Read bassa UNDWA TUKWABILANA 27 Bible Online

UNDWA TUKWABILANA 27 - bassa bible

UNDWA TUKWABILANA 27

¹Nazhɛ go Moses, nu n-nyarɛ mi Isrɛl mi peni atwa ata unu, ɛɛ hiɛŋ, Untangana ma unu-tupana we elele na Ngee hi peni hwayɛ ga.

²Jita elele na ehi keshi Urefu ga Jodan, ehi zhe na cɛnjɛ ta ata AGWANGWAMA na shɛ Agwatana bụ zhɛ ma bụ pana. Tulono atayɛ te gembi, maa gbelecenji aŋ gbele gbele.

³Aka na ebi keshi ebi teni cɛnjɛ ta ata AGWANGWAMA na shɛ Agwatana bụ zhɛ ma bụ pana, cɛnjɛ ta ata ti 'yajɛ ugwungwu, tuwebiye kaa tu barɛ. 'Nyata n-ndumwa mu undwa ga kpaaŋ na aba atayɛ ata, nu gana na ta AGWANGWAMA na shɛ Agwatana eshi bu ibi shileni-unu.

⁴Aka na ehi keshi Jodan ga, hiɛ shɛ hio tulono atayɛ ga, ni Ishɛmɛ Ebal nu gana na ti Ngee bi peni-unu hwayɛ ga, bɛ shɛ kaa bo gbolocongo aŋ gbele gbele.

⁵Apata kaa ɛbi zhɛ ba mana AGWANGWAMA na shɛ Agwatana bụ utukwu-ụrụpɛ na atayɛ. To tumongono uŋ ni iyi-uhwoo ye elele o.

⁶Mana AGWANGWAMA na shɛ Agwatana bụ utukwu-ụrụpɛ nu utayɛ umudu.[30] Na pana AGWANGWAMA na shɛ Agwatana bụ ụrụpɛ tuhwoŋzhingo na azuba ubwa.

⁷Apata ɛbi zhɛ bu na ta ụrụpɛ wa amɛ-olom,[31] maa na ya uŋ. Na bwada unyasa nu umbe AGWANGWAMA na shɛ Agwatana bụ.

⁸'Nyata n-ndumwa mu undwa ga kpaaŋ na atayɛ ata kpataa tebiye.

⁹Nazhɛ go Moses na Alivai a na shɛ onongbo, mbishi atwa Isrɛl kpaaŋ, ɛɛ hiɛŋ, Oo ahiɛba atwa Isrɛl, nama ma shiruu maa hiɛ hwụjɛ. Hwayɛ ga hiɛ shɛ atwa AGWANGWAMA na shɛ Agwatana hiŋ.

¹⁰Iwɛbɛ po abɛ shɛ ba hwuga-unu wa AGWANGWAMA na shɛ Agwatana bụ, untangana onu ubwa tụpana keeni andwa ubwa, anaa na Ngee bi peni hwayɛ ga.

¹¹Nụ ụjita ata gbaa ibɛ go Moses peni atwa ata unu, bɛɛ hiɛŋ,

¹²Aka na ehi keshi Jodan ga, alamụ na zhɛ o shikono ni ihiŋhiŋ Ishɛmɛ Gerizim maa e peni atwa ata uwebiye na: ụlamụ Simion, nụ ụlamụ Livai, nụ ụlamụ Juda, nụ ụlamụ Isaka, nụ ụlamụ Josɛf, keeni ụlamụ Bɛnjamin.

¹³Atwa na ụlamụ wa aba zhɛ wo shikono ni ihiŋhiŋ Ishɛmɛ Ebal maa e keleni atwa unu na: ụlamụ Rubɛn, nụ ụlamụ Gad, nụ ụlamụ Ashɛ, nụ ụlamụ Zɛbulon, nụ ụlamụ Dan keeni ụlamụ Naftali.

¹⁴Alivai kaa a shɛ o mbiso etwenyi Isrɛl kpaaŋ, na rụhwụŋ rụ 'wụtụ maa.

¹⁵Go unu-tukalana 'imɛ bụtụ na ba shaba itɛtɛnuwɛŋ, kwo kaa inɛ i tuma, inɛɛ nɛ i shanɛ AGWANGWAMA iyi-tupwaŋ. Inɛ ɛtɛ shɛ iyi nɛ i'ɛlɛ bụtụ bu ugondu tugwoni njɛ, bee shikicinji kaa no ofwo tusweci. Ga atwa ata kpaaŋ jishijɛ, ɛ hiɛŋ, Ami.

¹⁶Go unu-tukalana 'imɛ bụtụ na mụnɛ shɛ bishi bwa kwo kaa bino bwa ụjɛrụma. Ga atwa ata kpaaŋ hiɛŋ, Ami.

¹⁷Go unu-tukalana 'imɛ bụtụ na mushinji useyida tugwungwu tu uyebi ubwa. Ga atwa ata kpaaŋ hiɛŋ, Ami.

¹⁸Go unu-tukalana 'imɛ bụtụ na zeriji olubo nu uhwaŋna ti'ina. Ga atwa ata kpaaŋ hiɛŋ, Ami.

¹⁹Go unu-tukalana 'imɛ bụtụ na ubi ụshɛrɛya bugaiŋ, nu una yɛu-bu'weteji keeni una bululo. Ga atwa ata kpaaŋ hiɛŋ, Ami.

²⁰Go unu-tukalana 'imɛ bụtụ na weci ne biyikwo bishi bwa, iwɛnɛ tu baa kwụbɛ mohondo mo biyikwo bishi bwa. Ga atwa ata kpaaŋ hiɛŋ, Ami.[32]

²¹Go unu-tukalana 'imɛ bụtụ na weci nu usunda we elele. Ga atwa ata kpaaŋ hiɛŋ, Ami.

²²Go unu-tukalana 'imɛ bụtụ be elele na weci na bụngwụfwụ bwaa, okwo yɛu-yo-o nɛ bishi bwa meci kwo kaa yɛu-yo-o nɛ bino bwa meci. Ga atwa ata kpaaŋ hiɛŋ, Ami.

²³Go unu-tukalana 'imɛ bụtụ na weci ne e'uji ubwa. Ga atwa ata kpaaŋ hiɛŋ, Ami.

²⁴Go unu-tukalana 'imɛ bụtụ na kwụnɛ uyebi ubwa ne tusweci. Ga atwa ata kpaaŋ hiɛŋ, Ami.

²⁵Go unu-tukalana 'imɛ bụtụ na leshiji ukwuribi ugworo maa kwụna bụtụ na i'ɛlɛ ibwɛ zasaba ni iwɛ. Ga atwa ata kpaaŋ hiɛŋ, Ami.

²⁶Go unu-tukalana 'imɛ bụtụ na shikicinji shi n-ndumwa mu undwa ga kpaaŋ dimi maa nda uŋ. Ga atwa ata kpaaŋ hiɛŋ, Ami.