwada unyasa ni iyi ibiye ye elele nɛ AGWANGWAMA na shɛ Agwatana bụ ibi peni ti ihwɛ bụ, tu gabụ, na Bulivai, keeni bulashɛ na namɛ na ashashɛ hiŋ.

¹²Aka na ebu suje iyi-umpwa iyimɛyɛ bụ nɛ ibi metenji kpaaŋ, nu uywa ụtatụ, maa peni Alivai, na alashɛ, ne e'weteji keeni olulo, iwɛ maa a yɛ iyi, na amɛ ashɛpwụ bụ maa e shigeji,

¹³nazhɛ ɛbi zhɛ ba duma ya nu umbe AGWANGWAMA na shɛ Agwatana bụ maa, M bocingwo urobwo ata tijilo nu umwono mu, Ngoo pwonuo du kaa Alivai, na alashɛ, ne e'weteji keeni olulo, te teni cɛŋ nu unu na ebu m peni kpaaŋ. M bweji shi kaa onu bu tụpana elele o, isɛbwɛ ya aba kaa n 'wi shi o.

¹⁴N yɛ shɛ iyi-umpwa, na aka na Ama ta-ụkwụla, kwo kaa maa ma bacɛnga inɛ ye elele ibɛ na aka na tu Ngaa hashɛganụ o, kwo kaa maa ma pana bụtụ na 'wi iyi elele na amɛ ibɛ o. Oo AGWANGWAMA na shɛ Agwatana mi, N hwụjɛ-unu bu, N nduwa gana na tu unu na ebu m peni namɛ kpaaŋ.

¹⁵Zucinje igbɛtɛtɛ bụ maa peni atwa bụ Isrɛl uwebiye keeni cɛnjɛ tu ga ebi ti peni ta abɛ jɛjɛ na ajɛjɛ bụ tijilo na azuba. Gana na ebi shileni la eshi tu unu, ibɛ shɛ cɛnjɛ ta ata ti 'yajɛ ugwungwu, tuwebiye kaa tu barɛ.

¹⁶AGWANGWAMA na shɛ Agwatana bụ, ma bụ pana-unu hwayɛ ga maa hwụjɛ-unu wa andwa elele na bee bi peni keeni shikpogo shɛ bwa kpaaŋ. Iwɛbɛ po no shiyono aŋ eshe maa njɛ iŋ na amɛ bụ oko, no ohwulu bu oko kpaaŋ.

¹⁷Gabụ bɛ jɛmɛ hwayɛ ga kpataa maa AGWANGWAMA ubwa shɛ Agwatana bụ, maa bi zhɛ ba zha tahaŋnụ ni ihwɛŋnɛ ibwɛ, ɛbi zhɛ ba untangana shikpogo shɛ bwa, no onu ubwa tụpana keeni andwa ubwa kpaaŋ, maa bi zhɛ ba hwuga-unu ubwa.

¹⁸AGWANGWAMA kaa du jɛmɛ hwayɛ ga kpataa maa Gabụ bɛ shɛ atwa ubwa a na ba 'yajɛ, gana na ti bee bi shileni la unu, maa kaa na untangana onu ubwa tụpana kpaaŋ,

¹⁹maa ubwa zhɛ mo bi shikicingo te zeci uhwuri edenji elele na baa njɛ, na tụdụmanga keeni nu urishi tubana keeni nụ ụjɛrụma ti'yaga, maa kaa shanɛ bụ atwa tijilo, nu gana na tu baa dumwa.